Chapter 45

vaiśaṃpāyana uvāca |
anubhūya tu rājñastaṃ rājasūyaṃ mahākratum |
yudhiṣṭhirasya nṛpatergāndhārīputrasaṃyutaḥ || 1 ||
[Analyze grammar]

priyakṛnmatamājñāya pūrvaṃ duryodhanasya tat |
prajñācakṣuṣamāsīnaṃ śakuniḥ saubalastadā || 2 ||
[Analyze grammar]

duryodhanavacaḥ śrutvā dhṛtarāṣṭraṃ janādhipam |
upagamya mahāprājñaṃ śakunirvākyamabravīt || 3 ||
[Analyze grammar]

duryodhano mahārāja vivarṇo hariṇaḥ kṛśaḥ |
dīnaścintāparaścaiva tadviddhi bharatarṣabha || 4 ||
[Analyze grammar]

na vai parīkṣase samyagasahyaṃ śatrusaṃbhavam |
jyeṣṭhaputrasya śokaṃ tvaṃ kimarthaṃ nāvabudhyase || 5 ||
[Analyze grammar]

dhṛtarāṣṭra uvāca |
duryodhana kutomūlaṃ bhṛśamārto'si putraka |
śrotavyaścenmayā so'rtho brūhi me kurunandana || 6 ||
[Analyze grammar]

ayaṃ tvāṃ śakuniḥ prāha vivarṇaṃ hariṇaṃ kṛśam |
cintayaṃśca na paśyāmi śokasya tava saṃbhavam || 7 ||
[Analyze grammar]

aiśvaryaṃ hi mahatputra tvayi sarvaṃ samarpitam |
bhrātaraḥ suhṛdaścaiva nācaranti tavāpriyam || 8 ||
[Analyze grammar]

ācchādayasi prāvārānaśnāsi piśitaudanam |
ājāneyā vahanti tvāṃ kenāsi hariṇaḥ kṛśaḥ || 9 ||
[Analyze grammar]

śayanāni mahārhāṇi yoṣitaśca manoramāḥ |
guṇavanti ca veśmāni vihārāśca yathāsukham || 10 ||
[Analyze grammar]

devānāmiva te sarvaṃ vāci baddhaṃ na saṃśayaḥ |
sa dīna iva durdharṣaḥ kasmācchocasi putraka || 11 ||
[Analyze grammar]

duryodhana uvāca |
aśnāmyācchādaye cāhaṃ yathā kupuruṣastathā |
amarṣaṃ dhāraye cograṃ titikṣankālaparyayam || 12 ||
[Analyze grammar]

amarṣaṇaḥ svāḥ prakṛtīrabhibhūya pare sthitāḥ |
kleśānmumukṣuḥ parajānsa vai puruṣa ucyate || 13 ||
[Analyze grammar]

saṃtoṣo vai śriyaṃ hanti abhimānaśca bhārata |
anukrośabhaye cobhe yairvṛto nāśnute mahat || 14 ||
[Analyze grammar]

na māmavati tadbhuktaṃ śriyaṃ dṛṣṭvā yudhiṣṭhire |
jvalantīmiva kaunteye vivarṇakaraṇīṃ mama || 15 ||
[Analyze grammar]

sapatnānṛdhyato''tmānaṃ hīyamānaṃ niśāmya ca |
adṛśyāmapi kaunteye sthitāṃ paśyannivodyatām |
tasmādahaṃ vivarṇaśca dīnaśca hariṇaḥ kṛśaḥ || 16 ||
[Analyze grammar]

aṣṭāśītisahasrāṇi snātakā gṛhamedhinaḥ |
triṃśaddāsīka ekaiko yānbibharti yudhiṣṭhiraḥ || 17 ||
[Analyze grammar]

daśānyāni sahasrāṇi nityaṃ tatrānnamuttamam |
bhuñjate rukmapātrībhiryudhiṣṭhiraniveśane || 18 ||
[Analyze grammar]

kadalīmṛgamokāni kṛṣṇaśyāmāruṇāni ca |
kāmbojaḥ prāhiṇottasmai parārdhyānapi kambalān || 19 ||
[Analyze grammar]

rathayoṣidgavāśvasya śataśo'tha sahasraśaḥ |
triṃśataṃ coṣṭravāmīnāṃ śatāni vicarantyuta || 20 ||
[Analyze grammar]

pṛthagvidhāni ratnāni pārthivāḥ pṛthivīpate |
āharankratumukhye'sminkuntīputrāya bhūriśaḥ || 21 ||
[Analyze grammar]

na kvaciddhi mayā dṛṣṭastādṛśo naiva ca śrutaḥ |
yādṛgdhanāgamo yajñe pāṇḍuputrasya dhīmataḥ || 22 ||
[Analyze grammar]

aparyantaṃ dhanaughaṃ taṃ dṛṣṭvā śatrorahaṃ nṛpa |
śarma naivādhigacchāmi cintayāno'niśaṃ vibho || 23 ||
[Analyze grammar]

brāhmaṇā vāṭadhānāśca gomantaḥ śatasaṃghaśaḥ |
traikharvaṃ balimādāya dvāri tiṣṭhanti vāritāḥ || 24 ||
[Analyze grammar]

kamaṇḍalūnupādāya jātarūpamayāñśubhān |
evaṃ baliṃ samādāya praveśaṃ lebhire tataḥ || 25 ||
[Analyze grammar]

yannaiva madhu śakrāya dhārayantyamarastriyaḥ |
tadasmai kāṃsyamāhārṣīdvāruṇaṃ kalaśodadhiḥ || 26 ||
[Analyze grammar]

śaikyaṃ rukmasahasrasya bahuratnavibhūṣitam |
dṛṣṭvā ca mama tatsarvaṃ jvararūpamivābhavat || 27 ||
[Analyze grammar]

gṛhītvā tattu gacchanti samudrau pūrvadakṣiṇau |
tathaiva paścimaṃ yānti gṛhītvā bharatarṣabha || 28 ||
[Analyze grammar]

uttaraṃ tu na gacchanti vinā tāta patatribhiḥ |
idaṃ cādbhutamatrāsīttanme nigadataḥ śṛṇu || 29 ||
[Analyze grammar]

pūrṇe śatasahasre tu viprāṇāṃ pariviṣyatām |
sthāpitā tatra saṃjñābhūcchaṅkho dhmāyati nityaśaḥ || 30 ||
[Analyze grammar]

muhurmuhuḥ praṇadatastasya śaṅkhasya bhārata |
uttamaṃ śabdamaśrauṣaṃ tato romāṇi me'hṛṣan || 31 ||
[Analyze grammar]

pārthivairbahubhiḥ kīrṇamupasthānaṃ didṛkṣubhiḥ |
sarvaratnānyupādāya pārthivā vai janeśvara || 32 ||
[Analyze grammar]

yajñe tasya mahārāja pāṇḍuputrasya dhīmataḥ |
vaiśyā iva mahīpālā dvijātipariveṣakāḥ || 33 ||
[Analyze grammar]

na sā śrīrdevarājasya yamasya varuṇasya vā |
guhyakādhipatervāpi yā śrī rājanyudhiṣṭhire || 34 ||
[Analyze grammar]

tāṃ dṛṣṭvā pāṇḍuputrasya śriyaṃ paramikāmaham |
śāntiṃ na parigacchāmi dahyamānena cetasā || 35 ||
[Analyze grammar]

śakuniruvāca |
yāmetāmuttamāṃ lakṣmīṃ dṛṣṭavānasi pāṇḍave |
tasyāḥ prāptāvupāyaṃ me śṛṇu satyaparākrama || 36 ||
[Analyze grammar]

ahamakṣeṣvabhijñātaḥ pṛthivyāmapi bhārata |
hṛdayajñaḥ paṇajñaśca viśeṣajñaśca devane || 37 ||
[Analyze grammar]

dyūtapriyaśca kaunteyo na ca jānāti devitum |
āhūtaścaiṣyati vyaktaṃ dīvyāvetyāhvayasva tam || 38 ||
[Analyze grammar]

vaiśaṃpāyana uvāca |
evamuktaḥ śakuninā rājā duryodhanastadā |
dhṛtarāṣṭramidaṃ vākyamapadāntaramabravīt || 39 ||
[Analyze grammar]

ayamutsahate rājañśriyamāhartumakṣavit |
dyūtena pāṇḍuputrasya tadanujñātumarhasi || 40 ||
[Analyze grammar]

dhṛtarāṣṭra uvāca |
kṣattā mantrī mahāprājñaḥ sthito yasyāsmi śāsane |
tena saṃgamya vetsyāmi kāryasyāsya viniścayam || 41 ||
[Analyze grammar]

sa hi dharmaṃ puraskṛtya dīrghadarśī paraṃ hitam |
ubhayoḥ pakṣayoryuktaṃ vakṣyatyarthaviniścayam || 42 ||
[Analyze grammar]

duryodhana uvāca |
nivartayiṣyati tvāsau yadi kṣattā sameṣyati |
nivṛtte tvayi rājendra mariṣye'hamasaṃśayam || 43 ||
[Analyze grammar]

sa mayi tvaṃ mṛte rājanvidureṇa sukhī bhava |
bhokṣyase pṛthivīṃ kṛtsnāṃ kiṃ mayā tvaṃ kariṣyasi || 44 ||
[Analyze grammar]

vaiśaṃpāyana uvāca |
ārtavākyaṃ tu tattasya praṇayoktaṃ niśamya saḥ |
dhṛtarāṣṭro'bravītpreṣyānduryodhanamate sthitaḥ || 45 ||
[Analyze grammar]

sthūṇāsahasrairbṛhatīṃ śatadvārāṃ sabhāṃ mama |
manoramāṃ darśanīyāmāśu kurvantu śilpinaḥ || 46 ||
[Analyze grammar]

tataḥ saṃstīrya ratnaistāmakṣānāvāpya sarvaśaḥ |
sukṛtāṃ supraveśāṃ ca nivedayata me śanaiḥ || 47 ||
[Analyze grammar]

duryodhanasya śāntyarthamiti niścitya bhūmipaḥ |
dhṛtarāṣṭro mahārāja prāhiṇodvidurāya vai || 48 ||
[Analyze grammar]

apṛṣṭvā viduraṃ hyasya nāsītkaścidviniścayaḥ |
dyūtadoṣāṃśca jānansa putrasnehādakṛṣyata || 49 ||
[Analyze grammar]

tacchrutvā viduro dhīmānkalidvāramupasthitam |
vināśamukhamutpannaṃ dhṛtarāṣṭramupādravat || 50 ||
[Analyze grammar]

so'bhigamya mahātmānaṃ bhrātā bhrātaramagrajam |
mūrdhnā praṇamya caraṇāvidaṃ vacanamabravīt || 51 ||
[Analyze grammar]

nābhinandāmi te rājanvyavasāyamimaṃ prabho |
putrairbhedo yathā na syāddyūtahetostathā kuru || 52 ||
[Analyze grammar]

dhṛtarāṣṭra uvāca |
kṣattaḥ putreṣu putrairme kalaho na bhaviṣyati |
divi devāḥ prasādaṃ naḥ kariṣyanti na saṃśayaḥ || 53 ||
[Analyze grammar]

aśubhaṃ vā śubhaṃ vāpi hitaṃ vā yadi vāhitam |
pravartatāṃ suhṛddyūtaṃ diṣṭametanna saṃśayaḥ || 54 ||
[Analyze grammar]

mayi saṃnihite caiva bhīṣme ca bharatarṣabhe |
anayo daivavihito na kathaṃcidbhaviṣyati || 55 ||
[Analyze grammar]

gaccha tvaṃ rathamāsthāya hayairvātasamairjave |
khāṇḍavaprasthamadyaiva samānaya yudhiṣṭhiram || 56 ||
[Analyze grammar]

na vāryo vyavasāyo me viduraitadbravīmi te |
daivameva paraṃ manye yenaitadupapadyate || 57 ||
[Analyze grammar]

ityukto viduro dhīmānnaitadastīti cintayan |
āpageyaṃ mahāprājñamabhyagacchatsuduḥkhitaḥ || 58 ||
[Analyze grammar]