Chapter 51

bhīṣma uvāca |
nahuṣastu tataḥ śrutvā cyavanaṃ taṃ tathāgatam |
tvaritaḥ prayayau tatra sahāmātyapurohitaḥ || 1 ||
[Analyze grammar]

śaucaṃ kṛtvā yathānyāyaṃ prāñjaliḥ prayato nṛpaḥ |
ātmānamācacakṣe ca cyavanāya mahātmane || 2 ||
[Analyze grammar]

arcayāmāsa taṃ cāpi tasya rājñaḥ purohitaḥ |
satyavrataṃ mahābhāgaṃ devakalpaṃ viśāṃ pate || 3 ||
[Analyze grammar]

nahuṣa uvāca |
karavāṇi priyaṃ kiṃ te tanme vyākhyātumarhasi |
sarvaṃ kartāsmi bhagavanyadyapi syātsuduṣkaram || 4 ||
[Analyze grammar]

cyavana uvāca |
śrameṇa mahatā yuktāḥ kaivartā matsyajīvinaḥ |
mama mūlyaṃ prayacchaibhyo matsyānāṃ vikrayaiḥ saha || 5 ||
[Analyze grammar]

nahuṣa uvāca |
sahasraṃ dīyatāṃ mūlyaṃ niṣādebhyaḥ purohita |
niṣkrayārthaṃ bhagavato yathāha bhṛgunandanaḥ || 6 ||
[Analyze grammar]

cyavana uvāca |
sahasraṃ nāhamarhāmi kiṃ vā tvaṃ manyase nṛpa |
sadṛśaṃ dīyatāṃ mūlyaṃ svabuddhyā niścayaṃ kuru || 7 ||
[Analyze grammar]

nahuṣa uvāca |
sahasrāṇāṃ śataṃ kṣipraṃ niṣādebhyaḥ pradīyatām |
syādetattu bhavenmūlyaṃ kiṃ vānyanmanyate bhavān || 8 ||
[Analyze grammar]

cyavana uvāca |
nāhaṃ śatasahasreṇa nimeyaḥ pārthivarṣabha |
dīyatāṃ sadṛśaṃ mūlyamamātyaiḥ saha cintaya || 9 ||
[Analyze grammar]

nahuṣa uvāca |
koṭiḥ pradīyatāṃ mūlyaṃ niṣādebhyaḥ purohita |
yadetadapi naupamyamato bhūyaḥ pradīyatām || 10 ||
[Analyze grammar]

cyavana uvāca |
rājannārhāmyahaṃ koṭiṃ bhūyo vāpi mahādyute |
sadṛśaṃ dīyatāṃ mūlyaṃ brāhmaṇaiḥ saha cintaya || 11 ||
[Analyze grammar]

nahuṣa uvāca |
ardharājyaṃ samagraṃ vā niṣādebhyaḥ pradīyatām |
etanmūlyamahaṃ manye kiṃ vānyanmanyase dvija || 12 ||
[Analyze grammar]

cyavana uvāca |
ardharājyaṃ samagraṃ vā nāhamarhāmi pārthiva |
sadṛśaṃ dīyatāṃ mūlyamṛṣibhiḥ saha cintyatām || 13 ||
[Analyze grammar]

bhīṣma uvāca |
maharṣervacanaṃ śrutvā nahuṣo duḥkhakarśitaḥ |
sa cintayāmāsa tadā sahāmātyapurohitaḥ || 14 ||
[Analyze grammar]

tatra tvanyo vanacaraḥ kaścinmūlaphalāśanaḥ |
nahuṣasya samīpastho gavijāto'bhavanmuniḥ || 15 ||
[Analyze grammar]

sa samābhāṣya rājānamabravīddvijasattamaḥ |
toṣayiṣyāmyahaṃ vipraṃ yathā tuṣṭo bhaviṣyati || 16 ||
[Analyze grammar]

nāhaṃ mithyāvaco brūyāṃ svaireṣvapi kuto'nyathā |
bhavato yadahaṃ brūyāṃ tatkāryamaviśaṅkayā || 17 ||
[Analyze grammar]

nahuṣa uvāca |
bravītu bhagavānmūlyaṃ maharṣeḥ sadṛśaṃ bhṛgoḥ |
paritrāyasva māmasmādviṣayaṃ ca kulaṃ ca me || 18 ||
[Analyze grammar]

hanyāddhi bhagavānkruddhastrailokyamapi kevalam |
kiṃ punarmāṃ tapohīnaṃ bāhuvīryaparāyaṇam || 19 ||
[Analyze grammar]

agādhe'mbhasi magnasya sāmātyasya sahartvijaḥ |
plavo bhava maharṣe tvaṃ kuru mūlyaviniścayam || 20 ||
[Analyze grammar]

bhīṣma uvāca |
nahuṣasya vacaḥ śrutvā gavijātaḥ pratāpavān |
uvāca harṣayansarvānamātyānpārthivaṃ ca tam || 21 ||
[Analyze grammar]

anargheyā mahārāja dvijā varṇamahattamāḥ |
gāvaśca pṛthivīpāla gaurmūlyaṃ parikalpyatām || 22 ||
[Analyze grammar]

nahuṣastu tataḥ śrutvā maharṣervacanaṃ nṛpa |
harṣeṇa mahatā yuktaḥ sahāmātyapurohitaḥ || 23 ||
[Analyze grammar]

abhigamya bhṛgoḥ putraṃ cyavanaṃ saṃśitavratam |
idaṃ provāca nṛpate vācā saṃtarpayanniva || 24 ||
[Analyze grammar]

uttiṣṭhottiṣṭha viprarṣe gavā krīto'si bhārgava |
etanmūlyamahaṃ manye tava dharmabhṛtāṃ vara || 25 ||
[Analyze grammar]

cyavana uvāca |
uttiṣṭhāmyeṣa rājendra samyakkrīto'smi te'nagha |
gobhistulyaṃ na paśyāmi dhanaṃ kiṃcidihācyuta || 26 ||
[Analyze grammar]

kīrtanaṃ śravaṇaṃ dānaṃ darśanaṃ cāpi pārthiva |
gavāṃ praśasyate vīra sarvapāpaharaṃ śivam || 27 ||
[Analyze grammar]

gāvo lakṣmyāḥ sadā mūlaṃ goṣu pāpmā na vidyate |
annameva sadā gāvo devānāṃ paramaṃ haviḥ || 28 ||
[Analyze grammar]

svāhākāravaṣaṭkārau goṣu nityaṃ pratiṣṭhitau |
gāvo yajñapraṇetryo vai tathā yajñasya tā mukham || 29 ||
[Analyze grammar]

amṛtaṃ hyakṣayaṃ divyaṃ kṣaranti ca vahanti ca |
amṛtāyatanaṃ caitāḥ sarvalokanamaskṛtāḥ || 30 ||
[Analyze grammar]

tejasā vapuṣā caiva gāvo vahnisamā bhuvi |
gāvo hi sumahattejaḥ prāṇināṃ ca sukhapradāḥ || 31 ||
[Analyze grammar]

niviṣṭaṃ gokulaṃ yatra śvāsaṃ muñcati nirbhayam |
virājayati taṃ deśaṃ pāpmānaṃ cāpakarṣati || 32 ||
[Analyze grammar]

gāvaḥ svargasya sopānaṃ gāvaḥ svarge'pi pūjitāḥ |
gāvaḥ kāmadughā devyo nānyatkiṃcitparaṃ smṛtam || 33 ||
[Analyze grammar]

ityetadgoṣu me proktaṃ māhātmyaṃ pārthivarṣabha |
guṇaikadeśavacanaṃ śakyaṃ pārāyaṇaṃ na tu || 34 ||
[Analyze grammar]

niṣādā ūcuḥ |
darśanaṃ kathanaṃ caiva sahāsmābhiḥ kṛtaṃ mune |
satāṃ saptapadaṃ mitraṃ prasādaṃ naḥ kuru prabho || 35 ||
[Analyze grammar]

havīṃṣi sarvāṇi yathā hyupabhuṅkte hutāśanaḥ |
evaṃ tvamapi dharmātmanpuruṣāgniḥ pratāpavān || 36 ||
[Analyze grammar]

prasādayāmahe vidvanbhavantaṃ praṇatā vayam |
anugrahārthamasmākamiyaṃ gauḥ pratigṛhyatām || 37 ||
[Analyze grammar]

cyavana uvāca |
kṛpaṇasya ca yaccakṣurmunerāśīviṣasya ca |
naraṃ samūlaṃ dahati kakṣamagniriva jvalan || 38 ||
[Analyze grammar]

pratigṛhṇāmi vo dhenuṃ kaivartā muktakilbiṣāḥ |
divaṃ gacchata vai kṣipraṃ matsyairjāloddhṛtaiḥ saha || 39 ||
[Analyze grammar]

bhīṣma uvāca |
tatastasya prasādātte maharṣerbhāvitātmanaḥ |
niṣādāstena vākyena saha matsyairdivaṃ yayuḥ || 40 ||
[Analyze grammar]

tataḥ sa rājā nahuṣo vismitaḥ prekṣya dhīvarān |
ārohamāṇāṃstridivaṃ matsyāṃśca bharatarṣabha || 41 ||
[Analyze grammar]

tatastau gavijaścaiva cyavanaśca bhṛgūdvahaḥ |
varābhyāmanurūpābhyāṃ chandayāmāsaturnṛpam || 42 ||
[Analyze grammar]

tato rājā mahāvīryo nahuṣaḥ pṛthivīpatiḥ |
paramityabravītprītastadā bharatasattama || 43 ||
[Analyze grammar]

tato jagrāha dharme sa sthitimindranibho nṛpaḥ |
tatheti coditaḥ prītastāvṛṣī pratyapūjayat || 44 ||
[Analyze grammar]

samāptadīkṣaścyavanastato'gacchatsvamāśramam |
gavijaśca mahātejāḥ svamāśramapadaṃ yayau || 45 ||
[Analyze grammar]

niṣādāśca divaṃ jagmuste ca matsyā janādhipa |
nahuṣo'pi varaṃ labdhvā praviveśa puraṃ svakam || 46 ||
[Analyze grammar]

etatte kathitaṃ tāta yanmāṃ tvaṃ paripṛcchasi |
darśane yādṛśaḥ snehaḥ saṃvāse ca yudhiṣṭhira || 47 ||
[Analyze grammar]

mahābhāgyaṃ gavāṃ caiva tathā dharmaviniścayam |
kiṃ bhūyaḥ kathyatāṃ vīra kiṃ te hṛdi vivakṣitam || 48 ||
[Analyze grammar]