Chapter 44

yudhiṣṭhira uvāca |
yanmūlaṃ sarvadharmāṇāṃ prajanasya gṛhasya ca |
pitṛdevātithīnāṃ ca tanme brūhi pitāmaha || 1 ||
[Analyze grammar]

bhīṣma uvāca |
ayaṃ hi sarvadharmāṇāṃ dharmaścintyatamo mataḥ |
kīdṛśāya pradeyā syātkanyeti vasudhādhipa || 2 ||
[Analyze grammar]

śīlavṛtte samājñāya vidyāṃ yoniṃ ca karma ca |
adbhireva pradātavyā kanyā guṇavate vare |
brāhmaṇānāṃ satāmeṣa dharmo nityaṃ yudhiṣṭhira || 3 ||
[Analyze grammar]

āvāhyamāvahedevaṃ yo dadyādanukūlataḥ |
śiṣṭānāṃ kṣatriyāṇāṃ ca dharma eṣa sanātanaḥ || 4 ||
[Analyze grammar]

ātmābhipretamutsṛjya kanyābhipreta eva yaḥ |
abhipretā ca yā yasya tasmai deyā yudhiṣṭhira |
gāndharvamiti taṃ dharmaṃ prāhurdharmavido janāḥ || 5 ||
[Analyze grammar]

dhanena bahunā krītvā saṃpralobhya ca bāndhavān |
asurāṇāṃ nṛpaitaṃ vai dharmamāhurmanīṣiṇaḥ || 6 ||
[Analyze grammar]

hatvā chittvā ca śīrṣāṇi rudatāṃ rudatīṃ gṛhāt |
prasahya haraṇaṃ tāta rākṣasaṃ dharmalakṣaṇam || 7 ||
[Analyze grammar]

pañcānāṃ tu trayo dharmyā dvāvadharmyau yudhiṣṭhira |
paiśāca āsuraścaiva na kartavyau kathaṃcana || 8 ||
[Analyze grammar]

brāhmaḥ kṣātro'tha gāndharva ete dharmyā nararṣabha |
pṛthagvā yadi vā miśrāḥ kartavyā nātra saṃśayaḥ || 9 ||
[Analyze grammar]

tisro bhāryā brāhmaṇasya dve bhārye kṣatriyasya tu |
vaiśyaḥ svajātiṃ vindeta tāsvapatyaṃ samaṃ bhavet || 10 ||
[Analyze grammar]

brāhmaṇī tu bhavejjyeṣṭhā kṣatriyā kṣatriyasya tu |
ratyarthamapi śūdrā syānnetyāhurapare janāḥ || 11 ||
[Analyze grammar]

apatyajanma śūdrāyāṃ na praśaṃsanti sādhavaḥ |
śūdrāyāṃ janayanvipraḥ prāyaścittī vidhīyate || 12 ||
[Analyze grammar]

triṃśadvarṣo daśavarṣāṃ bhāryāṃ vindeta nagnikām |
ekaviṃśativarṣo vā saptavarṣāmavāpnuyāt || 13 ||
[Analyze grammar]

yasyāstu na bhavedbhrātā pitā vā bharatarṣabha |
nopayaccheta tāṃ jātu putrikādharmiṇī hi sā || 14 ||
[Analyze grammar]

trīṇi varṣāṇyudīkṣeta kanyā ṛtumatī satī |
caturthe tvatha saṃprāpte svayaṃ bhartāramarjayet || 15 ||
[Analyze grammar]

prajano hīyate tasyā ratiśca bharatarṣabha |
ato'nyathā vartamānā bhavedvācyā prajāpateḥ || 16 ||
[Analyze grammar]

asapiṇḍā ca yā māturasagotrā ca yā pituḥ |
ityetāmanugaccheta taṃ dharmaṃ manurabravīt || 17 ||
[Analyze grammar]

yudhiṣṭhira uvāca |
śulkamanyena dattaṃ syāddadānītyāha cāparaḥ |
balādanyaḥ prabhāṣeta dhanamanyaḥ pradarśayet || 18 ||
[Analyze grammar]

pāṇigrahītā tvanyaḥ syātkasya kanyā pitāmaha |
tattvaṃ jijñāsamānānāṃ cakṣurbhavatu no bhavān || 19 ||
[Analyze grammar]

bhīṣma uvāca |
yatkiṃcitkarma mānuṣyaṃ saṃsthānāya prakṛṣyate |
mantravanmantritaṃ tasya mṛṣāvādastu pātakaḥ || 20 ||
[Analyze grammar]

bhāryāpatyṛtvigācāryāḥ śiṣyopādhyāya eva ca |
mṛṣokte daṇḍamarhanti netyāhurapare janāḥ || 21 ||
[Analyze grammar]

na hyakāmena saṃvādaṃ manurevaṃ praśaṃsati |
ayaśasyamadharmyaṃ ca yanmṛṣā dharmakopanam || 22 ||
[Analyze grammar]

naikāntadoṣa ekasmiṃstaddānaṃ nopalabhyate |
dharmato yāṃ prayacchanti yāṃ ca krīṇanti bhārata || 23 ||
[Analyze grammar]

bandhubhiḥ samanujñāto mantrahomau prayojayet |
tathā sidhyanti te mantrā nādattāyāḥ kathaṃcana || 24 ||
[Analyze grammar]

yastvatra mantrasamayo bhāryāpatyormithaḥ kṛtaḥ |
tamevāhurgarīyāṃsaṃ yaścāsau jñātibhiḥ kṛtaḥ || 25 ||
[Analyze grammar]

devadattāṃ patirbhāryāṃ vetti dharmasya śāsanāt |
sā daivīṃ mānuṣīṃ vācamanṛtāṃ paryudasyati || 26 ||
[Analyze grammar]

yudhiṣṭhira uvāca |
kanyāyāṃ prāptaśulkāyāṃ jyāyāṃścedāvrajedvaraḥ |
dharmakāmārthasaṃpanno vācyamatrānṛtaṃ na vā || 27 ||
[Analyze grammar]

tasminnubhayato doṣe kurvañchreyaḥ samācaret |
ayaṃ naḥ sarvadharmāṇāṃ dharmaścintyatamo mataḥ || 28 ||
[Analyze grammar]

tattvaṃ jijñāsamānānāṃ cakṣurbhavatu no bhavān |
tadetatsarvamācakṣva na hi tṛpyāmi kathyatām || 29 ||
[Analyze grammar]

bhīṣma uvāca |
na vai niṣṭhākaraṃ śulkaṃ jñātvāsīttena nāhṛtam |
na hi śulkaparāḥ santaḥ kanyāṃ dadati karhicit || 30 ||
[Analyze grammar]

anyairguṇairupetaṃ tu śulkaṃ yācanti bāndhavāḥ |
alaṃkṛtvā vahasveti yo dadyādanukūlataḥ || 31 ||
[Analyze grammar]

tacca tāṃ ca dadātyeva na śulkaṃ vikrayo na saḥ |
pratigṛhya bhaveddeyameṣa dharmaḥ sanātanaḥ || 32 ||
[Analyze grammar]

dāsyāmi bhavate kanyāmiti pūrvaṃ nabhāṣitam |
ye caivāhurye ca nāhurye cāvaśyaṃ vadantyuta || 33 ||
[Analyze grammar]

tasmādā grahaṇātpāṇeryācayanti parasparam |
kanyāvaraḥ purā datto marudbhiriti naḥ śrutam || 34 ||
[Analyze grammar]

nāniṣṭāya pradātavyā kanyā ityṛṣicoditam |
tanmūlaṃ kāmamūlasya prajanasyeti me matiḥ || 35 ||
[Analyze grammar]

samīkṣya ca bahūndoṣānsaṃvāsādvidviṣāṇayoḥ |
yathā niṣṭhākaraṃ śulkaṃ na jātvāsīttathā śṛṇu || 36 ||
[Analyze grammar]

ahaṃ vicitravīryāya dve kanye samudāvaham |
jitvā ca māgadhānsarvānkāśīnatha ca kosalān |
gṛhītapāṇirekāsītprāptaśulkāparābhavat || 37 ||
[Analyze grammar]

pāṇau gṛhītā tatraiva visṛjyā iti me pitā |
abravīditarāṃ kanyāmāvahatsa tu kauravaḥ || 38 ||
[Analyze grammar]

apyanyāmanupapraccha śaṅkamānaḥ piturvacaḥ |
atīva hyasya dharmepsā piturme'bhyadhikābhavat || 39 ||
[Analyze grammar]

tato'hamabruvaṃ rājannācārepsuridaṃ vacaḥ |
ācāraṃ tattvato vettumicchāmīti punaḥ punaḥ || 40 ||
[Analyze grammar]

tato mayaivamukte tu vākye dharmabhṛtāṃ varaḥ |
pitā mama mahārāja bāhlīko vākyamabravīt || 41 ||
[Analyze grammar]

yadi vaḥ śulkato niṣṭhā na pāṇigrahaṇaṃ tathā |
lājāntaramupāsīta prāptaśulkā patiṃ vṛtam || 42 ||
[Analyze grammar]

na hi dharmavidaḥ prāhuḥ pramāṇaṃ vākyataḥ smṛtam |
yeṣāṃ vai śulkato niṣṭhā na pāṇigrahaṇāttathā || 43 ||
[Analyze grammar]

prasiddhaṃ bhāṣitaṃ dāne teṣāṃ pratyasanaṃ punaḥ |
ye manyante krayaṃ śulkaṃ na te dharmavido janāḥ || 44 ||
[Analyze grammar]

na caitebhyaḥ pradātavyā na voḍhavyā tathāvidhā |
na hyeva bhāryā kretavyā na vikreyā kathaṃcana || 45 ||
[Analyze grammar]

ye ca krīṇanti dāsīvadye ca vikrīṇate janāḥ |
bhavetteṣāṃ tathā niṣṭhā lubdhānāṃ pāpacetasām || 46 ||
[Analyze grammar]

asmindharme satyavantaṃ paryapṛcchanta vai janāḥ |
kanyāyāḥ prāptaśulkāyāḥ śulkadaḥ praśamaṃ gataḥ || 47 ||
[Analyze grammar]

pāṇigrahītā cānyaḥ syādatra no dharmasaṃśayaḥ |
tannaśchindhi mahāprājña tvaṃ hi vai prājñasaṃmataḥ |
tattvaṃ jijñāsamānānāṃ cakṣurbhavatu no bhavān || 48 ||
[Analyze grammar]

tānevaṃ bruvataḥ sarvānsatyavānvākyamabravīt |
yatreṣṭaṃ tatra deyā syānnātra kāryā vicāraṇā |
kurvate jīvato'pyevaṃ mṛte naivāsti saṃśayaḥ || 49 ||
[Analyze grammar]

devaraṃ praviśetkanyā tapyedvāpi mahattapaḥ |
tamevānuvratā bhūtvā pāṇigrāhasya nāma sā || 50 ||
[Analyze grammar]

likhantyeva tu keṣāṃcidapareṣāṃ śanairapi |
iti ye saṃvadantyatra ta etaṃ niścayaṃ viduḥ || 51 ||
[Analyze grammar]

tatpāṇigrahaṇātpūrvamuttaraṃ yatra vartate |
sarvamaṅgalamantraṃ vai mṛṣāvādastu pātakaḥ || 52 ||
[Analyze grammar]

pāṇigrahaṇamantrāṇāṃ niṣṭhā syātsaptame pade |
pāṇigrāhasya bhāryā syādyasya cādbhiḥ pradīyate || 53 ||
[Analyze grammar]

anukūlāmanuvaṃśāṃ bhrātrā dattāmupāgnikām |
parikramya yathānyāyaṃ bhāryāṃ vindeddvijottamaḥ || 54 ||
[Analyze grammar]