Chapter 159

bhīṣma uvāca |
kṛtārtho yakṣyamāṇaśca sarvavedāntagaśca yaḥ |
ācāryapitṛbhāryārthaṃ svādhyāyārthamathāpi vā || 1 ||
[Analyze grammar]

ete vai sādhavo dṛṣṭā brāhmaṇā dharmabhikṣavaḥ |
asvebhyo deyametebhyo dānaṃ vidyāviśeṣataḥ || 2 ||
[Analyze grammar]

anyatra dakṣiṇā yā tu deyā bharatasattama |
anyebhyo hi bahirvedyāṃ nākṛtānnaṃ vidhīyate || 3 ||
[Analyze grammar]

sarvaratnāni rājā ca yathārhaṃ pratipādayet |
brāhmaṇāścaiva yajñāśca sahānnāḥ sahadakṣiṇāḥ || 4 ||
[Analyze grammar]

yasya traivārṣikaṃ bhaktaṃ paryāptaṃ bhṛtyavṛttaye |
adhikaṃ vāpi vidyeta sa somaṃ pātumarhati || 5 ||
[Analyze grammar]

yajñaścetpratividdhaḥ syādaṅgenaikena yajvanaḥ |
brāhmaṇasya viśeṣeṇa dhārmike sati rājani || 6 ||
[Analyze grammar]

yo vaiśyaḥ syādbahupaśurhīnakraturasomapaḥ |
kuṭumbāttasya taddravyaṃ yajñārthaṃ pārthivo haret || 7 ||
[Analyze grammar]

āharedveśmataḥ kiṃcitkāmaṃ śūdrasya dravyataḥ |
na hi veśmani śūdrasya kaścidasti parigrahaḥ || 8 ||
[Analyze grammar]

yo'nāhitāgniḥ śatagurayajvā ca sahasraguḥ |
tayorapi kuṭumbābhyāmāharedavicārayan || 9 ||
[Analyze grammar]

adātṛbhyo harennityaṃ vyākhyāpya nṛpatiḥ prabho |
tathā hyācarato dharmo nṛpateḥ syādathākhilaḥ || 10 ||
[Analyze grammar]

tathaiva saptame bhakte bhaktāni ṣaḍanaśnatā |
aśvastanavidhānena hartavyaṃ hīnakarmaṇaḥ |
khalātkṣetrāttathāgārādyato vāpyupapadyate || 11 ||
[Analyze grammar]

ākhyātavyaṃ nṛpasyaitatpṛcchato'pṛcchato'pi vā |
na tasmai dhārayeddaṇḍaṃ rājā dharmeṇa dharmavit || 12 ||
[Analyze grammar]

kṣatriyasya hi bāliśyādbrāhmaṇaḥ kliśyate kṣudhā |
śrutaśīle samājñāya vṛttimasya prakalpayet |
athainaṃ parirakṣeta pitā putramivaurasam || 13 ||
[Analyze grammar]

iṣṭiṃ vaiśvānarīṃ nityaṃ nirvapedabdaparyaye |
avikalpaḥ purādharmo dharmavādaistu kevalam || 14 ||
[Analyze grammar]

viśvaistu devaiḥ sādhyaiśca brāhmaṇaiśca maharṣibhiḥ |
āpatsu maraṇādbhītairliṅgapratinidhiḥ kṛtaḥ || 15 ||
[Analyze grammar]

prabhuḥ prathamakalpasya yo'nukalpena vartate |
na sāṃparāyikaṃ tasya durmatervidyate phalam || 16 ||
[Analyze grammar]

na brāhmaṇānvedayeta kaścidrājani mānavaḥ |
avīryo vedanādvidyātsuvīryo vīryavattaram || 17 ||
[Analyze grammar]

tasmādrājñā sadā tejo duḥsahaṃ brahmavādinām |
mantā śāstā vidhātā ca brāhmaṇo deva ucyate |
tasminnākuśalaṃ brūyānna śuktāmīrayedgiram || 18 ||
[Analyze grammar]

kṣatriyo bāhuvīryeṇa taratyāpadamātmanaḥ |
dhanena vaiśyaḥ śūdraśca mantrairhomaiśca vai dvijaḥ || 19 ||
[Analyze grammar]

na vai kanyā na yuvatirnāmantro na ca bāliśaḥ |
pariveṣṭāgnihotrasya bhavennāsaṃskṛtastathā |
narake nipatantyete juhvānāḥ sa ca yasya tat || 20 ||
[Analyze grammar]

prājāpatyamadattvāśvamagnyādheyasya dakṣiṇām |
anāhitāgniriti sa procyate dharmadarśibhiḥ || 21 ||
[Analyze grammar]

puṇyānyanyāni kurvīta śraddadhāno jitendriyaḥ |
anāptadakṣiṇairyajñairna yajeta kathaṃcana || 22 ||
[Analyze grammar]

prajāḥ paśūṃśca svargaṃ ca hanti yajño hyadakṣiṇaḥ |
indriyāṇi yaśaḥ kīrtimāyuścāsyopakṛntati || 23 ||
[Analyze grammar]

udakyā hyāsate ye ca ye ca kecidanagnayaḥ |
kulaṃ cāśrotriyaṃ yeṣāṃ sarve te śūdradharmiṇaḥ || 24 ||
[Analyze grammar]

udapānodake grāme brāhmaṇo vṛṣalīpatiḥ |
uṣitvā dvādaśa samāḥ śūdrakarmeha gacchati || 25 ||
[Analyze grammar]

anāryāṃ śayane bibhradujjhanbibhracca yo dvijām |
abrāhmaṇo manyamānastṛṇeṣvāsīta pṛṣṭhataḥ |
tathā sa śudhyate rājañśṛṇu cātra vaco mama || 26 ||
[Analyze grammar]

yadekarātreṇa karoti pāpaṃ kṛṣṇaṃ varṇaṃ brāhmaṇaḥ sevamānaḥ |
sthānāsanābhyāṃ vicaranvratī saṃstribhirvarṣaiḥ śamayedātmapāpam || 27 ||
[Analyze grammar]

na narmayuktaṃ vacanaṃ hinasti na strīṣu rājanna vivāhakāle |
na gurvarthe nātmano jīvitārthe pañcānṛtānyāhurapātakāni || 28 ||
[Analyze grammar]

śraddadhānaḥ śubhāṃ vidyāṃ hīnādapi samācaret |
suvarṇamapi cāmedhyādādadīteti dhāraṇā || 29 ||
[Analyze grammar]

strīratnaṃ duṣkulāccāpi viṣādapyamṛtaṃ pibet |
aduṣṭā hi striyo ratnamāpa ityeva dharmataḥ || 30 ||
[Analyze grammar]

gobrāhmaṇahitārthaṃ ca varṇānāṃ saṃkareṣu ca |
gṛhṇīyāttu dhanurvaiśyaḥ paritrāṇāya cātmanaḥ || 31 ||
[Analyze grammar]

surāpānaṃ brahmahatyā gurutalpamathāpi vā |
anirdeśyāni manyante prāṇāntānīti dhāraṇā || 32 ||
[Analyze grammar]

suvarṇaharaṇaṃ stainyaṃ viprāsaṅgaśca pātakam |
viharanmadyapānaṃ cāpyagamyāgamanaṃ tathā || 33 ||
[Analyze grammar]

patitaiḥ saṃprayogācca brāhmaṇairyonitastathā |
acireṇa mahārāja tādṛśo vai bhavatyuta || 34 ||
[Analyze grammar]

saṃvatsareṇa patati patitena sahācaran |
yājanādhyāpanādyaunānna tu yānāsanāśanāt || 35 ||
[Analyze grammar]

etāni ca tato'nyāni nirdeśyānīti dhāraṇā |
nirdeśyakena vidhinā kālenāvyasanī bhavet || 36 ||
[Analyze grammar]

annaṃ tiryaṅna hotavyaṃ pretakarmaṇyapātite |
triṣu tveteṣu pūrveṣu na kurvīta vicāraṇām || 37 ||
[Analyze grammar]

amātyānvā gurūnvāpi jahyāddharmeṇa dhārmikaḥ |
prāyaścittamakurvāṇairnaitairarhati saṃvidam || 38 ||
[Analyze grammar]

adharmakārī dharmeṇa tapasā hanti kilbiṣam |
bruvanstena iti stenaṃ tāvatprāpnoti kilbiṣam |
astenaṃ stena ityuktvā dviguṇaṃ pāpamāpnuyāt || 39 ||
[Analyze grammar]

tribhāgaṃ brahmahatyāyāḥ kanyā prāpnoti duṣyatī |
yastu dūṣayitā tasyāḥ śeṣaṃ prāpnoti kilbiṣam || 40 ||
[Analyze grammar]

brāhmaṇāyāvagūryeha spṛṣṭvā gurutaraṃ bhavet |
varṣāṇāṃ hi śataṃ pāpaḥ pratiṣṭhāṃ nādhigacchati || 41 ||
[Analyze grammar]

sahasraṃ tveva varṣāṇāṃ nipātya narake vaset |
tasmānnaivāvagūryāddhi naiva jātu nipātayet || 42 ||
[Analyze grammar]

śoṇitaṃ yāvataḥ pāṃsūnsaṃgṛhṇīyāddvijakṣatāt |
tāvatīḥ sa samā rājannarake parivartate || 43 ||
[Analyze grammar]

bhrūṇahāhavamadhye tu śudhyate śastrapātitaḥ |
ātmānaṃ juhuyādvahnau samiddhe tena śudhyati || 44 ||
[Analyze grammar]

surāpo vāruṇīmuṣṇāṃ pītvā pāpādvimucyate |
tayā sa kāye nirdagdhe mṛtyunā pretya śudhyati |
lokāṃśca labhate vipro nānyathā labhate hi saḥ || 45 ||
[Analyze grammar]

gurutalpamadhiṣṭhāya durātmā pāpacetanaḥ |
sūrmīṃ jvalantīmāśliṣya mṛtyunā sa viśudhyati || 46 ||
[Analyze grammar]

atha vā śiśnavṛṣaṇāvādāyāñjalinā svayam |
nairṛtīṃ diśamāsthāya nipatetsa tvajihmagaḥ || 47 ||
[Analyze grammar]

brāhmaṇārthe'pi vā prāṇānsaṃtyajettena śudhyati |
aśvamedhena vāpīṣṭvā gomedhenāpi vā punaḥ |
agniṣṭomena vā samyagiha pretya ca pūyate || 48 ||
[Analyze grammar]

tathaiva dvādaśa samāḥ kapālī brahmahā bhavet |
brahmacārī caredbhaikṣaṃ svakarmodāharanmuniḥ || 49 ||
[Analyze grammar]

evaṃ vā tapasā yukto brahmahā savanī bhavet |
evaṃ vā garbhamajñātā cātreyīṃ yo'bhigacchati |
dviguṇā brahmahatyā vai ātreyīvyasane bhavet || 50 ||
[Analyze grammar]

surāpo niyatāhāro brahmacārī kṣamācaraḥ |
ūrdhvaṃ tribhyo'tha varṣebhyo yajetāgniṣṭutā param |
ṛṣabhaikasahasraṃ gā dattvā śubhamavāpnuyāt || 51 ||
[Analyze grammar]

vaiśyaṃ hatvā tu varṣe dve ṛṣabhaikaśatāśca gāḥ |
śūdraṃ hatvābdamevaikamṛṣabhaikādaśāśca gāḥ || 52 ||
[Analyze grammar]

śvabarbarakharānhatvā śaudrameva vrataṃ caret |
mārjāracāṣamaṇḍūkānkākaṃ bhāsaṃ ca mūṣakam || 53 ||
[Analyze grammar]

uktaḥ paśusamo dharmo rājanprāṇinipātanāt |
prāyaścittānyathānyāni pravakṣyāmyanupūrvaśaḥ || 54 ||
[Analyze grammar]

talpe cānyasya caurye ca pṛthaksaṃvatsaraṃ caret |
trīṇi śrotriyabhāryāyāṃ paradāre tu dve smṛte || 55 ||
[Analyze grammar]

kāle caturthe bhuñjāno brahmacārī vratī bhavet |
sthānāsanābhyāṃ viharettrirahno'bhyuditādapaḥ |
evameva nirācānto yaścāgnīnapavidhyati || 56 ||
[Analyze grammar]

tyajatyakāraṇe yaśca pitaraṃ mātaraṃ tathā |
patitaḥ syātsa kauravya tathā dharmeṣu niścayaḥ || 57 ||
[Analyze grammar]

grāsācchādanamatyarthaṃ dadyāditi nidarśanam |
bhāryāyāṃ vyabhicāriṇyāṃ niruddhāyāṃ viśeṣataḥ |
yatpuṃsāṃ paradāreṣu taccaināṃ cārayedvratam || 58 ||
[Analyze grammar]

śreyāṃsaṃ śayane hitvā yā pāpīyāṃsamṛcchati |
śvabhistāṃ khādayedrājā saṃsthāne bahusaṃvṛte || 59 ||
[Analyze grammar]

pumāṃsaṃ bandhayetprājñaḥ śayane tapta āyase |
apyādadhīta dārūṇi tatra dahyeta pāpakṛt || 60 ||
[Analyze grammar]

eṣa daṇḍo mahārāja strīṇāṃ bhartṛvyatikrame |
saṃvatsarābhiśastasya duṣṭasya dviguṇo bhavet || 61 ||
[Analyze grammar]

dve tasya trīṇi varṣāṇi catvāri sahasevinaḥ |
kucaraḥ pañca varṣāṇi caredbhaikṣaṃ munivrataḥ || 62 ||
[Analyze grammar]

parivittiḥ parivettā yayā ca parividyate |
pāṇigrāhaśca dharmeṇa sarve te patitāḥ smṛtāḥ || 63 ||
[Analyze grammar]

careyuḥ sarva evaite vīrahā yadvrataṃ caret |
cāndrāyaṇaṃ carenmāsaṃ kṛcchraṃ vā pāpaśuddhaye || 64 ||
[Analyze grammar]

parivettā prayaccheta parivittāya tāṃ snuṣām |
jyeṣṭhena tvabhyanujñāto yavīyānpratyanantaram |
enaso mokṣamāpnoti sā ca tau caiva dharmataḥ || 65 ||
[Analyze grammar]

amānuṣīṣu govarjamanāvṛṣṭirna duṣyati |
adhiṣṭhātāramattāraṃ paśūnāṃ puruṣaṃ viduḥ || 66 ||
[Analyze grammar]

paridhāyordhvavālaṃ tu pātramādāya mṛnmayam |
caretsapta gṛhānbhaikṣaṃ svakarma parikīrtayan || 67 ||
[Analyze grammar]

tatraiva labdhabhojī syāddvādaśāhātsa śudhyati |
caretsaṃvatsaraṃ cāpi tadvrataṃ yannirākṛti || 68 ||
[Analyze grammar]

bhavettu mānuṣeṣvevaṃ prāyaścittamanuttamam |
dānaṃ vādānasakteṣu sarvameva prakalpayet |
anāstikeṣu gomātraṃ prāṇamekaṃ pracakṣate || 69 ||
[Analyze grammar]

śvavarāhamanuṣyāṇāṃ kukkuṭasya kharasya ca |
māṃsaṃ mūtrapurīṣaṃ ca prāśya saṃskāramarhati || 70 ||
[Analyze grammar]

brāhmaṇasya surāpasya gandhamāghrāya somapaḥ |
apastryahaṃ pibeduṣṇāstryahamuṣṇaṃ payaḥ pibet |
tryahamuṣṇaṃ ghṛtaṃ pītvā vāyubhakṣo bhavettryaham || 71 ||
[Analyze grammar]

evametatsamuddiṣṭaṃ prāyaścittaṃ sanātanam |
brāhmaṇasya viśeṣeṇa tattvajñānena jāyate || 72 ||
[Analyze grammar]