Chapter 30

saṃjaya uvāca |
tatasteṣvapayāteṣu ratheṣu triṣu pāṇḍavāḥ |
taṃ hradaṃ pratyapadyanta yatra duryodhano'bhavat || 1 ||
[Analyze grammar]

āsādya ca kuruśreṣṭha tadā dvaipāyanahradam |
stambhitaṃ dhārtarāṣṭreṇa dṛṣṭvā taṃ salilāśayam |
vāsudevamidaṃ vākyamabravītkurunandanaḥ || 2 ||
[Analyze grammar]

paśyemāṃ dhārtarāṣṭreṇa māyāmapsu prayojitām |
viṣṭabhya salilaṃ śete nāsya mānuṣato bhayam || 3 ||
[Analyze grammar]

daivīṃ māyāmimāṃ kṛtvā salilāntargato hyayam |
nikṛtyā nikṛtiprajño na me jīvanvimokṣyate || 4 ||
[Analyze grammar]

yadyasya samare sāhyaṃ kurute vajrabhṛtsvayam |
tathāpyenaṃ hataṃ yuddhe loko drakṣyati mādhava || 5 ||
[Analyze grammar]

śrīvāsudeva uvāca |
māyāvina imāṃ māyāṃ māyayā jahi bhārata |
māyāvī māyayā vadhyaḥ satyametadyudhiṣṭhira || 6 ||
[Analyze grammar]

kriyābhyupāyairbahulairmāyāmapsu prayojya ha |
jahi tvaṃ bharataśreṣṭha pāpātmānaṃ suyodhanam || 7 ||
[Analyze grammar]

kriyābhyupāyairindreṇa nihatā daityadānavāḥ |
kriyābhyupāyairbahubhirbalirbaddho mahātmanā || 8 ||
[Analyze grammar]

kriyābhyupāyaiḥ pūrvaṃ hi hiraṇyākṣo mahāsuraḥ |
hiraṇyakaśipuścaiva kriyayaiva niṣūditau |
vṛtraśca nihato rājankriyayaiva na saṃśayaḥ || 9 ||
[Analyze grammar]

tathā paulastyatanayo rāvaṇo nāma rākṣasaḥ |
rāmeṇa nihato rājansānubandhaḥ sahānugaḥ |
kriyayā yogamāsthāya tathā tvamapi vikrama || 10 ||
[Analyze grammar]

kriyābhyupāyairnihato mayā rājanpurātane |
tārakaśca mahādaityo vipracittiśca vīryavān || 11 ||
[Analyze grammar]

vātāpirilvalaścaiva triśirāśca tathā vibho |
sundopasundāvasurau kriyayaiva niṣūditau || 12 ||
[Analyze grammar]

kriyābhyupāyairindreṇa tridivaṃ bhujyate vibho |
kriyā balavatī rājannānyatkiṃcidyudhiṣṭhira || 13 ||
[Analyze grammar]

daityāśca dānavāścaiva rākṣasāḥ pārthivāstathā |
kriyābhyupāyairnihatāḥ kriyāṃ tasmātsamācara || 14 ||
[Analyze grammar]

saṃjaya uvāca |
ityukto vāsudevena pāṇḍavaḥ saṃśitavrataḥ |
jalasthaṃ taṃ mahārāja tava putraṃ mahābalam |
abhyabhāṣata kaunteyaḥ prahasanniva bhārata || 15 ||
[Analyze grammar]

suyodhana kimartho'yamārambho'psu kṛtastvayā |
sarvaṃ kṣatraṃ ghātayitvā svakulaṃ ca viśāṃ pate || 16 ||
[Analyze grammar]

jalāśayaṃ praviṣṭo'dya vāñchañjīvitamātmanaḥ |
uttiṣṭha rājanyudhyasva sahāsmābhiḥ suyodhana || 17 ||
[Analyze grammar]

sa ca darpo naraśreṣṭha sa ca mānaḥ kva te gataḥ |
yastvaṃ saṃstabhya salilaṃ bhīto rājanvyavasthitaḥ || 18 ||
[Analyze grammar]

sarve tvāṃ śūra ityeva janā jalpanti saṃsadi |
vyarthaṃ tadbhavato manye śauryaṃ salilaśāyinaḥ || 19 ||
[Analyze grammar]

uttiṣṭha rājanyudhyasva kṣatriyo'si kulodbhavaḥ |
kauraveyo viśeṣeṇa kule janma ca saṃsmara || 20 ||
[Analyze grammar]

sa kathaṃ kaurave vaṃśe praśaṃsañjanma cātmanaḥ |
yuddhādbhītastatastoyaṃ praviśya pratitiṣṭhasi || 21 ||
[Analyze grammar]

ayuddhamavyavasthānaṃ naiṣa dharmaḥ sanātanaḥ |
anāryajuṣṭamasvargyaṃ raṇe rājanpalāyanam || 22 ||
[Analyze grammar]

kathaṃ pāramagatvā hi yuddhe tvaṃ vai jijīviṣuḥ |
imānnipatitāndṛṣṭvā putrānbhrātṝnpitṝṃstathā || 23 ||
[Analyze grammar]

saṃbandhino vayasyāṃśca mātulānbāndhavāṃstathā |
ghātayitvā kathaṃ tāta hrade tiṣṭhasi sāṃpratam || 24 ||
[Analyze grammar]

śūramānī na śūrastvaṃ mithyā vadasi bhārata |
śūro'hamiti durbuddhe sarvalokasya śṛṇvataḥ || 25 ||
[Analyze grammar]

na hi śūrāḥ palāyante śatrūndṛṣṭvā kathaṃcana |
brūhi vā tvaṃ yayā dhṛtyā śūra tyajasi saṃgaram || 26 ||
[Analyze grammar]

sa tvamuttiṣṭha yudhyasva vinīya bhayamātmanaḥ |
ghātayitvā sarvasainyaṃ bhrātṝṃścaiva suyodhana || 27 ||
[Analyze grammar]

nedānīṃ jīvite buddhiḥ kāryā dharmacikīrṣayā |
kṣatradharmamapāśritya tvadvidhena suyodhana || 28 ||
[Analyze grammar]

yattatkarṇamupāśritya śakuniṃ cāpi saubalam |
amartya iva saṃmohāttvamātmānaṃ na buddhavān || 29 ||
[Analyze grammar]

tatpāpaṃ sumahatkṛtvā pratiyudhyasva bhārata |
kathaṃ hi tvadvidho mohādrocayeta palāyanam || 30 ||
[Analyze grammar]

kva te tatpauruṣaṃ yātaṃ kva ca mānaḥ suyodhana |
kva ca vikrāntatā yātā kva ca visphūrjitaṃ mahat || 31 ||
[Analyze grammar]

kva te kṛtāstratā yātā kiṃ ca śeṣe jalāśaye |
sa tvamuttiṣṭha yudhyasva kṣatradharmeṇa bhārata || 32 ||
[Analyze grammar]

asmānvā tvaṃ parājitya praśādhi pṛthivīmimām |
atha vā nihato'smābhirbhūmau svapsyasi bhārata || 33 ||
[Analyze grammar]

eṣa te prathamo dharmaḥ sṛṣṭo dhātrā mahātmanā |
taṃ kuruṣva yathātathyaṃ rājā bhava mahāratha || 34 ||
[Analyze grammar]

duryodhana uvāca |
naitaccitraṃ mahārāja yadbhīḥ prāṇinamāviśet |
na ca prāṇabhayādbhīto vyapayāto'smi bhārata || 35 ||
[Analyze grammar]

arathaścāniṣaṅgī ca nihataḥ pārṣṇisārathiḥ |
ekaścāpyagaṇaḥ saṃkhye pratyāśvāsamarocayam || 36 ||
[Analyze grammar]

na prāṇahetorna bhayānna viṣādādviśāṃ pate |
idamambhaḥ praviṣṭo'smi śramāttvidamanuṣṭhitam || 37 ||
[Analyze grammar]

tvaṃ cāśvasihi kaunteya ye cāpyanugatāstava |
ahamutthāya vaḥ sarvānpratiyotsyāmi saṃyuge || 38 ||
[Analyze grammar]

yudhiṣṭhira uvāca |
āśvastā eva sarve sma ciraṃ tvāṃ mṛgayāmahe |
tadidānīṃ samuttiṣṭha yudhyasveha suyodhana || 39 ||
[Analyze grammar]

hatvā vā samare pārthānsphītaṃ rājyamavāpnuhi |
nihato vā raṇe'smābhirvīralokamavāpsyasi || 40 ||
[Analyze grammar]

duryodhana uvāca |
yadarthaṃ rājyamicchāmi kurūṇāṃ kurunandana |
ta ime nihatāḥ sarve bhrātaro me janeśvara || 41 ||
[Analyze grammar]

kṣīṇaratnāṃ ca pṛthivīṃ hatakṣatriyapuṃgavām |
nābhyutsahāmyahaṃ bhoktuṃ vidhavāmiva yoṣitam || 42 ||
[Analyze grammar]

adyāpi tvahamāśaṃse tvāṃ vijetuṃ yudhiṣṭhira |
bhaṅktvā pāñcālapāṇḍūnāmutsāhaṃ bharatarṣabha || 43 ||
[Analyze grammar]

na tvidānīmahaṃ manye kāryaṃ yuddhena karhicit |
droṇe karṇe ca saṃśānte nihate ca pitāmahe || 44 ||
[Analyze grammar]

astvidānīmiyaṃ rājankevalā pṛthivī tava |
asahāyo hi ko rājā rājyamicchetpraśāsitum || 45 ||
[Analyze grammar]

suhṛdastādṛśānhitvā putrānbhrātṝnpitṝnapi |
bhavadbhiśca hṛte rājye ko nu jīveta mādṛśaḥ || 46 ||
[Analyze grammar]

ahaṃ vanaṃ gamiṣyāmi hyajinaiḥ prativāsitaḥ |
ratirhi nāsti me rājye hatapakṣasya bhārata || 47 ||
[Analyze grammar]

hatabāndhavabhūyiṣṭhā hatāśvā hatakuñjarā |
eṣā te pṛthivī rājanbhuṅkṣvaināṃ vigatajvaraḥ || 48 ||
[Analyze grammar]

vanameva gamiṣyāmi vasāno mṛgacarmaṇī |
na hi me nirjitasyāsti jīvite'dya spṛhā vibho || 49 ||
[Analyze grammar]

gaccha tvaṃ bhuṅkṣva rājendra pṛthivīṃ nihateśvarām |
hatayodhāṃ naṣṭaratnāṃ kṣīṇavaprāṃ yathāsukham || 50 ||
[Analyze grammar]

yudhiṣṭhira uvāca |
ārtapralāpānmā tāta salilasthaḥ prabhāṣathāḥ |
naitanmanasi me rājanvāśitaṃ śakuneriva || 51 ||
[Analyze grammar]

yadi cāpi samarthaḥ syāstvaṃ dānāya suyodhana |
nāhamiccheyamavaniṃ tvayā dattāṃ praśāsitum || 52 ||
[Analyze grammar]

adharmeṇa na gṛhṇīyāṃ tvayā dattāṃ mahīmimām |
na hi dharmaḥ smṛto rājankṣatriyasya pratigrahaḥ || 53 ||
[Analyze grammar]

tvayā dattāṃ na ceccheyaṃ pṛthivīmakhilāmaham |
tvāṃ tu yuddhe vinirjitya bhoktāsmi vasudhāmimām || 54 ||
[Analyze grammar]

anīśvaraśca pṛthivīṃ kathaṃ tvaṃ dātumicchasi |
tvayeyaṃ pṛthivī rājankiṃ na dattā tadaiva hi || 55 ||
[Analyze grammar]

dharmato yācamānānāṃ śamārthaṃ ca kulasya naḥ |
vārṣṇeyaṃ prathamaṃ rājanpratyākhyāya mahābalam || 56 ||
[Analyze grammar]

kimidānīṃ dadāsi tvaṃ ko hi te cittavibhramaḥ |
abhiyuktastu ko rājā dātumiccheddhi medinīm || 57 ||
[Analyze grammar]

na tvamadya mahīṃ dātumīśaḥ kauravanandana |
ācchettuṃ vā balādrājansa kathaṃ dātumicchasi |
māṃ tu nirjitya saṃgrāme pālayemāṃ vasuṃdharām || 58 ||
[Analyze grammar]

sūcyagreṇāpi yadbhūmerapi dhrīyeta bhārata |
tanmātramapi no mahyaṃ na dadāti purā bhavān || 59 ||
[Analyze grammar]

sa kathaṃ pṛthivīmetāṃ pradadāsi viśāṃ pate |
sūcyagraṃ nātyajaḥ pūrvaṃ sa kathaṃ tyajasi kṣitim || 60 ||
[Analyze grammar]

evamaiśvaryamāsādya praśāsya pṛthivīmimām |
ko hi mūḍho vyavasyeta śatrordātuṃ vasuṃdharām || 61 ||
[Analyze grammar]

tvaṃ tu kevalamaurkhyeṇa vimūḍho nāvabudhyase |
pṛthivīṃ dātukāmo'pi jīvitenādya mokṣyase || 62 ||
[Analyze grammar]

asmānvā tvaṃ parājitya praśādhi pṛthivīmimām |
atha vā nihato'smābhirvraja lokānanuttamān || 63 ||
[Analyze grammar]

āvayorjīvato rājanmayi ca tvayi ca dhruvam |
saṃśayaḥ sarvabhūtānāṃ vijaye no bhaviṣyati || 64 ||
[Analyze grammar]

jīvitaṃ tava duṣprajña mayi saṃprati vartate |
jīvayeyaṃ tvahaṃ kāmaṃ na tu tvaṃ jīvituṃ kṣamaḥ || 65 ||
[Analyze grammar]

dahane hi kṛto yatnastvayāsmāsu viśeṣataḥ |
āśīviṣairviṣaiścāpi jale cāpi praveśanaiḥ |
tvayā vinikṛtā rājanrājyasya haraṇena ca || 66 ||
[Analyze grammar]

etasmātkāraṇātpāpa jīvitaṃ te na vidyate |
uttiṣṭhottiṣṭha yudhyasva tatte śreyo bhaviṣyati || 67 ||
[Analyze grammar]

saṃjaya uvāca |
evaṃ tu vividhā vāco jayayuktāḥ punaḥ punaḥ |
kīrtayanti sma te vīrāstatra tatra janādhipa || 68 ||
[Analyze grammar]