Chapter 121

saṃjaya uvāca |
sa raṇe vyacaratpārthaḥ prekṣaṇīyo dhanaṃjayaḥ |
yugapaddikṣu sarvāsu citrāṇyastrāṇi darśayan || 1 ||
[Analyze grammar]

madhyaṃdinagataṃ sūryaṃ pratapantamivāmbare |
na śekuḥ sarvabhūtāni pāṇḍavaṃ prativīkṣitum || 2 ||
[Analyze grammar]

prasṛtāṃstasya gāṇḍīvāccharavrātānmahātmanaḥ |
saṃgrāme samapaśyāma haṃsapaṅktīrivāmbare || 3 ||
[Analyze grammar]

vinivārya sa vīrāṇāmastrairastrāṇi sarvaśaḥ |
darśayanraudramātmānamugre karmaṇi dhiṣṭhitaḥ || 4 ||
[Analyze grammar]

sa tānrathavarānrājannabhyatikrāmadarjunaḥ |
mohayanniva nārācairjayadrathavadhepsayā || 5 ||
[Analyze grammar]

visṛjandikṣu sarvāsu śarānasitasārathiḥ |
sa raṇe vyacarattūrṇaṃ prekṣaṇīyo dhanaṃjayaḥ || 6 ||
[Analyze grammar]

bhramanta iva śūrasya śaravrātā mahātmanaḥ |
adṛśyantāntarikṣasthāḥ śataśo'tha sahasraśaḥ || 7 ||
[Analyze grammar]

ādadānaṃ maheṣvāsaṃ saṃdadhānaṃ ca pāṇḍavam |
visṛjantaṃ ca kaunteyaṃ nānupaśyāmahe tadā || 8 ||
[Analyze grammar]

tathā sarvā diśo rājansarvāṃśca rathino raṇe |
ākulīkṛtya kaunteyo jayadrathamupādravat |
vivyādha ca catuḥṣaṣṭyā śarāṇāṃ nataparvaṇām || 9 ||
[Analyze grammar]

saindhavastu tathā viddhaḥ śarairgāṇḍīvadhanvanā |
na cakṣame susaṃkruddhastottrārdita iva dvipaḥ || 10 ||
[Analyze grammar]

sa varāhadhvajastūrṇaṃ gārdhrapatrānajihmagān |
āśīviṣasamaprakhyānkarmāraparimārjitān |
mumoca niśitānsaṃkhye sāyakānsavyasācini || 11 ||
[Analyze grammar]

tribhistu viddhvā gāṇḍīvaṃ nārācaiḥ ṣaḍbhirarjunam |
aṣṭābhirvājino'vidhyaddhvajaṃ caikena patriṇā || 12 ||
[Analyze grammar]

sa vikṣipyārjunastīkṣṇānsaindhavapreṣitāñśarān |
yugapattasya ciccheda śarābhyāṃ saindhavasya ha |
sāratheśca śiraḥ kāyāddhvajaṃ ca samalaṃkṛtam || 13 ||
[Analyze grammar]

sa chinnayaṣṭiḥ sumahāñśīryamāṇaḥ śarāhataḥ |
varāhaḥ sindhurājasya papātāgniśikhopamaḥ || 14 ||
[Analyze grammar]

etasminneva kāle tu drutaṃ gacchati bhāskare |
abravītpāṇḍavaṃ tatra tvaramāṇo janārdanaḥ || 15 ||
[Analyze grammar]

dhanaṃjaya śiraśchindhi saindhavasya durātmanaḥ |
astaṃ mahīdharaśreṣṭhaṃ yiyāsati divākaraḥ |
śṛṇuṣvaiva ca me vākyaṃ jayadrathavadhaṃ prati || 16 ||
[Analyze grammar]

vṛddhakṣatraḥ saindhavasya pitā jagati viśrutaḥ |
sa kāleneha mahatā saindhavaṃ prāptavānsutam || 17 ||
[Analyze grammar]

jayadrathamamitraghnaṃ taṃ covāca tato nṛpam |
antarhitā tadā vāṇī meghadundubhinisvanā || 18 ||
[Analyze grammar]

tavātmajo'yaṃ martyeṣu kulaśīladamādibhiḥ |
guṇairbhaviṣyati vibho sadṛśo vaṃśayordvayoḥ |
kṣatriyapravaro loke nityaṃ śūrābhisatkṛtaḥ || 19 ||
[Analyze grammar]

śatrubhiryudhyamānasya saṃgrāme tvasya dhanvinaḥ |
śiraśchetsyati saṃkruddhaḥ śatrurnālakṣito bhuvi || 20 ||
[Analyze grammar]

etacchrutvā sindhurājo dhyātvā ciramariṃdama |
jñātīnsarvānuvācedaṃ putrasnehābhipīḍitaḥ || 21 ||
[Analyze grammar]

saṃgrāme yudhyamānasya vahato mahatīṃ dhuram |
dharaṇyāṃ mama putrasya pātayiṣyati yaḥ śiraḥ |
tasyāpi śatadhā mūrdhā phaliṣyati na saṃśayaḥ || 22 ||
[Analyze grammar]

evamuktvā tato rājye sthāpayitvā jayadratham |
vṛddhakṣatro vanaṃ yātastapaśceṣṭaṃ samāsthitaḥ || 23 ||
[Analyze grammar]

so'yaṃ tapyati tejasvī tapo ghoraṃ durāsadam |
samantapañcakādasmādbahirvānaraketana || 24 ||
[Analyze grammar]

tasmājjayadrathasya tvaṃ śiraśchittvā mahāmṛdhe |
divyenāstreṇa ripuhanghoreṇādbhutakarmaṇā || 25 ||
[Analyze grammar]

sakuṇḍalaṃ sindhupateḥ prabhañjanasutānuja |
utsaṅge pātayasvāśu vṛddhakṣatrasya bhārata || 26 ||
[Analyze grammar]

atha tvamasya mūrdhānaṃ pātayiṣyasi bhūtale |
tavāpi śatadhā mūrdhā phaliṣyati na saṃśayaḥ || 27 ||
[Analyze grammar]

yathā caitanna jānīyātsa rājā pṛthivīpatiḥ |
tathā kuru kuruśreṣṭha divyamastramupāśritaḥ || 28 ||
[Analyze grammar]

na hyasādhyamakāryaṃ vā vidyate tava kiṃcana |
samasteṣvapi lokeṣu triṣu vāsavanandana || 29 ||
[Analyze grammar]

etacchrutvā tu vacanaṃ sṛkkiṇī parisaṃlihan |
indrāśanisamasparśaṃ divyamantrābhimantritam || 30 ||
[Analyze grammar]

sarvabhārasahaṃ śaśvadgandhamālyārcitaṃ śaram |
visasarjārjunastūrṇaṃ saindhavasya vadhe vṛtaḥ || 31 ||
[Analyze grammar]

sa tu gāṇḍīvanirmuktaḥ śaraḥ śyena ivāśugaḥ |
śakuntamiva vṛkṣāgrātsaindhavasya śiro'harat || 32 ||
[Analyze grammar]

aharattatpunaścaiva śarairūrdhvaṃ dhanaṃjayaḥ |
durhṛdāmapraharṣāya suhṛdāṃ harṣaṇāya ca || 33 ||
[Analyze grammar]

śaraiḥ kadambakīkṛtya kāle tasmiṃśca pāṇḍavaḥ |
samantapañcakādbāhyaṃ śirastadvyaharattataḥ || 34 ||
[Analyze grammar]

etasminneva kāle tu vṛddhakṣatro mahīpatiḥ |
saṃdhyāmupāste tejasvī saṃbandhī tava māriṣa || 35 ||
[Analyze grammar]

upāsīnasya tasyātha kṛṣṇakeśaṃ sakuṇḍalam |
sindhurājasya mūrdhānamutsaṅge samapātayat || 36 ||
[Analyze grammar]

tasyotsaṅge nipatitaṃ śirastaccārukuṇḍalam |
vṛddhakṣatrasya nṛpateralakṣitamariṃdama || 37 ||
[Analyze grammar]

kṛtajapyasya tasyātha vṛddhakṣatrasya dhīmataḥ |
uttiṣṭhatastatsahasā śiro'gacchaddharātalam || 38 ||
[Analyze grammar]

tatastasya narendrasya putramūrdhani bhūtalam |
gate tasyāpi śatadhā mūrdhāgacchadariṃdama || 39 ||
[Analyze grammar]

tataḥ sarvāṇi bhūtāni vismayaṃ jagmuruttamam |
vāsudevaśca bībhatsuṃ praśaśaṃsa mahāratham || 40 ||
[Analyze grammar]

tato dṛṣṭvā vinihataṃ sindhurājaṃ jayadratham |
putrāṇāṃ tava netrebhyo duḥkhādbahvapatajjalam || 41 ||
[Analyze grammar]

bhīmaseno'pi saṃgrāme bodhayanniva pāṇḍavam |
siṃhanādena mahatā pūrayāmāsa rodasī || 42 ||
[Analyze grammar]

taṃ śrutvā tu mahānādaṃ dharmaputro yudhiṣṭhiraḥ |
saindhavaṃ nihataṃ mene phalgunena mahātmanā || 43 ||
[Analyze grammar]

tato vāditraghoṣeṇa svānyodhānabhiharṣayan |
abhyavartata saṃgrāme bhāradvājaṃ yuyutsayā || 44 ||
[Analyze grammar]

tataḥ pravavṛte rājannastaṃ gacchati bhāskare |
droṇasya somakaiḥ sārdhaṃ saṃgrāmo lomaharṣaṇaḥ || 45 ||
[Analyze grammar]

te tu sarvaprayatnena bhāradvājaṃ jighāṃsavaḥ |
saindhave nihate rājannayudhyanta mahārathāḥ || 46 ||
[Analyze grammar]

pāṇḍavāstu jayaṃ labdhvā saindhavaṃ vinihatya ca |
ayodhayaṃstato droṇaṃ jayonmattāstatastataḥ || 47 ||
[Analyze grammar]

arjuno'pi raṇe yodhāṃstāvakānrathasattamān |
ayodhayanmahārāja hatvā saindhavakaṃ nṛpam || 48 ||
[Analyze grammar]

sa devaśatrūniva devarājaḥ kirīṭamālī vyadhamatsamantāt |
yathā tamāṃsyabhyuditastamoghnaḥ pūrvāṃ pratijñāṃ samavāpya vīraḥ || 49 ||
[Analyze grammar]