Chapter 120

dhṛtarāṣṭra uvāca |
tadavasthe hate tasminbhūriśravasi kaurave |
yathā bhūyo'bhavadyuddhaṃ tanmamācakṣva saṃjaya || 1 ||
[Analyze grammar]

saṃjaya uvāca |
bhūriśravasi saṃkrānte paralokāya bhārata |
vāsudevaṃ mahābāhurarjunaḥ samacūcudat || 2 ||
[Analyze grammar]

codayāśvānbhṛśaṃ kṛṣṇa yato rājā jayadrathaḥ |
astameti mahābāho tvaramāṇo divākaraḥ || 3 ||
[Analyze grammar]

etaddhi puruṣavyāghra mahadabhyudyataṃ mayā |
kāryaṃ saṃrakṣyate caiṣa kurusenāmahārathaiḥ || 4 ||
[Analyze grammar]

nāstameti yathā sūryo yathā satyaṃ bhavedvacaḥ |
codayāśvāṃstathā kṛṣṇa yathā hanyāṃ jayadratham || 5 ||
[Analyze grammar]

tataḥ kṛṣṇo mahābāhū rajatapratimānhayān |
hayajñaścodayāmāsa jayadratharathaṃ prati || 6 ||
[Analyze grammar]

taṃ prayāntamamogheṣumutpatadbhirivāśugaiḥ |
tvaramāṇā mahārāja senāmukhyāḥ samāvrajan || 7 ||
[Analyze grammar]

duryodhanaśca karṇaśca vṛṣaseno'tha madrarāṭ |
aśvatthāmā kṛpaścaiva svayameva ca saindhavaḥ || 8 ||
[Analyze grammar]

samāsādya tu bībhatsuḥ saindhavaṃ pramukhe sthitam |
netrābhyāṃ krodhadīptābhyāṃ saṃpraikṣannirdahanniva || 9 ||
[Analyze grammar]

tato duryodhano rājā rādheyaṃ tvarito'bravīt |
arjunaṃ vīkṣya saṃyāntaṃ jayadratharathaṃ prati || 10 ||
[Analyze grammar]

ayaṃ sa vaikartana yuddhakālo vidarśayasvātmabalaṃ mahātman |
yathā na vadhyeta raṇe'rjunena jayadrathaḥ karṇa tathā kuruṣva || 11 ||
[Analyze grammar]

alpāvaśiṣṭaṃ divasaṃ nṛvīra vighātayasvādya ripuṃ śaraughaiḥ |
dinakṣayaṃ prāpya narapravīra dhruvaṃ hi naḥ karṇa jayo bhaviṣyati || 12 ||
[Analyze grammar]

saindhave rakṣyamāṇe tu sūryasyāstamayaṃ prati |
mithyāpratijñaḥ kaunteyaḥ pravekṣyati hutāśanam || 13 ||
[Analyze grammar]

anarjunāyāṃ ca bhuvi muhūrtamapi mānada |
jīvituṃ notsaheranvai bhrātaro'sya sahānugāḥ || 14 ||
[Analyze grammar]

vinaṣṭaiḥ pāṇḍaveyaiśca saśailavanakānanām |
vasuṃdharāmimāṃ karṇa bhokṣyāmo hatakaṇṭakām || 15 ||
[Analyze grammar]

daivenopahataḥ pārtho viparītaśca mānada |
kāryākāryamajānanvai pratijñāṃ kṛtavānraṇe || 16 ||
[Analyze grammar]

nūnamātmavināśāya pāṇḍavena kirīṭinā |
pratijñeyaṃ kṛtā karṇa jayadrathavadhaṃ prati || 17 ||
[Analyze grammar]

kathaṃ jīvati durdharṣe tvayi rādheya phalgunaḥ |
anastaṃgata āditye hanyātsaindhavakaṃ nṛpam || 18 ||
[Analyze grammar]

rakṣitaṃ madrarājena kṛpeṇa ca mahātmanā |
jayadrathaṃ raṇamukhe kathaṃ hanyāddhanaṃjayaḥ || 19 ||
[Analyze grammar]

drauṇinā rakṣyamāṇaṃ ca mayā duḥśāsanena ca |
kathaṃ prāpsyati bībhatsuḥ saindhavaṃ kālacoditaḥ || 20 ||
[Analyze grammar]

yudhyante bahavaḥ śūrā lambate ca divākaraḥ |
śaṅke jayadrathaṃ pārtho naiva prāpsyati mānada || 21 ||
[Analyze grammar]

sa tvaṃ karṇa mayā sārdhaṃ śūraiścānyairmahārathaiḥ |
yudhyasva yatnamāsthāya paraṃ pārthena saṃyuge || 22 ||
[Analyze grammar]

evamuktastu rādheyastava putreṇa māriṣa |
duryodhanamidaṃ vākyaṃ pratyuvāca kurūttamam || 23 ||
[Analyze grammar]

dṛḍhalakṣyeṇa śūreṇa bhīmasenena dhanvinā |
bhṛśamudvejitaḥ saṃkhye śarajālairanekaśaḥ || 24 ||
[Analyze grammar]

sthātavyamiti tiṣṭhāmi raṇe saṃprati mānada |
naivāṅgamiṅgati kiṃcinme saṃtaptasya raṇeṣubhiḥ || 25 ||
[Analyze grammar]

yotsyāmi tu tathā rājañśaktyāhaṃ parayā raṇe |
yathā pāṇḍavamukhyo'sau na haniṣyati saindhavam || 26 ||
[Analyze grammar]

na hi me yudhyamānasya sāyakāṃścāsyataḥ śitān |
saindhavaṃ prāpsyate vīraḥ savyasācī dhanaṃjayaḥ || 27 ||
[Analyze grammar]

yattu śaktimatā kāryaṃ satataṃ hitakāriṇā |
tatkariṣyāmi kauravya jayo daive pratiṣṭhitaḥ || 28 ||
[Analyze grammar]

adya yotsye'rjunamahaṃ pauruṣaṃ svaṃ vyapāśritaḥ |
tvadarthaṃ puruṣavyāghra jayo daive pratiṣṭhitaḥ || 29 ||
[Analyze grammar]

adya yuddhaṃ kuruśreṣṭha mama pārthasya cobhayoḥ |
paśyantu sarvabhūtāni dāruṇaṃ lomaharṣaṇam || 30 ||
[Analyze grammar]

karṇakauravayorevaṃ raṇe saṃbhāṣamāṇayoḥ |
arjuno niśitairbāṇairjaghāna tava vāhinīm || 31 ||
[Analyze grammar]

ciccheda tīkṣṇāgramukhaiḥ śūrāṇāmanivartinām |
bhujānparighasaṃkāśānhastihastopamānraṇe || 32 ||
[Analyze grammar]

śirāṃsi ca mahābāhuściccheda niśitaiḥ śaraiḥ |
hastihastānhayagrīvā rathākṣāṃśca samantataḥ || 33 ||
[Analyze grammar]

śoṇitāktānhayārohāngṛhītaprāsatomarān |
kṣuraiściccheda bībhatsurdvidhaikaikaṃ tridhaiva ca || 34 ||
[Analyze grammar]

hayavāraṇamukhyāśca prāpatanta sahasraśaḥ |
dhvajāśchatrāṇi cāpāni cāmarāṇi śirāṃsi ca || 35 ||
[Analyze grammar]

kakṣamagnimivoddhūtaḥ pradahaṃstava vāhinīm |
acireṇa mahīṃ pārthaścakāra rudhirottarām || 36 ||
[Analyze grammar]

hatabhūyiṣṭhayodhaṃ tatkṛtvā tava balaṃ balī |
āsasāda durādharṣaḥ saindhavaṃ satyavikramaḥ || 37 ||
[Analyze grammar]

bībhatsurbhīmasenena sātvatena ca rakṣitaḥ |
sa babhau bharataśreṣṭha jvalanniva hutāśanaḥ || 38 ||
[Analyze grammar]

taṃ tathāvasthitaṃ dṛṣṭvā tvadīyā vīryasaṃmatāḥ |
nāmṛṣyanta maheṣvāsāḥ phalgunaṃ puruṣarṣabhāḥ || 39 ||
[Analyze grammar]

duryodhanaśca karṇaśca vṛṣaseno'tha madrarāṭ |
aśvatthāmā kṛpaścaiva svayameva ca saindhavaḥ || 40 ||
[Analyze grammar]

saṃrabdhāḥ saindhavasyārthe samāvṛṇvankirīṭinam |
nṛtyantaṃ rathamārgeṣu dhanurjyātalanisvanaiḥ || 41 ||
[Analyze grammar]

saṃgrāmakovidaṃ pārthaṃ sarve yuddhaviśāradāḥ |
abhītāḥ paryavartanta vyāditāsyamivāntakam || 42 ||
[Analyze grammar]

saindhavaṃ pṛṣṭhataḥ kṛtvā jighāṃsanto'rjunācyutau |
sūryāstamayamicchanto lohitāyati bhāskare || 43 ||
[Analyze grammar]

te bhujairbhogibhogābhairdhanūṃṣyāyamya sāyakān |
mumucuḥ sūryaraśmyābhāñśataśaḥ phalgunaṃ prati || 44 ||
[Analyze grammar]

tānastānasyamānāṃśca kirīṭī yuddhadurmadaḥ |
dvidhā tridhāṣṭadhaikaikaṃ chittvā vivyādha tānraṇe || 45 ||
[Analyze grammar]

siṃhalāṅgūlaketustu darśayañśaktimātmanaḥ |
śāradvatīsuto rājannarjunaṃ pratyavārayat || 46 ||
[Analyze grammar]

sa viddhvā daśabhiḥ pārthaṃ vāsudevaṃ ca saptabhiḥ |
atiṣṭhadrathamārgeṣu saindhavaṃ paripālayan || 47 ||
[Analyze grammar]

athainaṃ kauravaśreṣṭhāḥ sarva eva mahārathāḥ |
mahatā rathavaṃśena sarvataḥ paryavārayan || 48 ||
[Analyze grammar]

visphārayantaścāpāni visṛjantaśca sāyakān |
saindhavaṃ paryarakṣanta śāsanāttanayasya te || 49 ||
[Analyze grammar]

tatra pārthasya śūrasya bāhvorbalamadṛśyata |
iṣūṇāmakṣayatvaṃ ca dhanuṣo gāṇḍivasya ca || 50 ||
[Analyze grammar]

astrairastrāṇi saṃvārya drauṇeḥ śāradvatasya ca |
ekaikaṃ navabhirbāṇaiḥ sarvāneva samarpayat || 51 ||
[Analyze grammar]

taṃ drauṇiḥ pañcaviṃśatyā vṛṣasenaśca saptabhiḥ |
duryodhanaśca viṃśatyā karṇaśalyau tribhistribhiḥ || 52 ||
[Analyze grammar]

ta enamabhigarjanto vidhyantaśca punaḥ punaḥ |
vidhunvantaśca cāpāni sarvataḥ paryavārayan || 53 ||
[Analyze grammar]

śliṣṭaṃ tu sarvataścakrū rathamaṇḍalamāśu te |
sūryāstamayamicchantastvaramāṇā mahārathāḥ || 54 ||
[Analyze grammar]

ta enamabhinardanto vidhunvānā dhanūṃṣi ca |
siṣicurmārgaṇairghorairgiriṃ meghā ivāmbubhiḥ || 55 ||
[Analyze grammar]

te mahāstrāṇi divyāni tatra rājanvyadarśayan |
dhanaṃjayasya gātreṣu śūrāḥ parighabāhavaḥ || 56 ||
[Analyze grammar]

hatabhūyiṣṭhayodhaṃ tatkṛtvā tava balaṃ balī |
āsasāda durādharṣaḥ saindhavaṃ satyavikramaḥ || 57 ||
[Analyze grammar]

taṃ karṇaḥ saṃyuge rājanpratyavārayadāśugaiḥ |
miṣato bhīmasenasya sātvatasya ca bhārata || 58 ||
[Analyze grammar]

taṃ pārtho daśabhirbāṇaiḥ pratyavidhyadraṇājire |
sūtaputraṃ mahābāhuḥ sarvasainyasya paśyataḥ || 59 ||
[Analyze grammar]

sātvataśca tribhirbāṇaiḥ karṇaṃ vivyādha māriṣa |
bhīmasenastribhiścaiva punaḥ pārthaśca saptabhiḥ || 60 ||
[Analyze grammar]

tānkarṇaḥ prativivyādha ṣaṣṭyā ṣaṣṭyā mahārathaḥ |
tadyuddhamabhavadrājankarṇasya bahubhiḥ saha || 61 ||
[Analyze grammar]

tatrādbhutamapaśyāma sūtaputrasya māriṣa |
yadekaḥ samare kruddhastrīnrathānparyavārayat || 62 ||
[Analyze grammar]

phalgunastu mahābāhuḥ karṇaṃ vaikartanaṃ raṇe |
sāyakānāṃ śatenaiva sarvamarmasvatāḍayat || 63 ||
[Analyze grammar]

rudhirokṣitasarvāṅgaḥ sūtaputraḥ pratāpavān |
śaraiḥ pañcāśatā vīraḥ phalgunaṃ pratyavidhyata |
tasya tallāghavaṃ dṛṣṭvā nāmṛṣyata raṇe'rjunaḥ || 64 ||
[Analyze grammar]

tataḥ pārtho dhanuśchittvā vivyādhainaṃ stanāntare |
sāyakairnavabhirvīrastvaramāṇo dhanaṃjayaḥ || 65 ||
[Analyze grammar]

vadhārthaṃ cāsya samare sāyakaṃ sūryavarcasam |
cikṣepa tvarayā yuktastvarākāle dhanaṃjayaḥ || 66 ||
[Analyze grammar]

tamāpatantaṃ vegena drauṇiściccheda sāyakam |
ardhacandreṇa tīkṣṇena sa chinnaḥ prāpatadbhuvi || 67 ||
[Analyze grammar]

athānyaddhanurādāya sūtaputraḥ pratāpavān |
karṇo'pi dviṣatāṃ hantā chādayāmāsa phalgunam |
sāyakairbahusāhasraiḥ kṛtapratikṛtepsayā || 68 ||
[Analyze grammar]

tau vṛṣāviva nardantau narasiṃhau mahārathau |
sāyakaughapraticchannaṃ cakratuḥ khamajihmagaiḥ |
adṛśyau ca śaraughaistau nighnatāmitaretaram || 69 ||
[Analyze grammar]

pārtho'hamasmi tiṣṭha tvaṃ karṇo'haṃ tiṣṭha phalguna |
ityevaṃ tarjayantau tau vākśalyaistudatāṃ tathā || 70 ||
[Analyze grammar]

yudhyetāṃ samare vīrau citraṃ laghu ca suṣṭhu ca |
prekṣaṇīyau cābhavatāṃ sarvayodhasamāgame || 71 ||
[Analyze grammar]

praśasyamānau samare siddhacāraṇavātikaiḥ |
ayudhyetāṃ mahārāja parasparavadhaiṣiṇau || 72 ||
[Analyze grammar]

tato duryodhano rājaṃstāvakānabhyabhāṣata |
yattā rakṣata rādheyaṃ nāhatvā samare'rjunam |
nivartiṣyati rādheya iti māmuktavānvṛṣaḥ || 73 ||
[Analyze grammar]

etasminnantare rājandṛṣṭvā karṇasya vikramam |
ākarṇamuktairiṣubhiḥ karṇasya caturo hayān |
anayanmṛtyulokāya caturbhiḥ sāyakottamaiḥ || 74 ||
[Analyze grammar]

sārathiṃ cāsya bhallena rathanīḍādapāharat |
chādayāmāsa ca śaraistava putrasya paśyataḥ || 75 ||
[Analyze grammar]

sa chādyamānaḥ samare hatāśvo hatasārathiḥ |
mohitaḥ śarajālena kartavyaṃ nābhyapadyata || 76 ||
[Analyze grammar]

taṃ tathā virathaṃ dṛṣṭvā rathamāropya svaṃ tadā |
aśvatthāmā mahārāja bhūyo'rjunamayodhayat || 77 ||
[Analyze grammar]

madrarājastu kaunteyamavidhyattriṃśatā śaraiḥ |
śāradvatastu viṃśatyā vāsudevaṃ samārpayat |
dhanaṃjayaṃ dvādaśabhirājaghāna śilīmukhaiḥ || 78 ||
[Analyze grammar]

caturbhiḥ sindhurājaśca vṛṣasenaśca saptabhiḥ |
pṛthakpṛthaṅmahārāja kṛṣṇapārthāvavidhyatām || 79 ||
[Analyze grammar]

tathaiva tānpratyavidhyatkuntīputro dhanaṃjayaḥ |
droṇaputraṃ catuḥṣaṣṭyā madrarājaṃ śatena ca || 80 ||
[Analyze grammar]

saindhavaṃ daśabhirbhallairvṛṣasenaṃ tribhiḥ śaraiḥ |
śāradvataṃ ca viṃśatyā viddhvā pārthaḥ samunnadat || 81 ||
[Analyze grammar]

te pratijñāpratīghātamicchantaḥ savyasācinaḥ |
sahitāstāvakāstūrṇamabhipeturdhanaṃjayam || 82 ||
[Analyze grammar]

athārjunaḥ sarvatodhāramastraṃ prāduścakre trāsayandhārtarāṣṭrān |
taṃ pratyudīyuḥ kuravaḥ pāṇḍusūnuṃ rathairmahārhaiḥ śaravarṣāṇyavarṣan || 83 ||
[Analyze grammar]

tatastu tasmiṃstumule samutthite sudāruṇe bhārata mohanīye |
nāmuhyata prāpya sa rājaputraḥ kirīṭamālī visṛjanpṛṣatkān || 84 ||
[Analyze grammar]

rājyaprepsuḥ savyasācī kurūṇāṃ smarankleśāndvādaśavarṣavṛttān |
gāṇḍīvamuktairiṣubhirmahātmā sarvā diśo vyāvṛṇodaprameyaiḥ || 85 ||
[Analyze grammar]

pradīptolkamabhavaccāntarikṣaṃ deheṣu bhūrīṇyapatanvayāṃsi |
yatpiṅgalajyena kirīṭamālī kruddho ripūnājagavena hanti || 86 ||
[Analyze grammar]

kirīṭamālī mahatā mahāyaśāḥ śarāsanenāsya śarānanīkajit |
hayapravekottamanāgadhūrgatānkurupravīrāniṣubhirnyapātayat || 87 ||
[Analyze grammar]

gadāśca gurvīḥ parighānayasmayānasīṃśca śaktīśca raṇe narādhipāḥ |
mahānti śastrāṇi ca bhīmadarśanāḥ pragṛhya pārthaṃ sahasābhidudruvuḥ || 88 ||
[Analyze grammar]

sa tānudīrṇānsarathāśvavāraṇānpadātisaṃghāṃśca mahādhanurdharaḥ |
vipannasarvāyudhajīvitānraṇe cakāra vīro yamarāṣṭravardhanān || 89 ||
[Analyze grammar]