Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 2.20
evaṃ heyatvena dṛśyasya prathamaṃ jñātavyatvāt tadavasthāsahitaṃ vyākhyāyopādeyaṃ draṣṭāraṃ vyākhyātumāha —
draṣṭā dṛśimātraḥ śuddho'pi pratyayānupaśyaḥ || sādhana 20 ||
vṛttiḥ — draṣṭā puruṣo dṛśimātraścetanāmātram | mātragrahaṇaṃ dharmadharminirāsārtham | keciddhi cetanāmātmano dharmamicchanti | sa śuddho'pi pariṇāmitvādyabhāvena svapratiṣṭho'pi pratyayānupaśyaḥ | pratyayā viṣayoparaktāni vijñānāni tāni anu avyavadhānena pratisaṃkramādyabhāvena paśyati | etaduktaṃ bhavati — jātaviṣayoparāgāyāmeva buddhau sannidhimātreṇaiva puruṣasya draṣṭutvamiti || 20 ||