Yoga-sutra with Bhoja Vritti [sanskrit]
9,596 words
The Sanskrit edition of the Rājamārtaṇḍa or Bhojavṛtti by Bhojarāja.—This represents the commentary on the yoga aphorisms of Patañjali by King Bhoja who ruled in the 11th century. The material was typed by Suryansu Ray from a traditional old manuscript belonging to the family Guru.
Sūtra 2.12
evaṃ kleśānāṃ tattvamabhidhāya karmāśayasya tadabhidhātumāha —
kleśamūlaḥ karmāśayo dṛṣṭādṛṣṭajanmavedanīyaḥ || sādhana 12 ||
vṛttiḥ — karmāśaya ityanena svarūpaṃ tasyābhihitam | ato vāsanārūpāṇyeva karmāṇi | kleśamūla ityanena kāraṇamabhihitaṃ yataḥ karmaṇāṃ śubhāśubhānāṃ kleśā eva nimittam | dṛṣṭādṛṣṭajanmavedanīya ityanena phalamuktam | asminneva janmani anubhavanīyo dṛṣṭajanmavedanīyaḥ | janmāntarānubhavanīyo'dṛṣṭajanmavedanīyaḥ | tathāhi — kānicit puṇyāni devatārādhanādīni tīvrasaṃvegena kṛtāni ihaiva janmani jātyāyurbhogalakṣaṇaṃ phalaṃ prayacchanti yathā nandīśvarasya bhagavanmaheśvarārādhanabalādihaiva janmani jātyādayo viśiṣṭāḥ prādurbhūtāḥ | evamanveṣāṃ viśvāmitrādīnāṃ tapaḥprabhāvājjātyāyuṣī | keṣāñcijjātireva yathā tīvrasaṃvegena duṣṭakarmakṛtāṃ nahuṣādīnāṃ jātyantarādipariṇāmaḥ | urvaśyāśca kārtikeyavane latārūpatayā | evaṃ vyastasamastatvena yathāyogyaṃ yojyamiti || 12 ||