Chapter 102

sa uvāca mahāprajñamabhigamya plavaṃgamaḥ |
rāmaṃ vacanamarthajño varaṃ sarvadhanuṣmatām || 1 ||
[Analyze grammar]

yannimitto'yamārambhaḥ karmaṇāṃ ca phalodayaḥ |
tāṃ devīṃ śokasaṃtaptāṃ maithilīṃ draṣṭumarhasi || 2 ||
[Analyze grammar]

sā hi śokasamāviṣṭā bāṣpaparyākulekṣaṇā |
maithilī vijayaṃ śrutvā tava harṣamupāgamat || 3 ||
[Analyze grammar]

pūrvakāt pratyayāccāhamukto viśvastayā tayā |
bhartāraṃ draṣṭumicchāmi kṛtārthaṃ sahalakṣmaṇam || 4 ||
[Analyze grammar]

evamukto hanumatā rāmo dharmabhṛtāṃ varaḥ |
agacchat sahasā dhyānamāsīdbāṣpapariplutaḥ || 5 ||
[Analyze grammar]

dīrghamuṣṇaṃ ca niśvasya medinīmavalokayan |
uvāca meghasaṃkāśaṃ vibhīṣaṇamupasthitam || 6 ||
[Analyze grammar]

divyāṅgarāgāṃ vaidehīṃ divyābharaṇabhūṣitām |
iha sītāṃ śiraḥsnātāmupasthāpaya māciram || 7 ||
[Analyze grammar]

evamuktastu rāmeṇa tvaramāṇo vibhīṣaṇaḥ |
praviśyāntaḥpuraṃ sītāṃ strībhiḥ svābhiracodayat || 8 ||
[Analyze grammar]

divyāṅgarāgā vaidehī divyābharaṇabhūṣitā |
yānamāroha bhadraṃ te bhartā tvāṃ draṣṭumicchati || 9 ||
[Analyze grammar]

evamuktā tu vaidehī pratyuvāca vibhīṣaṇam |
asnātā draṣṭumicchāmi bhartāraṃ rākṣasādhipa || 10 ||
[Analyze grammar]

tasyāstadvacanaṃ śrutvā pratyuvāca vibhīṣaṇaḥ |
yathāha rāmo bhartā te tattathā kartumarhasi || 11 ||
[Analyze grammar]

tasya tadvacanaṃ śrutvā maithilī bhartṛdevatā |
bhartṛbhaktivratā sādhvī tatheti pratyabhāṣata || 12 ||
[Analyze grammar]

tataḥ sītāṃ śiraḥsnātāṃ yuvatībhiralaṃkṛtām |
mahārhābharaṇopetāṃ mahārhāmbaradhāriṇīm || 13 ||
[Analyze grammar]

āropya śibikāṃ dīptāṃ parārdhyāmbarasaṃvṛtām |
rakṣobhirbahubhirguptāmājahāra vibhīṣaṇaḥ || 14 ||
[Analyze grammar]

so'bhigamya mahātmānaṃ jñātvābhidhyānamāsthitam |
praṇataśca prahṛṣṭaśca prāptāṃ sītāṃ nyavedayat || 15 ||
[Analyze grammar]

tāmāgatāmupaśrutya rakṣogṛhaciroṣitām |
harṣo dainyaṃ ca roṣaśca trayaṃ rāghavamāviśat || 16 ||
[Analyze grammar]

tataḥ pārśvagataṃ dṛṣṭvā savimarśaṃ vicārayan |
vibhīṣaṇamidaṃ vākyamahṛṣṭo rāghavo'bravīt || 17 ||
[Analyze grammar]

rākṣasādhipate saumya nityaṃ madvijaye rata |
vaidehī saṃnikarṣaṃ me śīghraṃ samupagacchatu || 18 ||
[Analyze grammar]

sa tadvacanamājñāya rāghavasya vibhīṣaṇaḥ |
tūrṇamutsāraṇe yatnaṃ kārayāmāsa sarvataḥ || 19 ||
[Analyze grammar]

kañcukoṣṇīṣiṇastatra vetrajharjharapāṇayaḥ |
utsārayantaḥ puruṣāḥ samantāt paricakramuḥ || 20 ||
[Analyze grammar]

ṛkṣāṇāṃ vānarāṇāṃ ca rākṣasānāṃ ca sarvataḥ |
vṛndānyutsāryamāṇāni dūramutsasṛjustataḥ || 21 ||
[Analyze grammar]

teṣāmutsāryamāṇānāṃ sarveṣāṃ dhvanirutthitaḥ |
vāyunodvartamānasya sāgarasyeva nisvanaḥ || 22 ||
[Analyze grammar]

utsāryamāṇāṃstāndṛṣṭvā samantājjātasaṃbhramān |
dākṣiṇyāttadamarṣācca vārayāmāsa rāghavaḥ || 23 ||
[Analyze grammar]

saṃrabdhaścābravīd rāmaścakṣuṣā pradahanniva |
vibhīṣaṇaṃ mahāprājñaṃ sopālambhamidaṃ vacaḥ || 24 ||
[Analyze grammar]

kimarthaṃ māmanādṛtya kṛśyate'yaṃ tvayā janaḥ |
nivartayainamudyogaṃ jano'yaṃ svajano mama || 25 ||
[Analyze grammar]

na gṛhāṇi na vastrāṇi na prākārāstiraskriyāḥ |
nedṛśā rājasatkārā vṛttamāvaraṇaṃ striyaḥ || 26 ||
[Analyze grammar]

vyasaneṣu na kṛcchreṣu na yuddhe na svayaṃvare |
na kratau no vivāhe ca darśanaṃ duṣyate striyaḥ || 27 ||
[Analyze grammar]

saiṣā yuddhagatā caiva kṛcchre mahati ca sthitā |
darśane'syā na doṣaḥ syānmatsamīpe viśeṣataḥ || 28 ||
[Analyze grammar]

tadānaya samīpaṃ me śīghramenāṃ vibhīṣaṇa |
sītā paśyatu māmeṣā suhṛdgaṇavṛtaṃ sthitam || 29 ||
[Analyze grammar]

evamuktastu rāmeṇa savimarśo vibhīṣaṇaḥ |
rāmasyopānayat sītāṃ saṃnikarṣaṃ vinītavat || 30 ||
[Analyze grammar]

tato lakṣmaṇasugrīvau hanūmāṃśca plavaṃgamaḥ |
niśamya vākyaṃ rāmasya babhūvurvyathitā bhṛśam || 31 ||
[Analyze grammar]

kalatranirapekṣaiśca iṅgitairasya dāruṇaiḥ |
aprītamiva sītāyāṃ tarkayanti sma rāghavam || 32 ||
[Analyze grammar]

lajjayā tvavalīyantī sveṣu gātreṣu maithilī |
vibhīṣaṇenānugatā bhartāraṃ sābhyavartata || 33 ||
[Analyze grammar]

sā vastrasaṃruddhamukhī lajjayā janasaṃsadi |
rurodāsādya bhartāramāryaputreti bhāṣiṇī || 34 ||
[Analyze grammar]

vismayācca praharṣācca snehācca paridevatā |
udaikṣata mukhaṃ bhartuḥ saumyaṃ saumyatarānanā || 35 ||
[Analyze grammar]

atha samapanudanmanaḥklamaṃ sā suciramadṛṣṭamudīkṣya vai priyasya |
vadanamuditapūrṇacandrakāntaṃ vimalaśaśāṅkanibhānanā tadāsīt || 36 ||
[Analyze grammar]