Chapter 101

iti pratisamādiṣṭo hanūmānmārutātmajaḥ |
praviveśa purīṃ laṅkāṃ pūjyamāno niśācaraiḥ || 1 ||
[Analyze grammar]

praviśya tu mahātejā rāvaṇasya niveśanam |
dadarśa śaśinā hīnāṃ sātaṅkāmiva rohiṇīm || 2 ||
[Analyze grammar]

nibhṛtaḥ praṇataḥ prahvaḥ so'bhigamyābhivādya ca |
rāmasya vacanaṃ sarvamākhyātumupacakrame || 3 ||
[Analyze grammar]

vaidehi kuśalī rāmaḥ sasugrīvaḥ salakṣmaṇaḥ |
kuśalaṃ cāha siddhārtho hataśatrurariṃdamaḥ || 4 ||
[Analyze grammar]

vibhīṣaṇasahāyena rāmeṇa haribhiḥ saha |
nihato rāvaṇo devi lakṣmaṇasya nayena ca || 5 ||
[Analyze grammar]

pṛṣṭvā ca kuśalaṃ rāmo vīrastvāṃ raghunandanaḥ |
abravīt paramaprītaḥ kṛtārthenāntarātmanā || 6 ||
[Analyze grammar]

priyamākhyāmi te devi tvāṃ tu bhūyaḥ sabhājaye |
diṣṭyā jīvasi dharmajñe jayena mama saṃyuge || 7 ||
[Analyze grammar]

labdho no vijayaḥ sīte svasthā bhava gatavyathā |
rāvaṇaḥ sa hataḥ śatrurlaṅkā ceyaṃ vaśe sthitā || 8 ||
[Analyze grammar]

mayā hyalabdhanidreṇa dhṛtena tava nirjaye |
pratijñaiṣā vinistīrṇā baddhvā setuṃ mahodadhau || 9 ||
[Analyze grammar]

saṃbhramaśca na kartavyo vartantyā rāvaṇālaye |
vibhīṣaṇavidheyaṃ hi laṅkaiśvaryamidaṃ kṛtam || 10 ||
[Analyze grammar]

tadāśvasihi viśvastā svagṛhe parivartase |
ayaṃ cābhyeti saṃhṛṣṭastvaddarśanasamutsukaḥ || 11 ||
[Analyze grammar]

evamuktā samutpatya sītā śaśinibhānanā |
praharṣeṇāvaruddhā sā vyājahāra na kiṃ cana || 12 ||
[Analyze grammar]

abravīcca hariśreṣṭhaḥ sītāmapratijalpatīm |
kiṃ tvaṃ cintayase devi kiṃ ca māṃ nābhibhāṣase || 13 ||
[Analyze grammar]

evamuktā hanumatā sītā dharme vyavasthitā |
abravīt paramaprītā harṣagadgadayā girā || 14 ||
[Analyze grammar]

priyametadupaśrutya bharturvijayasaṃśritam |
praharṣavaśamāpannā nirvākyāsmi kṣaṇāntaram || 15 ||
[Analyze grammar]

na hi paśyāmi sadṛśaṃ cintayantī plavaṃgama |
matpriyākhyānakasyeha tava pratyabhinandanam || 16 ||
[Analyze grammar]

na ca paśyāmi tat saumya pṛthivyāmapi vānara |
sadṛśaṃ matpriyākhyāne tava dātuṃ bhavet samam || 17 ||
[Analyze grammar]

hiraṇyaṃ vā suvarṇaṃ vā ratnāni vividhāni ca |
rājyaṃ vā triṣu lokeṣu naitadarhati bhāṣitum || 18 ||
[Analyze grammar]

evamuktastu vaidehyā pratyuvāca plavaṃgamaḥ |
pragṛhītāñjalirvākyaṃ sītāyāḥ pramukhe sthitaḥ || 19 ||
[Analyze grammar]

bhartuḥ priyahite yukte bharturvijayakāṅkṣiṇi |
snigdhamevaṃvidhaṃ vākyaṃ tvamevārhasi bhāṣitum || 20 ||
[Analyze grammar]

tavaitadvacanaṃ saumye sāravat snigdhameva ca |
ratnaughādvividhāccāpi devarājyādviśiṣyate || 21 ||
[Analyze grammar]

arthataśca mayā prāptā devarājyādayo guṇāḥ |
hataśatruṃ vijayinaṃ rāmaṃ paśyāmi yat sthitam || 22 ||
[Analyze grammar]

imāstu khalu rākṣasyo yadi tvamanumanyase |
hantumicchāmyahaṃ sarvā yābhistvaṃ tarjitā purā || 23 ||
[Analyze grammar]

kliśyantīṃ patidevāṃ tvāmaśokavanikāṃ gatām |
ghorarūpasamācārāḥ krūrāḥ krūratarekṣaṇāḥ || 24 ||
[Analyze grammar]

rākṣasyo dāruṇakathā varametaṃ prayaccha me |
icchāmi vividhairghātairhantumetāḥ sudāruṇāḥ || 25 ||
[Analyze grammar]

muṣṭibhiḥ pāṇibhiścaiva caraṇaiścaiva śobhane |
ghorairjānuprahāraiśca daśanānāṃ ca pātanaiḥ || 26 ||
[Analyze grammar]

bhakṣaṇaiḥ karṇanāsānāṃ keśānāṃ luñcanaistathā |
bhṛśaṃ śuṣkamukhībhiśca dāruṇairlaṅghanairhataiḥ || 27 ||
[Analyze grammar]

evaṃprakārairbahubhirviprakārairyaśasvini |
hantumicchāmyahaṃ devi tavemāḥ kṛtakilbiṣāḥ || 28 ||
[Analyze grammar]

evamuktā mahumatā vaidehī janakātmajā |
uvāca dharmasahitaṃ hanūmantaṃ yaśasvinī || 29 ||
[Analyze grammar]

rājasaṃśrayavaśyānāṃ kurvatīnāṃ parājñayā |
vidheyānāṃ ca dāsīnāṃ kaḥ kupyedvānarottama || 30 ||
[Analyze grammar]

bhāgyavaiṣamyayogena purā duścaritena ca |
mayaitat prāpyate sarvaṃ svakṛtaṃ hyupabhujyate || 31 ||
[Analyze grammar]

prāptavyaṃ tu daśāyogānmayaitaditi niścitam |
dāsīnāṃ rāvaṇasyāhaṃ marṣayāmīha durbalā || 32 ||
[Analyze grammar]

ājñaptā rāvaṇenaitā rākṣasyo māmatarjayan |
hate tasminna kuryurhi tarjanaṃ vānarottama || 33 ||
[Analyze grammar]

ayaṃ vyāghrasamīpe tu purāṇo dharmasaṃhitaḥ |
ṛkṣeṇa gītaḥ śloko me taṃ nibodha plavaṃgama || 34 ||
[Analyze grammar]

na paraḥ pāpamādatte pareṣāṃ pāpakarmaṇām |
samayo rakṣitavyastu santaścāritrabhūṣaṇāḥ || 35 ||
[Analyze grammar]

pāpānāṃ vā śubhānāṃ vā vadhārhāṇāṃ plavaṃgama |
kāryaṃ kāruṇyamāryeṇa na kaścinnāparādhyati || 36 ||
[Analyze grammar]

lokahiṃsāvihārāṇāṃ rakṣasāṃ kāmarūpiṇam |
kurvatāmapi pāpāni naiva kāryamaśobhanam || 37 ||
[Analyze grammar]

evamuktastu hanumān sītayā vākyakovidaḥ |
pratyuvāca tataḥ sītāṃ rāmapatnīṃ yaśasvinīm || 38 ||
[Analyze grammar]

yuktā rāmasya bhavatī dharmapatnī yaśasvinī |
pratisaṃdiśa māṃ devi gamiṣye yatra rāghavaḥ || 39 ||
[Analyze grammar]

evamuktā hanumatā vaidehī janakātmajā |
abravīddraṣṭumicchāmi bhartāraṃ vānarottama || 40 ||
[Analyze grammar]

tasyāstadvacanaṃ śrutvā hanumānpavanātmajaḥ |
harṣayanmaithilīṃ vākyamuvācedaṃ mahādyutiḥ || 41 ||
[Analyze grammar]

pūrṇacandrānanaṃ rāmaṃ drakṣyasyārye salakṣmaṇam |
sthiramitraṃ hatāmitraṃ śacīva tridaśeśvaram || 42 ||
[Analyze grammar]

tāmevamuktvā rājantīṃ sītāṃ sākṣādiva śriyam |
ājagāma mahāvego hanūmānyatra rāghavaḥ || 43 ||
[Analyze grammar]