Chapter 19

[English text for this chapter is available]

rājovāca |
gṛhītvā dakṣiṇāṃ daityānmahāviṣṇurjanārdanaḥ || |
cakāra kiṃ mamācakṣva paraṃ kautūhalaṃ hi me || 1 ||
[Analyze grammar]

sārasvata uvāca |
evaṃ stutaḥ surairdevo gṛhītvā medinīṃ hariḥ |
baliṃ nirvāsayāmāsa saṃpūrṇe yajñakarmaṇi |
yajñāṃte dakṣiṇāṃ labdhvā saṃpūrṇo'bhūdathādhvaraḥ || 2 ||
[Analyze grammar]

bhagavānapyasaṃpūrṇe tṛtīye tu krame vibhuḥ |
samabhyetya baliṃ prāha īṣatprasphuritādharaḥ || 3 ||
[Analyze grammar]

ṛṇe bhavati daityendra baṃdhanaṃ ghoradarśanam |
tvaṃ pūraya padaṃ tanme nocedbandhaṃ pratīccha bhoḥ || 4 ||
[Analyze grammar]

tanmurārivacaḥ śrutvā puro bhūtvā baleḥ sutaḥ |
bāṇo vāmanamācaṣṭe tadā taṃ viśvarūpiṇam || 5 ||
[Analyze grammar]

kṛtvā mahīmalpatarāṃ vapuḥ kṛtvā tu vāmanam |
padatrayaṃ yācayitvā viśvarūpamagāḥ katham || 6 ||
[Analyze grammar]

yadi tṛtīyaṃ kramaṇaṃ yācase jagadīśvara |
punarvāmanatāṃ yāhi balirdāsyati tatpadam || 7 ||
[Analyze grammar]

yādṛgvidhāya balinā vāmanāyodakaṃ kṛtam |
tattādṛśāya dātavyamatha kiṃ viśvarūpiṇe || 8 ||
[Analyze grammar]

bhavatkṛtamidaṃ viśvaṃ viśvasminvartate baliḥ |
chadmanā naiva gṛhṇanti sādhavo ye maheśvara || 9 ||
[Analyze grammar]

jagadetajjagannātha tāvakaṃ yadi manyase |
jñātvā balimamaryādaṃ bhavadbhaktiparāṅmukham || 10 ||
[Analyze grammar]

kaṃṭhapāśena niṣkāsya kena vai vāryate bhavān |
gopālamanyaṃ kurute rakṣaṇāya ca gopatiḥ |
sutṛṇaṃ cārayanpūrvo gopaḥ kiṃ kurute tadā || 11 ||
[Analyze grammar]

ityevamukte tenātha vacane balisūnunā |
provāca bhagavānvākyamādikartā janārdanaḥ || 12 ||
[Analyze grammar]

yānyuktāni vacāṃsītthaṃ tvayā bālena sāṃpratam |
teṣāṃ tvaṃ hetusaṃyuktaṃ śṛṇu pratyuttaraṃ mama || 13 ||
[Analyze grammar]

pūrvamuktastava pitā mayā bāṇa padatrayam |
dehi mahyaṃ pramāṇena tadetatsamanuṣṭhitam || 14 ||
[Analyze grammar]

kiṃ na vetti pramāṇaṃ me balistava pitā suta |
balerapi hitārthāya kṛtametatpadatrayam || 15 ||
[Analyze grammar]

tasmādyanmama bāleya tvatpitrāṃ'bu kare mahat |
dattaṃ tenāsya sutale kalpaṃ yāvadvasiṣyati || 16 ||
[Analyze grammar]

gate manvantare bāṇa śrāddhadevasya sāmpratam |
sāvarṇike tvāgate ca balirindro bhaviṣyati || 17 ||
[Analyze grammar]

iti proktvā balisutaṃ bāṇaṃ devastrivikramaḥ |
provāca balimabhyetya vacanaṃ madhurākṣaram || 18 ||
[Analyze grammar]

śrībhagavānuvāca |
apūrṇadakṣiṇe yāge gaccha rājanmahātalam |
sutalaṃnāma pātālaṃ vasa tatra nirāmayaḥ || 19 ||
[Analyze grammar]

baliruvāca |
sutalasthasya me nātha kathaṃ caraṇayostava |
darśanaṃ pūjanaṃ bhogo nivasāmi yathāsukham || 20 ||
[Analyze grammar]

śrībhagavānuvāca |
daityendra hadaye nityaṃ tāvake nivasāmyaham |
ataste darśanaṃ prāptaḥ punaḥ sthāsye tavāntikam || 21 ||
[Analyze grammar]

tathānyamutsavaṃ puṇyaṃ vṛtte śakramahotsave |
dīpapratipannāmā'sau tatra bhāvī mahotsavaḥ || 22 ||
[Analyze grammar]

tatra tvāṃ naraśārdūlā hṛṣṭāḥ puṣṭāḥ svalaṃkṛtāḥ |
puṣpadīpapradānena arcayiṣyaṃti yatnataḥ || 23 ||
[Analyze grammar]

tatrotsavaḥ puṇyatamo bhaviṣyati dharātale |
tava nāmāṃkito daitya tena tvaṃ vatsaraṃ sukhī || 24 ||
[Analyze grammar]

bhaviṣyasi narā ye tu dṛḍhabhaktisahā nvitāḥ |
tvāmarcayanti vidhivatte'pi syuḥ sukhabhāginaḥ || 25 ||
[Analyze grammar]

yathaiva rājyaṃ bhavatastu sāṃprataṃ tathaiva sā bhāvyatha kaumudīti |
ityevamuktvā madhumaditīśvaraṃ nivāsayitvā sutalaṃ sabhāryakam || 26 ||
[Analyze grammar]

urvī samādāya jagāma tūrṇaṃ sa śakrasadmāmarasaṃghajuṣṭam |
dattvā maghone madhujittriviṣṭapaṃ kṛtvā tu devānmakhabhāgabhoginaḥ || 27 ||
[Analyze grammar]

antardadhe viśvapatirmaheśaḥ saṃpaśyatāṃ vai vasudhādhipānām || 28 ||
[Analyze grammar]

gṛhītveti bale rājyaṃ manuputre niyojitam |
dvīpāṃtare ca te daityāḥ preṣitāścājñayā svayam || 29 ||
[Analyze grammar]

pātālanilayā ye tu te tatraiva niveśitāḥ |
devānāṃ paramo harṣaḥ saṃjāto balinigrahe || 30 ||
[Analyze grammar]

nivāsāya punaścakre vāmano vāmano manaḥ |
tatra kṣetre svanagare vāmanaḥ sa nyuvāsa ha || 31 ||
[Analyze grammar]

sārasvata uvāca |
prādurbhāvaste kathito narendra puṇyaḥ śucirvāmanasyāghahārī |
smṛte yasminsaṃśrute kīrtite ca pāpaṃ yāyātsaṃkṣayaṃ puṇyameti || 32 ||
[Analyze grammar]

īśvara uvāca |
iti sārasvatavacaḥ śrutvā bhojaḥ sa bhūpatiḥ |
namaskṛtya muniśreṣṭhaṃ pūjayāmāsa bhaktitaḥ || 33 ||
[Analyze grammar]

tato yathoktavidhinā sa bhojo nṛpasattamaḥ |
vastrāpathakṣetra yātrāṃ parivārajanaiḥ saha |
kṛtvā kṛtārthatāṃ prāpto jagāmānte paraṃ padam || 34 ||
[Analyze grammar]

etanmayā puṇyatamaṃ prabhāsakṣetre ca vasrāpathamīritaṃ te |
śrutvā paṭhitvā parayā sameto bhaktyā tu viṣṇoḥ padamabhyupaiti || 35 ||
[Analyze grammar]

yathā pāpāni dhūyaṃte gaṃgāvārivigāhanāt |
tathā purāṇaśravaṇādduritānāṃ vinā śanam || 36 ||
[Analyze grammar]

idaṃ rahasyaṃ paramaṃ tavoktaṃ na vācyametaddharibhaktivarjite |
dvijasya nindānirate'tipāpe gurāvabhakte kṛtapāpabuddhau || 37 ||
[Analyze grammar]

idaṃ paṭhedyo niyataṃ manuṣyaḥ kṛtabhāvanaḥ |
tasya bhaktiḥ śive kṛṣṇe niścalā jāyate dhuvam || 38 ||
[Analyze grammar]

tadbhaktyā sakalānarthānprāpnoti puruṣottamaḥ || |
purāṇavācine dadyādgobhūsvarṇavibhūṣaṇam || 39 ||
[Analyze grammar]

vittaśāṭhyaṃ na kartavyaṃ kurvandāridryamāpnuyāt |
triḥkṛtvā prapaṭhañchṛṇvaṃnsarvānkāmānavāpnuyāt || 40 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye balaye vāmanakṛtavarapradānavṛttāntavarṇana pūrvakaṃ vastrāpathakṣetrayātrāmāhātmya sārasvatabhojasaṃvādasamāptipuraḥsara vastrāpathakṣetramāhātmyasamāptivarṇanaṃ nāmaikonaviṃśatitamo'dhyāyaḥ || 19 ||
[Analyze grammar]