Chapter 18

[English text for this chapter is available]

rājovāca |
vastrāpathe mahākṣetre samprāpto vāmano yadā |
tadāprabhṛti kiṃ cakre tanme vistarato vada || 1 ||
[Analyze grammar]

sārasvata uvāca |
vāmano vasatiṃ cakre bhavasyāgre nṛpottama |
svarṇarekhājale snātvā bhavaṃ sampūjya bhāvataḥ || 2 ||
[Analyze grammar]

ekāṃte nirmale sthāne kaṇṭakāsthivivarjite |
kṛṣṇājinaparicchanna upaviṣṭo varā sane || 3 ||
[Analyze grammar]

kṛtvā padmāsanaṃ dhīro niścalo'bhūddvijottamaḥ |
vidhāya kandharābaṃdhamṛjunāsāvalokakaḥ || 4 ||
[Analyze grammar]

gṛhakṣetrakalatrāṇāṃ ciṃtāṃ muktvā dhanasya ca |
māyāṃ ca vaiṣṇavīṃ tyaktvā kṛtamauno jitendriyaḥ || 5 ||
[Analyze grammar]

nirāhāro jitakrodho muktasaṃsārabaṃdhanaḥ |
bhujau padmāsane kṛtvā kiñcinmīlitalo canaḥ |
manoticaṃcalaṃ jñātvā sthiraṃ cakre hṛdi dvijaḥ || 6 ||
[Analyze grammar]

krameṇābhyāsayogena bhinnāṃścakre sa caikataḥ |
prāṇāpānavyānodānasamānākhyāṃśca mārutān || 64 ||
[Analyze grammar]

evaṃ taṃ hṛdaye kṛtvā gṛhītvā sarvasandhiṣu |
ānīya brahmaṇaḥ sthāne dṛḍhaṃ brahmaṇyayojayat || 8 ||
[Analyze grammar]

gṛhītvā pavanaṃ bāhyaṃ yadā pūra yate tanum |
tadā sa pūrako jñeyo recakaṃ tu vadāmyaham || 9 ||
[Analyze grammar]

yadā cābhyantaro vāyurbāhye yāti kramānnṛpa |
tadā sa recako jñeyaḥ stambhanātkumbhako bhavet || 10 ||
[Analyze grammar]

pañcaviṃśatitattvāni yadā jānaṃti yoginaḥ |
mucyante pātakaiḥ sarvaiḥ saptajanmakṛtairapi || 11 ||
[Analyze grammar]

rājovāca |
kāni tattvāni ko dehī kiṃ jñeyaṃ yogināṃ vada |
utpannajñānasadbhāvo yogayuktaḥ kathaṃ bhavet || 12 ||
[Analyze grammar]

īśvara uvāca |
prakṛtiśca tato buddhirahaṃkārastato'bhavat |
tanmātrapaṃcakaṃ tasmādeṣā prakṛtiraṣṭadhā || 13 ||
[Analyze grammar]

buddhīndriyāṇi pañcaiva pañca karmeṃdriyāṇi ca |
ekādaśaṃ mano viddhi mahā bhūtāni paṃca ca || 14 ||
[Analyze grammar]

gaṇaḥ ṣoḍaśakaḥ sāṃkhye vistareṇa prakīrtitaḥ |
caturviṃśatitattvāni puruṣaḥ paṃcaviṃśakaḥ || 15 ||
[Analyze grammar]

dehīti procyate dehe sa cātmānaṃ ca paśyati |
viṃdanti paramātmānaṃ ṣaṣṭhaṃ taṃ viṃśateḥ param || 16 ||
[Analyze grammar]

āsanādiprakārā ye te jñeyāḥ prathamaṃ sadā |
yadā dīpaśikhāprāyaṃ jyotiḥ paśyaṃti te hṛdi || 17 ||
[Analyze grammar]

utpannajñānasadbhāvā bhaṇyāste yogino budhaiḥ |
pūrvaṃ jarāṃ jarayati rogā naśyati dūrataḥ || 18 ||
[Analyze grammar]

sarvapāpacaye kṣīṇe paścānmṛtyuṃ sa viṃdati |
mṛto loke naro nāsti yogī jānāti cetsvayam || 19 ||
[Analyze grammar]

tadā dvārāṇi saṃruddhya daśa prāṇānsa muñcati |
puṇya pāpakṣayaṃ kṛtvā prāṇā gacchaṃti yoginām |
aṇimādiguṇaiśvaryaṃ prāpnuvaṃti śivālaye || 20 ||
[Analyze grammar]

anena dhyānayogena bhavaṃ paśyati mānavaḥ |
manasā ciṃtitaṃ sarvaṃ samprāptaṃ bhavadarśanāt || 21 ||
[Analyze grammar]

evamāste yadā vipro vāmano bhavasannidhau |
gaganādavatīrṇaṃ taṃ tadā paśyati nāradam || 22 ||
[Analyze grammar]

vāmana uvāca |
maharṣe kuśalaṃ te'dya kasmādāgamyate tvayā |
praṇamāmi maharṣe tvāṃ brahmaiva tvaṃ jagattraye || 23 ||
[Analyze grammar]

nārada uvāca |
svarga lokādahaṃ prāptaḥ kuśalaṃ kiṃ bravīmi te || 24 ||
[Analyze grammar]

yātāyātairdineśasya pūryyate brahmaṇo dinam |
dināṃte jāyate rātrī rātrau naśyaṃti devatāḥ || 25 ||
[Analyze grammar]

kā kathā mṛtyulokasya ye mriyaṃte dinedine |
nabho dhūmākulaṃ jātaṃ devā baligṛhe gatāḥ || 26 ||
[Analyze grammar]

saptarṣayo gatāstatra brahmaṇā brahmacāriṇaḥ |
hāhāhūhūstuṃbaruśca gatau nāradaparvatau || 27 ||
[Analyze grammar]

apsarogaṇagandharvāḥ saṃprāptā balimaṃdire |
utpātaśāṃtiko yajñaḥ kriyate balinā svayam || 28 ||
[Analyze grammar]

tatraiva gantumicchāmi draṣṭuṃ yajñaṃ balergṛhe |
sahasramekaṃ yajñānāmekonaṃ vidadhe baliḥ || 29 ||
[Analyze grammar]

daityānāṃ bhuvanaṃ sarvaṃ saṃpūrṇe'sminbhaviṣyati |
asāvatiśayaḥ ko'pi prārabdho yajñakarmaṇi |
dvijātibhyo mayā deyaṃ yena yadyācyate svayam || 30 ||
[Analyze grammar]

vāritenāpi me deyaṃ satyamastu vaco mama |
ātmānamapi dārāṃśca rājyaṃ putrānpriyānmama || 31 ||
[Analyze grammar]

prārthitaścenna dāsyāmi vyartho bhavatu me'dhvaraḥ |
anena vacasā jātā mahatī me śiro vyathā |
pratijñāya kathaṃ yajñaḥ saṃpūrṇo'yaṃ bhaviṣyati || 32 ||
[Analyze grammar]

bhaṃgopāyaṃ na paśyāmi bhramāmi bhuvanatraye |
vidhvaṃsakāriṇaṃ jñātvā bhavaṃtaṃ paryupasthitaḥ || 33 ||
[Analyze grammar]

yathā na pūryate yajñastathedānīṃ vidhīyatām || 34 ||
[Analyze grammar]

vāmana uvāca |
maharṣe śṛṇu me vākyaṃ kā śaktirmama vidyate |
ko'haṃ kasmātkariṣyāmi yajñe devāḥ samāgatāḥ || 35 ||
[Analyze grammar]

ṛṣayo brāhmaṇāḥ sarve kathaṃ vyartho bhaviṣyati |
aparaṃ śṛṇu me vākyaṃ brahmarṣe brahmaṇaspate || 36 ||
[Analyze grammar]

na kalatraṃ na te putrāḥ kasmātprakṛtirīdṛśī |
yuddhaṃ vinā na te saukhyaṃ na saukhyaṃ kalahaṃ vinā || 37 ||
[Analyze grammar]

yādṛśastā dṛśo vā'pi vāgvādo'pi sadā priyaḥ |
snānaṃ saṃdhyā japo homastarpaṇaṃ pitṛdevayoḥ || 36 ||
[Analyze grammar]

nāradaḥ kurute cānyadanyatkurvaṃti brāhmaṇāḥ |
mamāpi kautukaṃ jātaṃ maharṣe vada satvaram || 39 ||
[Analyze grammar]

nārada uvāca |
pādmakalpe vyatikrāṃte rātryaṃte śṛṇu vāmana |
brahmāṇḍaṃ vāriṇā vyāptamanyatkiṃ cinna vidyate || 40 ||
[Analyze grammar]

apsu śete devadevaḥ sa ca nārāyaṇaḥ smṛtaḥ |
sa brahmā sa śivo nāsti bhedasteṣāṃ parasparam || 41 ||
[Analyze grammar]

yadā bhavaṃti te bhinnā stadā devatrayaṃ ca te |
karttuṃ vārāhakalpaṃ tu bhinnā jātāstrayastadā || 42 ||
[Analyze grammar]

brahmaviṣṇuharā devā rajaḥsattvatamomayāḥ |
sṛṣṭiṃ brahmā karotyevaṃ tāṃ ca pālayate hariḥ || 43 ||
[Analyze grammar]

haraḥ saṃharate sarvaṃ trailokyaṃ sacarācaram |
evaṃ pravartya deveśa upaviṣṭā varāsane |
kailāsaśikhare ramye maṃtrayaṃti parasparam || 44 ||
[Analyze grammar]

trayāṇāṃ ko varo devaḥ ko jyeṣṭhaḥ ko guṇādhikaḥ |
caturtho nāsti yo vetti sahasā te trayaḥ sthitāḥ || 45 ||
[Analyze grammar]

tebhyaḥ samutthitaṃ jyotirekībhūtaṃ tadaṃbare |
kālamānena yuktaṃ tadbhrāmte ravimaṃḍalam || 46 ||
[Analyze grammar]

ahaṃ jyeṣṭho hyahaṃ jyeṣṭho vādo'bhūddharabrahmaṇoḥ |
dvayorvivadatoḥ krodhātsaṃjāto'haṃ mukhātprabho || 47 ||
[Analyze grammar]

kathaṃ deva na jānāsi yaduktaṃ brahmaṇā tadā |
daśāvatārāste raṃtuṃ matsyakūrmādayaḥ purā || 48 ||
[Analyze grammar]

rudreṇa vāritā gatvā kalaho vo na yujyate |
tathaiva kṛtavānviṣṇuravatārāndaśaiva tān || 49 ||
[Analyze grammar]

kalpādau brahmaṇo vaktrātsaṃjāto'haṃ dvijottama |
kalahājanma me yasmāttasmānme kalahaḥ priyaḥ || 50 ||
[Analyze grammar]

kalpādau sṛjatā pūrvaṃ cinvitaṃ brahmaṇā svayam |
vedāntinā kathaṃ sṛṣṭiḥ karttavyā'ho hare mayā || 51 ||
[Analyze grammar]

naṣṭānvedānna jānāmi kva vedāste gatā iti |
pṛthvīmapi na jānāmi kiṃ sthāne kimadho gatā || 52 ||
[Analyze grammar]

gaṃtuṃ na vidyate śaktirjalamadhye mamādhunā |
avatāraistvayā kāryaṃ daśabhiḥ sṛṣṭirakṣaṇa m || 93 ||
[Analyze grammar]

jale jalecaro matsyo mahānadyāṃ bhaviṣyasi |
ādāya vedānvegena mama tvaṃ dātumarhasi || 54 ||
[Analyze grammar]

tathā ca kṛtavāndevo matsyarūpaṃ jale mahat |
vedānsamānayāmāsa dadau ca brahmaṇe purā |
kūrmarūpaṃ punaḥ kṛtvā maṃdaraṃ dhārayiṣyasi || 55 ||
[Analyze grammar]

ityukto brahmaṇā viṣṇurlakṣmīstvāṃ varayiṣyati |
purā citraṃ caritraṃ te mathane dṛṣṭavānaham || 56 ||
[Analyze grammar]

yadā rasātalaṃ prāptā pṛthivī naiva dṛśyate |
brahmāṃḍārthe sthānakṛte tatra sā naiva dṛśyate || 57 ||
[Analyze grammar]

vārāhaṃ kriyatāṃ rūpaṃ brahmaṇā preritaḥ svayam |
mahāvarāharūpaṃ sa kṛtvā bhūmeradho gataḥ || 58 ||
[Analyze grammar]

uddhṛtya ca tadā viṣṇurdaṃṣṭrāgreṇa vasuṃdharām |
sa nināya yathāsthānaṃ mustāṃ va dharaṇītalāt || 59 ||
[Analyze grammar]

avatāraṃ tṛtīyaṃ vai harasyāpi manoharam |
yena sā pṛthivī pṛthvī parvataiḥ sahitā dhṛtā || 60 ||
[Analyze grammar]

caturthaṃ narasiṃhaṃ vai kathayāmi sudāruṇam |
ādityā aditeḥ putrā diteḥ putrau mahāvalau || 61 ||
[Analyze grammar]

hiraṇyakaśipurdaityo hiraṇyākṣo mahābalaḥ |
svarge devāḥ sthitāḥ sarve pātāle daityadānavāḥ || 62 ||
[Analyze grammar]

hiraṇyakaśipuścakre daityo rājyaṃ rasātale |
manuputrā dharāpṛṣṭhe sthāpitā devadānavaiḥ || 63 ||
[Analyze grammar]

vyavasthāṃ tāmatikramya hiraṇyakaśipurdvija |
rājyaṃ cakre dharāpṛṣṭhe surendraṃ sa vijitya ca || 64 ||
[Analyze grammar]

saptadvīpavatīṃ pṛthvīṃ gṛhītvā sā'marāvatīm |
grahītukāmo bubhuje putrapautraiḥ kṛtādaraḥ || 65 ||
[Analyze grammar]

prahlādapramukhānputrānsa pīḍayati maṃdadhīḥ |
putreṣu pāṭhyamāneṣu prahlādo'pi papāṭha tat || 66 ||
[Analyze grammar]

yena vai paṭhyamānena jāyate tasya vedanā |
bhuvanadvayarājyena daityo devānna manyate || 67 ||
[Analyze grammar]

tapasā toṣito brahmā dadau tasmai varaṃ prabhuḥ |
amaratvaṃ sa devebhyo manuṣyebhyaḥ surottama || 68 ||
[Analyze grammar]

kasmādapi na me bhūyānmaraṇaṃ yadi cedbhavet |
kiṃcitsiṃho naraḥ kiṃcidyo bhaveddharaṇīdharaḥ || 69 ||
[Analyze grammar]

tasmātkararuhaibhinno mariṣye na dharātale |
evaṃ bhaviṣyatītyuktvā gato brahmā ca vismayam || 70 ||
[Analyze grammar]

kālena gacchatā tasya saṃjāto vigraho mahān |
devāḥ kiṃ me kariṣyaṃti viṣṇunā kiṃ prayojanam || 71 ||
[Analyze grammar]

yaṣṭavyo'haṃ sadā yajñai rudraḥ kiṃ me kariṣyati |
evaṃ hi varttamānasya prahlādaḥ stauti taṃ harim || 72 ||
[Analyze grammar]

yenāsya jāyate mṛtyustameva smarate harim |
yadāsau vāryamāṇo'pi virauti ca hariṃ harim || 73 ||
[Analyze grammar]

caturbhujaṃ śaṃkhagadāsidhāriṇaṃ pītāṃbaraṃ kaustubha lāñchitaṃ sadā |
smarāmi viṣṇuṃ jagadekanāyakaṃ dadāti muktiṃ smṛtamātra eva yaḥ || 74 ||
[Analyze grammar]

anena vacasā kṣubdho daityo detyāndi deśa ha |
mārayadhvaṃ tu taṃ duṣṭaṃ gaja sarpajalāgnitaḥ || 75 ||
[Analyze grammar]

prahlāda uvāca |
gajepi viṣṇurbhujage'pi viṣṇurjale'pi viṣṇurjvalane'pi viṣṇuḥ |
tvayi sthito daitya mayi sthitaśca viṣṇuṃ vinā daityagaṇā'pi nāsti || 76 ||
[Analyze grammar]

yadā sa māryamāṇo'pi mṛtyuṃ prāpnoti na kvacit |
hiraṇyakaśiporvakṣo dahyate krodhavahninā |
tadā śikṣayituṃ putraṃ mukhāgre saṃniveśya ca || 77 ||
[Analyze grammar]

vacobhiḥ kaṭhinaiḥ putraṃ svayaṃ hantuṃ samudyataḥ || |
dhiktvā nārāyaṇaṃ stauṣi mamāriṃ stauṣi cetpunaḥ || 78 ||
[Analyze grammar]

puṣpalāvaṃ laviṣyāmi śiraste'haṃ varāsinā |
ahaṃ viṣṇurahaṃ brahmā rudra indro varaṃ vada || 79 ||
[Analyze grammar]

ātmīyaṃ pitaraṃ muktvā kamanyaṃ stauṣi bālaka || 80 ||
[Analyze grammar]

yadā na paṭhate bālaḥ stauti no pitaraṃ svakam |
daṇḍenāhatya guruṇā prahlādaḥ preritaḥ punaḥ |
vadaikaṃ vacanaṃ śiṣya dehi me gurudakṣiṇām || 81 ||
[Analyze grammar]

yathā me tuṣyate svāmī dadāti vipulaṃ dhanam || 82 ||
[Analyze grammar]

prahlāda uvāca |
praharasva prathamaṃ māṃ kariṣye vacanaṃ guro |
staumi viṣṇumahaṃ yena trailokyaṃ sacarācaram || 83 ||
[Analyze grammar]

kṛtaṃ saṃvarddhitaṃ śāṃtaṃ sa me viṣṇuḥ prasīdatu |
brahmā viṣṇurharo viṣṇu rindro vāyuryamo'nalaḥ || 84 ||
[Analyze grammar]

prakṛtyādīni tattvāni puruṣaṃ paṃcaviṃśakam |
pitṛdehe gurordehe mama dehe'pi saṃsthitaḥ || 85 ||
[Analyze grammar]

evaṃ jānankathaṃ staumi mriyamāṇaṃ narādhamam || 86 ||
[Analyze grammar]

gururuvāca |
nareṣu ko'dhamaḥ śiṣya janmādimaraṇe'dhama |
kathaṃ na pitaraṃ stauṣi mriyamāṇo hariṃ harim || 87 ||
[Analyze grammar]

prahlāda uvāca |
bhojane śayane yāne jvare niṣṭhīvane raṇe |
harirityakṣaraṃ nāsti maraṇe'sau narādhamaḥ || 8 ||
[Analyze grammar]

bhaye rājakule yuddhe vyādhau strīsaṃgame vane |
aśaktau vā'tha saṃnyāse maraṇe bhūmisaṃsthitāḥ |
smaraṃti mātaraṃ mūrkhāḥ pitaraṃ ca narādhamāḥ || 89 ||
[Analyze grammar]

mātā nāsti pitā nāsti nāsti me svajano janaḥ |
hariṃ vinā na ko'pyasti yadyuktaṃ tadvidhīyatām || 90 ||
[Analyze grammar]

ityādivacanaiḥ kruddho hantuṃ daityaḥ samutthitaḥ |
tadā mātā samāgatya putrasya purataḥ sthitā || 91 ||
[Analyze grammar]

bhrātaraḥ svajano bhaginī bhāṣate mā hariṃ vada |
ahaṃ mātā svasā ceyaṃ bhrātaraḥ svajano janaḥ |
yathā saṃmilitairvatsa sthīyate vahuvāsaram || 92 ||
[Analyze grammar]

prahlāda uvāca |
mātā me kā svasā me kā bhrātaraḥ ke pitā ca kaḥ |
svajanaṃ śṛṇu me mātaḥ sahitaiḥ sthīyate sadā || 93 ||
[Analyze grammar]

yasyāḥ pītaṃ mayā mūtraṃ purīṣamudare bahu |
sā mātā narako'smākamagre vaktuṃ na śakyate || 94 ||
[Analyze grammar]

nirmito na dvitīyastu nirmito viśvakarmaṇā |
tvādṛśastu pumānkaścidyasya no hadaye hariḥ || 95 ||
[Analyze grammar]

daśamāsaṃ dhruvaṃ manye mūtraṃ pāsyati tarpitaḥ |
bhrātaro bhrātaraḥ satyaṃ garbhe'pi syuḥ kathaṃ yadi || 96 ||
[Analyze grammar]

yudhyatastānkathaṃ mātā varākī vārayiṣyati |
svajano dṛśyate vṛddhaḥ pareṣu paṇḍitāyate || 97 ||
[Analyze grammar]

kuṭuṃbaṃ bhaṇyate kasmādyaśca nāyāti yāti ca |
baṃdhanaṃ ca kuṭumbasya jāyate narakāya naḥ || 98 ||
[Analyze grammar]

mātā me vidyate cānyā pitānyo bhrātaraśca ye |
svasā svajanasamvandhaṃ jñātvā muktimavāpnuyāt || 99 ||
[Analyze grammar]

mātā prakṛtirasmākaṃ svasā buddhirnigadyate |
ahaṃkārastato jāto yo'hamityanumīyate || 100 ||
[Analyze grammar]

tanmātrāḥ sodarāḥ pañca ye gacchanti sahaiva me |
eṣā prakṛtirasmākaṃ vikāraḥ svajano mama || 101 ||
[Analyze grammar]

eteṣāṃ vāhako yastu puruṣaḥ pañca viṃśakaḥ |
sa me pitā śarīre'sminparamātmā hariḥ sthitaḥ || 102 ||
[Analyze grammar]

yadyasau cityante citte dṛśyate hṛdaye hariḥ |
aṇimādiguṇaiśvaryaṃ padaṃ tasyaiva jāyate || 103 ||
[Analyze grammar]

bhavatā sammataṃ rājyaṃ tanme nityaṃ tṛṇaiḥ samam |
yatra no pūjyate viṣṇurbrahmā rudro'nilo'nalaḥ || 104 ||
[Analyze grammar]

pratyakṣo dṛśyate yastu nirālambo bhramatyasau |
sa eva bhagavānviṣṇurya ete gagane sthitāḥ || 105 ||
[Analyze grammar]

dhruve baddhā grahāḥ sarve ya ete'pyuḍavaḥ sthitāḥ |
te sarve viṣṇuvacasā na pataṃti dharātale || 106 ||
[Analyze grammar]

kāle vināśaḥ sarveṣāṃ tenaiva vihitaḥ svayam |
iti saṃciṃtya me nāsti bhavadbhyo maraṇādbhayam || 107 ||
[Analyze grammar]

iti tadvacanasyāṃte padā hatvā pitā'bravīt |
kutrā'sau hanmi tatpūrvaṃ paścāttvāṃ haribhāṣiṇam || 108 ||
[Analyze grammar]

prahlāda uvāca |
pṛthivyādīni bhūtāni tānyeva bhagavānhariḥ |
sthale jale kiṃ bahunā sarvaṃ viṣṇumayaṃ jagat || 109 ||
[Analyze grammar]

tṛṇe kāṣṭhe gṛhe kṣetre dravye dehe sthito hariḥ |
jñāyate jñānayogena dṛśyate kiṃ nu cakṣuṣā || 110 ||
[Analyze grammar]

brahmālaye yāti rasātale vā dharātale'sau bhramati kṣaṇena |
āghrāti gandhaṃ vidadhāti sarvaṃ śṛṇoti jānāti sa cātra viṣṇuḥ || 111 ||
[Analyze grammar]

ityuktaḥ sahajāṃ māyāṃ tyaktvā siṃhāsanotthitaḥ |
dṛḍhaṃ parikaraṃ baddhvā khaṅgaṃ cākṛṣya cojjvalam || 112 ||
[Analyze grammar]

hatvā taṃ phalakāgreṇa babhāṣe dussahaṃ vacaḥ |
idānīṃ smara re viṣṇuṃ no cejjavalitaku ṇḍalam |
patiṣyati śiro bhūmau phalaṃ pakvaṃ yathā nagāt || 113 ||
[Analyze grammar]

no ceddarśaya taṃ viṣṇumasmātstaṃbhādvinirgatam |
prahlādastu bhayaṃ tyaktvā cakre padmāsanaṃ bhuvi || 114 ||
[Analyze grammar]

vidhāya kaṃdharāṃ netumuccaiḥ śvāsaṃ nirudhya ca |
hṛdi dhyātvā hariṃ devaṃ maraṇāyonmukhaḥ sthitaḥ || 115 ||
[Analyze grammar]

prabho mayā tadā dṛṣṭamāścaryaṃ gaganādbhuvi |
puṣpamālā sthitā kaṇṭhe prahlādasya svayaṃ gatā || 116 ||
[Analyze grammar]

gaganaṃ vyāpyamānaṃ ca kiṃkimevaṃ kṛtaṃ janaiḥ |
jhaṭiti truṭyati stambhācchabdena kṣubhito janaḥ || 117 ||
[Analyze grammar]

dharaṇī yāti pātālaṃ dyaurvā bhūmiṃ sameṣyati |
patiṣyati śiro bhūmau khaḍgaghātāhataṃ nu kim || 118 ||
[Analyze grammar]

tāvatstaṃbhādviniṣkrāntaḥ siṃhanādo bhayaṃkaraḥ |
bhūmau nipatitāḥ sarve daityāḥ śabdena mūrcchitāḥ || 119 ||
[Analyze grammar]

hiraṇyakaśiporhastātkhaḍgacarma papāta ca |
na sa jānāti kiṃ kimetaditi punaḥpunaḥ || 120 ||
[Analyze grammar]

utthito vīkṣate yāvattāvatpaśyati taṃ harim |
adho naraṃ sthitaṃ siṃhamupariṣṭādvibhī ṣaṇam || 121 ||
[Analyze grammar]

daṃṣṭrā karālavadanaṃ lelihānamivāṃbaram |
jājvalyamānavapuṣaṃ pucchācchoṭitamastakam || 122 ||
[Analyze grammar]

mahākaṇṭhakṛtārāvaṃ saśabda miva toyadam |
samucchvasitakeśāṃtaṃ durnirīkṣyaṃ surāsuraiḥ || 123 ||
[Analyze grammar]

narasiṃhamatho dṛṣṭvā nipapāta punaḥ kṣitau |
vigṛhya keśapāśe taṃ bhrāmayāmāsa cāṃbaram || 124 ||
[Analyze grammar]

bhrāmayitvā śataguṇaṃ pṛthivyāṃ samapothayat |
na mamāra sa daityendro brahmaṇo varakāraṇāt || 125 ||
[Analyze grammar]

gaganasthaistadā devai ruccaiḥ saṃsmārito hariḥ |
daityaṃ jānuni cānīya vakṣo hṛṣṭo nirīkṣya ca || 126 ||
[Analyze grammar]

jayajayeti yakṣānāṃ surāṇāṃ so'vadhārayat |
śabdaṃ karṇe bhujau sajjau kṛtvā tau padmalāṃchitau || 127 ||
[Analyze grammar]

bibheda vakṣo daityasya vajraghātakiṇāṃkitam |
nakhaiḥ kundasumaprakhyairasthisaṃghātakarśitam || 128 ||
[Analyze grammar]

bhinne vakṣasi daityendro mamāraca papāta ca |
tadā saharṣamabhavattrailokyaṃ sacarācaram || 129 ||
[Analyze grammar]

mamāpi tṛptiḥ sañjātā prasādāttava keśava |
yadā puratraye dagdhe prasādācchaṃkarasya ca || 130 ||
[Analyze grammar]

hiṇyākṣe punarjātā sā kāle vinipātite |
idānīṃ nāsti me tṛptiḥ kutra yāmi karomi kim || 131 ||
[Analyze grammar]

pṛthivyāṃ kṣatriyāḥ santi na yudhyaṃte parasparam |
devānāṃ dānavaiḥ sārddhaṃ nāsti yuddhaṃ kathaṃ prabho || 132 ||
[Analyze grammar]

idānīṃ balinā vyāptaṃ trailokyaṃ sacarācaram |
pañcamo yo'vatāraste na jāne kiṃ kariṣyati |
valinigrahakālo'yaṃ taddarśaya janārdana || 133 ||
[Analyze grammar]

sārasvata uvāca |
tadetatsakalaṃ śrutvā babhāṣe vāmano munim || 134 ||
[Analyze grammar]

vāmana uvāca |
śṛṇu nārada yadvṛttaṃ hiṇyakaśipau hate |
daityarājaḥ kṛto rājā prahlādo'tīva vaiṣṇavaḥ || 135 ||
[Analyze grammar]

tena rājyaṃ dharāpṛṣṭhe kṛtaṃ saṃvatsarānbahūn |
tasyāpi kurvato rājyaṃ vigraho hi suraiḥ samam || 136 ||
[Analyze grammar]

no paśyāmyapi daityānāṃ pūrvavairamanusmaran |
utpādya putrānsabahūnrājyaṃ cakre sa puṣkalam || 137 ||
[Analyze grammar]

virocanādbalirjāto bāla eva yadā'bhavat |
ekānte sa hariṃ jñātvā tadā yogena kenacit || 138 ||
[Analyze grammar]

muktvā rājyaṃ priyānputrāngato'sau girisānuṣu |
kalpāntasthāyinaṃ dehaṃ tasya cakre janārddanaḥ || 139 ||
[Analyze grammar]

daityānāṃ dānavānāṃ ca bahūnāṃ rājyakāraṇe |
vivādotīva saṃjātaḥ ko no rājā bhavediti || 140 ||
[Analyze grammar]

nārada uvāca |
hiṇyākṣasya ye putrāḥ pautrāśca balavattarāḥ |
virocanaprabhṛtayaḥ santi ye balavattarāḥ || 141 ||
[Analyze grammar]

vṛṣaparvāpi balavānrājyārthe samupasthitaḥ |
indravitteśavaruṇā vāyuḥ sūryonalo yamaḥ || 142 ||
[Analyze grammar]

daityena sadṛśā na syurbalarūpakṣamādibhiḥ |
audāryādiguṇaiḥ kṛtvā santatyā cāsurādhikaḥ || 143 ||
[Analyze grammar]

śukreṇā cāryamāṇāste yuddhyaṃte ca parasparam |
amṛtāharaṇe dauṣṭyaṃ yadā daityāḥ smaranti tat || 144 ||
[Analyze grammar]

pītāvaśeṣamamṛtaṃ kasmādyacchaṃti devatāḥ |
nāsmākamiti saṃnahya yudhyante ca parasparam || 145 ||
[Analyze grammar]

kadācidapi no yuddhaṃ viśrāṃtimupagacchati |
ekakāryodyatā yasmādbahavo daityadānavāḥ || 146 ||
[Analyze grammar]

pītvā'mṛtaṃ surā jātā amarāste jayanti ca |
devadānavadaityānāṃ gandharvoragarakṣasām |
viṣṇurbalādhiko yuddhe tadetatkāraṇaṃ vada || 147 ||
[Analyze grammar]

vāmana uvāca |
anādinidhanaḥ karttā pātā harttā janārdanaḥ |
eko'yaṃ sa śivo devaḥ sa cāyaṃ brahmasaṃjñitaḥ |
ekasya tu yadā kāryaṃ jāyate bhuvane nṛpa || 148 ||
[Analyze grammar]

tasya dehaṃ samāśritya mṛtyukāryaṃ kurvaṃti te |
brahmāṃḍaṃ sakalaṃ viṣṇoḥ karadaṃ varado yataḥ |
tasmādbalādhiko viṣṇurna tathānyo'sti kaścana || 149 ||
[Analyze grammar]

pālanāyodyato viṣṇuḥ kimanyaiścarmacakṣubhiḥ |
indrādyāśca surāḥ sarve viṣṇorvyāpārakāriṇaḥ || 150 ||
[Analyze grammar]

sṛṣṭiṃ kṛtvā tato brahmā kailāse saṃsthito haraḥ |
na śakyate surairviṣṇurbhrāmyante bhuvanatraye || 151 ||
[Analyze grammar]

jagatyasminyadā kaścidvaiparītyena vartate |
tasyocchedaṃ samāgatya karotyeva janārdanaḥ || 152 ||
[Analyze grammar]

tvamejaya mahābāho na mano nāradā'dayam |
sarvapāpaharāṃ divyāṃ tāṃ kathāṃ kathayāmyaham || 153 ||
[Analyze grammar]

purā vivadatāṃ teṣāṃ daityānāṃ rājyahetave |
prahlādena samāgatya vyavasthā vihitā svayam || 154 ||
[Analyze grammar]

sarvalakṣaṇasaṃ panno dīrghāyurbalavattaraḥ |
yajñaśīlaḥ sadānaṃdo bahuputrotidurjayaḥ || 155 ||
[Analyze grammar]

na yudhyate suraiḥ sākaṃ viṣṇuṃ yo vetti durjayam |
saṃgrāme maraṇaṃ nāsti yasya yaḥ sarvadakṣiṇaḥ || 156 ||
[Analyze grammar]

ātmano vacanaṃ vyarthaṃ na karoti kathaṃcana |
sarveṣāṃ putrapautrāṇāṃ madhye yo rājate śriyā || 157 ||
[Analyze grammar]

abhiṣiktastu śukreṇa sa vo rājā bhavediti |
gurupramāṇamityuktvā yayau yatrāgataḥ punaḥ || 158 ||
[Analyze grammar]

tathā ca kṛtavaṃtaste sahitā daityadānavāḥ |
virocanaprabhṛtayaḥ putrāḥ pautrāḥ svayaṃgatāḥ || 159 ||
[Analyze grammar]

pratyekaṃ vīkṣitāḥ sarve guruṇā jñānapūrvakam |
prahlādena guṇāḥ proktā na te saṃti virocane || 160 ||
[Analyze grammar]

anyeṣāmapi daityānāṃ vṛṣaparvāpi nedṛśaḥ |
yathā nirīkṣitāḥ putrā baliprabhṛtayo mune |
sarvānsaṃvīkṣya śukreṇa balau dṛṣṭā guṇāstathā || 161 ||
[Analyze grammar]

balidehe'dhikāndṛṣṭvā daityebhyo viniveditāḥ |
balirguṇādhiko daityāḥ kathaṃ kāryaṃ bhavenmayā || 162 ||
[Analyze grammar]

kenāpi daivayogena baliriṃdro bhaviṣyati |
yādṛśastu pitā loke tādṛśastu suto bhavet || 163 ||
[Analyze grammar]

pautraśca niścitaṃ tādṛgbhavatīti na cetsutaḥ |
prahlādastu mahāyogī vaiṣṇavo viṣṇuvallabhaḥ || 164 ||
[Analyze grammar]

tasmādvirocane keciddhiraṇyakaśiporguṇāḥ |
jyeṣṭho virocano rājye yadi cetkriyate'surāḥ |
narasiṃhaḥ samāgatya niścitaṃ mārayiṣyati || 165 ||
[Analyze grammar]

muktaṃ virocanenāpi rājyaṃ maraṇabhīruṇā |
prahlādasya guṇāḥ sarve balidehe vyavasthitāḥ || 166 ||
[Analyze grammar]

evaṃ te samayaṃ kṛtvā baliṃ rājye'bhyaṣiṃcaya n |
yaḥ prahlādaḥ sa vai viṣṇuryo viṣṇuḥ sa baliḥ svayam || 167 ||
[Analyze grammar]

ato mitrīkṛto devairvigrahaistu vivarjitaḥ |
ekībhāvaṃ kṛtaṃ sarvaṃ balirājye surāsuraiḥ || 168 ||
[Analyze grammar]

tasyāpi bhāṣitaṃ śrutvā deveṃdro mama maṃdire |
samāgatā vālakhilyāḥ śaptohaṃ vāmanaḥ kṛtaḥ || 169 ||
[Analyze grammar]

prasādya te mayā proktāḥ śāpamuktipradā mama |
bhaviṣyatīti tairuktaṃ balinigrahaṇādanu || 170 ||
[Analyze grammar]

tavāpi kautukaṃ yuddhe baliryajñaṃ karoti ca |
devānāṃ nigraho nāsti sarve yajñe samāgatāḥ || 171 ||
[Analyze grammar]

sa māṃ yajati yajñena vadhaṃ tasya karotu kaḥ |
ahaṃ ca vāmano jāto nāradaḥ kautukānvitaḥ || 172 ||
[Analyze grammar]

viparītamidaṃ sarvaṃ varttate mama cetasi |
tathā'pi kramayogena sarvaṃ bhavyaṃ karomyaham || 173 ||
[Analyze grammar]

nārada uvāca |
prasādaṃ kuru deveśa yuddhārthaṃ kautukaṃ mama |
ekena brāhmaṇenājau hanyaṃte kṣatriyā yadā |
pitrā proktaṃ ca me pūrvaṃ tadā yuddhaṃ bhaviṣyati || 174 ||
[Analyze grammar]

brāhmaṇosi bhavāñjātaḥ kadā yuddhaṃ kariṣyasi |
vihasya vāmano brūte satyaṃ tava bhaviṣyati || 175 ||
[Analyze grammar]

jamadagnisuto bhūtvā guruṃ kṛtvā maheśvaram |
kārttavīryaṃ vadhiṣyāmi bahubhiḥ kṣatriyaiḥ saha || 176 ||
[Analyze grammar]

samaṃtapaṃcake paṃca kariṣye rudhirahradān |
tatrāhaṃ tarpayiṣyāmi pitṝnatha pitāmahān || 177 ||
[Analyze grammar]

puṇyakṣetraṃ kariṣyāmi bhavāṃstatrāgamiṣya ti |
paraṃ ca kautukaṃ yuddhe bhaviṣyati tava priyam || 178 ||
[Analyze grammar]

brāhmaṇebhyo grahīṣyaṃti yadā kuṃ kṣatriyāḥ punaḥ |
tadaiva tānhaniṣyāmi punardā syāmi medinīm || 179 ||
[Analyze grammar]

trisaptavāraṃ dāsyāmi jitvā jitvā vasuṃdharām |
śastranyāsaṃ kariṣyāmi nirviṇṇo yuddhakarmaṇi |
vihariṣyāmi ramyeṣu vaneṣu girisānuṣu || 180 ||
[Analyze grammar]

laṃkāyāṃ rāvaṇo rājyaṃ kariṣyati mahābalaḥ |
trailokyakaṃṭakaṃ nāma yadāsau dhārayiṣyati || 181 ||
[Analyze grammar]

tadā dāśarathī rāmaḥ kausalyānaṃdavarddhanaḥ |
bhaviṣye bhrātṛbhiḥ sārddhaṃ gamiṣye yajñamaṃḍape || 182 ||
[Analyze grammar]

tāḍakāṃ tāḍayitvāhaṃ subāhuṃ yajñamaṃdire |
nītvā yajñādgamiṣyāmi sītāyāstu svayaṃvare || 183 ||
[Analyze grammar]

pariṇeṣyābhi tāṃ sītāṃ bhaṃktvā māheśvaraṃ dhanuḥ |
tyaktvā rājyaṃ gamiṣyāmi vane varṣāṃścaturdaśa || 184 ||
[Analyze grammar]

sītāharaṇajaṃ duḥkhaṃ prathamaṃ me bhaviṣyati |
nāsākarṇavihīnāṃ tāṃ kariṣye rākṣasīṃ vane || 185 ||
[Analyze grammar]

caturddaśasahasrāṇi triśiraḥkharadūṣaṇān |
dhatvā haniṣye mārīcaṃ rākṣasaṃ mṛgarūpiṇam || 186 ||
[Analyze grammar]

hṛtadāro gamiṣyāmi dagdhvā gṛdhraṃ jaṭāyuṣam |
sugrīveṇa samaṃ maitrīṃ kṛtvā hatvā'tha vālinam || 187 ||
[Analyze grammar]

samudraṃ baṃdhayiṣyāmi nalapramukhavānaraiḥ |
laṃkāṃ saṃveṣṭayiṣyāmi mārayiṣyāmi rākṣasān || 188 ||
[Analyze grammar]

kumbhakarṇaṃ nihatyājau meghanādaṃ tato raṇe |
nihatya rāvaṇaṃ rakṣaḥ paśyatāṃ sarvarakṣasām || 189 ||
[Analyze grammar]

vibhīṣaṇāya dāsyāmi laṃkāṃ devavinirmitām |
ayodhyāṃ punarāgatya kṛtvā rājyamakaṃṭakam || 190 ||
[Analyze grammar]

kāladurvāsasościtracaritreṇāmarāvatīm |
yāsyehaṃ bhrātṛbhiḥ sārddhaṃ rājyaṃ putre nivedya ca || 191 ||
[Analyze grammar]

dvāpare samanuprāpte kṣatriyairbahubhirmahī |
bhārākrāṃtā na śaknoti pātālaṃ gaṃtumudyatā || 192 ||
[Analyze grammar]

mathurāyāṃ tadā karttā kaṃso rājyaṃ mahāsuraḥ |
śiśupālajarāsaṃdhau kālanemirmahāsuraḥ || 193 ||
[Analyze grammar]

pauṃḍrako vāsudevaśca bāṇo rājā mahāsuraḥ |
gajavājituraṃgāḍhyā vadhyaṃte me tadā mune || 194 ||
[Analyze grammar]

kalau svalpodakā meghā alpadugdhāśca dhenavaḥ |
dugdhe ghṛtaṃ na caivāsti nāsti satyaṃ janeṣu ca || 195 ||
[Analyze grammar]

corairupahatā lokā vyādhibhiḥ paripīḍitāḥ |
trātāraṃ nābhi gacchaṃti yuddhāvasthāṃ gatā api || 196 ||
[Analyze grammar]

kṣudrāḥ paścimavāhinyo nadyaḥ śuṣyaṃti kārttike |
ekādaśīvrataṃ nāsti kṛṣṇā yā ca caturddaśī || 197 ||
[Analyze grammar]

na jānāti janaḥ kaścidvikrāṃtamapi sve gṛhe |
daridropahataṃ sarvaṃ saṃdhyāsnānavivarjitam |
bhaviṣyati kalau sarvaṃ na tatpūrvayugatraye || 198 ||
[Analyze grammar]

pitaraṃ mātaraṃ putrastyaktvā bhāryāṃ niṣevate |
na guruḥ svajanaḥ kaścitko'pi kaṃ nānusevate || 199 ||
[Analyze grammar]

yathāyathā kalirvyāptiṃ karoti dharaṇītale |
tathātathā janaḥ sarva ekākāro bhaviṣyati || 200 ||
[Analyze grammar]

mlecchairupahataṃ sarvaṃ saṃdhyāsnānavivarjitam |
kalkirityabhivikhyāto bhaviṣye brāhmaṇo hyaham || 201 ||
[Analyze grammar]

mlecchānāṃ chedanaṃ kṛtvā yājñavalyapurohitaḥ |
bahusvarṇena yajñena yakṣye niṣkṛtikāraṇāt || 202 ||
[Analyze grammar]

bhaviṣyaṃtyavatārā me yuddhaṃ teṣu bhaviṣyati |
idānīṃ balinā yuddhaṃ kariṣyaṃti na devatāḥ || 203 ||
[Analyze grammar]

sa māṃ yajati daityendro na me vadhyo balirbhavet |
sarvasvadānaniyamaṃ karoti sa mahādhvare || 204 ||
[Analyze grammar]

sārasvata uvāca |
ityuktvā nāradaṃ devo visṛjya tamathābhyagāt |
draṣṭuṃ balikṛtaṃ yajñaṃ devakāryaprasiddhaye || 205 ||
[Analyze grammar]

vāmano nagaraṃ gatvā vīkṣamāṇo gṛhādgṛham |
brāhmaṇānāṃ gṛhaṃ gatvā bhojanaṃ sa tu yācate || 206 ||
[Analyze grammar]

nityaṃ snānaparo vipro vedādhyayanatatparaḥ |
vāmano labhate bhikṣāṃ bhojanaṃ dvijamaṃdire || 207 ||
[Analyze grammar]

catuṣpatheṣu ramyeṣu devatāyataneṣu ca |
āste parivṛto lokaiścālayanvipulāṃ kaṭim || 208 ||
[Analyze grammar]

śiro vidhūnate sthūlaṃ sthūlaskandho mahāhanuḥ |
nṛtyate tālamānena gāyatyatimanoharam || 209 ||
[Analyze grammar]

vedānadhīte caturo vāmano dvijasaṃsadi |
daityānāṃ tanayāḥ sarve brāhmaṇānāṃ tathaiva ca || 210 ||
[Analyze grammar]

vāmanaṃ paryupāsaṃte divārātraṃ manoramam |
atha taiḥ sakalairnīto vāmano yajñamaṃḍape || 211 ||
[Analyze grammar]

niścitaṃ maṭhikāsthānaṃ yācitavyo balistvayā |
tadāsmākaṃ mahacchreyo deśasya nagarasya ca || 212 ||
[Analyze grammar]

vijñapto vāmanaḥ sarvairdaityadvijakumārakaiḥ |
vāmana vastavyaṃ daityeṃdranagare sadā || 213 ||
[Analyze grammar]

sārasvata uvāca |
praviveśa tathetyuktvā vāmano yajñamaṃḍape |
tataḥ kolāhalo jāto dvāḥsthairdvāri kṛto mahān || 214 ||
[Analyze grammar]

brāhmaṇairbahubhiḥ sārddhaṃ vedānuccārayansthitaḥ |
tato vedadhvanirjāto mahānvai yajñamaṃḍapre || 215 ||
[Analyze grammar]

praviṣṭau prathamaṃ daityau daityāya viniveditaḥ |
draṣṭuṃ samāgato deva brāhmaṇo vāmano'dhvare || 216 ||
[Analyze grammar]

bhavaṃtaṃ kautukāttāvaddvāradeśe samāviśat |
eka eva yathāyāti vāmanastava sannidhau || 217 ||
[Analyze grammar]

nirīho vāmano deva yāvattatraiva kiṃcana |
vedānāṃ tu dhvaniṃ kṛtvā caturṇāmekavaktrataḥ || 218 ||
[Analyze grammar]

balirhṛṣṭo'bravīdvākyaṃ dvāḥsthamenaṃ praveśaya |
pūjayiṣyāmi vipredraṃ dāsye cāsya yadīpsitam || 219 ||
[Analyze grammar]

smarāmi smṛtivākyāni yāni prāha gururmama |
kiṃcidvedamayaṃ pātraṃ kiṃcitpātraṃ tapomayam || 220 ||
[Analyze grammar]

āgamiṣyati yatpātraṃ tatpātraṃ tārayiṣyati |
yajñe pravarttamāne tu dātavyā dakṣiṇā mayā || 221 ||
[Analyze grammar]

vāmano na vicāryastu satyamastu vaco mama |
iti śrutvā guruḥ śukro vārayāmāsa taṃ balim || 222 ||
[Analyze grammar]

śukra uvāca |
dvāri pūjyā dvijāḥ saveṃ dīnāṃdha kṛpaṇādayaḥ |
badhirā vāmanāḥ kubjā rogiṇo ye tu niṣṭhurāḥ || 223 ||
[Analyze grammar]

suvarṇarajatairvastrairvāmano dvāri pūjyatām |
caturṇāṃ tu vṛthā janma vṛthā dānāni ṣoḍaśa || 224 ||
[Analyze grammar]

aputrāṇāṃ vṛthā janma ye ca dharmabahiṣkṛtāḥ |
parapākaṃ ca yeśnaṃti paradāraratāśca ye || 225 ||
[Analyze grammar]

anyāyenārjitaṃ vittaṃ na deyaṃ śreya icchatā |
vyarthamabrāhmaṇe dānamārūḍhapatite tathā || 226 ||
[Analyze grammar]

saṃdhyāhīne dvije naṣṭe patite taskare tathā |
guroścāprītijanake pitṛmātṛparāṅmukhe || 227 ||
[Analyze grammar]

brahmabandhau ca yaddataṃ yaddattaṃ vṛṣalīpatau |
vedavikrayake caiva kṛtaghne grāmayājake || 228 ||
[Analyze grammar]

strīnirjite ca yaddattaṃ vyālagrāhe tathaiva ca |
parivāreṣu yaddattaṃ vṛthā dānāni ṣoḍaśa || 229 ||
[Analyze grammar]

sārasvata uvāca |
atrāṃtare balirbrūte naivaṃ vācyaṃ tvayā guro |
vedānadhīte yaḥ kaścitsa me viṣṇuḥ samāgataḥ || 230 ||
[Analyze grammar]

na vilaṃbastu karttavyaḥ śrotriye gṛhamāgate |
abhyutthānena vacasā pādaprakṣālanena ca || 231 ||
[Analyze grammar]

yathā śaktyā pradātavyaṃ bhojanaṃ gṛhamedhinā |
apūjito yadā yāti vāmano maṃḍapādbahiḥ || 232 ||
[Analyze grammar]

tadāyaṃ vyarthatāṃ yāti yajñaḥ sarvasvadakṣiṇaḥ |
atrāṃtare samānīto vāmano balisaṃnidhau || 233 ||
[Analyze grammar]

āyāṃtaṃ dadṛśe daityo vāmanaṃ viṣṇurūpiṇam |
jājvalyamānaṃ vapuṣā piṃgalaṃ sūryasaṃnibham || 234 ||
[Analyze grammar]

utthāyābhimukhaḥ prāyānnamaskṛtyāgrataḥ sthitaḥ |
dhanyo'haṃ yasya me yajñe prāpto viṣṇusamo dvijaḥ || 235 ||
[Analyze grammar]

vedimadhye samānīto dadau tasyāsanaṃ baliḥ |
pādyamācamanīyaṃ ca dattvārghyaṃ viṣṭaraṃ baliḥ |
śrīkhaṃḍagaṃdhapuṣpādyaiḥ pūjayitvāgrataḥ sthitaḥ || 236 ||
[Analyze grammar]

madhuparkaṃ ca gāṃ tasmai satvaraṃ sa nivedya ca |
āghrāte madhuparke ca vāmanena tataḥ param || 237 ||
[Analyze grammar]

svāgataṃ balinā proktaṃ svastītyuktaṃ dvijanmanā |
ahamarthī samāyāto dīyatāṃ vada kiṃ vibho || 238 ||
[Analyze grammar]

medinīṃ dehi me daitya kiyanmātrāṃ dvijottama |
vāsārthaṃ mama daityendra dīyatāṃ me krama trayam || 239 ||
[Analyze grammar]

vidhāya maṭhikāṃ divyāṃ śiṣyānadhyāpayāmyaham |
dattaṃ kramatrayaṃ tubhyaṃ gṛhītaṃ vāmano'bravīt || 240 ||
[Analyze grammar]

mā dehītyavadacchukro viṣṇureva sanātanaḥ |
hṛṣṭo brūte baliḥ śukraṃ pātraṃ syātkimataḥ param || 241 ||
[Analyze grammar]

savyaṃ kṛtvā balirdarbhānsākṣatāndakṣiṇe kare |
prayogaṃ na guruścakre na muṃcati jalaṃ kare || 242 ||
[Analyze grammar]

vismitā ṛṣayaḥ sarve hotāro ye sabhāsadaḥ |
brāhmaṇā baṭavo daityā bhāryāputrāśca bāṃdhavāḥ || 243 ||
[Analyze grammar]

dattaṃ gṛhītamityukte kasmāttoyaṃ na muñcati |
vāmanāya kare toyaṃ vivekāya pradīyate || 244 ||
[Analyze grammar]

yaddānaṃ vacasā dattaṃ karmaṇā nopapādyate |
vidhāya narake pūye yajamānaṃ na niṣkṛtiḥ || 245 ||
[Analyze grammar]

uśanā prāha daityendra vāmano harirityayam |
kenāpi daivayogena tvāṃ draṣṭuṃ samupāgataḥ || 246 ||
[Analyze grammar]

apriyaṃ vā priyaṃ vāpi na jāne kiṃ kariṣyati |
babhāṣe bhārgavaṃ yaṣṭā śrūyatāṃ vacanaṃ guro || 247 ||
[Analyze grammar]

procyate dānakāleṣu yajamānairdvijairapi |
ahamindro dvijo viṣṇurdravyamādityadevatā |
tatkathaṃ na mayā deyaṃ viṣṇave prīyatāmiti || 248 ||
[Analyze grammar]

ityuktvā sa dadau toyaṃ vāmanāya kare baliḥ |
tataḥ kimidamityuktvā saṃsthito maṇḍapādbahiḥ || 249 ||
[Analyze grammar]

madhye'pi vāmano vipro balimātro vabhūva saḥ |
dattahasto'surendreṇa grahītuṃ tu padatrayam || 250 ||
[Analyze grammar]

yajamānadvijau haṣṭau dṛṣṭau yajñe surādibhiḥ |
vavṛdhe vāmanotīva kṛtvā rūpaṃ caturbhujam || 251 ||
[Analyze grammar]

nārado'pi samāyāto babhāṣe ki kṛtaṃ bale |
śiṣyābhyāṃ sahito hṛṣṭo narīnarti puraḥ sthitaḥ || 252 ||
[Analyze grammar]

gṛhāṇa dakṣiṇāṃ deva sabhāryo bhāṣate baliḥ |
adya kiṃ na mayā prāptaṃ yadgṛhṇāti janārddanaḥ || 253 ||
[Analyze grammar]

sārddhakramakṣayaṃ kṛtvā dharaṇīṃ yācate trayam |
yadasti tena kartavyaḥ santoṣo madhusūdana || 254 ||
[Analyze grammar]

varddhamānaṃ hariṃ dṛṣṭvā brāhmaṇā ṛṣayaḥ surāḥ |
tuṣṭuvurgagane yāṃtaṃ bhagavaṃtaṃ janārddanam || 255 ||
[Analyze grammar]

devarṣaya ūcuḥ |
jaya deva jayānanta jaya viṣṇo jayā'cyuta |
jaya matsya namastubhyaṃ jaya kūrma dharādhara || 256 ||
[Analyze grammar]

varāhāya namastubhyaṃ narasiṃha namonamaḥ |
jāmadagnya namastubhyaṃ jaya rāma salakṣmaṇa || 257 ||
[Analyze grammar]

jaya kṛṣṇa jagannātha jaya devakinandana |
namāmi buddhaṃ kṛṣṇaṃ ca kalkinaṃ praṇamāmyaham || 258 ||
[Analyze grammar]

sārasvata uvāca |
narīnarti tathā stauti nārado gaganaṃ gataḥ |
yoginaḥ sanakādyā ye stuvaṃti ca janārdanam || 259 ||
[Analyze grammar]

antarikṣe gate kṛṣṇe varddhamāne baleḥ puraḥ |
ūrdhvavaktrāḥ sthitāḥ sarve nirī kṣante divākaram || 260 ||
[Analyze grammar]

dṛṣṭacchatrākṛtistāvatpaścādūrdhvaṃ gato hariḥ |
cūḍāmaṇirivābhāti bhāskaro harimastake || 261 ||
[Analyze grammar]

daityairnirīkṣitaḥ samyaglalāṭe tilakāyate |
hariḥ saṃvarddhate yāvatkarṇe'sau kuṇḍalāyate || 262 ||
[Analyze grammar]

varddhamānasya ca harerhṛdaye kaustubhāyate |
iṃdrādyā devatā rudrā vasavo gagane sthitāḥ || 263 ||
[Analyze grammar]

ūrdhvaṃ punaryatra harirna tatra gaganaṃ matam |
vanamālā tadā kaṇṭhe vāsavena niveśitā || 264 ||
[Analyze grammar]

pṛthivī kampate sarvā divisthaṃ sūryamaṇḍalam |
kiṃ bhaviṣyati daityāste bhītāḥ paśyaṃti bhāskaram || 265 ||
[Analyze grammar]

nābhau padmāyate sūryaḥ kaṭau ca raśanāyate |
evaṃ saṃvarddhito viṣṇurjagṛhe ca padadvayam || 266 ||
[Analyze grammar]

sthānaṃ nāsti tṛtīyasya brahmāṃḍaṃ sakalaṃ kṛtam |
ahardaṇḍo jagatsraṣṭā brahmadaṃḍāyate tadā || 267 ||
[Analyze grammar]

devadānava gaṃdharvamanuṣyoragapannagaiḥ |
pūjyate caraṇo viṣṇoḥ stūyate cānumīyate || 268 ||
[Analyze grammar]

dharmātmā yatadaṇḍo hi gaṃdharvairgīyate muhuḥ |
jyotiścakrākṣadaṃḍaḥ kiṃ hariṇā nirmitaḥ svayam || 269 ||
[Analyze grammar]

jitvedaṃ bhuvanaṃ gaṃgā dhvajadaṃḍo'maraiḥ kṛtaḥ |
trivikramāṃghridaṇḍo'yaṃ kīrtidaṃḍāyate dhruvam || 270 ||
[Analyze grammar]

vegenākṣipya hariṇā nīto brahmāṃḍamastake |
pādastanmastakaṃ bhittvā bahiryāsyati vegataḥ || 271 ||
[Analyze grammar]

tāvadbrahmāṃḍavego'yaṃ virāḍiti hi saṃjñitaḥ |
sa sarva bījarūpo hi paramātmeti gadyate || 272 ||
[Analyze grammar]

tenedaṃ sakalaṃ jātaṃ pādasyāgre vyavasthitam |
brahmāṃḍabhedanaṃ kṛtvā na gantavyaṃ bahistvayā || 273 ||
[Analyze grammar]

tenaiva saha brahmāṃḍe paphāla caraṇo hareḥ |
brahmāṃḍaṃ jarjaraṃ jātaṃ pādasaṃkocanādapi || 274 ||
[Analyze grammar]

bhinne tasminsamāyātaṃ brāhmaṃ toyaṃ jagattraye |
viṣṇupādodbhavā gaṃgā mastakānniḥsṛtā tadā || 275 ||
[Analyze grammar]

trailokyaplāvinī devī yā rudreṇa svayaṃ dhṛtā |
svardhunī pūjyate svarge gaṃgeti gāṃ gatā satī || 276 ||
[Analyze grammar]

pātāle sā yadā prāptā khyātā tripathagaiva sā |
yasyāḥ smaraṇamātreṇa sarvapāpakṣayo bhavet || 277 ||
[Analyze grammar]

darśanādaśvamedhasya saṃpūrṇasya phalaṃ labhet |
snānamātreṇa naśyeta saptajanmakṛtaṃ tvagham || 278 ||
[Analyze grammar]

snātvā saṃpūjayedyastu devau hariharau naraḥ |
indralokamatikramya viṣṇuloke mahīyate || 279 ||
[Analyze grammar]

viṣṇupādodakaṃ pītvā jñātvā tattvāni saṃyamī |
upoṣya divasaṃ viṣṇormuktiṃ gacchati dehavān || 280 ||
[Analyze grammar]

śuddhasvabhāvasattvasthā viraktā janmabhūmiṣu |
saṃsārabaṃdhanaṃ chittvā yāti te paramāṃ gatim || 281 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye balinigrahavṛttāṃtavarṇanaṃnāmāṣṭādaśo'dhyāyaḥ || 18 ||
[Analyze grammar]