Chapter 14

[English text for this chapter is available]

sārasvata uvāca |
vastrāpathe mahākṣetre nagare vāmane purā |
putraśokābhisaṃtapto vasiṣṭho bhagavānṛṣiḥ || 1 ||
[Analyze grammar]

ājagāma tapastaptuṃ svarṇarekhānadītaṭe |
īśānakoṇe nagarātsvarṇarekhānadījale || 2 ||
[Analyze grammar]

snātvā dhyātvā śivaṃ devaṃ manasā'cintayadyadā |
tadā rudraḥ samāyātastrinetro vṛṣabhadhvajaḥ |
maharṣe tava tuṣṭo'haṃ kiṃ karomi vadasva tat || 3 ||
[Analyze grammar]

vasiṣṭha uvāca |
yadi tuṣṭo mahādeva varo deyo mamādhunā |
tadā'tra bhavatā stheyaṃ yāvadācaṃdratārakam || 4 ||
[Analyze grammar]

atra snānaṃ kariṣyaṃti ye narāḥ pāpakarmiṇaḥ |
teṣāṃ pāpakṣayo deva kartavyo bhavatā sadā || 5 ||
[Analyze grammar]

narā ye pāpakarmāṇaḥ pūjayaṃti trilocanam |
tānnarānnaya deveśa vimānaiḥ śivamaṃdiram || 6 ||
[Analyze grammar]

sārasvata uvāca |
tathetyuktā haro devastatraivāṃtara dhīyata |
hiraṇyakaśipuṃ hatvā narasiṃho mahābalaḥ |
trailokyamiṃdrāya dadau kālarudraṃ svayaṃ yayau || 7 ||
[Analyze grammar]

tadanvaye balirjātaḥ sa cātīva balā dhikaḥ |
ekātapatrāṃ pṛthivīṃ baliścakre balādhikaḥ |
akṛṣṭapacyā sujalā dharitrī sasyaśālinī || 8 ||
[Analyze grammar]

gandhavaṃti ca puṣpāṇi rasavaṃti phalāni ca |
āskandhaphalino vṛkṣāḥ puṭake puṭake madhu || 9 ||
[Analyze grammar]

caturvedā dvijāḥ sarve kṣatriyā yuddhakovidāḥ |
goṣu sevāparā vaiśyāḥ śūdrāḥ śuśrūṣaṇe ratāḥ || 10 ||
[Analyze grammar]

sadācārā janapadā ītivyādhivivarjitāḥ |
hṛṣṭapuṣṭajanāḥ sarve sadānaṃdāḥ sadodyatāḥ || 11 ||
[Analyze grammar]

kuṃkumāguruliptāṃgāḥ suveṣāḥ sādhumaṃḍitāḥ |
dāridryaduḥkhamaraṇairvimuktāścirajīvinaḥ || 12 ||
[Analyze grammar]

dīpoddyotitabhūbhāgā rātrāvapi yathā dine |
vicaraṃti tathā martyā devā devālaye yathā || 13 ||
[Analyze grammar]

pṛthivyāṃ svargarūpāyāṃ rājyaṃ cakre'suro baliḥ |
nityaṃ vivāhavāditrairnāditaṃ bhūpamaṃdiram || 14 ||
[Analyze grammar]

dharitrīṃ bubhuje daityo devarājo yathā divi |
devendro balinā nityaṃ yajñaiḥ saṃtoṣitastadā || 15 ||
[Analyze grammar]

devānāṃ dānavānāṃ ca nāsti yuddhaṃ parasparam |
eka eva mahīpālo yuddhaṃ nāsti dharātale || 16 ||
[Analyze grammar]

sapatnakakalirnāma nāsti yuddhaṃ harergajaiḥ |
na sarppanakulairnityaṃ na biḍālaiśca mūṣakaiḥ || 17 ||
[Analyze grammar]

maitrībhāvaṃ gataṃ sarvaṃ jagatsthāvara jaṃgamam |
trailokyabhramaṇaṃ kṛtvā nārado naṃdane vane || 18 ||
[Analyze grammar]

gato na paśyate yuddhaṃ trailokye sacarācare |
tāvattasyodare pīḍā mahatī samajāyata || 19 ||
[Analyze grammar]

na me snānādinā kāryaṃ tarppaṇaiḥ kiṃ prayojanam |
japahomādinā sarvamanyathā mama ceṣṭitam || 20 ||
[Analyze grammar]

tatsnānaṃ yatra yudhyante gajā daṃtavighaṭṭanaiḥ |
sā saṃdhyā yatra nihataiḥ kabandhairbhūrvibhūṣitā || 21 ||
[Analyze grammar]

kuṃtaghātavinirbhinnagajakumbhodbhavāsṛjā |
tṛpyaṃti yatra kravyādāstarpaṇaṃ tanmama priyam || 22 ||
[Analyze grammar]

gajaśīrṣairagamyāste nihatāḥ kṣatriyā raṇe |
sa homo yatra hūyaṃte gajāśca narapuṃgavāḥ || 23 ||
[Analyze grammar]

śabdāgnau nāradasyāyaṃ homastrai lokyaviśrutaḥ |
chinnapādaśirohastairaṃtarāṃtravilabitaiḥ || 24 ||
[Analyze grammar]

yadarcyate bhūmitalaṃ tanme nityaṃ surārcanam |
kiṃ devairdivi me kāryaṃ kiṃ manuṣyairdharātale || 25 ||
[Analyze grammar]

pannagaiḥ kiṃ tu pātāle na yudhyante parasparam |
tathā kariṣye devendrādupendrācca dharātale || 26 ||
[Analyze grammar]

rasātalaṃ baliryātu satyamastu vaco mama |
jīvitenāpi rājyena yadā dāmodaraṃ harim || 27 ||
[Analyze grammar]

toṣayiṣyati yatnena tadendro'sau bhaviṣyati |
devendro vṛtrahā bhūtvā bhraṣṭarājyo bhaviṣyati || 28 ||
[Analyze grammar]

yadā vastrāpathe gatvā bhavaṃ bhāvena pūjayet |
surādhipastadā bhūyo brahmahatyāvivarjitaḥ || 29 ||
[Analyze grammar]

anena mantrajāpyena sa śāṃtodarave danaḥ |
nārado devarājasya samīpaṃ sahasā yayau || 30 ||
[Analyze grammar]

siṃhāsanaṃ samāruhya nandane saṃsthito hariḥ |
āste parivṛto deverdevarājo mahābalaḥ || 31 ||
[Analyze grammar]

nirīkṣamāṇo nṛtyantīṃ raṃbhāṃ tāṃ surasundarīm |
āyāṃtaṃ dadṛśe devo nāradaṃ vismayānvitaḥ || 32 ||
[Analyze grammar]

aho viruddho bhagavānnārado mayi dṛśyate |
nṛtyate kiṃ na vā nṛtye gīyate kiṃ na gīyate || 33 ||
[Analyze grammar]

vādyatāṃ tālamānaiḥ kiṃ yāvacciṃtāparo hariḥ |
ṛṣiḥ samāgatastāvajjalābhyukṣaṇata tparaḥ || 34 ||
[Analyze grammar]

siṃhāsanaṃ parityajya samutthāyāgrataḥ sthitaḥ |
svāgatenābhivādyātha babhāṣe nāradaṃ hariḥ || 32 ||
[Analyze grammar]

maharṣe svāgataṃ te'dya kuto vā'ga myate tvayā |
snāne saṃdhyārcane home kuśalaṃ tava vidyate || 36 ||
[Analyze grammar]

iti prokto vihasyātha babhāṣe nārado harim |
yadyetajjāyate mahyaṃ kimanyena prayojanam || 37 ||
[Analyze grammar]

prekṣaṇīkasya te sthānaṃ nāhaṃ paśyāmi svarpate |
yāvadrājyaṃ balestāvattvayā me na prayojanam || 38 ||
[Analyze grammar]

ādityādyā grahāḥ sarve kāla mānena yojitāḥ |
āhutyā plāvitā meghā varṣaṃti hṛṣitā bhuvi || 39 ||
[Analyze grammar]

rogādimaraṇaṃ nāsti yamo dharmeṇa pīḍitaḥ || 40 ||
[Analyze grammar]

ekātapatrāṃ pṛthivīṃ bubhuje sa narādhipaḥ |
trailokyanātheti mahānṛpeti saṃgrāmavidyākuśaleti nityam |
trailokyalakṣmīkucakāmuketi saṃstūyate cāraṇabaṃdivṛndaiḥ || 41 ||
[Analyze grammar]

brahmeti kṛṣṇeti hareti bhūmāviṃdreti sūryeti dhanādhipeti |
devārinātheti surādhipeti jegīyate cāraṇabaṃdivṛndaiḥ || 42 ||
[Analyze grammar]

yuddhaṃ vinā daityagaṇā hasaṃti mattāḥ pramattāḥ kariṇo nadaṃti |
rathādhirūḍhāḥ puruṣā bhramaṃti senādhipā strīṣu gṛhe ramaṃti || 43 ||
[Analyze grammar]

yajñāgnidhūmena nabho virājate suvarṇarūpā pṛthivī virājate |
śūnyaṃ tu vedairbhuvanaṃ ca śobhate dhiṣṇyaṃ balerdairtyaigaṇaiśca śobhate || 44 ||
[Analyze grammar]

balirna jānāti surādhipaṃ tvāṃ surāśca sarve baliyajñabhojinaḥ |
tvameva te'riṃ hṛdi ciṃtaya svayaṃ yuktaṃ tavedaṃ kathitaṃ mayeti || 45 ||
[Analyze grammar]

raṃbhā na rājate raṃge menakā tvāṃ na manyate |
tilottamāpi manute balirājaṃ sureśvaram || 46 ||
[Analyze grammar]

urvaśī caiva taṃ yāti sukeśā saha bhāṣate |
mañjughoṣā mukhaṃ vaktraṃ kṛtvā tvāṃ na nirīkṣate || 47 ||
[Analyze grammar]

pulomā pulakodbhedaṃ na karoti baliṃ vinā |
paulomī purato gatvā baliṃ stauti ca maṃtharā || 48 ||
[Analyze grammar]

nāradaḥ parvataścaiva hāhā hūhūśca tuṃburuḥ |
balirājyaṃ praśaṃsaṃti rudrasyāgre mayā śrutam || 49 ||
[Analyze grammar]

ājyāhutībhiḥ santuṣṭā ṛṣayo brahmasadmani |
brahmaṇo'gre praśaṃsaṃti tadevaṃ kathitaṃ mayā || 50 ||
[Analyze grammar]

bṛhaspatiryadācaṣṭe na tadvācyaṃ mayā tava |
iṃdrāṇī balinaṃ matvā baliṃ citreṣu paśyati || 51 ||
[Analyze grammar]

anena vākyena surādhipastu cacāla kopāvaritastadānīm |
gajeti vajreti jagāda sūtaṃ samānayāsiṃ kavacaṃ rathaṃ ca || 52 ||
[Analyze grammar]

rathena sūryo maruto gajena vṛṣeṇa rudro mahiṣeṇa sauriḥ |
vādyaṃtu vādyāni raṇāya me'dya caṇḍī gaṇeśāstvaritāḥ prayātu || 53 ||
[Analyze grammar]

dṛṣṭvā surendraṃ saṃkruddhaṃ bṛhaspatirudāradhīḥ |
ṛṣimadhye gato vidvānbabhāṣe samayocitam || 54 ||
[Analyze grammar]

sāmādyā nītayaḥ proktāścatasro manunā purā |
sāmasādhyeṣu kāryeṣu daṇḍastena na pātyatām || 55 ||
[Analyze grammar]

ato hyupendrmāhūya maṃtrayantu surottamāḥ |
tadadhīnaṃ jagatsarvaṃ trailokyaṃ sacarācaram || 56 ||
[Analyze grammar]

vinaṣṭeṣu ca kāryeṣu tasya vācyaṃ śubhāśubham |
sa eva prathamaṃ gacchetpṛthivyāṃ svārthasiddhaye || 57 ||
[Analyze grammar]

tatheti devairvijñaptastathā cakre sureśvaraḥ |
mandare'tha girau viṣṇuḥ satyalokātsamāgataḥ || 58 ||
[Analyze grammar]

ṛṣayastatra te yāṃtu samānetuṃ janārddanam |
ityukto nāradaḥ svargātsnātuṃ prāptaḥ sa mandare || 59 ||
[Analyze grammar]

gautamo'trirbharadvājo viśvāmitro'tha kaśyapaḥ |
jamadagnirvasiṣṭhaśca saṃprāptā harimandire || 60 ||
[Analyze grammar]

girau gaṃgā jale snānaṃ saṃdhyāṃ cakre sa nāradaḥ |
yāvadāste tadā hṛṣṭā vālakhilyā maharṣayaḥ || 61 ||
[Analyze grammar]

vinayenābhivādyātha kathayāmāsa nāradaḥ |
ṛṣayo mandare prāptā viṣṇuṃ netuṃ surālaye || 62 ||
[Analyze grammar]

ṛṣayo darśanaṃ karttuṃ bhavatāmapi yujyate |
tadetadvacanaṃ śrutvā harṣitāste maharṣayaḥ || 63 ||
[Analyze grammar]

aṃguṣṭhaparvamātrāṃstānvāmanānharimandire |
gatāngaṃgājale snātuṃ vālakhilyānpuro hariḥ || 64 ||
[Analyze grammar]

jahāsa vāmanānsarvānbhāvikāryabalāttataḥ |
brahmaputrā vālakhilyāḥ sarve te śaṃsitavratāḥ || 65 ||
[Analyze grammar]

lajjānvitāḥ krodhaparā uccairūcuḥ parasparam |
kenāpi devakāryeṇa vāmano'yaṃ bhaviṣyati || 66 ||
[Analyze grammar]

ṛṣibhirvi ṣṇunā sarve pratibodhya prasāditāḥ |
bhāgyamokṣaḥ kadā viṣṇorbhaviṣyati taducyatām || 67 ||
[Analyze grammar]

prabhāsādadhikaṃ kṣetraṃ yadā vastrāpathaṃ bhavet |
bhaviṣyati tadā vṛddhirdhruvamaṇḍalavyāpinī |
tathā vastrāpathaṃ kṣetraṃ bhaviṣyati yavādhikam || 68 ||
[Analyze grammar]

dṛṣṭvā someśvaraṃ devaṃ doṣamukto bhaviṣyati |
asādhyasādhanī śaktirbhaviṣyati sthirā tava || 69 ||
[Analyze grammar]

vastrāpathe somanāthaṃ yaḥ paśyati sa paśyati |
indropendrau samāliṃgyāthāsīnau tau varāsane || 70 ||
[Analyze grammar]

viṣṇuruvāca |
kiṃ te kāryaṃ devarāja tadavaśyaṃ karomyaham || 71 ||
[Analyze grammar]

indra uvāca |
hiraṇyakaśiporvaṃśe balirdaityo mahā balaḥ |
tenedaṃ sakalaṃ vyāptaṃ devā yajñabhujaḥ kṛtāḥ || 72 ||
[Analyze grammar]

devaloke bhūmiloko gataḥ sarvo'pi keśava |
yāvanno vikṛtiṃ yāti pūrvavairamanusmaran |
bhraṣṭarājyo balistāvatpātālamadhitiṣṭhatu || 73 ||
[Analyze grammar]

sūryasomānvaye kaścidrājā bhavatu bhūtale || 74 ||
[Analyze grammar]

sārasvata uvāca |
ityetadvacanaṃ śrutvā svayaṃ saṃcintya cetasā |
tathā kariṣye taṃ procya munīnprāha janārdanaḥ || 75 ||
[Analyze grammar]

ṛṣayastatra gacchaṃtu kārayantu mahāmakham |
ahaṃ tatrāgamiṣyāmi sādhayiṣyāmi taṃ balim || 76 ||
[Analyze grammar]

ityuktā munayaḥ sarve gatāste yajñamaṇḍape |
dvādaśāho mahāyajñaḥ prārabdhaḥ sarvadakṣiṇaḥ || 77 ||
[Analyze grammar]

surāṣṭradeśaṃ vikhyātaṃ kṣetraṃ vastrāpathaṃ nṛpa |
tasya dakṣiṇadigbhāge baleḥ siddhaṃ mahāpuram || 78 ||
[Analyze grammar]

kṣetrādbahiḥ samārabdho yajñaḥ sarvasvadakṣiṇaḥ |
śukreṇāmantritāḥ sarve munayo yajñakarmaṇi |
atihṛṣṭo baliryajñe dadau dānānyanekadhā || 79 ||
[Analyze grammar]

svarṇapātreṣu sarveṣu dīyate bhojanaṃ bahu |
atithirbrāhmaṇo vidvānsarvasvenāpi pūjyate |
dānādyajño bhavetpūrṇo dānahīno vṛthā bhavet || 80 ||
[Analyze grammar]

etasminneva kāle tu viṣṇurvāmanatāṃ gataḥ |
madhyadeśe caturvedo brāhmaṇastīrthayātrikaḥ |
mahodaro hrasvabhujaḥ khañjapādo mahāśirāḥ || 81 ||
[Analyze grammar]

mahāhanuḥ sthūlajaṃghaḥ sthūlagrīvo'tilaṃpaṭaḥ |
śvetavastro baddhaśikhaśchatropānatkamaṇḍalūn || 82 ||
[Analyze grammar]

draṣṭuṃ tīrthānyanekāni babhrāma sa mahītale |
surāṣṭradeśe saṃprāptaḥ kṣetre vastrāpathe dvijaḥ || 83 ||
[Analyze grammar]

svarṇarekhā nadītīre ciṃtayāmāsa vāmanaḥ |
prathamaṃ kiṃ bhavaṃ dṛṣṭvā yāmi someśvaraṃ śivam || 84 ||
[Analyze grammar]

atha someśvaraṃ pūjya paścādyāsyāmi mandaram |
iti cintāparo bhūtvā kṛtyaṃ sañcintya cetasā |
atra sthitaḥ somanāthaṃ pūjayiṣyāmi niścitam || 85 ||
[Analyze grammar]

vastrāpathe mahākṣetre bhavaṃ someśvaraṃ vṛthā |
pūjayaṃti janā nityaṃ tathā kāryaṃ mayā dhuvam || 86 ||
[Analyze grammar]

deśānāmuttamo deśo girīṇāmuttamo giriḥ |
kṣetrāṇāmuttamaṃ kṣetraṃ nadīnāmuttamā sarit || 87 ||
[Analyze grammar]

divyaṃ vanaṃ vanānāṃ tu devānāmuttamo bhavaḥ |
yadā someśvaro devo bhūmiṃ bhittvā bhaviṣyati || 88 ||
[Analyze grammar]

tadāmramaṇḍale divyaṃ kṣetrametadyavādhikam |
caitra śuklacaturdaśyāmagnisādhanatatparaḥ || 89 ||
[Analyze grammar]

ūrdhvabāhuḥ sūryakāle bhavaṃ tāvatsa paśyati |
madhyaṃdinaṃ paraṃ yāte dinanāthe vilaṃbite || 90 ||
[Analyze grammar]

agni tāpāṃgasaṃtaptastāvatpaśyati śaṃkaram |
somanāthaṃ śivaṃ śāṃtaṃ sarvadevanamaskṛtam |
arghyeṇa puṣpamiśreṇa jalamiśreṇa bhāmini || 91 ||
[Analyze grammar]

sārasvata uvāca |
bhūmiṃ bhittvātha deveśaḥ svayaṃ someśvaraḥ sthitaḥ |
liṃgarūpo mahādevo yāvadābrahmavāsaram || 92 ||
[Analyze grammar]

someśvara uvāca |
siddhastvaṃ matprasādena kāryaṃ siddhaṃ bhaviṣyati |
ityukto vāmano devaṃ pratyuvāca maheśvaram || 93 ||
[Analyze grammar]

vāmana uvāca |
yadi tuṣṭo mahādeva yadi deyo varo mama |
tadā'tra liṃge sthātavyamastu divyaṃ puro mama || 94 ||
[Analyze grammar]

yastu svāyaṃbhuvaṃ liṃgaṃ vāmane nagare mama |
pūjayiṣyati brahmaghno goghno vā bālaghātakaḥ || 95 ||
[Analyze grammar]

gurudrohī svarṇacoro mucyate sarvapātakaiḥ |
nirdoṣaḥ pūjayedyastu sakṛtsomeśvaraṃ haram || 96 ||
[Analyze grammar]

mṛto vimānamāruhya divyastrīpariveṣṭitaḥ |
saṃstūyamāno dikpālairyātu svarge śivālaye || 97 ||
[Analyze grammar]

brahmalokamatikramya rudraloke sa gacchatu |
tathetyuktvā somanāthastatraivāntaradhīyata || 98 ||
[Analyze grammar]

prakāśya vāmano ligaṃ somanāthaṃ svayaṃbhuvam |
prāptajñāno labdhavṛddhiryayau draṣṭuṃ bhavaṃ haram || 99 ||
[Analyze grammar]

gaṃgādyāḥ saritaḥ sarvāḥ svarṇarekhājale sthitāḥ |
etāṃ someśvarotpattiṃ ye śṛṇvaṃti narāḥ striyaḥ |
sarvapāpakṣayasteṣāṃ jāyate nātra saṃśayaḥ || 100 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe dvitīye vastrāpathakṣetramāhātmye someśvarotpattivarṇanaṃnāma caturdaśo'dhyāyaḥ || 14 ||
[Analyze grammar]