Chapter 28

[English text for this chapter is available]

devyuvāca |
ityāścaryamidaṃ deva tvattaḥ sarvaṃ mayā śrutam |
mahimānaṃ maheśasya vistareṇa samudbhavam |
sāṃprataṃ somanāthasya yathāvadvaktumarhasi || 1 ||
[Analyze grammar]

vidhinā kena dṛśyosau yātrā kāryā kathaṃ nṛbhiḥ |
kasminkāle mahādeva niyamāścaiva kīdṛśāḥ || 2 ||
[Analyze grammar]

īśvara uvāca |
hemante śiśire vāpi vasante vātha bhāmini |
yadā ca jāyate cittaṃ vittaṃ vā parva vā bhavet || 3 ||
[Analyze grammar]

tadaiva yātrā karttavyā bhāvastatraiva kāraṇam |
kṛtvā tu niyamaṃ kaṃcitsvagṛhe varavarṇini || 4 ||
[Analyze grammar]

praṇamya manasā rudraṃ kṛtvā śrāddhaṃ yathāvidhi |
sthānaṃ pradakṣiṇaṃ kṛtvā vāgyataḥ susamāhitaḥ || 5 ||
[Analyze grammar]

niyato niyatāhāro gaccheccaiva tataḥ pathi |
kāmakrodhau parityajya lobhamohau tathaiva ca || 6 ||
[Analyze grammar]

īrṣyāmatsaralaulyaṃ ca yātrā kāryā tato nṛbhiḥ |
tīrthānugamanaṃ puṇyaṃ yajñebhyo'pi viśiṣyate || 7 ||
[Analyze grammar]

agniṣṭomādiyajñaiśca iṣṭvā vipuladakṣiṇaiḥ |
tattatphalamavāpnoti tīrthānugamanena yat || 8 ||
[Analyze grammar]

kaleryugaṃ mahāghoraṃ prāpya pāpasamanvitam |
nānyenā'sminnupāyena dharmmaḥ svargaśca labhyate |
vinā yātrāṃ mahādevi someśasya na saṃśayaḥ || 9 ||
[Analyze grammar]

ye kurvaṃti narā yātrāṃ śuciśraddhāsamanvitāḥ |
kalau yuge kṛtārthāste ye tvanye te nirarthakāḥ || 10 ||
[Analyze grammar]

yathāmahodadhestulyo na cānyo'sti jalāśayaḥ |
tathā prābhāsikātkṣetrātsamaṃ tīrthaṃ na vidyate || 11 ||
[Analyze grammar]

anupoṣya trirātrāṇi tīrthānyanabhigamya ca |
adattvā kāṃcanaṃ gāśca daridronāma jāyate || 12 ||
[Analyze grammar]

yanyagamyāni tīrthāni durgāṇi viṣamāṇi ca |
manasā tāni gamyāni sarvatīrthagatīpsunā || 13 ||
[Analyze grammar]

yasya hastau ca pādau ca manaścaiva susaṃyatam |
vidyā tapaśca kīrtiśca sa tīrthaphalamaśnute || 14 ||
[Analyze grammar]

niyato niyatāhāraḥ snāna |jāpyaparāyaṇaḥ |
vratopavāsanirataḥ sa tīrthaphalamaśnute || 15 ||
[Analyze grammar]

akrodhanaśca deveśi satyaśīlo dṛḍhavrataḥ |
ātmopamaśca bhūteṣu sa tīrthaphalamaśnute || 16 ||
[Analyze grammar]

kurukṣetrāditīrthāni rathagamyāni yāni tu |
tānyeva brāhmaṇo yāyādānadoṣo na teṣu vai || 17 ||
[Analyze grammar]

ye sādhavo dhanopetāstīrthānāṃ smaraṇe ratāḥ |
tīrthe dānācca yogācca teṣāmabhyadhikaṃ phalam || 18 ||
[Analyze grammar]

ye daridrā dhanairhīnāstīrthānugamaneratāḥ |
teṣāṃ yajñaphalāvāptirvināpi dhanasaṃcayaiḥ || 19 ||
[Analyze grammar]

sarveṣāmeva varṇānāṃ sarvāśramanivāsinām |
tīrthaṃ tu phaladaṃ jñeyaṃ nātra kāryā vicāraṇā || 20 ||
[Analyze grammar]

kāryāṃtareṇa yo gatvā snānaṃ tīrthe samācaret |
na ca yātrāphalaṃ tasya snānamātraṃ phalaṃ bhavet || 21 ||
[Analyze grammar]

tīrthānugamanaṃ padbhyāṃ tapaḥparamihocyate |
tadeva kṛtvā yānena snānamātraphalaṃ labhet || 22 ||
[Analyze grammar]

yasyānyaḥ kurute śaktyā tīrthayātrāṃ tatheśvari |
svakīyadravyayānābhyāṃ phalaṃ tasya caturguṇam || 23 ||
[Analyze grammar]

tīrthānugamanaṃ kṛtvā bhikṣāhārā jiteṃdriyāḥ |
prāpnuvaṃti mahādevi tīrthe daśaguṇaṃ phalam || 24 ||
[Analyze grammar]

chatropānadvihīnastu bhikṣāśī vijiteṃdriyaḥ |
mahāpātakajairghorairvipraḥ pāpaiḥ pramucyate || 25 ||
[Analyze grammar]

na bhaikṣaṃ parapākaṃ tu na ca bhaikṣyaṃ pratigraham |
somapānasamaṃ bhaikṣyaṃ tasmādbhaikṣaṃ samācaret || 26 ||
[Analyze grammar]

loke'smindvividhaṃ tīrthaṃ svaccha ndairnirmmitaṃ tathā |
svayaṃbhūtaṃ prabhāsādyaṃ nirmitaṃ daivataiḥ kṛtam || 27 ||
[Analyze grammar]

svayaṃbhūte mahātīrthe svabhāve ca mahattare |
tasmiṃstīrthe pratigṛhya kṛtāḥ sarve pratigrahāḥ || 28 ||
[Analyze grammar]

pratigrahanivṛttasya yātrādaśaguṇaṃ phalam |
tena dattāni dānāni yajñairdevāḥ sutarpitāḥ || 29 ||
[Analyze grammar]

yena kṣetraṃ samāsādya nivṛttiḥ paramā kṛtā |
vastulaulyāddhi yaḥ kṣetre pratigraharucistathā || 30 ||
[Analyze grammar]

naiva tasya paroloko nāyaṃ loko durātmanaḥ |
atha cetpratigṛhṇāti brāhmaṇo vṛttidurbalaḥ |
daśāṃśamarjitāddadyādevaṃ tatra na hīyate || 31 ||
[Analyze grammar]

vipraveṣaṃ samāsthāya śūdro bhūtvā pratigraham |
tṛṇakāṣṭhasamaṃ vāpi pratigṛhya patatyadhaḥ || 32 ||
[Analyze grammar]

kumbhīpākādikeṣvevaṃ mahānarakakoṭiṣu |
yāvadiṃdrasahasrāṇi caturddaśa varānane || 33 ||
[Analyze grammar]

tasmānnaiva pratigrāhyaṃ kimanyairbrāhmaṇairapi |
dviprakārasya tīrthasya kṛtasyāpyakṛtasya ca || 34 ||
[Analyze grammar]

svakīyabhāvasaṃyuktaḥ saṃpūrṇaṃ phalamaśnute |
labhate ṣoḍaśāṃśaṃ sa yaḥ parānnena gacchati || 35 ||
[Analyze grammar]

aśaktasya tathāṃdhasya paṃgoryāyāvarasya ca |
vihitaṃ kāraṇāyānamacchidre brāhmaṇe kutaḥ || 36 ||
[Analyze grammar]

snānakhādanapānaiśca voḍhṛbhyastīrthasevakaḥ |
dadatsakalamāpnoti phalaṃ tīrthasamudbhavam || 37 ||
[Analyze grammar]

na ṣoḍaśāṃśaṃ yatnena labdhārthaṃ yadi yacchati |
paṃcamāṃśamatho vāpi dadyāttatra dvijātiṣu || 38 ||
[Analyze grammar]

devatānāṃ gurūṇāṃ ca mātāpitrośca kāmataḥ |
puṇyadaḥ samavāpnoti tadevāṣṭaguṇaṃ phalam || 39 ||
[Analyze grammar]

snānaṃ dānaṃ japo homaḥ svādhyāyo devatārcanam |
puṇyaṃ deyaṃ tu sarvatra nāpuṇyaṃ dīyate kvacit || 40 ||
[Analyze grammar]

pitaraṃ mātaraṃ tīrthe bhrātaraṃ suhṛdaṃ gurum |
yamuddiśya nimajjeta dvādaśāṃśaṃ labheta saḥ || 41 ||
[Analyze grammar]

kuśaistu pratimāṃ kṛtvā tīrthavāriṣu majjayet |
yamuddiśya mahādevi aṣṭabhāgaṃ labheta saḥ || 42 ||
[Analyze grammar]

mahādānāni ye viprā gṛhṇanti jñānadurbalāḥ |
vṛkṣāste dvijarūpeṇa jāyaṃte brahmarākṣasāḥ || 43 ||
[Analyze grammar]

na vedabalamāśritya pratigraharucirbhavet |
ajñānādvā pramādādvā dahate karma netarat || 44 ||
[Analyze grammar]

citikāṣṭhaṃ tu vai spṛṣṭvā yajñayūpaṃ tathaiva ca |
vedavikrayiṇaṃ spṛṣṭvā snānameva vidhīyate || 45 ||
[Analyze grammar]

ādeśaṃ paṭhate yastu ādeśaṃ tu dadāti yaḥ |
dvāvetau pāpakarmāṇau pātālatalavāsinau || 46 ||
[Analyze grammar]

ādeśaṃ paṭhate yastu saṃjighṛkṣuḥ pratigraham |
tīrthe caiva viśeṣeṇa brahmaghnaḥ saiva netaraḥ |
sthito vai nṛpaterdvāri na kuryādvedavikrayam || 47 ||
[Analyze grammar]

hatvā gāvo varaṃ māṃsaṃ bhakṣayīta dvijādhamaḥ |
varaṃ jīvansamaṃ matsyairna kuryādvedavikrayam |
brahmahatyāsamaṃ pāpaṃ na bhūtaṃ na bhaviṣyati || 48 ||
[Analyze grammar]

varaṃ kuryācca taddevi na kuryādvedavikayam |
tīrthe caiva viśeṣeṇa mahākṣetre tathaiva ca || 49 ||
[Analyze grammar]

dīyamānaṃ tu vai dānaṃ yastyajettīrthasevakaḥ |
tīrthaṃ karoti tīrthaṃ ca sa punāti ca pūrvajān || 50 ||
[Analyze grammar]

yadanyatra kṛtaṃ pāpaṃ tīrthe tadyāti lāghavam |
na tīrthakṛtamanyatra kvacideva vyapohati || 51 ||
[Analyze grammar]

tailapātramivātmānaṃ yo rakṣettīrthasevakaḥ |
sa tīrthaphalamaskannaṃ vipraḥ prāpnoti saṃyataḥ || 52 ||
[Analyze grammar]

yasyayasyātti pakvānnamalpaṃ vā yadi vā bahu |
tīrthagastasya tasyārdhaṃ snātasya viniyacchati || 53 ||
[Analyze grammar]

yo na kliṣṭopi bhikṣeta brāhmaṇa stīrthasevakaḥ |
satyavādī samādhisthaḥ sa tīrthasyopakārakaḥ || 54 ||
[Analyze grammar]

kṛte yuge puṣkarāṇi tretāyāṃ naimiṣaṃ tathā |
dvāpare tu kurukṣetraṃ prābhāsikaṃ kalauyuge || 55 ||
[Analyze grammar]

tiṣṭhedyugasahasraṃtupādenaikena yaḥ pumān |
prabhāsayātrāmeko vā samaṃ bhavati vā na vā || 56 ||
[Analyze grammar]

etatkṣetraṃ samāgatya madhyabhāge varānane |
yānāni tu parityajya bhāvyaṃ pādacarairnaraiḥ || 57 ||
[Analyze grammar]

luṭhitvā loṭhanīṃ tatra luṭhitā yatra devatāḥ |
tato nṛtyanhasangāyanbhūtvā kārpaṭikā kṛtiḥ |
gacchetsomeśvaraṃ devaṃ dṛṣṭvā cādau kaparddinam || 58 ||
[Analyze grammar]

īdṛśaṃ puruṣaṃ dṛṣṭvā sthitaṃ someśvaronmukham |
nityaṃ tuṣyaṃti pitaro garjaṃti ca pitā mahāḥ || 59 ||
[Analyze grammar]

asmākaṃ vaṃśajo devaṃ prasthitastāraṇāya naḥ |
gatvā someśvaraṃ devi kuryādvapanamāditaḥ || 60 ||
[Analyze grammar]

tīrthopavāsaḥ karttavyo yathāvadvai nibodha me |
nāsti gaṃgāsamaṃ tīrthaṃ nāsti kratusamā gatiḥ || 61 ||
[Analyze grammar]

gāyatrīsadṛśaṃ jāpyaṃ homo vyāhṛtibhiḥ samaḥ |
aṃtarjale tathā nāsti pāpaghnamaghamarṣaṇāt || 62 ||
[Analyze grammar]

ahiṃsāsadṛśaṃ puṇyaṃ dānātsaṃcayanaṃ param |
tapaścānaśanānnāsti tathā tīrthaniṣevaṇāt || 63 ||
[Analyze grammar]

tīrthopavāsāddeveśi adhikaṃ nāsti kiñcana |
pāpānāṃ copaśamanaṃ satāmīpsitakārakam || 64 ||
[Analyze grammar]

upavāso vinirddiṣṭo viśeṣāddevatāśraye |
brāhmaṇasya tvanaśanaṃ tapaḥ paramihocyate || 65 ||
[Analyze grammar]

ṣaṣṭhakālāśanaṃ śūdre tapaḥ proktaṃ paraṃ budhaiḥ |
varṇasaṃkarajātānāṃ dinamekaṃ prakīrtitam || 66 ||
[Analyze grammar]

ṣaṣṭhakālātparaṃ śūdrastapaḥ kuryādyathā kvacit |
rāṣṭrahānistadā jñeyā rājñaścopadravo mahān || 67 ||
[Analyze grammar]

śūdrastu ṣaṣṭhakālāśī yathāśaktyā tapaścaret |
na darbhānuddharecchūdro na pibetkāpilaṃ payaḥ || 68 ||
[Analyze grammar]

madhyapatre na bhuñjīta brahmavṛkṣasya bhāmini |
noccaretpraṇavaṃ maṃtraṃ puroḍāśaṃ na bhakṣayet || 69 ||
[Analyze grammar]

na śikhāṃ nopavītaṃ ca nocca retsaṃskṛtāṃ giram |
na paṭhedvedavacanaṃ trairātraṃ na hi sevayet || 70 ||
[Analyze grammar]

namaskāreṇa śūdrasya kriyāsiddhirbhaveddhruvam |
niṣiddhācaraṇaṃ kurvanpitṛbhiḥ saha majjati || 71 ||
[Analyze grammar]

yenaikādaśasaṃkhyāni yaṃtritānīṃdriyāṇi vai |
sa tīrthaphalamāpnoti naro'nyaḥ kleśabhāgbhavet || 72 ||
[Analyze grammar]

yacca tīrthe pitṛśrāddhaṃ snānaṃ tatra samācaret |
hitakārī ca bhūtebhyaḥ so'śnīyāttīrthajaṃ phalam || 73 ||
[Analyze grammar]

dharmadhvajī sadā lubdhaḥ paradārarato hi yaḥ |
karoti tīrthagamanaṃ sa naraḥ pātakī bhavet || 74 ||
[Analyze grammar]

evaṃ jñātvā mahādevi yātrāṃ kuryādyathāvidhi |
tīrthopavāsaṃ kṛtvādau śraddhāyukto dṛḍhavrataḥ || 75 ||
[Analyze grammar]

bhojanaṃ naiva kurvīta yadī ccheddhitamātmanaḥ |
parānnaṃ naiva bhuñjīta taddine brāhmaṇaḥ kvacit || 76 ||
[Analyze grammar]

hastyaśvarathayānāni bhūmigokāṃcanādikam |
sarvaṃ tatparigṛhṇīyādbhojanaṃ na samācaret || 77 ||
[Analyze grammar]

āmācchataguṇaṃ puṇyaṃ bhuñjato dadato'pi vā |
tīrthopavāsaṃ kurvīta tasmāttatra varānane || 78 ||
[Analyze grammar]

vratī ca tīrthayātrī ca vidhavā ca viśeṣataḥ |
parānnabhojane devi yasyānnaṃ tasya tatphalam || 79 ||
[Analyze grammar]

vidhavā caiva yā nārī tasyā yātrāvidhiṃ bruve |
kuṃkumaṃ candanaṃ caiva tāṃbūlaṃ ca srajastathā || 80 ||
[Analyze grammar]

raktavastrāṇi sarvāṇi śayyā prāstaraṇāni ca |
aśiṣṭaiḥ saha saṃbhāṣo dvivāraṃ bhojanaṃ tathā || 81 ||
[Analyze grammar]

puṃsāṃ pradarśanaṃ caiva hāsyaṃ tamasi varjayet |
saśabdopānahau caiva nṛtyaṃ gatiṃ ca varjayet || 82 ||
[Analyze grammar]

dhāraṇaṃ caiva keśānāmaṃjanaṃ ca vilepanam |
asatījanasaṃsargaṃ pāṃḍityaṃ ca parityajet || 83 ||
[Analyze grammar]

nityaṃ snānaṃ ca kurvīta śvetavastrāṇi dhārayet |
yatiśca brahmacārī ca vidhavā ca viśeṣataḥ || 84 ||
[Analyze grammar]

tāṃbūlaṃ madhu māṃsaṃ ca surāpānasamaṃ viduḥ |
eteṣāṃ varjjanāddevi samyagyātrāphalaṃ labhet || 95 ||
[Analyze grammar]

devyuvāca |
tapāṃsi kāni kathyante kṣetre prābhā sike naraiḥ |
kāni dānāni dīyante keṣu tīrtheṣu vā katham || 86 ||
[Analyze grammar]

īśvara uvāca |
tapaḥ paraṃ kṛtayuge tretāyāṃ jñānamiṣyate |
dvāpare yajanaṃ dhanyaṃ dānamekaṃ kalau yuge || 87 ||
[Analyze grammar]

tapastapyanti munayaḥ kṛcchracāndrāyaṇādikam |
gatvā prābhāsikaṃ kṣetraṃ lokāścānye kṛte yuge || 88 ||
[Analyze grammar]

kalau dānāni dīyante brāhmaṇebhyo yathāvidhi |
prabhāsaṃ kṣetramāsādya tapasāṃ prāpyate phalam || 89 ||
[Analyze grammar]

tulāpuruṣabrahmāṇḍapṛthivīkalpapādapāḥ |
hiraṇya kāmadhenuśca gajavājirathāstathā || 90 ||
[Analyze grammar]

ratnadhenuhiraṇyāśvasaptasāgara eva ca |
mahābhūtaghaṭo viśvacakrakalpalatābhidhaḥ || 91 ||
[Analyze grammar]

prabhāse nṛpatirdadyā nmahādānāni ṣoḍaśa |
dhānyaratnaguḍasvarṇatilakārpāsaśarkarāḥ || 92 ||
[Analyze grammar]

sarpirlavaṇarūpyākhyā daśaite parvatāḥ smṛtāḥ |
guḍājyadadhimadhvaṃbusalila kṣīraśarkarāḥ |
ratnākhyāśca svarūpeṇa daśaitā dhenavo matāḥ || 93 ||
[Analyze grammar]

teṣāmekatamaṃ dānaṃ tīrthetīrthe pṛthakpṛthak |
pradeyānyekavāraṃ vā sarasvatyabdhi saṃgame || 94 ||
[Analyze grammar]

sarvasvaṃ cātividuṣe gṛhaṃ vā saparicchadam |
bahvalpamapi viprebhyo dātavyaṃ priyamelake || 95 ||
[Analyze grammar]

yatra tīrthe labhelliṃgaṃ tīrthaṃ ca vimalodakam |
tatrāgnikāryaṃ kṛtvādau viśiṣṭaṃ dānamiṣyate || 96 ||
[Analyze grammar]

tarpaṇaṃ pitṛdevānāṃ śrāddhaṃ dānaṃ sadakṣiṇam |
tīrthetīrthe ca godānaṃ niyataḥ prakṛto vidhiḥ || 97 ||
[Analyze grammar]

viśiṣṭakhyātaliṃgeṣu vṛṣadānaṃ vidhīyate |
snānaṃ vilepanaṃ pūjāṃ devatānāṃ samācaret || 98 ||
[Analyze grammar]

jagatīṃ cārcayedbhaktyā tathā caivopalepayet |
prāsādaṃ dhavalaṃ saudhaṃ kārayejjīrṇamuddharet || 99 ||
[Analyze grammar]

puṣpavāṭīṃ snānakūpaṃ nirmalaṃ kārayedvratī |
brāhmaṇānāṃ bhūridānaṃ devapūjākarāya ca || 100 ||
[Analyze grammar]

sarvatra devayātrāyāṃ vidhireṣa pravarttate |
tīrthamabhyuddharejjīrṇaṃ mārjayetkathayetphalam || 101 ||
[Analyze grammar]

prasiddhe ca mahādānaṃ madhyame caiva madhyamam |
godānaṃ sarvatīrtheṣu suvarṇamatha niṣkrayaḥ |
hiraṇyadānaṃ sarveṣāṃ dānānāmeva niṣkṛtiḥ || 102 ||
[Analyze grammar]

evaṃ kṛtvā naro bhaktyā labhate janmanaḥ phalam |
tīrtheṣu dānaṃ vakṣyāmi yeṣu yaddīyate tithau || 103 ||
[Analyze grammar]

prabhāse pratipaddānaṃ dātavyaṃ kāṃcanaṃ śubham |
dvitīyāyāṃ tathā vastraṃ tṛtīyāyāṃ ca medinīm || 104 ||
[Analyze grammar]

caturthyāṃ dāpayeddhānyaṃ paṃcamyāṃ kapilāṃ tathā |
ṣaṣṭhyāmaśvaṃ ca saptamyāṃ mahiṣīṃ tatra dāpayet || 105 ||
[Analyze grammar]

aṣṭamyāṃ vṛṣabhaṃ dattvā nīlaṃ lakṣaṇasaṃyutam |
navamyāṃ tu gṛhaṃ dadyāccakraṃ śaṃkhaṃ gadāṃ tathā || 106 ||
[Analyze grammar]

daśamyāṃ sarvagaṃdhāṃśca ekādaśyāṃ ca mauktikam |
dvādaśyāṃ suvratennādyaṃ pravālaṃ vidhivattathā || 107 ||
[Analyze grammar]

striyo deyāstrayodaśyāṃ bhūtāyāṃ jñānado bhavet |
amāvāsyāmanuprāpya sarvadānāni dāpayet || 108 ||
[Analyze grammar]

evaṃ dānaṃ pradattvā tu daśa kṛtvaḥ phalaṃ labhet || 109 ||
[Analyze grammar]

devyuvāca |
bhaktidānavihīnā ye prabhāsaṃ kṣetramāgatāḥ |
snānamantravihīnāśca vada teṣāṃ tu kiṃ phalam || 110 ||
[Analyze grammar]

īśvara uvāca |
sadhanā nirddhanā vāpi samaṃtrā maṃtravarjitāḥ |
prabhāse nidhanaṃ prāptāḥ sarve yāṃti śivālayam || 111 ||
[Analyze grammar]

ye maṃtrahīnāḥ puruṣā dharmahīnāśca ye mṛtāḥ |
teṣāmekaṃ vimānaṃ tu dadāmi sumahatpriye || 112 ||
[Analyze grammar]

snānadānānurūpyeṇa prāpnuvaṃti paraṃ padam |
kecitsnānaprabhāvena keciddānena mānavāḥ || 113 ||
[Analyze grammar]

kecilliṃgapraṇāmena kecilliṃgārccanena ca |
keciddhyānaprabhāvena kecidyogaprabhāvataḥ || 114 ||
[Analyze grammar]

kecinmaṃ trasya jāpyena kecicca tapasā śubhe |
tīrthe saṃnyasanaiḥ kecitkecidbhaktyanusārataḥ || 115 ||
[Analyze grammar]

ete cānye ca bahava uttamādhamamadhyamāḥ |
sarve śivapuraṃ yāṃti vimānaiḥ sūryasaṃnibhaiḥ || 116 ||
[Analyze grammar]

triśūlāṃkitahastāśca sarve ca vṛṣavāhanāḥ |
divyāpsarogaṇākīrṇāḥ krīḍaṃte matprabhāvataḥ || 117 ||
[Analyze grammar]

evaṃ bhaktyanusāreṇa dadāmi phalamavyayam |
alepakaṃ prabhāsaṃ tu dharmādharmairna lipyate || 118 ||
[Analyze grammar]

dharmaṃ caraṃtyadharmaṃ vā śivaṃ yāṃti na saṃśayaḥ || 119 ||
[Analyze grammar]

janmaprabhṛti yo devi naro netravivarjitaḥ |
mama kṣetre mṛtaḥ so'pi rudraloke mahīyate || 120 ||
[Analyze grammar]

janmaprabhṛti yo devi śravaṇābhyāṃ vivarjitaḥ |
prabhāse nidhanaṃ prāptaḥ sa bhavenmatparigrahaḥ || 121 ||
[Analyze grammar]

athātaḥ saṃpravakṣyāmi tīrthānāṃ sparśane vidhim |
mantreṇa maṃtritaṃ tīrthaṃ bhavetsaṃnihitaṃ tathā || 122 ||
[Analyze grammar]

prathamaṃ cālabhettīrthaṃ praṇavena jalaṃ śuci |
avagāhya tataḥ snāyādadhyātmamantrayogataḥ || 123 ||
[Analyze grammar]

oṃnamo devadevāya śitikaṇṭhāya daṃḍine |
rudrāya vāmahastāya cakriṇe vedhase namaḥ || 124 ||
[Analyze grammar]

sarasvatī ca sāvitrī vedamātā vibhāvarī |
saṃnidhānaṃ kuruṣvātra tīrthe pāpa praṇāśini |
sarveṣāmeva tīrthānāṃ maṃtra eṣa udāhṛtaḥ || 125 ||
[Analyze grammar]

ityuccārya namaskṛtvā snānaṃ kuryādyathāvidhi |
upavāsaṃ tataḥ kuryāttasminnahani suvrate || 126 ||
[Analyze grammar]

sā tithirvarṣamekaṃ tu upoṣyā bhaktitatparaiḥ || 127 ||
[Analyze grammar]

devyuvāca |
kasmiṃstīrthe naraiḥ pūrvaṃ prabhāsakṣetramāgataiḥ |
snānaṃ kāryaṃ mahādevi tanme vistarato vada || 128 ||
[Analyze grammar]

īśvara uvāca |
haṃta te saṃpravakṣyāmi ādyaṃ tīrthaṃ mahāprabham |
pūrvaṃ yatra naraiḥ snānaṃ kriyate tacchṛṣuṣva me || 129 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ saptame prabhāsakhaṇḍe prathame prabhāsakṣetramāhātmye tīrthayātrā vidhānavarṇanaṃnāmāṣṭāviṃśo'dhyāyaḥ || 28 ||
[Analyze grammar]