Chapter 192

[English text for this chapter is available]

sūta uvāca |
atha śrutvā mahānādaṃ vādyānāṃ samupasthitam |
nāradaḥ sammukhaḥ prāyājjñātvā ca jananīṃ nijām || 1 ||
[Analyze grammar]

praṇipatya sa dīnātmā bhūtvā cāśrupariplutaḥ |
prāha gadgadayā vācā kaṇṭhe bāṣpasamāvṛtaḥ || 2 ||
[Analyze grammar]

ātmanaḥ śāparakṣārthaṃ tasyāḥ kopavivṛddhaye |
kalipriyastadā vipro devastrīṇāṃ puraḥ sthitaḥ || 3 ||
[Analyze grammar]

meghagambhīrayā vācā praskhalaṃtyā padepade |
mayā tvaṃ devi cāhūtā pulastyena tataḥ param || 4 ||
[Analyze grammar]

strīsvabhāvaṃ samāśritya dīkṣākāle'pi nāgatā || 5 ||
[Analyze grammar]

tato vidheḥ samādeśācchakreṇānyā samāhṛtā |
kācidgopasamudbhūtā kumārī deva rūpiṇī || 6 ||
[Analyze grammar]

govaktreṇa praveśyātha guhyamārgeṇa tatkṣaṇāt |
ākarṣitā mahābhāge samānītātha tatkṣaṇāt || 7 ||
[Analyze grammar]

sā viṣṇunā vivāhārthaṃ tataścaivānumoditā |
īśvareṇa kṛtaṃ nāma gāyatrī ca tavānugam || 8 ||
[Analyze grammar]

brāhmaṇaiḥ sakalaiḥ proktaṃ brāhmaṇīti bhavatviyam |
asmākaṃ vacanādbrahmankuru hastagrahaṃ vibho || 9 ||
[Analyze grammar]

devaiḥ sarvaiḥ sa samproktastatastāṃ ca varānanām |
tataḥ patnyutthadharmeṇa yojayāmāsa satvaram || 10 ||
[Analyze grammar]

kiṃ vā te bahunoktena patnīśālāṃ samāgatā |
raśanā yojitā tasyā gopyāḥ kaṭyāṃ sureśvari || 11 ||
[Analyze grammar]

taddṛṣṭvā garhitaṃ karma niṣkrāṃto yajñamaṇḍapāt |
amarṣa vaśamāpanno na śakto vīkṣituṃ ca tām || 12 ||
[Analyze grammar]

etajjñātvā mahābhāge yatkṣamaṃ tatsamācara |
gaccha vā tiṣṭha vā tatra maṇḍape dharmavarjite || 13 ||
[Analyze grammar]

tacchrutvā sā tadā devī sāvitrī dvijasattamāḥ |
pramlānavadanā jātā padminīva himāgame || 14 ||
[Analyze grammar]

lateva cchinnamūlā sā cakrīva priyavicyutā |
śuciśuklāgame kāle sarasīva gatodakā || 15 ||
[Analyze grammar]

prakṣīṇacandralekheva mṛgīva mṛgavarjitā |
seneva hatabhūpālā satīva gatabhartṛkā || 16 ||
[Analyze grammar]

saṃśuṣkā puṣpamāleva mṛtavatsaiva saurabhī |
vaimanasyaṃ paraṃ gatvā niścalatvamupasthitām |
tāṃ dṛṣṭvā devapatnyastā jagadurnāradaṃ tadā || 17 ||
[Analyze grammar]

dhigdhikkalipriya tvāṃ ca rāge vairāgyakārakam |
tvayā kṛtaṃ sarvametadvidhestasya tathāntaram || 18 ||
[Analyze grammar]

gauryuvāca |
ayaṃ kalipriyo devi brūte satyānṛtaṃ vacaḥ |
anena karmaṇā prāṇānbibhartyeṣa sadā muniḥ || 19 ||
[Analyze grammar]

ahaṃ tryakṣeṇa sāvitri purā proktā muhurmuhuḥ |
nāradasya munervākyaṃ na śraddheyaṃ tvayā priye |
yadi vāṃchasi saukhyāni mama jātāni pārvati || 20 ||
[Analyze grammar]

tataḥprabhṛti naivāhaṃ śraddadhe'sya vacaḥ kvacit |
tasmādgacchāmahe tatra yatra tiṣṭhati te patiḥ || 21 ||
[Analyze grammar]

svayaṃ dṛṣṭvaiva vṛttāṃtaṃ kartavyaṃ yatkṣamaṃ tataḥ |
nātrāsya vacanādadya sthātavyaṃ tatra gamyatām || 22 ||
[Analyze grammar]

sūta uvāca |
gauryā stadvacanaṃ śrutvā sāvitrī harṣavarjitā |
makhamaṇḍapamuddiśya praskhalantī padepade || 23 ||
[Analyze grammar]

prajagāma dvijaśreṣṭhāḥ śūnyena manasā tadā |
pratibhāti tadā gītaṃ tasyā madhuramapyaho || 24 ||
[Analyze grammar]

karṇaśūlaṃ yathā'yātamasakṛddvijasattamāḥ |
vandhyavādyaṃ yathā vādyaṃ mṛdaṃgānakapūrvakam || 25 ||
[Analyze grammar]

pretasaṃdarśanaṃ yadvanmartyaṃ tatsā mahāsatī |
vīkṣituṃ na ca śakroti gacchamānā tadā makhe || 26 ||
[Analyze grammar]

śṛṃgāraṃ ca tathāṃgāraṃ manyate sā tanusthitam |
vāṣpapūrṇekṣaṇā dīnā prajagāma mahāsatī || 27 ||
[Analyze grammar]

tataḥ kṛcchrātsamāsādya saivaṃ taṃ yajñamaṃḍapam |
kṛcchrātkārāgṛhaṃ tadvadduṣprekṣyaṃ dṛkpathaṃ gatam || 28 ||
[Analyze grammar]

atha dṛṣṭvā tu saṃprāptāṃ sāvitrīṃ yajñamaṇḍapam |
tatkṣaṇācca caturvaktraḥ saṃsthito'dhomukho hriyā || 29 ||
[Analyze grammar]

tathā śambhuśca śakraśca vāsudevastathaiva ca |
ye cānye vibudhāstatra saṃsthitā yajñamaṃḍape || 30 ||
[Analyze grammar]

te ca brāhmaṇaśārdūlāstyaktvā vedadhvaniṃ tataḥ |
mūkībhāvaṃ gatāḥ sarve bhayasaṃtrastamānasāḥ || 31 ||
[Analyze grammar]

atha saṃvīkṣya sāvitrī sapatnyā sahitaṃ patim |
kopasaṃraktanayanā paruṣaṃ vākyamabravīt || 32 ||
[Analyze grammar]

sāvitryuvāca |
kimetadyujyate kartuṃ tava vṛddha tamākṛte |
ūḍhavānasi yatpatnīmetāṃ gopasamudbhavām || 33 ||
[Analyze grammar]

ubhayoḥ pakṣayoryasyāḥ strīṇāṃ kāṃtā yathepsitāḥ |
śaucācāraparityaktā dharmakṛtyaparāṅmukhāḥ || 34 ||
[Analyze grammar]

yadanvaye janāḥ sarve paśudharmaratotsavāḥ |
sodaryāṃ bhaginīṃ tyaktvā jananīṃ ca tathā parām || 35 ||
[Analyze grammar]

tasyāḥ kule prasevaṃte sarvāṃ nārīṃ janāḥ parām |
yathā hi paśavo'śnaṃti tṛṇāni jalapānagāḥ || 36 ||
[Analyze grammar]

viṇmūtraṃ kevalaṃ cakrurbhārodvahanameva ca || 9 ||
[Analyze grammar]

tadvadasyāḥ kulaṃ sarvaṃ takramaśrāti kevalam || 37 ||
[Analyze grammar]

kṛtvā mūtrapurīṣaṃ ca janmabhogavivarjitam |
nānyajjānāti kartavyaṃ dharmaṃ svodarasaṃ śrayāt || 38 ||
[Analyze grammar]

antyajā api no karma yatkurvanti vigarhitam |
ābhīrāstacca kurvaṃti tatkimetattvayā kṛtam || 39 ||
[Analyze grammar]

avaśyaṃ yadi te kāryaṃ bhāryayā parayā makhe |
tvayā vā brāhmaṇī kāpi prakhyātā bhuvanatraye || 40 ||
[Analyze grammar]

noḍhā vidhe vṛthā muṇḍa nūnaṃ dhūrto'si me mataḥ |
yattvayā śaucasaṃtyaktā kanyābhāvapradūṣitā || 41 ||
[Analyze grammar]

prabhuktā bahubhiḥ pūrvaṃ tathā gopakumārikā |
eṣā prāptā supāpāḍhyā veśyājanaśatādhikā || 42 ||
[Analyze grammar]

antyajātā tathā kanyā kṣatayoniḥ prajāyate |
tathā gopakumārī ca kācittādṛkprajāyate || 43 ||
[Analyze grammar]

mātṛkaṃ paitṛkaṃ vaṃśaṃ śvāśuraṃ ca prapātayet |
tasmādetena kṛtyena garhitena dharātale || 44 ||
[Analyze grammar]

na tvaṃ prāpsyasi tāṃ pūjāṃ tathā nye vibudhottamāḥ |
anena karmaṇā caiva yadi me sti ṛtaṃ kvacit || 44 ||
[Analyze grammar]

pūjāṃ ye ca kariṣyaṃti bhaviṣyaṃti ca nirdhanāḥ |
kathaṃ na lajjitosi tvametatkurvanvigarhitam || 46 ||
[Analyze grammar]

putrāṇāmatha pautrāṇāmanyeṣāṃ ca divaukasām |
ayogyaṃ caiva viprāṇāṃ yadetatkṛtavānasi || 47 ||
[Analyze grammar]

atha vā naiṣa doṣaste na kāmavaśagā narāḥ |
lajjaṃti ca vijānaṃti kṛtyākṛtyaṃ śubhāśubham || 48 ||
[Analyze grammar]

akṛtyaṃ manyate kṛtyaṃ mitraṃ śatruṃ ca manyate |
śatruṃ ca manyate mitraṃ janaḥ kāmavaśaṃ gataḥ || 49 ||
[Analyze grammar]

dyūtakāre yathā satyaṃ yathā cauraṃ ca sauhṛdam |
yathā nṛpasya no mitraṃ tathā lajjā na kāminām || 50 ||
[Analyze grammar]

api syācchītalo vahniścaṃdramā dahanātmakaḥ |
kṣārābdirapi miṣṭaḥ syānna kāmī lajjate dhruvam || 51 ||
[Analyze grammar]

na me syāddukhametaddhi yatsāpatnyamupasthitam |
sahasramapi nārīṇāṃ puruṣāṇāṃ yathā bhavet || 52 ||
[Analyze grammar]

kulīnānāṃ ca śuddhānāṃ svajātyānāṃ viśeṣataḥ |
tvaṃ kuruṣva parāṇāṃ ca yadi kāmavaśaṃ gataḥ || 53 ||
[Analyze grammar]

etatpunarmahadduḥkhaṃ yadābhīrī vigarhitā |
veśyeva naṣṭacāritrā tvayoḍhā bahubhartṛkā || 54 ||
[Analyze grammar]

tasmādahaṃ prayāsyāmi yatra nāma na te vidhe |
śrūyate kāmalubdhasya hriyā parihṛtasya ca || 55 ||
[Analyze grammar]

ahaṃ viḍaṃbitā yasmādatrānīya tvayā vidhe |
purato devapatnīnāṃ devānāṃ ca dvijanmanām |
tasmātpūjāṃ na te kaścitsāṃprataṃ prakariṣyati || 56 ||
[Analyze grammar]

adya prabhṛti yaḥ pūjāṃ maṃtrapūjāṃ kariṣyati |
tava martyo dharāpṛṣṭhe yathānyeṣāṃ divaukasām || 57 ||
[Analyze grammar]

bhaviṣyati ca tadvaṃśo daridro duḥkhasaṃyutaḥ |
brāhmaṇaḥ kṣatriyo vāpi vaiśyaḥ śūdropi cālaye || 58 ||
[Analyze grammar]

eṣā'bhīrasutā yasmānmama sthāne vigarhitā |
bhaviṣyati na saṃtānastasmādvākyānmamaiva hi || 59 ||
[Analyze grammar]

na pūjāṃ lapsyate loke yathānyā devayoṣitaḥ || 60 ||
[Analyze grammar]

kariṣyati ca yā nārī pūjā yasyā api kvacit |
sā bhaviṣyati duḥkhāḍhyā vaṃdhyā daurbhāgyasaṃyutā || 61 ||
[Analyze grammar]

pāpiṣṭhā naṣṭacāritrā yathaiṣā paṃcabhartṛkā |
vikhyātiṃ yāsyate loke yathā cāsau tathaiva sā || 62 ||
[Analyze grammar]

etasyā anvayaḥ pāpo bhaviṣyati niśācara |
satyaśaucaparityaktāḥ śiṣṭasaṃgavivarjitāḥ || 63 ||
[Analyze grammar]

aniketā bhaviṣyaṃti vaṃśe'syā goprajīvinaḥ |
evaṃ śaptvā vidhiṃ sādhvī gāyatrīṃ ca tataḥ param || 64 ||
[Analyze grammar]

tato devagaṇānsarvāñchaśāpa ca tadā satī |
bhobhoḥ śakra tvayānītā yadeṣā paṃcabhartṛkā || 65 ||
[Analyze grammar]

tadāpnuhi phalaṃ samyakchubhaṃ kṛtvā guroridam |
tvaṃ śatrubhirjito yuddhe baṃdhanaṃ samavāpsyasi || 66 ||
[Analyze grammar]

kārāgāre ciraṃ kālaṃ saṃgamiṣyatyasaṃśayam |
vāsudeva tvayā yasmādeṣā vai paṃcabhartṛkā || 67 ||
[Analyze grammar]

anumoditā vidheḥ pūrvaṃ tasmācchapsyāmyasaṃśayam |
tvaṃ cāpi parabhṛtyatvaṃ saṃprāpsyasi sudurmate || 68 ||
[Analyze grammar]

samīpastho'pi rudra tvaṃ karmaitadyadupekṣase |
niṣedhayasi no mūḍha tasmācśṛṇu vaco mama || 69 ||
[Analyze grammar]

jīvamānasya kāṃtasya mayā tadvirahodbhavam |
saṃsevitaṃ mṛtāyāṃ te dayitāyāṃ bhaviṣyati || 70 ||
[Analyze grammar]

yatra yajñe praviṣṭeyaṃ garhitā paṃcabhartṛkā |
bhavānapi havirvahne yattvaṃ gṛhṇāsi laulyataḥ || 71 ||
[Analyze grammar]

tathānyeṣu ca yajñeṣu samyakchaṃkāvivarjitaḥ |
tasmādduṣṭasamācāra sarvabhakṣo bhaviṣyasi || 72 ||
[Analyze grammar]

svadhayā svāhayā sārdhaṃ sadā duḥkhasamanvitaḥ |
naivāpsyasi paraṃ saukhyaṃ sarvakālaṃ yathā purā || 73 ||
[Analyze grammar]

ete ca brāhmaṇāḥ sarve lobhopahatacetasaḥ |
homaṃ prakurvate ye ca makhe cāpi vigarhite || 74 ||
[Analyze grammar]

vittalobhena yatraiṣā niviṣṭā pañcabhartṛkā |
tathā ca vacanaṃ proktaṃ brāhmaṇīyaṃ bhaviṣyati || 75 ||
[Analyze grammar]

daridropahatāstasmādvṛṣalīpatayastathā |
vedavikrayakartāro bhaviṣyatha na saṃśayaḥ || 76 ||
[Analyze grammar]

bhobho vittapate vittaṃ dadāsi makhaviplave |
tasmādyatte'khilaṃ vittamabhogyaṃ saṃbhaviṣyati || 77 ||
[Analyze grammar]

tathā devagaṇāḥ sarve sāhāyyaṃ ye samāśritāḥ |
atra kurvaṃti doṣāḍhye yajñe vai pāṃcabhartṛke || 78 ||
[Analyze grammar]

saṃtānena parityaktāste bhaviṣyaṃti sāṃpratam |
dānavaiśca parābhūtā duḥkhaṃ prāpsyati kevalam || 79 ||
[Analyze grammar]

etasyāḥ pārśvataścānyāścatasro yā vyavasthitāḥ |
ābhīrīti sapa tnīti proktā dhyānapraharṣitāḥ || 80 ||
[Analyze grammar]

mama dveṣaparā nityaṃ śivadūtīpurassarāḥ |
tāsāṃ parasparaṃ saṃgaḥ kadācicca bhaviṣyati || 81 ||
[Analyze grammar]

nānyenātra nareṇāpi dṛṣṭimātramapi kṣitau |
parvatāgreṣu durgeṣu cāgamyeṣu ca dehinām |
vāsaḥ saṃpatsyate nityaṃ sarvabhogavivarjitaḥ || 82 ||
[Analyze grammar]

sūta uvāca |
evamuktvā'tha sāvitrīkopopahatacetasā |
visṛjya devapatnīstāḥ sarvā yāḥ pārśvataḥ sthitāḥ || 83 ||
[Analyze grammar]

udaṅmukhī pratasthe ca vāryamāṇāpi sarvataḥ |
sarvābhirdevapatnībhirlakṣmīpūrvābhirevaca || 84 ||
[Analyze grammar]

tatra yāsyāmi no yatra nāmāpi kila vai yataḥ |
śrūyate kāmukasyāsya tatra yāsyāmyahaṃ drutam || 85 ||
[Analyze grammar]

ekaścaraṇayornyasto vāmaḥ parvatarodhasi |
dvitīyena samārūḍhā tasyāgasya tathopari || 86 ||
[Analyze grammar]

adyāpi tatpadaṃ vāmaṃ tasyāstatra pradṛśyate |
sarvapāpaharaṃ puṇyaṃ sthitaṃ parvatarodhasi || 87 ||
[Analyze grammar]

api pāpasamācāro yastaṃ pūjayate naraḥ |
sarvapātakanirmuktaḥ sa yāti paramaṃ padam || 88 ||
[Analyze grammar]

yo yaṃ kāmamabhi dhyāya tamarcayati mānavaḥ |
avaśyaṃ samavāpnoti yadyapi syātsudurlabham || 89 ||
[Analyze grammar]

sūta uvāca |
evaṃ tatra sthitā devī sāvitrī parvatā śrayā |
apamānaṃ mahatprāpya sakāśātsvapatestadā || 90 ||
[Analyze grammar]

yastāmarcayate samyakpaurṇamāsyāṃ viśeṣataḥ |
sarvānkāmānavāpnoti sa manovāṃchitāṃ stadā || 91 ||
[Analyze grammar]

yā nārī kurute bhaktyā dīpadānaṃ tadagrataḥ |
raktataṃtubhirājyena śrūyatāṃ tasya yatphalam || 92 ||
[Analyze grammar]

yāvantastaṃtavastasya dahyaṃte dīpa saṃbhavāḥ |
muhūrtāni ca yāvaṃti ghṛtadīpaśca tiṣṭhati |
tāvajjanmasahasrāṇi sā syātsaubhāgyabhāṃginī || 93 ||
[Analyze grammar]

putrapautrasamopetā dhaninī śīla maṃḍanā ||
na durbhagā na vandhyā ca na ca kāṇā virūpikā || 94 ||
[Analyze grammar]

yā nṛtyaṃ kurute nārī vidhavāpi tadagrataḥ |
gītaṃ vā kurute tatra tasyāḥ śṛṇuta yatphalam || 95 ||
[Analyze grammar]

yathāyathā nṛtyamānā svagātraṃ vidhunoti ca |
tathātathā dhunotyeva yatpāpaṃ prakṛtaṃ purā || 96 ||
[Analyze grammar]

yāvanto jantavo gītaṃ tasyāḥ śṛṇvaṃti tatra ca |
tāvaṃti divi varṣāṇi sahasrāṇi vasecca sā || 97 ||
[Analyze grammar]

sāvitrīṃ yā samuddiśya phaladānaṃ karoti sā |
phalasaṃkhyāpramāṇāni yugāni divi modate || 98 ||
[Analyze grammar]

miṣṭānnaṃ yacchate yaśca nārīṇāṃ ca viśeṣataḥ |
tasyā dakṣiṇamūrtau ca bhartrāḍhyānāṃ dvijottamāḥ |
sa ca sikthapramāṇāni yugā ni divi modate || 99 ||
[Analyze grammar]

yaḥ śrāddhaṃ kurute tatra samyakchraddhāsamanvitaḥ |
rasenaikena sasyena tathaikena dvijottamāḥ |
tasyāpi jāyate puṇyaṃ gayāśrāddhena yadbhavet || 100 ||
[Analyze grammar]

yaḥ karoti dvijastasyā dakṣiṇāṃ diśamāśritaḥ |
sandhyopāsanamekaṃ tu svapatnyā kṣipitairjalaiḥ || 101 ||
[Analyze grammar]

sāyaṃtane ca saṃprāpte kāle brāhmaṇasattamāḥ |
tena syādvaṃditā saṃdhyā samyagdvādaśavārṣikī || 102 ||
[Analyze grammar]

yo japedbrāhmaṇastasyāḥ sāvitrīṃ purataḥ sthitaḥ |
tasya yatsyātphalaṃ viprāḥ śrūyatāṃ tadvadāmi vaḥ || 103 ||
[Analyze grammar]

daśabhirjjanmajanitaṃ śatena ca purā kṛtam |
triyuge tu sahasreṇa tasya naśyati pātakam || 104 ||
[Analyze grammar]

tasmātsarvaprayatnena camatkārapuraṃ prati |
gatvā tāṃ pūjayeddevīṃ stotavyā ca viśeṣataḥ || 105 ||
[Analyze grammar]

sāvitryā idamākhyānaṃ yaḥ paṭhecchṛṇuyācca vā |
sarvapāpavinirmuktaḥ sukhabhāgatra jāyate || 106 ||
[Analyze grammar]

etadvaḥ sarvamākhyātaṃ yatpṛṣṭo'haṃ dvijottamāḥ |
sāvitryāḥ kṛtsnaṃ māhātmyaṃ kiṃ bhūyaḥ pravadāmyaham || 107 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ ṣaṣṭhe nāgarakhaṇḍe hāṭakeśvarakṣetramāhātmye sāvitrīmāhātmyavarṇanaṃnāma dvinavatyuttaraśatatamo'dhyāyaḥ || 192 ||
[Analyze grammar]