Chapter 9

[English text for this chapter is available]

ṛṣaya ūcuḥ |
sādhusādhu mahābhāga tvayā kathitamuttamam |
ākhyānaṃ punaranyatra vicitraṃ vaktumarhasi || 1 ||
[Analyze grammar]

sūta uvāca |
vidarbhaviṣaye pūrvamāsīdeko dvijottamaḥ |
vedamitra iti khyāto veda śāstrārthavitsudhīḥ || 2 ||
[Analyze grammar]

tasyāsīdaparo vipraḥ sakhā sārasvatāhvayaḥ |
tāvubhau paramasnigdhāvekadeśanivāsinau || 3 ||
[Analyze grammar]

vedamitrasya putro'bhūtsumedhā nāma suvrataḥ |
sārasvatasya tanayaḥ somavāniti viśrutaḥ || 4 ||
[Analyze grammar]

ubhau savayasau bālau samaveṣau samasthitī |
samaṃ ca kṛtasaṃskārau sama vidyau babhūvatuḥ || 5 ||
[Analyze grammar]

sāṃgānadhītya tau vedāṃstarkavyākaraṇāni ca |
itihāsapurāṇāni dharmaśāstrāṇi kṛtsnaśaḥ || 6 ||
[Analyze grammar]

sarvavidyākuśalinau bālya eva manīṣiṇau |
praharṣamatulaṃ pitrordadatuḥ sakalairguṇaiḥ || 7 ||
[Analyze grammar]

tāvekadā svatanayau tāvubhau brāhmaṇottamau |
āhūyāvocatāṃ prītyā ṣoḍa śābdau śubhākṛtī || 8 ||
[Analyze grammar]

he putrakau yuvāṃ bālye kṛtavidyau suvarcasau |
vaivāhikoyaṃ samayo vartate yuvayoḥ samam || 9 ||
[Analyze grammar]

imaṃ prasādya rājānaṃ vidarbheśaṃ svavidyayā |
tataḥ prāpya dhanaṃ bhūri kṛtodvāhau bhaviṣyathaḥ || 10 ||
[Analyze grammar]

evamuktau sutau tābhyāṃ tāvubhau dvijanaṃdanau |
vidarbharājamāsādya samatoṣayatāṃ guṇaiḥ || 11 ||
[Analyze grammar]

vidyayā parituṣṭāya tasmai dvijakumārakau |
vivāhārthaṃ kṛtodyogau dhanahīnāvaśaṃsatām || 12 ||
[Analyze grammar]

tayorapi mataṃ jñātvā sa vidarbhamahīpatiḥ |
prahasya kiṃcitprovāca lokatattvavivitsayā || 13 ||
[Analyze grammar]

āste niṣadharājasya rājñī sīmaṃtinī satī |
somavāre mahādevaṃ pūjayatyaṃbikāyutam || 14 ||
[Analyze grammar]

tasmindine sapatnīkāndvijāgryānvedavittamān |
saṃpūjya parayā bhaktyā dhanaṃ bhūri dadāti ca || 15 ||
[Analyze grammar]

ato'tra yuvayoraiko nārīvibhramaveṣadhṛk |
ekastasyā patirbhūtvā jāyetāṃ vipradaṃpatī || 16 ||
[Analyze grammar]

yuvāṃ vadhūvarau bhūtvā prāpya sīmaṃtinīgṛham |
bhuktvā bhūri dhanaṃ labdhvā punaryātaṃ mamāṃmatikam || 17 ||
[Analyze grammar]

iti rājñā samādiṣṭau bhītau dvijakumārakau |
pratyūcaturidaṃ karma kartuṃ nau jāyate bhayam || 18 ||
[Analyze grammar]

devatāsu gurau pitrostathā rājakuleṣu ca |
kauṭilyamācaranmohātsadyo naśyati sānvayaḥ || 19 ||
[Analyze grammar]

kathamaṃtargṛhaṃ rājñāṃ chadmanā praviśetpumān |
gopyamānamapicchadma kadācitkhyātimeṣyati || 20 ||
[Analyze grammar]

ye guṇāḥ sādhitāḥ pūrvaṃ śīlācāraśrutādibhiḥ |
sadyaste nāśamāyāṃti kauṭilya pathagāminaḥ || 21 ||
[Analyze grammar]

pāpaṃ niṃdā bhayaṃ vairaṃ catvāryetāni dehinām |
chadmamārgaprapannānāṃ tiṣṭhaṃtyeva hi sarvadā || 22 ||
[Analyze grammar]

ata āvāṃ śubhācārau jātau ca śucināṃ kule |
vṛttaṃ dhūrtajanaślāghyaṃ nāśrayāvaḥ kadācana || 23 ||
[Analyze grammar]

rājovāca |
daivatānāṃ gurūṇāṃ ca pitrośca pṛthivīpateḥ |
śāsanasyāpyalaṃghyatvātpratyādeśo na karhicit || 24 ||
[Analyze grammar]

etairyadyatsamādiṣṭaṃ śubhaṃ vā yadi vā'śubham |
kartavyaṃ niyataṃ bhītairapramattairbubhūṣubhiḥ || 25 ||
[Analyze grammar]

aho vayaṃ hi rājānaḥ prajā yūyaṃ hi saṃmatāḥ |
rājājñayā pravṛttānāṃ śreyaḥ syādanyathā bhayam || 26 ||
[Analyze grammar]

ato macchāsanaṃ kāryaṃ bhava dbhyāmavilaṃbitam |
ityuktau naradevena tau tathetyūcaturbhayāt || 27 ||
[Analyze grammar]

sārasvatasya tanayaṃ sāmavantaṃ narādhipaḥ |
strīrūpadhāriṇaṃ cakre vastrākalpāṃ janādibhiḥ || 28 ||
[Analyze grammar]

sa kṛtrimodbhūtakalatrabhāvaḥ prayuktakarṇābharaṇāṃgarāgaḥ |
snigdhāñjanākṣaḥ spṛhaṇīyarūpo babhūva sadyaḥ pramadottamābhaḥ || 29 ||
[Analyze grammar]

tāvubhau daṃpatī bhūtvā dvijaputrau nṛpājñayā |
jagmaturnaiṣadhaṃ deśaṃ yadvā tadvā bhavatviti || 30 ||
[Analyze grammar]

upetya rājasadanaṃ somavāre dvijottamaiḥ |
sapatnīkaiḥ kṛtātithyau dhautapādau babhūvatuḥ || 31 ||
[Analyze grammar]

sā rājñī brāhmaṇānsarvānupaviṣṭānvarāsane |
pratyekamarcayāṃcakre sapatnīkāndvijottamān || 32 ||
[Analyze grammar]

tau ca viprasutau dṛṣṭvā prāptau kṛtakadaṃpatī |
jñātvā kiṃcidvihasyātha mene gaurīmaheśvarau || 33 ||
[Analyze grammar]

āvāhya dvijamukhyeṣu devadevaṃ sadāśivam |
patnīṣvāvāhayāmāsa sā devīṃ jagadaṃbikām || 34 ||
[Analyze grammar]

gandhairmālyaiḥ surabhibhirdhūpairnīrājanairapi |
arcayitvā dvijaśreṣṭhānnamaścakre samāhitā || 35 ||
[Analyze grammar]

hiraṇmayeṣu pātreṣu pāyasaṃ ghṛtasaṃyutam |
śarkarāmadhusaṃyuktaṃ śākairjuṣṭaṃ manoramaiḥ || 36 ||
[Analyze grammar]

gaṃdhaśālyodanairhṛdyairmodakāpūparāśibhiḥ |
śaṣkrulībhiśca saṃyāvaiḥ kṛsarairmāṣapakvakaiḥ || 37 ||
[Analyze grammar]

tathānyairapyasaṃkhyātairbhakṣyairbhojyairmanoramaiḥ |
sugandhaiḥ svādubhiḥ sūpaiḥ pānīyairapi śītalaiḥ || 38 ||
[Analyze grammar]

klṛptamannaṃ dvijāgryebhyaḥ sā bhaktyā paryaveṣayat |
dadhyodanaṃ nirupamaṃ nivedya samatoṣayat || 39 ||
[Analyze grammar]

bhuktavatsu dvijāgryeṣu svācāṃteṣu nṛpāṃganā |
praṇamya dattvā tāṃbūlaṃ dakṣiṇāṃ ca yathārhataḥ || 40 ||
[Analyze grammar]

dhenūrhiraṇyavāsāṃsi ratnasragbhūṣaṇāni ca |
dattvā bhūyo namaskṛtya visasarja dvijottamān || 41 ||
[Analyze grammar]

tayordvayorbhūsuravaryaputrayorekasttayā haimavatīdhiyārcitaḥ |
eko mahādevadhiyābhipūjitaḥ kṛtapraṇāmau yayatustadājñayā || 42 ||
[Analyze grammar]

sā tu vismṛtapuṃbhāvā tasminneva dvijottame |
jātaspṛhā madotsiktā kandarpavivaśābravīt || 43 ||
[Analyze grammar]

aṃyi nātha viśālākṣa sarvāvayavasundara |
tiṣṭhatiṣṭha kva vā yāsi māṃ na paśyasi te priyām || 44 ||
[Analyze grammar]

idamagre vanaṃ ramyaṃ supuṣpitamahādrumam |
asminvihartumicchāmi tvayā saha yathāsukham || 45 ||
[Analyze grammar]

itthaṃ tayoktamākarṇya puro'gacchaddvijātmajaḥ |
viciṃtya parihāsoktiṃ gacchati sma yathā purā || 46 ||
[Analyze grammar]

punarapyāha sā bālā tiṣṭhatiṣṭha kva yāsyasi |
durutsahasmarāveśāṃ paribhoktumupetya mām || 47 ||
[Analyze grammar]

pariṣvajasva māṃ kāṃtāṃ pāyayasva tavādharam |
nāhaṃ gaṃtuṃ samarthāsmi smarabāṇaprapīḍitā || 48 ||
[Analyze grammar]

itthamaśrutapūrvāṃ tāṃ niśamya pariśaṃkitaḥ |
āyāṃtīṃ pṛṣṭhato vīkṣya sahasā vismayaṃ gataḥ || 49 ||
[Analyze grammar]

kaiṣā padmapalāśākṣī pīnonnatapayodharā |
kṛśodarī bṛhacchroṇī navapallavakomalā || 50 ||
[Analyze grammar]

sa eva me sakhā kinnu jāta eva varāṃganā |
pṛcchāmyenamataḥ sarvamiti saṃcintya so'bravīt || 51 ||
[Analyze grammar]

kimapūrva ivābhāṣi sakhe rūpaguṇādibhiḥ |
apūrvaṃ bhāṣase vākyaṃ kāminīva samākulā || 52 ||
[Analyze grammar]

yastvaṃ vedapurāṇajño brahmacārī jiteṃdriyaḥ |
sārasvatātmajaḥ śāṃtaḥ kathamevaṃ prabhāṣase || 53 ||
[Analyze grammar]

ityuktā sā punaḥ prāha nāhamasmi pumānprabho |
nāmnā sāmavatī bālā tavāsmi ratidāyinī || 54 ||
[Analyze grammar]

yadi te saṃśayaḥ kāṃta mamāṃgāni vilokaya |
ityuktaḥ sahasā mārge rahasyenāṃ vyalokayat || 55 ||
[Analyze grammar]

tāmakṛtrimadhammillāṃ javanastanaśobhinīm |
surūpāṃ vīkṣya kāmena kiṃcidvyākulatāmagāt || 56 ||
[Analyze grammar]

punaḥ saṃstabhya yatnena cetaso vikṛtiṃ budhaḥ |
muhūrtaṃ vismayāviṣṭo na kiṃcitpratyabhāṣata || 57 ||
[Analyze grammar]

sāmavatyuvāca |
gataste saṃśayaḥ kaścittarhyāgaccha bhajasva mām |
paśyedaṃ vipinaṃ kāṃta parastrīsuratocitam || 58 ||
[Analyze grammar]

sumedhā uvāca |
maivaṃ kathaya maryādāṃ mā hiṃsīrmadamattavat |
āvāṃ vijñātaśāstrārthau tvamevaṃ bhāṣase katham || 59 ||
[Analyze grammar]

adhītasya ca śāstrasya vivekasya kulasya ca |
kimeṣa sadṛśo dharmo jāradharmaniṣevaṇam || 60 ||
[Analyze grammar]

na tvaṃ strī puruṣo vidvāñjānīhyātmānamātmanā |
ayaṃ svayaṃkṛto'nartha āvābhyāṃ yadviceṣṭitam || 61 ||
[Analyze grammar]

vaṃcayitvātmapitarau dhūrttarājānuśāsanāt |
kṛtvā cānucitaṃ karma tasyaitadbhujyate phalam || 62 ||
[Analyze grammar]

sarvaṃ tvanucitaṃ karma nṛṇāṃ śreyovināśanam |
yastvaṃ viprātmajo vidvāngataḥ strītvaṃ vigarhitam || 63 ||
[Analyze grammar]

mārgaṃ tyaktvā gato'raṇyaṃ naro vidhyeta kaṇṭakaiḥ |
balārddhisyeta vā hiṃsrairyadā tyaktasamā gamaḥ || 64 ||
[Analyze grammar]

evaṃ vivekamāśritya tūṣṇīmehi svayaṃ gṛham |
devadvijaprasādena strītvaṃ tava vilīyate || 65 ||
[Analyze grammar]

athavā daivayogena strītvameva bhavettava |
pitrā dattā mayā sākaṃ raṃsyase varavarṇini || 66 ||
[Analyze grammar]

aho citramaho duḥkhamaho pāpabalaṃ mahat |
aho rājñaḥ prabhāvoyaṃ śivārādhanasaṃbhṛtaḥ || 67 ||
[Analyze grammar]

ityuktāpyasakṛttena sā vadhūrativihvalā |
balena taṃ samāliṃgya cucuṃbādharapallavam || 68 ||
[Analyze grammar]

dharṣitopi tayā dhīraḥ sumedhā nūtanastriyam |
yatnādānīya sadanaṃ kṛtsnaṃ tatra nyavedayat || 69 ||
[Analyze grammar]

tadākarṇyātha tau viprau kupitau śokavihvalau |
tābhyāṃ saha kumārābhyāṃ vaidarbhāṃtikamīyatuḥ || 70 ||
[Analyze grammar]

tataḥ sārasvataḥ prāha rājānaṃ dhūrtaceṣṭitam |
rājanmamātmajaṃ paśya tava śāsanayaṃtritam || 71 ||
[Analyze grammar]

etau tavājñāvaśagau cakratuḥ karma garhitam |
matputrastatphalaṃ bhuṃkte strītvaṃ prāpya jugupsitam || 72 ||
[Analyze grammar]

adya me saṃtatirnaṣṭā nirāśāḥ pitaro mama |
nāputrasya hi lokosti luptapiṃḍādisaṃskṛteḥ || 73 ||
[Analyze grammar]

śikhopavītamajinaṃ maujīṃ daṃḍaṃ kamaṃḍalum |
brahmacaryocitaṃ cihnaṃ vihāyemāṃ daśāṃ gataḥ || 74 ||
[Analyze grammar]

brahmasūtraṃ ca sāvitrīṃ snānaṃ saṃdhyāṃ japārcanam |
visṛjya strītvamāptosya kā gatirvada pārthiva || 75 ||
[Analyze grammar]

tvayā me saṃtatirnaṣṭā naṣṭo vedapathaśca me |
ekātmajasya me rājankā gatirvada śāśvatī || 76 ||
[Analyze grammar]

iti sārasvatenoktaṃ vākyamākarṇya bhūpatiḥ |
sīmaṃtinyāḥ prabhāveṇa vismayaṃ paramaṃ gataḥ || 77 ||
[Analyze grammar]

atha sarvānsamāhūya maharṣīnamitadyutīn |
prasādya prārthayāmāsa tasya puṃstvaṃ mahīpatiḥ || 78 ||
[Analyze grammar]

te'buvannatha pārvatyāḥ śivasya ca samīhitam |
tadbhaktānāṃ ca māhātmyaṃ konyathā kartumīśvaraḥ || 79 ||
[Analyze grammar]

atha rājā bharadvājamādāya munipuṃgavam |
tābhyāṃ saha dvijāgryābhyāṃ tatsutābhyāṃ samanvitaḥ || 80 ||
[Analyze grammar]

aṃbikābhavanaṃ prāpya bharadvājopadeśataḥ |
tāṃ devīṃ niyamaistīvrairupāste sma mahāniśi || 81 ||
[Analyze grammar]

evaṃ trirātraṃ suvisṛṣṭabhojanaḥ sa pārvatīdhyāna rato mahīpatiḥ |
samyakpraṇāmairvividhaiśca saṃstavairgaurīṃ prapannārtiharāmatoṣayat || 82 ||
[Analyze grammar]

tataḥ prasannā sā devī bhaktasya pṛthivīpateḥ |
svarūpaṃ darśayāmāsa caṃdrakoṭisamaprabham || 83 ||
[Analyze grammar]

athāha gaurī rājānaṃ kiṃ te brūhi samīhitam |
so'pyāha puṃstvametasya kṛpayā dīyatāmiti || 84 ||
[Analyze grammar]

bhūyopyāha mahādevī madbhaktaiḥ karma yatkṛtam |
śakyate nānyathā kartuṃ varṣāyutaśatairapi || 85 ||
[Analyze grammar]

rājovāca |
ekātmajo hi viproyaṃ karmaṇā naṣṭasaṃtatiḥ |
kathaṃ sukhaṃ prapadyeta vinā putreṇa tādṛśaḥ || 86 ||
[Analyze grammar]

devyuvāca |
tasyānyo matprasādena bhaviṣyati sutottamaḥ |
vidyā vinayasaṃpanno dīrghāyuramalāśayaḥ || 87 ||
[Analyze grammar]

eṣā sāmavatī nāma sutā tasya dvijanmanaḥ |
bhūtvā sumedhasaḥ patnī kāmabhogena yujyatām || 88 ||
[Analyze grammar]

ityuktvāṃtarhitā devī te ca rājapurogamāḥ |
gatāḥ svaṃsvaṃ gṛhaṃ sarve cakrustacchāsane sthitim || 89 ||
[Analyze grammar]

sopi sārasvato vipraḥ putraṃ pūrvasuto ttamam |
lebhe devyāḥ prasādena hyacirādeva kālataḥ || 90 ||
[Analyze grammar]

tāṃ ca sāmavatīṃ kanyāṃ dadau tasmai sumedhase |
tau daṃpatī ciraṃ kālaṃ bubhujāte paraṃ sukham || 91 ||
[Analyze grammar]

sūta uvāca |
ityeṣa śivabhaktāyāḥ sīmaṃtinyā nṛpastriyāḥ |
prabhāvaḥ kathitaḥ śaṃbhormāhātmyamapi varṇitam || 92 ||
[Analyze grammar]

bhūyopi śivabhaktānāṃ prabhāvaṃ vismayāvaham |
samāsādvarṇayiṣyāmi śrotṝṇāṃ maṃgalāyanam || 93 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ tṛtīye brahmottarakhaṇḍe sīmaṃtinyāḥ prabhāvavarṇanaṃ nāma navamo'dhyāyaḥ || 9 ||
[Analyze grammar]