Chapter 9

[English text for this chapter is available]

skanda uvāca |
bhāvidharmaviparyāsakālavegavaśo'tha saḥ |
nāhaṃ kṣamiṣya ityuktvā kailāsaṃ prayayau mune || 1 ||
[Analyze grammar]

trailokyācchrīrapi tadā samudrentarddhimāyayau |
indraṃ vihāyāpsarasaḥ sarvaśaḥ śriyamanvayuḥ || 2 ||
[Analyze grammar]

tapaḥ śaucaṃ dayā satyaṃ pādaḥ saddharmaṛddhayaḥ |
siddhayaśca balaṃ sattvaṃ sarvataḥ śriyamanvayuḥ || 3 ||
[Analyze grammar]

gajādīni ca yānāni svarṇādyābhūṣaṇāni ca |
cikṣipurmaṇiratnāni dhātūpakaraṇāni ca || 4 ||
[Analyze grammar]

annānyauṣadhayaḥ snehāḥ kālenālpena cikṣiyuḥ |
na kṣīraṃ dhenumahiṣīpramukhānāṃ staneṣva'bhūt || 5 ||
[Analyze grammar]

navāpi nidhayo naṣṭāḥ kuberasyāpi mandirāta |
indraḥ sahāmaragaṇairāsīttāpasasannibhaḥ || 6 ||
[Analyze grammar]

sarvāṇi bhogadravyāṇi nāśamīyustrilokataḥ |
devā daityā manuṣyāśca sarve dāridyapīḍitāḥ || 7 ||
[Analyze grammar]

kāntyā hīnastataścandraḥ prāpāmbutvaṃ mahodadhau |
anāvṛṣṭirmahatyāsīddhānyabījakṣayaṃkarī || 8 ||
[Analyze grammar]

kvānnaṃ kvānneti jalpantaḥ kṣutkṣāmāśca nirojasaḥ |
tyaktvā grāmānpuraścoṣurvaneṣu ca nageṣu ca || 9 ||
[Analyze grammar]

kṣudhārttāste paśūnhatvā grāmyānāraṇyakāṃstathā |
paktvā'paktvāpi vā kecitteṣāṃ māṃsānyabhuñjata || 10 ||
[Analyze grammar]

vidvāṃso munayaścā'tha ye vai saddharmacāriṇaḥ |
mriyamāṇāḥ kṣudhā'thāpi nāśnanta palalāni tu || 11 ||
[Analyze grammar]

tadā tu vṛddhā ṛṣayastāndṛṣṭvā'naśanādṛtān |
manubhiḥ saha vedoktamāpaddharmamabodhayan || 12 ||
[Analyze grammar]

munayaḥ prāyaśastatra kṣudhā vyākulitendriyāḥ |
parokṣavādavedārthānviparītānprapedire || 13 ||
[Analyze grammar]

arthaṃ cājādiśabdānāṃ mukhyaṃ chāgādimeva te |
bubudhuścā'tha te prāhuryajñān kuruta bho dvijāḥ || 14 ||
[Analyze grammar]

yā vedavihitā hiṃsā na sā hiṃsāsti doṣadā |
uddiśya devānpitṝṃśca tato ghnata paśūñchubhān || 15 ||
[Analyze grammar]

prokṣitaṃ devatābhyaśca pitṛbhyaśca niveditam |
bhuñjata svepsitaṃ māṃsaṃ svārthaṃ tu ghnata mā paśūn || 16 ||
[Analyze grammar]

tato devarṣibhūpālā narāśca svasvaśaktitaḥ |
cakrustairbodhitā yajñānṛte hyekāntikānhareḥ || 17 ||
[Analyze grammar]

gomedhamaśvamedhaṃ ca naramedhamukhānmakhān |
cakruryajñāvaśiṣṭāni māṃsāni bubhujuśca te || 18 ||
[Analyze grammar]

vinaṣṭāyāḥ śriyaḥ prāptyai kecidyajñāṃśca cakrire |
strīputramaṃdirādyarthaṃ kecicca svīyavṛttaye || 19 ||
[Analyze grammar]

mahāyajñeṣvaśaktāstu pitṝnudiśya bhūriśaḥ |
nihatya śrāddheṣu paśūnmāṃsānyādaṃstathā'dayan || 20 ||
[Analyze grammar]

kecitsaritsamudrāṇāṃ tīreṣvevāvasañjanāḥ |
matsyāñjālairupādāya tadāhārā babhūvire || 21 ||
[Analyze grammar]

svagṛhāgataśiṣṭebhyaḥ paśūneva nihatya ca |
nivedayāmāsurete gochāgapramukhānmune || 22 ||
[Analyze grammar]

sajātīyavivāhānāṃ niyamaśca tadā kvacit |
nābhavaddharmasāṃkaryādvittaveśmādyabhāvataḥ || 23 ||
[Analyze grammar]

brāhmaṇāḥ kṣatriyādīnāṃ kṣatrādyā brahmaṇāṃ sutāḥ |
upayemire kālagatyā svasvavaṃśavivṛddhaye || 24 ||
[Analyze grammar]

itthaṃ hiṃsāmayā yajñāḥ saṃpravṛttā mahāpadi |
dharmastvābhāsamātro'sthātsvayaṃ tu śriyamanvagāt || 25 ||
[Analyze grammar]

adharmaḥ sānvayo lokāṃstrīnapi vyāpya sarvataḥ |
avarddhatā'lpakālena durnivāryo budhairapi || 26 ||
[Analyze grammar]

daridrāṇāmathaiteṣāmapatyāni tu bhūriśaḥ |
teṣāṃ ca vaṃśavistāro mahāṃllokeṣvavarddhata || 27 ||
[Analyze grammar]

vidvāṃsastatra ye jātāste tu dharmaṃ tameva hi |
menire mukhyamevā'tha granthāṃścakruśca tādṛśān || 28 ||
[Analyze grammar]

te paramparayā granthāḥ prāmāṇyaṃ pratipedire |
ādye tretāyuge hītthamāsīddharmasya viplavaḥ || 29 ||
[Analyze grammar]

tataḥprabhṛti lokeṣu yajñādau paśuhiṃsanam |
babhūva satye tu yuge dharma āsītsanātanaḥ || 30 ||
[Analyze grammar]

kālena mahatā sopi saha devaiḥ surādhipaḥ |
ārādhya saṃpadaṃ prāpa vāsudevaṃ prabhuṃ mune || 31 ||
[Analyze grammar]

tato dharmaniketasya śrīpateḥ kṛpayā hareḥ |
yathāpūrvaṃ ca saddharmastrilokyāṃ saṃpravarttata || 32 ||
[Analyze grammar]

tatrāpi kecinmunayo nṛpā devāśca mānuṣāḥ |
kāmakrodharasāsvādalobhopahatasaddhiyaḥ |
tamāpaddharmamadyāpi prādhānyenaiva manvate || 33 ||
[Analyze grammar]

ekāntino bhāgavatā jitakāmādayastu ye |
āpadyapi na te'gṛhṇaṃstaṃ tadā kimutā'nyadā || 34 ||
[Analyze grammar]

itthaṃ brahmannādikalpe hiṃsrayajñapravarttanam |
yathāsīttanmayākhyātamāpatkālavaśādbhuvi || 35 ||
[Analyze grammar]

iti śrīskānde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīvāsudevamāhātmye hiṃsrayajñapravṛttihetunirūpaṇaṃ nāma navamo'dhyāyaḥ || 9 ||
[Analyze grammar]