Chapter 8

[English text for this chapter is available]

śiva uvāca |
brahmakuṇḍāddakṣiṇato narāvāsagirirmahān |
yatra bhagavatā meruḥ sthāpito lokasundaraḥ || 1 ||
[Analyze grammar]

skanda uvāca |
kathaṃ bhagavatā meruḥ sthāpito narasannidhau |
mahatkautūhalaṃ tāta kathyatāṃ yadi rocate || 2 ||
[Analyze grammar]

mahādeva uvāca |
yadā bhagavato vāso viśālāyāṃ samāgataḥ |
devā maharṣayaḥ siddhāḥ savidyādharacāraṇāḥ || 3 ||
[Analyze grammar]

vihāya meruśṛṃgāṇi bhagavaddarśanotsukāḥ |
bhagavaddarśanāhlādatiraskṛtasurālayāḥ || 4 ||
[Analyze grammar]

tadā tu bhagavāṃsteṣāṃ sukhahetoḥ ṣaḍānana |
utpādya meruśṛṃgāṇi kareṇaikena līlayā |
sthāpayāmāsa sarveṣāṃ bhagavānprītivarddhanaḥ || 5 ||
[Analyze grammar]

tataḥ sarve samālokya giriṃ kāṃcananirmitam |
prasannāstuṣṭuvuḥ sarve nārāyaṇamanāmayam || 6 ||
[Analyze grammar]

devā ūcuḥ |
yosmatsukhāya bhavaviśramaṇāya bibhrallīlātanūḥ kanakaśailamihānināya |
jetā surārddanaśataṃ tridaśaikapakṣastasmai vidhema nama ugratapaḥśriyāya || 7 ||
[Analyze grammar]

yadyatkaroti kṛpayā kṛpaṇārtitūlaśailāgnirāśritakṛdekavidāṃ variṣṭhaḥ |
svenaiva tena karaṇena sa tuṣyatāṃ no yasyānvakāri puruṣeṇa na kenacidvai || 8 ||
[Analyze grammar]

asmākamunnatadhiyāṃ vidadhāti samyakchikṣāṃ piteva karuṇo nijalābhapūrṇaḥ |
trailokyarakṣaṇavicakṣaṇadṛṣṭipātapūrṇāmṛtāṃbudhirasau vipadaḥ prapāyāt || 9 ||
[Analyze grammar]

ṛṣaya ūcuḥ |
yenādhyastaṃ bhāti samastaṃ jagadekaṃ krīḍābhāṃḍaṃ satyatayā'jasya vibhūmnaḥ |
bhānāṃ vṛdaṃ yadvadanepyāśritamūrtistasmai nityaṃ śāśvata tubhyaṃ praṇamāma || 10 ||
[Analyze grammar]

siddhā ūcuḥ |
yatkṛpālavata eva mahāṃtaḥ siddhimīyuritare bhavabhājaḥ |
te'cireṇa bhavabhīmapayodhiṃ tīrṇavaṃta iti naḥ sumanīṣā || 11 ||
[Analyze grammar]

vidyādharā ūcuḥ |
vibho sadguṇagrāma kalyāṇamūrte pareśāna saṃmānasaṃtānaheto |
bhavatpādapadmāsavasvādamattāḥ kṛtārthā na citraṃ bhavatyatra kiṃcit || 12 ||
[Analyze grammar]

tatastuṣṭo'tha bhagavāṃsteṣāmāsīddivaukasām |
varaṃ vṛṇudhvamityuktāste procurvaradarṣabham || 13 ||
[Analyze grammar]

parituṣṭo bhavānsākṣāddevadevo ramāpatiḥ |
badarī na tvayā tyājyā na ca meruḥ kadācana || 14 ||
[Analyze grammar]

meruśṛṃgaṃ prapaśyaṃti ye janāḥ puṇyabhāginaḥ |
teṣāṃ vai tvatprasādena merau vāsaḥ prajāyatām || 15 ||
[Analyze grammar]

tatra bhuktvā cirādbhogānbhūyādante layastvayi |
evamastviti cābhāṣya tatraivāṃtarhito hariḥ || 16 ||
[Analyze grammar]

tataḥ prabhṛti te sarve meruśṛṃgavihāriṇaḥ |
naranārāyaṇasyāṃte pālyamānā muhurmuhuḥ || 17 ||
[Analyze grammar]

kadāciddivi tiṣṭhaṃti kadācinmerumadhyataḥ |
nirviśaṃkā nirudvegā ṛṣayaśca tapodhanāḥ || 18 ||
[Analyze grammar]

bhagavānapi tatraiva nararūpeṇa tiṣṭhati |
dhanurbāṇadharaḥ śrīmāṃstapasā pāvakopamaḥ |
ānaṃdamṛṣivṛṃdasya janayaṃstapa āsthitaḥ || 19 ||
[Analyze grammar]

tatastu paramaṃ tīrthaṃ lokapālābhivaṃditam |
yatra saṃsthāpayāmāsa lokapālānhariḥ svayam || 20 ||
[Analyze grammar]

skaṃda uvāca |
kathaṃ bhagavatā tatra lokapālāśca sthāpitāḥ |
mahatkautūhalaṃ tāta kathayasva mahāmate || 21 ||
[Analyze grammar]

śiva uvāca |
ekadā merumadhyasthāśrayāniha haranhariḥ |
devānāmṛṣimukhyānāṃ caritaṃ draṣṭumudyataḥ || 21 ||
[Analyze grammar]

taṃ dṛṣṭvā sahasotthāya namaskṛtya divaukasaḥ |
ūcuste vinayātsarve prasīda bhagavanvibho || 23 ||
[Analyze grammar]

kṣaṇaṃ viśrāmya vidhivaddṛṣṭvā tāṃ viralāṃ bhuvam |
sānnidhyamṛṣidevānāmayuktaṃ bhāvayanmithaḥ || 24 ||
[Analyze grammar]

tataḥ prahasya bhagavānuvāca madhusūdanaḥ |
lokapālānsamāhūya nātra stheyaṃ bhavadvidhaiḥ || 25 ||
[Analyze grammar]

ṛṣayastāpasāḥ siddhāḥ sastrīkā nivasaṃti hi |
bhavadvidhānāmāsthānaṃ pureva kalpitaṃ mayā || 26 ||
[Analyze grammar]

tataḥ sa tvarito gatvā ramye girivare hariḥ |
lokapālānsamāhūya sthāpayāmāsa tānguha || 27 ||
[Analyze grammar]

tatraiva śailadaṃḍena hatvāgniṃ jalakāṃkṣayā |
krīḍāpuṣkaraṇīṃ teṣāṃ nirmame sumanoharāma || 28 ||
[Analyze grammar]

sastrīkā yatra gīrvāṇā vicaraṃti nijecchayā |
gāyaṃti svanumodaṃti gaṃdharvāstridivaukasām || 29 ||
[Analyze grammar]

vanāni kusumāmodaramyāṇi paritoṣataḥ |
dināni yatra gacchaṃti kṣaṇaprāyāṇi dehinām || 30 ||
[Analyze grammar]

bhagavānapi tatraiva teṣāmānaṃdamāvahan |
dvādaśyāṃ paurṇamāsyāṃ ca svayamāyāti majjane || 31 ||
[Analyze grammar]

tatpaścādṛṣayaḥ sarve munayaśca tapodhanāḥ |
yatra snātvā vidhānena guha madhyāhnakālataḥ |
asaṃgaṃ paramaṃ jyotirjale paśyaṃti cakṣuṣā || 32 ||
[Analyze grammar]

sarvatīrthāvagāhena yatphalaṃ parikīrtitam |
tatphalaṃ tatkṣaṇādeva daṇḍapuṣkariṇīkṣaṇāt || 33 ||
[Analyze grammar]

yatra kāmyāni karmāṇi saphalāni manīṣiṇām |
yatra piṃḍapradānena gayāto'ṣṭaguṇaṃ phalam || 34 ||
[Analyze grammar]

yajño dānaṃ tapaḥ karma sarvamakṣayamucyate |
dvādaśyāṃ śuklapakṣasya jyeṣṭhe māsi ṣaḍānana || 35 ||
[Analyze grammar]

tatra snātvā vidhānena kṛtakṛtyo bhavedyataḥ |
badarītīrthamadhye tu guptametatsurottamaiḥ |
na vācyaṃ yatra kutrāpi tava prītyā mayoditam || 36 ||
[Analyze grammar]

vaktavyaṃ kimiha bahu prabhūtapuṇyāḥ paśyaṃti prathitamidaṃ suraikaguptam |
nānyeṣāṃ kathamapi cetasi prasaṃgāddevaiḥ syādanudinaciṃtitaṃ guhaitat || 37 ||
[Analyze grammar]

yeṣāṃ vai bhagavati cetsamagrakarma svādhyāyābhyasanavidhikrameṇa jātam |
paśyaṃti tribhuvanadurllabhaṃ sutīrthaṃ daṃḍodaṃ na bhavati cānyathā sudṛṣṭam || 38 ||
[Analyze grammar]

daṃḍodakātparaṃ tīrthaṃ na viṣṇoḥ sadṛśo'maraḥ |
viśālāsadṛśaṃ kṣetraṃ na bhūtaṃ na bhaviṣyati || 39 ||
[Analyze grammar]

sevanīyā prayatnena viśālā ca vicakṣaṇaiḥ |
ya icchetsatataṃ dhāma bhagavatpārśvavarti vai || 40 ||
[Analyze grammar]

skaṃda uvāca |
gaṃgāmāśritya tīrthāni kāni saṃtīha satpade |
śreyaskarāṇi bhūrīṇi saṃkṣepāttāni me vada || 41 ||
[Analyze grammar]

mahādeva uvāca |
gaṃgāyāṃ yatra saṃyogo mānasodbhedasannidhau |
tattīrthaṃ vimalaṃ puṇyaṃ prayāgādadhikaṃ mahat || 42 ||
[Analyze grammar]

triṃśadvarṣasahasrāṇi vāyubhojanato bhavet |
tatphalaṃ snānamātreṇa gaṃgāyāḥ saṃgame nṛṇām || 43 ||
[Analyze grammar]

saṃgamāddakṣiṇe bhāge dharmakṣetraṃ prakīrtitam |
yatra mūrtyā śrutau jātau naranārāyaṇāvṛṣī || 44 ||
[Analyze grammar]

tatkṣetraṃ pāvanaṃ martye sarveṣāmuttamottamam |
dharmastatraiva bhagavāṃścatuṣpādavatiṣṭhati || 45 ||
[Analyze grammar]

yatra yajñāstapo dānaṃ yatkiṃcitkriyate nṛbhiḥ |
tatpuṇyasya kṣayo nāsti kalpakoṭiśatairapi || 46 ||
[Analyze grammar]

tato dakṣiṇadigbhāga urvaśī saṃgamābhidham |
sarvapāpaharaṃ puṃsāṃ snānamātreṇa dehinām || 47 ||
[Analyze grammar]

kūrmoddhārastataḥ sākṣāddharibhaktyekasādhanam |
snānamātreṇa bhūtānāṃ sattvaśuddhiḥ prajāyate || 48 ||
[Analyze grammar]

brahmāvarttastataḥ sākṣādbrahmalokaikakāraṇam |
darśanādeva tīrthasya sarvapāpakṣayo bhavet || 49 ||
[Analyze grammar]

bahūni saṃti tīrthāni durgamyānīha dehinām |
saṃkṣepātkathitaṃ vatsa tavādaravaśādidam || 50 ||
[Analyze grammar]

ya idaṃ śṛṇuyānnityaṃ śrāvayedvā samāhitaḥ |
sarvapāpavinirmuktaḥ padaṃ viṣṇoḥ prapadyate || 51 ||
[Analyze grammar]

rājā vijayamāpnoti sutārthī labhate sutam |
kanyārthī labhate kanyāṃ kanyā viṃdati satpatim || 52 ||
[Analyze grammar]

dhanārthī dhanamāpnoti sarvakāmaikasādhanam || 53 ||
[Analyze grammar]

māsamātraṃ naro bhaktyā śṛṇuyādyaḥ samāhitaḥ |
tasyābhīṣṭasamāvāptirdurlabhopi na saṃśayaḥ || 54 ||
[Analyze grammar]

ādhivyādhibhayaṃ ghoraṃ dāridrya kalahaṃ tathā |
yasya geheṣu māhātmyaṃ tatraitāni na karhicit || 55 ||
[Analyze grammar]

nāpamṛtyurna sarpādi daurbhāgyaṃ cāpi vartate |
duḥsvapnagrahapīḍā ca pararāṣṭrabhayaṃ tathā || 56 ||
[Analyze grammar]

yuddhe yātrāprayāṇe ca paṭhanīyaṃ prayatnataḥ |
vivāhe ca vivāde ca śubhakarmaṇi yatnataḥ || 57 ||
[Analyze grammar]

pūrṇaṃ vā'dhyāyamātraṃ vā tadardhaṃ vā vicakṣaṇaiḥ |
sarvakāryaprasiddhiḥ syānnātra kāryā vicāraṇā || 58 ||
[Analyze grammar]