Chapter 31

[English text for this chapter is available]

jaiminiruvāca |
kṛtakṛtyaṃ tadātmānaṃ manyamānastato vrajet |
aśvamedhāṃgasaṃbhūtamiṃdradyumnasaraḥ prati || 1 ||
[Analyze grammar]

yasya tīre nivasati narasiṃhākṛtirhariḥ |
narasiṃhamanuprārthya tatra snāyādyathāvidhi || 2 ||
[Analyze grammar]

narasiṃha namastubhyaṃ yasya te kṣetra uttame |
sahasraṃ vājimedhasya kratoścakre nṛpottamaḥ || 3 ||
[Analyze grammar]

indradyumnaḥ prasādātte tasya kratvaṃgasaṃbhave |
sarasi snātumāyāto māmanujñāpaya prabho || 4 ||
[Analyze grammar]

tatastīrthataṭaṃ gatvā kṛtaśaucācamakriyaḥ |
prārthayedaṃjaliṃ kṛtvā imaṃ maṃtramudīrayet || 5 ||
[Analyze grammar]

aśvamedhāṃgagokoṭikhurakṣuṇṇamahītalaḥ |
tanmūtraphenādānāṃbhaḥ pūritākhilapāvanaḥ || 6 ||
[Analyze grammar]

snātuṃ tavāgataḥ puṇye sarvatīrthamaye jale |
pūrvajanmasahasrotthaṃ pāpaṃ snānādvimocaya || 7 ||
[Analyze grammar]

antaḥ praviśya ca tato vāruṇaiḥ paṃcabhirdvijāḥ |
snāyādantarjale japyāttrirāvṛttyāghamarṣaṇam || 8 ||
[Analyze grammar]

aśvamedhāṃgasaṃbhūta tīrtha sarvāghanāśana |
janmakoṭibhavaṃ pāpaṃ tvayi snānādvinaśyatu || 9 ||
[Analyze grammar]

imaṃ mantraṃ triruccārya triḥ snāyāttajjale dvijāḥ |
saṃsmaredviṣṇugāyatryā narasiṃhākṛtiṃ harim || 10 ||
[Analyze grammar]

āpo nārā iti proktā yasmāttā narasūnavaḥ |
ayanaṃ prathamaṃ cāsya tasmādapsu hariṃ smaret || 11 ||
[Analyze grammar]

devānṛṣīnpitṝṃścaiva tarpayedvidhivannaraḥ |
narasiṃhaṃ tato gacchetpaścimābhimukhaṃ sthitam || 12 ||
[Analyze grammar]

siddhaṃ śaṃbhuṃ kṛtrimaṃ vā paścimābhimukhaṃ harim |
dṛṣṭvā vimucyate pāpairjanmakoṭisamudbhavaiḥ || 13 ||
[Analyze grammar]

tamātharvaṇamaṃtreṇa yajecca narakesarim |
nāradena purā hyeṣa maṃtrarājaḥ pratiṣṭhitaḥ || 14 ||
[Analyze grammar]

indradyumnena tenaiva cirādeṣa upāsitaḥ |
narasiṃhākṛtau nānyo maṃtrastatsadṛśo dvijāḥ || 15 ||
[Analyze grammar]

yasyoccāraṇamātreṇa tuṣṭo bhavati kesarī |
anena dāruvarṣmāpi brahmaṇā saṃpratiṣṭhitaḥ || 16 ||
[Analyze grammar]

pūrvoktairupacāraistu pūjayennarakesarim |
japāprasūnairaruṇairanyaiścaiva sugaṃdhibhiḥ || 17 ||
[Analyze grammar]

caṃdanāgarukarpūrairlepayennarakesarim |
pāyasaṃ sitayā yuktaṃ saurabheyeṇa sarpiṣā || 18 ||
[Analyze grammar]

karpūrakhaṇḍasaṃyuktānmodakānghṛtapācitān |
saṃyāvānghṛtapūpāṃśca phalaṃ nānāvidhaṃ tathā || 19 ||
[Analyze grammar]

śarkarādadhisaṃyuktaṃ śālyannaṃ vinivedayet |
dṛṣṭvā spṛṣṭvā namaskṛtvā saṃpūjya narakesarim || 20 ||
[Analyze grammar]

svānsvānabhīṣṭānāpnoti naro vai nātra saṃśayaḥ |
devatvamamareśatvaṃ gaṃdharvatvaṃ ca bho dvijāḥ || 21 ||
[Analyze grammar]

īśitvaṃ ca vaśitvaṃ ca sārvabhaumatvameva vā |
yadyatkāmayate citte tattadāpnotyasaṃśayam || 22 ||
[Analyze grammar]

paṃcatīrthīvidhānaṃ ca kathitaṃ pṛcchatāṃ dvijāḥ |
dināni paṃca kṛtvaitāṃ pañcabhūtamaye punaḥ || 23 ||
[Analyze grammar]

na dehe praviśenmartyo vratī viṣṇuparāyaṇaḥ |
paurṇamāsyāṃ pratyuṣasi tīrtharājajale punaḥ || 24 ||
[Analyze grammar]

pūrvoktavidhinā snātvā śuddhāhāro jiteṃdriyaḥ |
ekabhaktavratenaiva varttate prītaye naraḥ |
yāvatpaṃca dināni syustāvatkālaṃ dvijottamāḥ || 25 ||
[Analyze grammar]

tataḥ praviśyaprāsādaṃ maṃcasthaṃ puruṣottamam |
rāmaṃ subhadrāṃ dṛṣṭvā ca mucyate pāpakaṃcukaiḥ || 26 ||
[Analyze grammar]

sarvatīrthamayātkūpāduddhṛtena sugandhinā |
vāriṇā snāpyamānaṃ tu yo jyaiṣṭhyāṃ paśyate harim || 27 ||
[Analyze grammar]

na tasya pāpasaṃbaṃdha ātmani prabhaviṣyati |
yātrākartṛvidhiṃ vakṣye śṛṇudhvaṃ munayaḥ param || 28 ||
[Analyze grammar]

caturdaśyāṃ dṛḍhaṃ maṃcaṃ kārayitvā suśobhanam |
tṛṇakāṣṭhamayaṃ liptaṃ sudhayā bahulaṃ śubham || 29 ||
[Analyze grammar]

athavā dārṣadaṃ kuryāccirasthāyi dvijottamāḥ |
snānārthaṃ devadevasya vittaśāṭhyaṃ na kārayet || 30 ||
[Analyze grammar]

nānādrumagaṇākīrṇaṃ dakṣiṇānilaśītalam |
ullasatsiṃdhukallolaśāḍvalopari saṃskṛtam || 31 ||
[Analyze grammar]

samucchritamahāmūlyavitānavaraśobhitam |
viralācchādanaṃ kuryāddevānāṃ darśanāya vai || 32 ||
[Analyze grammar]

āyāṃti brahmaṇā sārddhaṃ snapanāya jagatpateḥ |
svargaṃgāṃbhaḥ samādāya pārijātavibhūṣitam || 33 ||
[Analyze grammar]

brahmarṣayaśca tridaśā brahmaṇā sahitā vibhum |
maṃcasthaṃ snāpayantīha vacanātparameṣṭhinaḥ || 34 ||
[Analyze grammar]

jayaśabdaiśca stutibhirvaṃdyo'yaṃ tridivaukasām |
tasmānmaṃcastu kartavyo maṃḍito mālyacāmaraiḥ || 35 ||
[Analyze grammar]

nānāmaṇisrajā hāridukūlakṛtatoraṇam |
sugaṃdhadhūpasurabhicaṃdanābhaḥ samukṣitam || 36 ||
[Analyze grammar]

evaṃ maṃcaṃ pratiṣṭhāpya tasya dakṣiṇato dvijāḥ |
kūpādvāri samuddhṛtya kalaśānsvarṇanirmitān || 37 ||
[Analyze grammar]

śālāyāṃ śāstradṛṣṭena vidhinā tvadhivāsayet || 38 ||
[Analyze grammar]

suvāsitaṃ jalaṃ teṣu pāvamānyā prapūrayet |
caturdaśīniśāmadhye karmaitatsamudāhṛtam || 39 ||
[Analyze grammar]

śanaiḥ śanaiśca nīyāsurhariṃ hali puraḥsaram |
brāhmaṇāḥ kṣatriyā vaiśyā rājñā saṃmānitādṛtāḥ || 40 ||
[Analyze grammar]

cāmaraistālavṛntaiśca vījyamānaṃ niraṃtaram |
purākṛtāmalepaṃ taṃ viṣṇoraṃgānna hāpayet || 41 ||
[Analyze grammar]

yathā sugaṃdhalepena supuṣṭāṃgo dine dine |
tathā prayatnataḥ kāryaḥ kṛśāṃgo na hi puṣṭikṛt || 42 ||
[Analyze grammar]

nayeyurapramādyaṃto bhagavaṃtamānaditāḥ |
pramādato yadi bhavetpatanaṃ muravairiṇaḥ || 43 ||
[Analyze grammar]

balasya vā subhadrāyā rājño rājyasya bhītikṛt |
api pātayatāṃ hāniḥ saṃtaterbahuduḥkhitā || 44 ||
[Analyze grammar]

narake niyataṃ vāso bhavetteṣāṃ durātmanām |
vimuhyaṃtaścirāddārumayīyaṃ pratimā katham || 45 ||
[Analyze grammar]

tiṣṭhedaviśvasaṃto ye bhagavaddrohiṇastu te |
narakaṃ pratipadyaṃte sarvakarmabahiṣkṛtāḥ || 46 ||
[Analyze grammar]

mūḍhānāṃ nāstikānāṃ ca kṛtaghnānāṃ hatātmanām |
dharmakṛtyeṣu jāyaṃte aviśvāsasya yuktayaḥ || 47 ||
[Analyze grammar]

adṛṣṭaṃ yasya yāvaddhi sa tu tena vinirmitaḥ |
tadaṃte tasya kṣīyaṃte prāsādapratimādayaḥ || 48 ||
[Analyze grammar]

na cāyaṃ nirmitaḥ kena drumaḥ so'pi pravarddhitaḥ |
varaṃ dadāti yā nūnaṃ na cāsau pratimā matā || 49 ||
[Analyze grammar]

nirmitāyāṃ pratikṛtau purā manvaṃtarādiṣu |
vyatīteṣvapi varddhaṃte janānāṃ ca suparvaṇām || 50 ||
[Analyze grammar]

bhaktayastādṛśo viprāḥ sarveṣāṃ pṛthivīkṣitām |
svārociṣeṃ'tare caiva āvirbhūtaḥ kṛpānidhiḥ || 51 ||
[Analyze grammar]

vaivasvateṃ'tare saptaviṃśe caiva caturyuge |
dvāparāṃte samāyātau tadā kṛṣṇārjunāvubhau || 52 ||
[Analyze grammar]

tridināni sthitāvatra vratasthau madhusūdanam |
bhaktyā saṃpūjya taṃ stutvā jagmaturdvārakāṃ punaḥ || 53 ||
[Analyze grammar]

na ke'pi tattvaṃ jānaṃti mānuṣīṃ tanumāsthitāḥ |
avatārāḥ pravartaṃte viṣṇorasya yugeyuge || 54 ||
[Analyze grammar]

dharmasthāpanayā viprā līyaṃte svapade punaḥ |
pūrvaṃ ca brahmaṇā proktaḥ sa cānena parasparam || 55 ||
[Analyze grammar]

sthātā parārddhaparyaṃtaṃ bhagavāndārurūpadhṛk |
sadāyaṃ varado viṣṇuḥ śuddhasattvena bhāvitaḥ || 56 ||
[Analyze grammar]

yasya yāvāṃstu viśvāsastasya siddhistu tāvatī |
pramādīkṛtaviśvāso bhakto dṛḍhamatiḥ pumān || 57 ||
[Analyze grammar]

yatnānurūpaṃ labhate phalamasmātsudurlabham |
purā vaḥ kathitaṃ sarvamaṃbarīṣavimocanam || 58 ||
[Analyze grammar]

tatastasmiñjagannāthe paramātmasvarūpiṇi |
vidhāya sudṛḍhāṃ bhaktiṃ vasadhvaṃ puruṣottame || 59 ||
[Analyze grammar]

ato'yaṃ bhaktito neyaḥ śrīkṛṣṇamaṃca uttamaḥ |
subhadrābalabhadrau ca rājavatparicarya vai || 60 ||
[Analyze grammar]

uttoliteṣu cchatreṣu cāmarairvījiteṣu ca |
kālāgurusudhūpāsu dikṣu gaṃbhīranādiṣu || 61 ||
[Analyze grammar]

nānāvidheṣu vādyeṣu tvagāre paripūrite |
tauryatrike sādhuvṛtte dīpikā śreṇirājite || 62 ||
[Analyze grammar]

aṃdhakāre'tha sarveṣāṃ varddhamāne mahotsave |
ācchanne śrīpateraṃge pramādapariśaṃkayā || 63 ||
[Analyze grammar]

paṭupaṭṭadukūleṣu nīyamāneṣu dūrataḥ |
gatervegāttadottānīkṛtāsye jagatāṃ gurau || 64 ||
[Analyze grammar]

āvarttadṛṣṭayo devā divārohaṇaśaṃkinaḥ |
jayasva rāma kṛṣṇeti jaya bhadreti cocire || 65 ||
[Analyze grammar]

evaṃ salīlaṃ bhagavāñjanmajyaiṣṭhyābhiṣecane |
nīyate maṃcadeśaṃ tu niśīthe brāhmaṇādibhiḥ || 66 ||
[Analyze grammar]

ahaṃpūrvikaśabdastu devānāṃ śrūyate divi |
devaduṃdubhayaścaiva jayaśabdavimiśritāḥ || 67 ||
[Analyze grammar]

tato maṃcasthitaṃ brahmarūpaṃ pratyarcayā saha |
ācchādya sarvāṇyaṃgāni mukhavarjaṃ sucelakaiḥ || 68 ||
[Analyze grammar]

vinā nivedyaṃ saṃpūjya upacāraiḥ puroditaiḥ |
adhivāsitakuṃbhaiśca śāṃtighoṣapuraḥsaram || 69 ||
[Analyze grammar]

samudajyeṣṭhāmaṃtreṇa snāpayetsurapuṃgavān |
paśyatāmabhiṣektṝṇāṃ kṛtakṛtyatvahetave || 70 ||
[Analyze grammar]

snāpyamānaṃ tu paśyaṃti ye narāstatra saṃsthitāḥ |
garbhodakena snapanaṃ na te punaravāpnuyuḥ || 71 ||
[Analyze grammar]

jyeṣṭhasnānaṃ bhagavato ye paśyaṃti mudānvitāḥ |
na te bhavābdhau majjaṃti yātrāmutkaṃṭhamānasāḥ || 72 ||
[Analyze grammar]

buddhyabuddhikṛtaḥ puṃsāmanādiḥ pāpasaṃcayaḥ |
tatkṣaṇānnāśamāyāti paśyatāṃ snapanaṃ hareḥ || 73 ||
[Analyze grammar]

satyaṃ satyaṃ punaḥ satyaṃ bravīmi dvijapuṃgavāḥ |
sarvasaṃtāpaśamanamaśeṣamalanāśanam || 74 ||
[Analyze grammar]

snapanaṃ śrīpaterjyaiṣṭhyāṃ yadi bhaktyā vilokanam |
prāyaścittanimittāni yāni pāpāni saṃti vai || 75 ||
[Analyze grammar]

tāni sarvāṇi kṣīyaṃte paśyatāṃ snapanaṃ hareḥ |
nātaḥ parataraṃ karma hyanāyāsena mocanam || 76 ||
[Analyze grammar]

jyeṣṭhajanmadine snānaṃ hareryadavalokitam |
snānadānatapaḥśrāddhajapayajñādayastu ye || 77 ||
[Analyze grammar]

vidhayaḥ koṭiguṇitāḥ koṭijanmopapāditāḥ |
snānadarśanapuṇyasya hareste na tulāṃ gatāḥ || 78 ||
[Analyze grammar]

bhaktyā yaḥ snapanaṃ viṣṇorekasminvatsare'pi vā |
paśyenna śocate viprā iha saṃsāramocane || 79 ||
[Analyze grammar]

teneṣṭaṃ kratubhiḥ puṇyaiḥ śraddhāvipuladakṣiṇaiḥ |
mahādānāni dattāni bhojitāḥ koṭiśo dvijāḥ || 80 ||
[Analyze grammar]

śrāddhāni gayaśīrṣādau koṭiśaśca kṛtāni vai |
puṇyakāle ca tīthārdau tapāṃsi caritāni ca || 81 ||
[Analyze grammar]

ardhodayādiyogeṣu koṭitīrtheṣu koṭiśaḥ |
snātāni tena bho viprā yaḥ paśyetsnapanaṃ hareḥ || 82 ||
[Analyze grammar]

satyaṃ satyaṃ punaḥ satyaṃ bravīmi dvijapuṃgavāḥ |
nātaḥ śreyaskaraṃ karma śāstradṛṣṭapathisthitam || 83 ||
[Analyze grammar]

mañcasthaṃ snāpyamānaṃ hi yaḥ paśyetpuruṣottamam |
snānācchataguṇaṃ puṇyaṃ labhate vai na saṃśayaḥ || 84 ||
[Analyze grammar]

mañcasthitaṃ jagannāthaṃ snānārdraṃ yastu paśyati |
sāṃdrānandārdracitto'sau na kiṃcitpāpamaśnute || 85 ||
[Analyze grammar]

yadeva puṇyamuditaṃ snānadarśanakarmaṇi |
tattatphalamavāpnoti dṛṣṭvā mañcasthamacyutam || 86 ||
[Analyze grammar]

eka eva jagannāthastridhā tatra sthito dvijāḥ |
ekaikasyāpi snapanadarśanaṃ bhuktimuktidam || 87 ||
[Analyze grammar]

jayasva rāmabhadreti jaya bhadreti yo vadet |
jaya kṛṣṇa jagannātha jayetyuccārayenmudā || 88 ||
[Analyze grammar]

snānakāle sa vai muktiṃ prayāti dvijasattamāḥ |
adhivāsādikaṃ tatra yaiḥ kṛtaṃ snānakarmaṇi || 89 ||
[Analyze grammar]

teṣāṃ śraddhāmudāyuktaḥ pradadyāddakṣiṇāḥ pṛthak |
brāhmaṇebhyaśca miṣṭānnaṃ vastrālaṃkaraṇāni ca || 90 ||
[Analyze grammar]

pradadyācchraddhayā yukto dīnānāthāṃśca tarpayet |
ye draṣṭumāgatāḥ snānaṃ jīvanmuktāstu te dhruvam || 91 ||
[Analyze grammar]

tānyathāśakti vai rājā mānayetprītaye hareḥ |
snānāvaśeṣatoyena snāyādbhadrāsanasthitaḥ || 92 ||
[Analyze grammar]

nārī vā puruṣo vāpi tasya puṇyaṃ vadāmi vaḥ |
kalpaḥ syāccirarogārto hyapamṛtyuṃ jayedasau || 93 ||
[Analyze grammar]

aputrā mṛtavatsā vā vandhyā vāpi labhetsutam |
subhagaḥ sarvalokānāṃ nirdhano dhanavānbhavet || 94 ||
[Analyze grammar]

gurviṇī labhate putraṃ dīrghāyurguṇavattaram |
gaṃgādisarvatīrthānāṃ snānajaṃ phalamucyate || 95 ||
[Analyze grammar]

snānadarśanajaṃ puṇyaṃ dharmātmā labhate dhruvam || 96 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmya ekatriṃśo'dhyāyaḥ || 31 ||
[Analyze grammar]