Chapter 16

[English text for this chapter is available]

jaiminiruvāca |
nṛpaṃ sumanasaṃ dṛṣṭvā śraddadhānaṃ mahākratau |
uvāca paramaprītyā nārado lokaharṣaṇaḥ || 1 ||
[Analyze grammar]

vyavasāye sukṛtināṃ devā yāṃti sahāyatām |
tatrodāharaṇaṃ tvaṃ hi yatsahāyaścaturmukhaḥ || 2 ||
[Analyze grammar]

tadehi yāmastatraiva nīlakaṃṭhasya sannidhau |
sarvarākṣasasaṃhāraṃ sarvavighnanivāraṇam || 3 ||
[Analyze grammar]

sthāpayāmyagrato rājannṛsiṃhaṃ vāruṇīmukham |
aṃtarhito hi bhagavānpratyakṣo'sau nṛkesarī || 4 ||
[Analyze grammar]

sannidhāvasya yāgastu phalātiśayavānbhavet |
tvamagrato gaccha śīghraṃ prāsādaṃ tatra kāraya || 5 ||
[Analyze grammar]

smaraṇānmama cāgatya suto vai viśvakarmaṇaḥ |
pratyaṅmukhaṃ tu prāsādaṃ sa tūrṇaṃ ghaṭayiṣyati || 6 ||
[Analyze grammar]

dakṣiṇe nīlakaṃṭhasya yo mahāṃścaṃdanadrumaḥ |
dhanuḥśatāṃtare rājaṃścirarūḍhastu tiṣṭhati || 7 ||
[Analyze grammar]

tasya paścimadeśasthaṃ kṣetraṃ rājanbhaviṣyati |
vājimedhasahasreṇa tasyāgre yajatāṃ bhavān || 8 ||
[Analyze grammar]

gaccha tvamahamatraiva sthāsyāmi dinapañcakam |
ārādhyainaṃ divyasiṃhaṃ jyotīrūpamanantakam || 9 ||
[Analyze grammar]

pratyarcāyāṃ pratiṣṭhāpya prāṇeṃdriyamanoyutam |
dīpāddīpaṃ yathā rājannayiṣye śobhanākṛtim || 10 ||
[Analyze grammar]

nāradasyeti vacanaṃ pratiśrutya nṛpottamaḥ |
jagāma tatra vegena candanadrumasaṃnidhim || 11 ||
[Analyze grammar]

tatrāpaśyatsughaṭakaṃ śilpaśāstraviśāradam |
nāradasyājñayā prāptaṃ putraṃ vai devaśilpinaḥ || 12 ||
[Analyze grammar]

manuṣyarūpamāsthāya śastrasūtradharaṃ sthitam |
rājānaṃ sa tu dṛṣṭvā vai cikīrṣaṃtaṃ surālayam || 13 ||
[Analyze grammar]

kṛtāṃjalipuṭaḥ proce devāhaṃ śilpaśāstravit |
narasiṃhālayaṃ te'dya ghaṭayiṣyāmi śobhanam |
rājāpi tamuvācedaṃ prahasanbho dvijottamāḥ || 14 ||
[Analyze grammar]

indradyumna uvāca |
na śilpī tvaṃ hi sāmānyaḥ śilpaśāstrapraṇetṛkaḥ |
kathito nāradenaiva tvaṣṭuḥ putro mahāyaśāḥ || 15 ||
[Analyze grammar]

nirjane'sminmahāraṇye netaḥ pūrvaṃ janāśrayaḥ |
vayamadyāgatāḥ śilpinsambandhaḥ kiṃnimittakaḥ || 16 ||
[Analyze grammar]

devaśilpī bhavāneva viṣṇoramitatejasaḥ |
sadānudhyāyinastasya nideśavaśavartinaḥ || 17 ||
[Analyze grammar]

yena smṛtastvaṃ muninā sa evātrāgamiṣyati |
pratyarcāṃ narasiṃhasya gṛhītvā tu dināṃtare || 18 ||
[Analyze grammar]

tadāśu ghaṭayasvādya saprākāraṃ satoraṇam |
prāsādaṃ narasiṃhasya pratīcīvadanaṃ śubham || 19 ||
[Analyze grammar]

taṃ pūjayitvā vidhivanniyojya ghaṭane nṛpaḥ |
śilāsaṃcayakānbhṛtyānbahuvittairayojayat || 20 ||
[Analyze grammar]

caturthe divase viprāḥ prāsādo'bhūdanuttamaḥ |
bahukālaprasādhyo'pi mahimnā devaśilpinaḥ || 21 ||
[Analyze grammar]

tataḥ prabhāte vimale nityakarmāvasānataḥ |
pratiṣṭhāvidhisaṃbhāraṃ gṛhītvā saparicchadaḥ || 22 ||
[Analyze grammar]

nāradāgamanaṃ prekṣya yāvattiṣṭhati bhūpatiḥ |
tāvacchuśruvire śaṅkhā mṛdaṅgā murajāstathā || 23 ||
[Analyze grammar]

gītamaṅgalavādyāni ghaṃṭānāṃ kariṇāṃ svanāḥ |
tathā jaya jayetyuccaiḥ śabdā ākāśamaṇḍale || 24 ||
[Analyze grammar]

tāñchrutvā vismayāpannā iṃdradyumnapurogamāḥ |
rājānaḥ śrotriyā viprā vaiṣṇavāśca sahasraśaḥ || 25 ||
[Analyze grammar]

nirādhārāstvime śabdā adbhutāni na saṃśayaḥ |
vicārayaṃtaste yāvattāvaddakṣiṇato marut || 26 ||
[Analyze grammar]

gandhānvitadvirephaughaśabditāḥ puṣpavṛṣṭayaḥ |
āvirbhūtāstripathagā vāriṇārdrīkṛtā dvijāḥ || 27 ||
[Analyze grammar]

tadanaṃtaramevāsau nārado brahmaṇaḥ sutaḥ |
tapaḥprabhāvanirvyūḍha vimānavaraśāyinīm || 28 ||
[Analyze grammar]

ratnacāmarahastābhirdivyastrībhiḥ suśobhitām |
alaṃkṛtāṃ vahuvidhairmaṇiratnaprasādhanaiḥ || 29 ||
[Analyze grammar]

divyamālyāṃbaradharāṃ divyagandhānulepanām |
ramyāṃ pratiṣṭhitaprāṇāṃ ghaṭitāṃ viśvakarmaṇā || 30 ||
[Analyze grammar]

tejomaṇḍalasaṃvītāṃ parito harṣadāmapi |
ādāya narasiṃhasya pratyarcāṃ pratyupasthitaḥ || 31 ||
[Analyze grammar]

tāṃ dṛṣṭvā harṣitāḥ sarve rājā rājānuyāyinaḥ |
antarddhānaṃ gato devo nāradenoddhṛtaḥ kimu || 32 ||
[Analyze grammar]

menire harṣitātmānaḥ praśaśaṃsuśca taṃ munim |
nirūpya saṃnidhisthāṃ tu narasiṃhākṛtiṃ dvijāḥ |
ādyamūrternṛsiṃhasya pratimāmatha menire || 33 ||
[Analyze grammar]

pratyutthāya tato rājā prahṛṣṭenāṃtarātmanā |
pradakṣiṇīkṛtya hariṃ jagāma śirasā mahīm || 34 ||
[Analyze grammar]

śraddhāsaṃpattiyogyena saṃbhāreṇa nṛpājñayā |
prasthāpayāmāsa muniḥ prāsādaṃ śubhalakṣaṇam || 35 ||
[Analyze grammar]

pratimāṃ devadevasya sumuhūrte dvijottamāḥ |
dharāramābhyāṃ sahitāṃ ratnavedyāṃ pratiṣṭhitām |
yogārūḍhatanuṃ rājā indradyumno'tha tuṣṭuve || 36 ||
[Analyze grammar]

vaiṣṇavairbrāhmaṇairbhūpairnāradena ca dhīmatā |
guhyopaniṣadaiḥ smārtaiḥ stotraiḥ śāstrairmudānvitaiḥ || 37 ||
[Analyze grammar]

indradyumna uvāca |
ekānekasthūlasūkṣmāṇumūrte vyomātīta vyomarūpaikarūpa |
vyomākāra vyāpaka vyomasaṃstha vyomārūḍha vyomakeśābjayone || 38 ||
[Analyze grammar]

duḥkhāṃbhodhestrāhi māṃ divyasiṃha prādurbhūtānekakoṭyarkadhāman |
nityāsanno dūrasaṃstho na dūro nāsanno vā bodhyabodhātmabhāva || 39 ||
[Analyze grammar]

jñeyajñeyo jñānagamyo'pyagamyo māyātīto mānameyo'numānāt |
kṛtsnasyādiḥ kṛtsnakarttānumaṃtā pātā harttā viśvasākṣinnamaste || 40 ||
[Analyze grammar]

duḥkhadhvaṃsasyaikahetuṃ na hetuṃ bhettuṃ chettuṃ saṃśayānagrajātam |
jyotīrūpa jñānarūpa prakāśa stomavyūhākāra nirmāṇaheto || 41 ||
[Analyze grammar]

tvatpādabje bhaktimagryāṃ sadā me dehi svāminmūlabhūtāṃ caturṇām |
śrautaiḥ smārtairnityayuktā janāste dīnāstiṣṭhantyatra baddhā bhavābdhau || 42 ||
[Analyze grammar]

anantapādaṃ bahuhastanetramanaṃtakarṇaṃ kakubhaughavastram |
divāniśānāthasukuṇḍalāḍhyaṃ nakṣatramālā kṛtacāruhāram || 43 ||
[Analyze grammar]

tvāmadbhutaṃ divyanṛsiṃhamūrtiṃ bhakteṣṭapūrtiṃ śaraṇaṃ prapadye |
yatpādapadma hi pitāmahasya kirīṭaratnairvikacatvameti || 44 ||
[Analyze grammar]

yadīyapādābjayugāṃtabhūmau luṭhecchiro yasya hi pāṃcabhautam |
taddivyapādaṃ śirasā vahaṃti surendranāryaḥ khalu taṃ namāmi || 45 ||
[Analyze grammar]

taddivyasiṃhaṃ hatapāpasaṃghaṃ pādāśritānāṃ karuṇābdhisiṃham |
pādā'bjasaṃghaṭṭavighaṭṭamānabrahmāṃḍabhāṃḍaṃ praṇamāmi caṇḍam || 46 ||
[Analyze grammar]

saṭācchaṭākaṃpanaśīryamāṇaghanaughavidrāvitapāpasaṃgham |
caṃḍāṭṭahāsāṃtaritābdaśabdaṃ trilokagarbhaṃ nṛhariṃ namāmi || 47 ||
[Analyze grammar]

namaste namaste namaste'dya viṣṇo paritrāhi dīnānukaṃpinnanātham |
bhavaṃtaṃ samāsādya me dehabandho murāre na saṃsārakārāgṛhe'stu || 48 ||
[Analyze grammar]

hayamedhasahasrāṃte yathā tvāṃ carmacakṣuṣā |
divyarūpaṃ prapaśyāmi tathānukrośaya prabho || 49 ||
[Analyze grammar]

yathā cejyāsahasraṃ me nirvighnaṃ tatsamāpyate |
yajñeśa tvatprasādānme tathā sānnidhyamastu te || 50 ||
[Analyze grammar]

koṭayaḥ pāparāśīnāṃ kṣayaṃ yāṃti yathā prabho |
dharmārthakāmā hastasthā naiṣāṃ citraṃ stuvaṃti ye |
mokṣasya bhājanaṃ viṣṇo te narā ye tavāśrayāḥ || 51 ||
[Analyze grammar]

stutvetthaṃ divya siṃhaṃ taṃ bhūpatirhaṣṭamānasaḥ |
daṇḍapātapraṇāmena jagāma dharaṇīṃ muhuḥ || 52 ||
[Analyze grammar]

jaiminiruvāca |
kṣetraṃ tannarasiṃhasya brahmaṇā nirmitaṃ purā |
indradyumnānugrahāya sarvalokahitāya ca || 53 ||
[Analyze grammar]

paśyaṃti ye nṛsiṃhaṃ taṃ śaṃbhunā saha saṃsthitam |
na dehabandhaṃ te viprāḥ prāpnuvaṃti na saṃśayaḥ || 54 ||
[Analyze grammar]

manasā vāṃchitaṃ yadyatprāpnuvaṃti tato'dhikam |
stotreṇānena ye divyasiṃharūpaṃ stuvaṃti vai || 55 ||
[Analyze grammar]

sarvakāmaprado devastasya muktiṃ prayacchati |
jyeṣṭhaśukladvādaśī yā svātīnakṣatrasaṃyutā || 56 ||
[Analyze grammar]

tasyāṃ pratiṣṭhitaḥ kṣetre divyasiṃho maharṣiṇā |
sutena brahmaṇaḥ sākṣāttatra paśyaṃti taṃ ca ye || 57 ||
[Analyze grammar]

vājimedhasahasrasya phalaṃ sāgraṃ labhaṃti te |
pañcāmṛtairvā kṣīreṇa nārikelarasena vā || 58 ||
[Analyze grammar]

snāpayaṃti narā ye vai athavā gandhavāriṇā |
pūjayitvā mahāsiṃhamupacāraiḥ sapāyasaiḥ || 59 ||
[Analyze grammar]

japākusumamālyaiśca gandhamālyaiḥ suśobhanaiḥ |
dhūpadīpaiḥ sakarpūraistāṃbūlairatiśobhanaiḥ || 60 ||
[Analyze grammar]

sugīrbhiḥ stutipāṭhaiśca jayaśabdaistathoccakai |
pradakṣiṇapraṇāmaiśca dānairbrāhmaṇatarpaṇaiḥ |
santoṣya narasiṃhaṃ taṃ brahmalokamavāpnuyāt || 61 ||
[Analyze grammar]

vaiśākhasya caturdaśyāṃ saurivāre'nilarkṣake |
ādyāvatāraḥ siṃhasya pradoṣasamaye dvijāḥ || 62 ||
[Analyze grammar]

tasyāṃ saṃpūjya vidhivannarasiṃhaṃ samāhitaḥ |
janmakoṭisahasraistu pāparāśiḥ susaṃcitaḥ |
dahyate tatkṣaṇādeva tūlarāśirivāgninā || 63 ||
[Analyze grammar]

dṛṣṭvā spṛṣṭvā namaskṛtvā praṇipatya ca bhaktitaḥ |
stutvā vimucyate pāpairnirmokena bhujaṃgavat || 64 ||
[Analyze grammar]

na tasya vyādhayaḥ saṃti na śokā nādhayastathā |
sarvānkāmānavāpnoti hayamedhaphalaṃ tathā || 65 ||
[Analyze grammar]

samīpe tasya bho viprā yajanaṃ dānameva ca |
anyāni puṇyakarmāṇi kṛtāni ca sakṛnnaraiḥ |
koṭikoṭiguṇāni syurnarasiṃhaprasādataḥ || 66 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde ṣoḍaśo'dhyāyaḥ || 16 ||
[Analyze grammar]