Chapter 17

[English text for this chapter is available]

munaya ūcuḥ |
pratiṣṭhite nārasiṃhe kṣetre tasminnarādhipaḥ |
kiṃ cakāra mune brūhi paraṃ kautūhalaṃ tu tat || 1 ||
[Analyze grammar]

jaiminiruvāca |
indrādīṃstridaśānsarvānnyamantrayata pūrvataḥ |
tataḥ sa mantrayāmāsa ṛṣīnviprānsahasraśaḥ || 2 ||
[Analyze grammar]

adhyetṝṃścaturo vedānsaṣaḍaṃgapadakramaiḥ |
yajñavidyāsu kuśalānmīmāṃsāpariniṣṭhitān || 3 ||
[Analyze grammar]

sabhāṣyakalpasūtraistu pariniṣṭhitakarmiṇaḥ |
aṣṭādaśasu vidyāsu kuśalāndharmakovidān || 4 ||
[Analyze grammar]

sadācārāvadātāṃśca kulīnānsatyavādinaḥ |
vaiṣṇavāṃśca viśeṣeṇa maṃtrayāmāsa sādaram || 5 ||
[Analyze grammar]

trailokye ye ca rājānaḥ siddhāḥ saptarṣayo dvijāḥ |
sacchūdrā vaṇijo dvīpapatayaśca nimaṃtritāḥ || 6 ||
[Analyze grammar]

krośadvayamitā viprāḥ sabhāsīttasya bhūpateḥ |
pāṣāṇaghaṭitā soccā sudhayā sānulepitā || 7 ||
[Analyze grammar]

kvacidratnamayī bhūmiḥ kvacitkāṃcananirmitā |
sphāṭikī rājatī caiva yathāyogyaṃ kṛtasthalī || 8 ||
[Analyze grammar]

staṃbhai ratnamayaiḥ proccairdukūlapariveṣṭitaiḥ |
cārucaṃdrātapāḍhyā tu gandhamālyaiḥ sacāmaraiḥ || 9 ||
[Analyze grammar]

muktādāmāṃtarasthaiśca cāruvātāyanā śubhā |
kṛṣṇāgurusnehasiktā śrīkhaṇḍasalilokṣitā || 10 ||
[Analyze grammar]

sarvarttukusumākīrṇā prāṃtopavanasaṃvṛtā |
vāpyaḥ sphaṭikasopānāḥ padmakadvāramaṃḍitāḥ || 11 ||
[Analyze grammar]

cakravākaiḥ plavairhaṃsaiḥ sārasairmadhurasvanaiḥ |
vyāptāṃtarāḥ svacchaśītasugaṃdhamadhurāṃbhasaḥ || 12 ||
[Analyze grammar]

paritaḥ śataśastasyāḥ sukhāvataraṇā dvijāḥ |
upacchāyāviracanāḥ śobhamānāḥ samaṃtataḥ || 13 ||
[Analyze grammar]

yajñaśālā maruttasya yathāsīdbho dvijottamāḥ |
tatheṃdradyumnabhūpasya racitā viśvakarmaṇā || 14 ||
[Analyze grammar]

śubhe'hni śubhanakṣatre vāsayitvā sabhāsadaḥ |
rājñaḥ siṃhāsanāsīnāndṛṣṭvāsīnānṛṣīnapi || 15 ||
[Analyze grammar]

sasiddhānbrahmarṣigaṇānbahumūlyakuthasthitān |
devānkāṃcanapīṭhasthānyathāyogyamatha dvijān || 16 ||
[Analyze grammar]

varāsanasthānanyāṃśca yathādeśaṃ sukhasthitān |
madhye nṛpāṇāṃ devānāmṛṣīṇāṃ ca śacīpatim || 17 ||
[Analyze grammar]

sāmrājyalakṣaṇe svasya ratnasiṃhāsane sthitam |
divyairmālyaistathā gaṃdhairvāsobhirviṣṭarādibhiḥ || 18 ||
[Analyze grammar]

purodhasā samaṃ pūrvamarcayāmāsa ṛddhimat |
vinīto dīnavattasya cakre pūjāṃ tathā nṛpaḥ || 19 ||
[Analyze grammar]

āścaryaṃ manyate'syāsau trailokyeśo'pi tadyathā |
tataḥ siddhāndevamunīnacaryanniṃdravattadā || 20 ||
[Analyze grammar]

vismayaṃ janayāmāsa kuverasyāpyadhiśriyaḥ |
tato devānsamānarca prabhūtasvasvasaṃpadaḥ || 21 ||
[Analyze grammar]

upacārairmahīnāthaḥ samyagavyagramānasaḥ |
rājñaḥ saṃpūjayāmāsa rājayogyaiḥ paricchadaiḥ || 22 ||
[Analyze grammar]

yathā te menire bhūpā bhavāmaḥ sāṃprataṃ vayam |
satyaṃ rājyaṃ kramātprāptaṃ nedṛśaśca paricchadaḥ || 23 ||
[Analyze grammar]

ānarca vaiṣṇavānbhūya upacāraiḥ samānayan |
śāṃtā api yathā citraṃ menire viṣayāgamam || 24 ||
[Analyze grammar]

tato viprānbāhujātānvaiśyānmunipuraḥsaram |
samyakprapūjayāmāsa sattvodrikto mahīpatiḥ || 25 ||
[Analyze grammar]

anyāṃśca sacivadvārā pūjayitvā sasaṃbhramaḥ |
dṛṣṭaḥ sa vinayānnamraḥ kṛtāṃjalipuṭastathā || 26 ||
[Analyze grammar]

maheṃdramuccairāhedaṃ nāradena purodhasā || 27 ||
[Analyze grammar]

indradyumna uvāca |
tava prasādāddeveśa icchāmīdaṃ prasīda me |
kratunā hayamedhena prayakṣye yajñapūruṣam || 28 ||
[Analyze grammar]

anujānīhi māṃ deva kratūnāmīśvaro bhavān |
tvadājñāpālakāḥ sarve trailokye nivasaṃti ye || 29 ||
[Analyze grammar]

yāvatkratusahasrasya saṃsthā ca bhavati prabho |
tāvattvaṃ tridaśaiḥ sārddhaṃ sadomadhyagato vasa || 30 ||
[Analyze grammar]

yaṣṭumicchāmi deveśa nāhaṃ tvatpadalipsayā |
sarveṣāṃ vetsi deveśa manovṛttiṃ sadā prabho || 31 ||
[Analyze grammar]

yuṣmākaṃ pūrvadṛṣṭo'tra vapuṣmānmādhavaḥ prabhuḥ |
upāsanāyāṃ so'yaṃ yo vālukābhistirodadhe || 32 ||
[Analyze grammar]

tasya bhūyaḥ prakāśārthaṃ vājimedhasahasrakam |
kariṣye vacanādiṃdra caturāsyasya śāsanāt |
punaḥ prakāśite tasmiñchreyo vo'pi bhaviṣyati || 33 ||
[Analyze grammar]

iti vijñāpite rājñā maheṃdrapramukhāḥ surāḥ |
antarddhānotaraṃ yā ca śrutā pūrvaṃ sarasvatī || 34 ||
[Analyze grammar]

aśarīrāṃ smaraṃtastāmidaṃ procuḥ praharṣitāḥ |
indradyumna mahātmāsi satyaṃ satyavato bhuvi || 35 ||
[Analyze grammar]

tacceṣṭitaṃ purāsmābhiranvabhāvi bhaviṣyakam |
sahāyāste bhaviṣyāmaḥ kārye trailokyapāvane || 36 ||
[Analyze grammar]

sraṣṭā sa jagatāṃ yatra udyuktaḥ svayameva hi |
atraivovāca bhagavānasmākamapi bhūtale || 37 ||
[Analyze grammar]

praviśaṃstadanukrośavaśādbhūyaḥ prakāśanam |
kariṣye dāravaṃ dehamityetatpariniṣṭhitam || 38 ||
[Analyze grammar]

nātrāsmākaṃ vyalīkaṃ tu neṃdrasya ca mahīpate |
asmaddiṣṭasamudyogastava naḥ prītikārakaḥ || 39 ||
[Analyze grammar]

sukhaṃ yajasva rājeṃdra vaikuṃṭhaṃ bhaktavatsalam |
kratunā hayamedhena sahasraparivartinā || 40 ||
[Analyze grammar]

durārādhyo hi bhagavānasmākaṃ bhaktavatsalaḥ |
vayamapyatra devatvaṃ tyaktvā bhakti parāyaṇāḥ || 41 ||
[Analyze grammar]

ārādhayāmaḥ kṣetresminvinītā nararūpiṇaḥ |
priyaṃ hi mānuṣe loke karma siddhyati vai kṛtam || 42 ||
[Analyze grammar]

jaiminiruvāca |
ityukte tridaśaiḥ seṃdraiḥ parituṣṭāṃtarātmanā |
āraṃbhārthaṃ krato rājā bhagavaṃtamapūjayat || 43 ||
[Analyze grammar]

upacārasahasraistu yathāvatpratipāditaiḥ |
tataḥ pitṛgaṇānrājā nirūpya śraddhayānvitaḥ || 44 ||
[Analyze grammar]

sadogṛhagatānviprānyājñikānsamalaṃkṛtān |
kṛtveṣṭadevaṃ purato vaikuṃṭhaṃ sāgnihotrakam || 45 ||
[Analyze grammar]

ākāṃkṣankalpitaṃ lagnaṃ saṃvṛtte svastivācane |
upasthitaḥ sapatnīkaḥ śuddhamāṃgalyaveṣadhṛk || 46 ||
[Analyze grammar]

svasti vācya dvijāñchuddhānpuṇyāhaṃ vṛddhikarma ca |
tataḥ saṃbhṛtasaṃbhāro varayāmāsa ṛtvijaḥ || 47 ||
[Analyze grammar]

vṛtāste tu sapatnīkaṃ dīkṣayaṃto nṛpottamam |
vihṛtya dīkṣaṇāyeṣṭānnyayajansabhyacoditāḥ || 48 ||
[Analyze grammar]

praṇīya taṃ prajvalaṃtaṃ vedyāmāhavanīyakam |
trailokyamaṃgalakaraṃ kiṃ sākṣādvaiṣṇavaṃ mahaḥ || 49 ||
[Analyze grammar]

suprokṣitaṃ cābhimaṃtrya anujñāpya digīśvarān |
mumucuste hayaṃ mukhyamaṃgeṣu śubhalakṣaṇam || 50 ||
[Analyze grammar]

tataḥ sa dīkṣito rājā vāgyato rauravīṃ tvacam |
adhiṣṭhāya sadomadhye mṛtyuṃjaya iva sthitaḥ || 51 ||
[Analyze grammar]

nimaṃtritānāṃ muktyarthaṃ cakṣuṣā saṃdideśa vai |
surāṇāṃ ratnapātrāṇi mahārghāṇi nṛpājñayā || 52 ||
[Analyze grammar]

sacivaḥ kārayāmāsa bhojanāya samṛddhimat |
śuddhasauvarṇapātrāṇi munīnāṃ ca mahīkṣitām || 53 ||
[Analyze grammar]

dvijānāṃ bhojanārthāya navāni pratyahaṃ dvijāḥ |
kṣatriyāṇāṃ viśāṃ viprā rājatāni śubhāni ca || 54 ||
[Analyze grammar]

kāṃsyanirmalapātrāṇi śūdrāṇāṃ bhojanāya vai |
ahanyahani pātrāṇi bhojanāṃte dvijottamāḥ || 55 ||
[Analyze grammar]

ākareṣu prapātyaṃte procchiṣṭadalavajjanaiḥ |
tatra yajñotsave ye vai bhojanāya nimaṃtritāḥ || 56 ||
[Analyze grammar]

teṣāṃ putrāśca pautrāśca prapautrāścaiva saṃtatiḥ |
nityaṃ paṃcarasānnāni bahumānapuraḥsaram || 57 ||
[Analyze grammar]

ādṛtairbhojitā rājña iṃdradyumnasya śāsanāt |
kuṭuṃbavatsthitāstatra saṃsthā yāvanmahākratoḥ || 58 ||
[Analyze grammar]

yaddeśīyā janāsteṣāmadhiṣṭhātā ca tānnṛpaḥ |
nṛpāṇāmanusaṃdhātā iṃdradyumnaprayācitaḥ || 59 ||
[Analyze grammar]

nāradaḥ samadarśī tu paropakṛtilolupaḥ |
iṃdrādīnāṃ sureṃdrāṇāṃ devarṣīṇāṃ nṛpottamaḥ || 60 ||
[Analyze grammar]

svayaṃ narapatiścaryāṃ cakāra kratupūrttaye |
ṣaḍvidhānyannapānāni saṃskṛtāni dvidhā naraiḥ || 61 ||
[Analyze grammar]

devānāṃ bhojane tatra maṃtrataṃtraviśāradaiḥ |
martyānāṃ nala vidyāyāṃ kuśalaiḥ saṃskṛtāni vai || 62 ||
[Analyze grammar]

kṣutpipāsānabhijñā hi sudhāhārā divaukasaḥ |
teṣāmapi apūrvatvādāścaryaṃ taddhi bhojanam || 63 ||
[Analyze grammar]

narāṇāṃ durlabhaṃ martya iṃdradyumnagṛhe'śanam |
indradyumnasya ceṃdrasya viśeṣo martyavāsitā || 64 ||
[Analyze grammar]

atyadbhutakaraṃ hyetatpratyahaṃ ca navaṃ navam |
saṃmānanādarāvṛddhirbhojyasya dvijasattamāḥ || 65 ||
[Analyze grammar]

anyonyasparddhayaivātra pravarddhate parasparam |
sugaṃdhasumanomālyakastūryādipralepanam || 66 ||
[Analyze grammar]

citrasūkṣmadukūlāni sopadhānāsanāni ca |
ratnapalyaṃkikā śayyā ratnadaṃḍaprakīrṇakam || 67 ||
[Analyze grammar]

jātīlavaṃgakarpūrairnāgavallīdalāni ca |
manoharāṇi gītāni nṛtyāni vividhāni ca || 68 ||
[Analyze grammar]

bharatasya muneḥ śikṣāpaṃḍitai racitāni ca |
svasvavaṃśayaśo'bhijñāḥ śataśaḥ sūtamāgadhāḥ || 69 ||
[Analyze grammar]

etānyanyāni vastūni durlabhānyapi yāni vai |
tridaśāścāpi martyāścānvabhujyaṃta susādaram || 70 ||
[Analyze grammar]

ekato'nyatra citrāṇi na ca hīnāni kutracit |
pātālavāsināṃ cāpi bhojanaṃ vai sudhādhikam || 71 ||
[Analyze grammar]

yadbhuktvā nānuvāñchanti pātālagamanaṃ hi te |
purāṇi yāni pātāle ratnaughālokitāni ca || 72 ||
[Analyze grammar]

vinā sūryaprakāśena tādṛśānyeva bhūpatiḥ |
dadau teṣāṃ nivāsāya yeṣu pātālabuddhayaḥ || 73 ||
[Analyze grammar]

sukhāsīnāśca krīḍaṃto bhuṃjānā śerate mudā |
devānāmapi nānyatra bhūmisparśanamasti vai || 74 ||
[Analyze grammar]

indradyumnapure tatra svargādapi manohare |
yadṛcchayā sukhakrīḍāsaktā no tatyajurbhuvam || 75 ||
[Analyze grammar]

abhilāṣopajātaṃ tu sukhaṃ svarge vadaṃti hi |
anicchayāpi bho viprāḥ sukhaṃ sarvatra tatra vai || 76 ||
[Analyze grammar]

ādṛtya yatnānmanyaṃte bhojyaṃ te sādaraṃ narāḥ |
na yācitaḥ kopi janaḥ kuto vā syātparāṅmukhaḥ || 77 ||
[Analyze grammar]

rājādhirājaveśmāni janānāṃ svagṛhaiḥ samam |
tadāsītsvagṛhe teṣāṃ na sadā sarvasaṃbhavaḥ || 78 ||
[Analyze grammar]

tatra yatkāmanātītaṃ tadvastu sulabhaṃ bahu |
itthaṃ pravartite yajñe yajñeśaprītaye mudā || 79 ||
[Analyze grammar]

pṛthivī hṛtasarvasvā vājimedhesya bhūpateḥ |
yā pūrvaṃ sābhavadbhūyaḥ svarṇavṛṣṭisubhūṣitā || 80 ||
[Analyze grammar]

itthaṃ pravṛtte lokānāṃ tatra trailokyavāsinām |
dānasaṃmānabhojyānāṃ vidhau vidhivato'nvaham || 81 ||
[Analyze grammar]

aśvamedhaṃ prati janā jagurgāthāḥ parasparam |
nedṛgyāgasya saṃbhāro vidheḥ śāstrapracoditaḥ || 82 ||
[Analyze grammar]

iṃdradyumnasya rājarṣerna bhūto na bhaviṣyati |
na yācitāro'dātāro mitho yatra nimaṃtritāḥ || 83 ||
[Analyze grammar]

na kāmabhaṃgo yatrāsīddevānāmapi bho dvijāḥ |
īdṛksamṛddhiḥ kraturāṭ pravṛtto bhūpatestadā || 84 ||
[Analyze grammar]

adhiśraddhaḥ susaṃpannaḥ pūrvasmādaparo'bhavat |
smṛtikārāḥ kalpakārāstathā śāstrapraṇetṛkāḥ || 85 ||
[Analyze grammar]

yajñānuṣṭhānakuśalāḥ sadācārāvataṃsakāḥ |
agnyādhānādyavabhṛthapracāramanupūrvaśaḥ || 86 ||
[Analyze grammar]

kratuḥ sadasyānumate nṛpateḥ prītaye dvijāḥ |
na maṃtrāḥ svarato hīnā varṇato vāpi karhicit || 87 ||
[Analyze grammar]

ye vai vidhividhātāraste vai karmapracārakāḥ |
prāyaścittanimittena prāyaścittanibaṃdhanāt || 88 ||
[Analyze grammar]

karmopaghāto no tatra yoginaḥ karmayoginaḥ |
yatra saptarṣayo divyāḥ sadasyāḥ kratusākṣiṇaḥ || 69 ||
[Analyze grammar]

pracārayaṃti karmāṇi guṇadoṣavibhāginaḥ |
yājñavalkyādayaste'tra munayastvṛtvijo vṛtāḥ || 90 ||
[Analyze grammar]

sadogatāste munayaḥ parasparakathāṃtare |
vākovākyāni sūktāni guhyopaniṣadāni ca || 91 ||
[Analyze grammar]

gāthāḥ paurāṇikīrviprā viṣṇubhaktipuraḥsarāḥ |
caritāni hareḥ sarvakalmaṣaughaharāṇi ca || 92 ||
[Analyze grammar]

tatra saṃvartayāmāsuste sabhāyāṃ mahīkṣitaḥ |
tasya yajñe haviḥ prāśuḥ pratyakṣaṃ vahnimadhyagāḥ || 93 ||
[Analyze grammar]

muditāstridaśā viprā maheṃdrapramukhāmakhe |
cirapravāsino devā nāsmaraṃtāmarāvatīm || 94 ||
[Analyze grammar]

amṛtaṃ hi havisteṣāṃ kalpitaṃ brahmaṇā purā |
tatprāśya muditā devā vīryavantaścirāyuṣaḥ || 95 ||
[Analyze grammar]

yāgānuṣṭhānaviṣayādanyatra viṣayānbahūn |
indradyumnena racitānsamastānupabhuṃjate || 96 ||
[Analyze grammar]

tatra ye nāgarājānaḥ pātālatalavāsinaḥ |
tato'dhikānmartyaloke viṣayānupabhuṃjate || 97 ||
[Analyze grammar]

pātālagamanaṃ te vai nehaṃte manasā dhuvam |
itthaṃ pravartito yajñastrailokyaprītikārakaḥ || 98 ||
[Analyze grammar]

indradyumnasya nṛpateḥ kṣetre'sminpuruṣottame |
jagadīśaprasādāya pitāmahanideśataḥ || 99 ||
[Analyze grammar]

ekonaṃ kramataḥ saṃsthāmavāpa pṛthivīpatiḥ |
sahasraṃ hayamedhasya yathāvadvidhicoditam || 100 ||
[Analyze grammar]

tataḥ sāhasrike yajñe vājimedhe mahīpatiḥ |
dinedine divyagatirbabhūva nṛpatistadā || 1 ||
[Analyze grammar]

sutyāyāḥ sapta divasādyā rātrirabhavatpurā |
tasyāsturīyaprahare dadhyau sa viṣṇumavyayam || 2 ||
[Analyze grammar]

dhyāne tasmindadarśāsau mahābhāgyavaśānnṛpaḥ |
pratyakṣamiva sa śvetadvīpaṃ sphaṭikanirmitam || 3 ||
[Analyze grammar]

samaṃtātparivāryainaṃ tiṣṭhaṃtaṃ kṣīrasāgaram |
mahākalpadrumaiḥ puṣpagaṃdhāmodidigaṃtaraiḥ || 4 ||
[Analyze grammar]

phalapallavavalkeṣu bahiraṃtaśca sarvaśaḥ |
śaṃkhacakrāṃkitaiḥ śubhraiḥ sarvālaṃkārabhūṣitaḥ || 5 ||
[Analyze grammar]

mahāmaṃjiṣṭhavarṇaiśca mūrtibhistairmuradviṣaḥ |
tanmadhye ghaṭitaṃ divyamaṇibhirmaṃḍapottamam || 6 ||
[Analyze grammar]

madhyasthasūryavadbhāsiratnasiṃhāsanojjvalam |
kṣīrābdhiśītakallolamaṃdavātamanoharam || 7 ||
[Analyze grammar]

tanmadhye dadṛśe devaṃ śaṃkhacakragadādharam |
nīlajīmūtasaṃkāśaṃ vanamālāvibhūṣitam || 8 ||
[Analyze grammar]

sarvalāvaṇyabhavanaṃ sauṃdaryaśrīniketanam |
nirbhartsayaṃtaṃ vapuṣā pinaddhaṃ divyabhūṣaṇam || 9 ||
[Analyze grammar]

dakṣapārśve sthitaṃ tatra anaṃtaṃ dharaṇīdharam |
koṭicandrapratīkāśaṃ himādrisadṛśaprabham || 110 ||
[Analyze grammar]

phaṇāmukuṭavistāracchatrībhūtaṃ manoharam |
maṇikuṃḍalayugmāṃkaṃ cārunīlanicolakam || 11 ||
[Analyze grammar]

halalāṃgalaśaṃkhārisphuradbāhucatuṣṭayam |
hārakeyūravalaya mudrikābhiralaṃkṛtam || 12 ||
[Analyze grammar]

mekhalākaṭisūtrāḍhyaṃ divyaratnaprasādhanam |
divyahālākṣībamūrtiṃ cāruhāsaṃ sunetrakam || 13 ||
[Analyze grammar]

dakṣapārśvasthitāṃ cāsya lakṣmīṃ tāṃ śubhalakṣaṇām |
varābhayābjahastāṃ vai kuṃkumābhāṃ sulocanām || 14 ||
[Analyze grammar]

trailokyayuvatīvṛndadṛṣṭāṃtādbhutavigrahām |
dadarśa padmāsanagāṃ lāvaṇyāṃbudhiputrikām || 15 ||
[Analyze grammar]

pitāmahaṃ ca dadṛśe purato'sya kṛtāṃjalim |
vāmapārśvasthitaṃ cakraṃ nānāmaṇimayaṃ vibhoḥ || 16 ||
[Analyze grammar]

sanakādyairmunīṃdraistaṃ stūyamānaṃ jagadgurum |
dṛṣṭvā svapne sa rājā vai prahṛṣṭo dvijasattamāḥ || 17 ||
[Analyze grammar]

adṛṣṭapūrvarūpaṃ taṃ jyotirmayamanaṃtakam |
tuṣṭāva tatra dhyānastho harṣagadgadayā girā || 18 ||
[Analyze grammar]

indradyumna uvāca |
namaste jagadādhāra jagadātmannamo'stu te |
kaivalyatriguṇātīta guṇāṃjana namo'stu te || 19 ||
[Analyze grammar]

suśuddhanirmalajñānasvarūpāya namo'stu te |
śabdabrahmābhidhānāya jagadrūpāya te namaḥ || 120 ||
[Analyze grammar]

saṃsārapatitaśrāṃta duḥkhadhvaṃsa namo'stu te |
durbhedyahṛdayagraṃthibhedakāya namo'stu te || 21 ||
[Analyze grammar]

dvisaptabhuvanāgāramūlastaṃbhāya te namaḥ |
brahmāṃḍakoṭighaṭanāśilpine cakriṇe namaḥ || 22 ||
[Analyze grammar]

karuṇāmṛtapāthodhisudhādhāmne namo namaḥ |
dīnoddhāraikaguhyāya kṛpāpāthodhaye namaḥ || 23 ||
[Analyze grammar]

prakāśakānāṃ sūryādijyotiṣāṃ jyotiṣe namaḥ |
pratisvasvanadīptāya antaḥpāpāgnaye namaḥ || 24 ||
[Analyze grammar]

pāvakāya pavitrāya pavitrāṇāṃ namo namaḥ |
gariṣṭhāya variṣṭhāya drāghiṣṭhāya namo namaḥ || 25 ||
[Analyze grammar]

nediṣṭhāya daviṣṭhāya kṣodiṣṭhāya namo namaḥ |
vareṇyāya supuṇyāya nārāyaṇa namo'stu te || 26 ||
[Analyze grammar]

paritrāhi jagannātha dīnabandho namo'stu te |
nistīrṇo'haṃ bhavāṃbhodhiṃ prāpya tvāṃ taraṇiṃ sukhām || 27 ||
[Analyze grammar]

tvayi dṛṣṭe ramānātha kleśā vyapagatā mama |
cidānaṃdasvarūpaṃ tvāṃ prāptānāṃ duḥkhasaṃkṣayaḥ || 28 ||
[Analyze grammar]

dhruvaṃ nātha samutpannaparamānaṃdahetukam |
trāhi trāhi bhavāṃbhodhimagnaṃ māṃ dīnacetasam || 29 ||
[Analyze grammar]

madhyāhnārkodite vyomni kutaḥ saṃtamasodayaḥ |
dhyānasthitaḥ stuvannevaṃ praṇamya jagadīśvaram || 130 ||
[Analyze grammar]

dhyānāvasāne sa punaḥ svayaṃ jāgradabudhyata |
svapnāṃta indradyumno'pi sasmārātmānamātmanā || 31 ||
[Analyze grammar]

atyadbhutamidaṃ svapnaṃ dṛṣṭvā ca nṛpakuṃjaraḥ |
mene kṛtārthamātmānaṃ hayamedhakratostathā || 32 ||
[Analyze grammar]

sahasraṃ saphalaṃ caiva svabhāgyaṃ samupasthitam |
na hi devarṣivacanaṃ vṛthā bhavati karhicit || 33 ||
[Analyze grammar]

pratyakṣaṃ me kathaṃ nāthaḥ svayamatra bhaviṣyati |
iti ciṃtākulo rātriśeṣaṃ nītvā viśāṃpatiḥ || 34 ||
[Analyze grammar]

śaśaṃsa nāradasyāgre yathā svapno'nvabhūyata |
sa cāpi nāradaḥ prāha śokaste vigato nṛpa || 35 ||
[Analyze grammar]

aruṇodayakāle hi bhagavaṃtaṃ dadarśa yat |
daśāhātphaladaḥ svapnastasminkāle nṛpottama || 36 ||
[Analyze grammar]

kratvaṃte bhagavānatra pratyakṣaste bhaviṣyati |
yadāha madgirā tvāṃ hi carācaragururvidhiḥ || 37 ||
[Analyze grammar]

so'pi tvayā jagatsraṣṭā svapne'sminnavalokitaḥ |
tadanuṣṭhīyatāṃ yajñaḥ parāgre na prakāśaya || 38 ||
[Analyze grammar]

svapno'yaṃ nṛpaśārdūla durbodhācarito hareḥ |
kiṃtu bhāgyavatastveva svapnastādṛkprajāyate || 139 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe puruṣottamakṣetramāhātmye jaiminiṛṣisaṃvāde saptadaśo'dhyāyaḥ || 17 ||
[Analyze grammar]