Chapter 16

[English text for this chapter is available]

atha śrīveṃkaṭādrau jaladānapraśaṃsā |
śrīsūta uvāca |
veṃkaṭākhye mahāpuṇye tṛṣārtānāṃ viśeṣataḥ |
jaladānamakurvāṇastiryagyonimavāpnuyāt || 1 ||
[Analyze grammar]

tasmādveṃkaṭaśailendre yathāśaktyanusārataḥ |
jaladānaṃ hi kartavyaṃ sarveṣāṃ jīvanaṃ mahat || 2 ||
[Analyze grammar]

atraivodāharantīmamitihāsaṃ purātanam |
viprasya gṛhagodhāyāḥ saṃvādaṃ paramādbhutam || 3 ||
[Analyze grammar]

atha hemāṃgasya jaladānākaraṇena gṛhagodhikātvaprāptiḥ |
purā cekṣvākuvaṃśe'bhūddhemāṃga iti bhūmipaḥ |
brahmaṇyo brahmabhūyiṣṭho jitāmitro jiteṃdriyaḥ || 4 ||
[Analyze grammar]

yāvanto bhūmikaṇikā yāvantastoyabindavaḥ |
yāvantyuḍūni gagane tāvatīrgā dadātyasau || 5 ||
[Analyze grammar]

yeneṣṭayajñadarbhaiśca bhūmirbarhiṣmatī smṛtā |
gobhūtilahiraṇyādyaistoṣitā bahavo dvijāḥ || 6 ||
[Analyze grammar]

tenādattāni dānāni na vidyanta iti śrutam |
tenādattaṃ jalaṃ caikaṃ sukhalabhyadhiyā dvijāḥ || 7 ||
[Analyze grammar]

bodhito brahmaputreṇa vasiṣṭhena mahātmanā |
amūlyaṃ sarvatolabhyaṃ taddātuḥ kiṃ phalaṃ labhet || 8 ||
[Analyze grammar]

iti durdhīrhetuvādairna jalaṃ dattavānvibhuḥ |
alabhyadāne puṇyaṃ syādityavādītsayuktikam || 9 ||
[Analyze grammar]

sa ānarca dvijānvyaṅgāndaridrānvṛttikarśitān |
nānarca śrotriyānviprānbrahmajñānbrahmavādinaḥ || 10 ||
[Analyze grammar]

prakhyātānpūjayiṣyanti sarvalokāḥ sahārhaṇaiḥ |
anāthānāmavidyānāṃ vyaṅgānāṃ ca kuṭuṃbinām || 11 ||
[Analyze grammar]

daridrāṇāṃ gatiḥ kā vā tasmātte maddayāspadāḥ |
iti duṣṭeṣu pātreṣu dattavānkimapi svakam || 12 ||
[Analyze grammar]

tena doṣeṇa mahatā cātakatvaṃ trijanmasu |
ekajanmani gṛdhratvaṃ śvatvaṃ vā sapta janmasu || 13 ||
[Analyze grammar]

prāpya paścādgṛhe jāto bhūpo'yaṃ gṛhagodhikā |
śrutakīrtestu bhūpasya mithilādhipaterdvijāḥ || 14 ||
[Analyze grammar]

gṛhadvārapratolyāṃ sma vartate kīṭakāśanaḥ |
aṣṭāśītiṣu varṣeṣu sthitaṃ tena durātmanā || 15 ||
[Analyze grammar]

atha śrutadevapādodakasevanena hemāṃgasya jātismaraṇam |
videhādhipatergehaṃ kadācidṛṣisattamaḥ |
śrutadeva iti khyātaḥ śrānto madhyāhna āgamat || 16 ||
[Analyze grammar]

taṃ dṛṣṭvā sahasotthāya jātaharṣo narādhipaḥ |
madhuparkaḥ susaṃpūjya tasya pādāvanejanīḥ || 17 ||
[Analyze grammar]

apo mūrdhnāvahatkṣipraṃ tadotkṣiptaiśca bindubhiḥ |
daivopadiṣṭakālena prokṣitā gṛhagodhikā || 18 ||
[Analyze grammar]

sadyo jātismṛtirabhūtkṛtakarmātiduḥkhitā |
trāhi trāhīti cukrośa brāhmaṇaṃ gṛhamāgatam || 19 ||
[Analyze grammar]

tiryagjanturavaṃ śrutvā brāhmaṇo vismito'bhavat |
kutaḥ krośasi godhe tvaṃ daśeyaṃ kena karmaṇā || 20 ||
[Analyze grammar]

upadevo'tha devo vā tvaṃ nṛpo'tha dvijottamaḥ |
kastvaṃ brūhi mahābhāga tvāmadyāhaṃ samuddhare || 21 ||
[Analyze grammar]

ityuktaḥ sa nṛpaḥ prāha śrutadevaṃ mahāprabhuḥ |
ahamikṣvākukulajaḥ śastravidyāviśāradaḥ || 22 ||
[Analyze grammar]

yāvanto bhūmikaṇikā yāvantastoyabindavaḥ |
yāvantyuḍūni gagane tāvatīrgā adāmaham || 23 ||
[Analyze grammar]

sarvairyajñairmayā ceṣṭaṃ pūrtānyācaritāni me |
dānānyapi ca dattāni dharmajātaṃ svanuṣṭhitam || 24 ||
[Analyze grammar]

tathāpi durgatirjātā na me cordhvagatirvibho |
trivāraṃ cātakatvaṃ me gṛdhratvaṃ caikajanmani || 25 ||
[Analyze grammar]

saptajanmasu ca śvatvaṃ prāptaṃ pūrvaṃ mayā dvija |
dharatānena bhūpena cāpaḥ pādāvanejanīḥ || 26 ||
[Analyze grammar]

bindavo dūramutkṣiptāstaiḥ sikto'haṃ kathaṃcana |
tadā janmasmṛtirabhūttena me hatapāpmanaḥ || 27 ||
[Analyze grammar]

godhājanmāni bhāvyānītyaṣṭāviṃśati me dvija |
dṛśyante devadiṣṭāni bibhyate janmabhirbhṛśam || 28 ||
[Analyze grammar]

na kāraṇaṃ prapaśyāmi tanme vistarato vada |
ityuktaḥ sa dvijaḥ prāha jñātaṃ vijñānacakṣuṣā || 29 ||
[Analyze grammar]

atha śrutadevadattapuṇyena hemāṃgasya godhikātvavimuktiḥ |
śṛṇu bhūpa pravakṣyāmi tava durgatikāraṇam |
na jalaṃ tu tvayā dattaṃ veṃkaṭāhvayabhūdhare || 30 ||
[Analyze grammar]

tajjalaṃ sulabhaṃ matvā na maulyamiti niścitaḥ |
nādhvagānāṃ dvijādīnāṃ gharmakāle'pyajānatā || 31 ||
[Analyze grammar]

tathā pātraṃ samutsṛjya hyapātre pratipāditam |
jvalantamagnimutsṛjya na hi bhasmani hūyate || 32 ||
[Analyze grammar]

tulasīṃ tu samutsṛjya bṛhatī pūjyate nu kim |
anāthavyaṃgapaṃgutvaṃ na prayojakatāmiyāt || 33 ||
[Analyze grammar]

paṃgvādyā yepyanāthā hi dayāpātraṃ hi kevalam |
taponiṣṭhā jñānaniṣṭhāḥ śrutiśāstraparāyaṇāḥ || 34 ||
[Analyze grammar]

viṣṇurūpāḥ sadā pūjyā netare tu kadācana |
tatrāpi jñānino'tyarthaṃ priyā viṣṇoḥ sadaiva hi || 35 ||
[Analyze grammar]

jñānināmapi bhūpāla viṣṇureva sadā priyaḥ |
tasmājjñānī sadā pūjyaḥ pūjyātpūjyataraḥ smṛtaḥ || 36 ||
[Analyze grammar]

na jalaṃ tu tvayā dattaṃ sādhavo vā na sevitāḥ |
tena te durgatiśceyaṃ prāptā cekṣvākunandana || 37 ||
[Analyze grammar]

veṃkaṭādrau kṛtaṃ puṇyaṃ tubhyaṃ dāsyāmi śāntaye |
bhūtaṃ bhavyaṃ bhavattena karmajātaṃ vijeṣyasi || 38 ||
[Analyze grammar]

ityuktvāpa upaspṛśya dadau puṇyamanuttamam |
yaddattaṃ brāhmaṇenāpi snānaṃ caikadine kṛtam || 39 ||
[Analyze grammar]

tena dhvastākhilā'gāstu tyaktvā ca gṛhagodhikā |
rūpaṃ karmocitaṃ ghoraṃ sadyo'dṛśyata pūruṣaḥ || 40 ||
[Analyze grammar]

divyaṃ vimānamārūḍho divyasragvastrabhūṣaṇaḥ |
paśyatāmeva sādhūnāṃ maithilasya gṛhāntare || 41 ||
[Analyze grammar]

baddhāñjalipuṭo bhūtvā parikramya praṇamya ca |
anujñāto yayau rājā stūyamāno'marairdivam || 42 ||
[Analyze grammar]

tatra bhuktvā mahābhogānvarṣāyutamatandritaḥ |
sa eva cekṣvākukule kakutstho'bhūnmahārathaḥ || 43 ||
[Analyze grammar]

saptadvīpapratīpālo brahmaṇyaḥ sādhusaṃmataḥ |
devendrasya samo viṣṇoraṃśa evaṃ mahāprabhuḥ || 44 ||
[Analyze grammar]

bodhitastu vasiṣṭhena sarvāndharmānmanoharān |
anuṣṭhāyākhilānrājā tena dhvastāśubhādikaḥ || 45 ||
[Analyze grammar]

divyaṃ jñānaṃ samāsādya viṣṇoḥ sāyujyamāptavān |
tasmādveṃkaṭaśailendraḥ puṇyaḥ pāpavināśanaḥ || 46 ||
[Analyze grammar]

tasmiṃśca jaladānaṃ tu viṣṇulokapradāyakam |
evaṃ vaḥ kathitaṃ viprā jaladānasya vaibhavam |
veṃkaṭādrau mahāpuṇye sarvapātakanāśane || 47 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye jaladānavaibhavavarṇanaṃnāma ṣoḍaśo'dhyāyaḥ || 16 ||
[Analyze grammar]