Chapter 17

[English text for this chapter is available]

atha śrīveṃkaṭācalakṣetrādivarṇanam |
śrīsūta uvāca |
veṃkaṭādrestu māhātmyaṃ bhūyo'pi pravadāmyaham |
yuṣmākaṃ sāvadhānena śṛṇudhvaṃ susamāhitāḥ || 1 ||
[Analyze grammar]

pṛthivyāṃ yāni tīrthāni brahmāṇḍāntargatāni ca |
tāni sarvāṇi vartaṃte veṃkaṭāhvayabhūdhare || 2 ||
[Analyze grammar]

tasminnagottame puṇye vasantaṃ puruṣottamam |
śaṃkhacakradharaṃ devaṃ pītāmbaradharaṃ śubham || 3 ||
[Analyze grammar]

kaustubhālaṃkṛtoraskaṃ bhaktānāmabhayapradam |
devadevaṃ viśālākṣaṃ vedavedyaṃ sanātanam || 4 ||
[Analyze grammar]

aṃgakosalakarṇāṭakāśīgurjaradeśagāḥ |
colakeralapāṇḍyādisarvadeśasamudbhavāḥ || 5 ||
[Analyze grammar]

sakuṭuṃbāśca sevārthamāyānti prativatsaram |
devāśca ṛṣayaḥ siddhā yoginaḥ sanakādayaḥ || 6 ||
[Analyze grammar]

ye bhādrapadamāse tu veṃkaṭeśamahotsave |
sevāṃ kurvanti te sarve niṣpāpā uttamottamāḥ || 7 ||
[Analyze grammar]

tatra śrīveṃkaṭeśasya brahmā lokapitāmahaḥ |
cakāra kanyāmāse tu dhvajāropamahotsavam || 8 ||
[Analyze grammar]

prativarṣaṃ ca tatsevā nimittaṃ sarvamānavāḥ |
sarve devāśca gaṃdharvāḥ siddhāḥ sādhyā mahaujasaḥ || 9 ||
[Analyze grammar]

brahmotsave bhagavataḥ samāyāṃti dvijottamāḥ |
vidyānāṃ vedavidyeva maṃtrāṇāṃ praṇavo yathā || 10 ||
[Analyze grammar]

prāṇavatpriyavastūnāṃ dhenūnāṃ kāmadhenuvat |
tathā veṃkaṭaśailendraḥ kṣetrāṇāmuttamottamaḥ || 11 ||
[Analyze grammar]

śeṣavatsarvanāgānāṃ pakṣiṇāṃ garuḍo yathā |
devānāṃ tu yathā viṣṇurvarṇānāṃ brāhmaṇo yathā || 12 ||
[Analyze grammar]

tathā veṃkaṭaśailendraḥ kṣetrāṇāmuttamottamaḥ |
bhūruhāṇāṃ suratarurbhāryeva suhṛdāṃ yathā || 13 ||
[Analyze grammar]

tīrthānāṃ tu yathā gaṃgā tejasāṃ tu raviryathā |
tathā veṃkaṭaśailendraḥ kṣetrāṇāmuttamottamaḥ || 14 ||
[Analyze grammar]

āyudhānāṃ yathā vajraṃ lohānāṃ kāṃcanaṃ yathā |
vaiṣṇavānāṃ yathā rudro ratnānāṃ kaustubho yathā || 15 ||
[Analyze grammar]

tathā veṃkaṭaśailendraḥ kṣetrāṇāmuttamottamaḥ |
nānena sadṛśo loke viṣṇuprītivivardhanaḥ || 16 ||
[Analyze grammar]

na mādhavasamo māso na kṛtena samaṃ yugam |
na ca vedasamaṃ śāstraṃ na tīrthaṃ gaṃgayā samam || 17 ||
[Analyze grammar]

na jalena samaṃ dānaṃ na sukhaṃ bhāryayā samam |
na kṛṣestu samaṃ vittaṃ na lābho jīvitātparaḥ || 18 ||
[Analyze grammar]

na tapo'naśanādanyanna dānātparamaṃ sukham |
na dharmastu dayātulyo na jyotiścakṣuṣā samam || 19 ||
[Analyze grammar]

na tṛptiraśanātulyā na vāṇijyaṃ kṛṣeḥ samam |
na dharmeṇa samaṃ mitraṃ na satyena samaṃ yaśaḥ || 20 ||
[Analyze grammar]

yathā tathā bhagavataḥ sthānena sadṛśaṃ na hi || 21 ||
[Analyze grammar]

yatkīrtanaṃ sakalapāpaharaṃ munīndrā yadvandanaṃ sakalasaukhyadameva loke |
yātrāpi yaṃ prati surairapi pūjanīyā tādṛṅmahānbhavati veṃkaṭaśailamukhyaḥ || 22 ||
[Analyze grammar]

tasyānubhāvaṃ pravadāmi bhūyaḥ samastatīrthāni vasaṃti yatra |
evaṃ samasteṣu ca mukhyatīrthaṃ śrīsvāmināmāsti sarovaraṃ tat || 23 ||
[Analyze grammar]

māhātmyametasya mayocyate kathaṃ yatpaścime rodhasi bhūvarāhaḥ |
āliṃgya kāntāmatisaumyamūrtirvirājate viśvajanopakārī || 24 ||
[Analyze grammar]

śrīsvāmipuṣkariṇyāṃ ca dakṣiṇe veṃkaṭeśvaraḥ |
āliṃgitavapurlakṣmyā varado vartate ciram || 25 ||
[Analyze grammar]

evaṃ vaḥ kathitaṃ viprāḥ kṣetramāhātmyamuttamam |
yaḥ śṛṇoti sadā bhaktyā viṣṇuloke mahīyate || 26 ||
[Analyze grammar]

iti śrīskāṃde mahāpurāṇa ekāśītisāhasryāṃ saṃhitāyāṃ dvitīye vaiṣṇavakhaṇḍe śrīveṃkaṭācalamāhātmye kṣetramahimānuvarṇanaṃnāma saptadaśo'dhyāyaḥ || 17 ||
[Analyze grammar]