Chapter 6

[English text for this chapter is available]

munaya ūcuḥ |
yo 'yaṃ paśuriti prokto yaśca pāśa udāhṛtaḥ |
abhyāṃ vilakṣaṇaḥ kaścitkoyamasti tayoḥ patiḥ || 1 ||
[Analyze grammar]

vāyuruvāca |
asti kaścidaparyaṃtaramaṇīyaguṇāśrayaḥ |
patirviśvasya nirmātā paśupāśavimocanaḥ || 2 ||
[Analyze grammar]

abhāve tasya viśvasya sṛṣṭireṣā kathaṃ bhavet |
acetanatvādajñānādanayoḥ paśupāśayoḥ || 3 ||
[Analyze grammar]

pradhānaparamāṇvādi yāvatkiṃcidacetanam |
tatkartṛkaṃ svayaṃ dṛṣṭaṃ buddhimatkāraṇaṃ vinā || 4 ||
[Analyze grammar]

jagacca kartṛsāpekṣaṃ kāryaṃ sāvayavaṃ yataḥ |
tasmātkāryasya kartṛtvaṃ patyurna paśupāśayoḥ || 5 ||
[Analyze grammar]

paśorapi ca kartṛtvaṃ patyuḥ preraṇapūrvakam |
ayathākaraṇajñānamaṃdhasya gamanaṃ yathā || 6 ||
[Analyze grammar]

ātmānaṃ ca pṛthaṅmatvā preritāraṃ tataḥ pṛthak |
asau juṣṭastatastena hyamṛtatvāya kalpate || 7 ||
[Analyze grammar]

paśoḥ pāśasya patyuśca tattvato 'sti padaṃ param |
brahmavittadviditvaiva yonimukto bhaviṣyati || 8 ||
[Analyze grammar]

saṃyuktametaddvitayaṃ kṣaramakṣarameva ca |
vyaktāvyaktaṃ bibhartīśo viśvaṃ viśvavimocakaḥ || 9 ||
[Analyze grammar]

bhoktā bhogyaṃ prerayitā maṃtavyaṃ trividhaṃ smṛtam |
nātaḥ paraṃ vijānadbhirveditavyaṃ hi kiṃcanaḥ || 10 ||
[Analyze grammar]

tileṣu vā yathā tailaṃ dadhni vā sarpirarpitam |
yathāpaḥ srotasi vyāptā yathāraṇyāṃ hutāśanaḥ || 11 ||
[Analyze grammar]

evameva mahātmānamātmanyātmavilakṣaṇam |
satyena tapasā caiva nityayukto 'nupaśyati || 12 ||
[Analyze grammar]

ya eko jālavānīśa īśānībhissvaśaktibhiḥ |
sarvāṃllokānimān kṛtvā eka eva sa īśate 1 || 13 ||
[Analyze grammar]

eka eva tadā rudro na dvitīyo 'sti kaścana |
saṃsṛjya viśvabhuvanaṃ goptā te saṃcukoca yaḥ || 14 ||
[Analyze grammar]

viśvataścakṣurevāyamutāyaṃ viśvatomukhaḥ |
tathaiva viśvatobāhuviśvataḥ pādasaṃyutaḥ || 15 ||
[Analyze grammar]

dyāvābhūmī ca janayan deva eko maheśvaraḥ |
sa eva sarvadevānāṃ prabhavaścodbhavastathā || 16 ||
[Analyze grammar]

hiraṇyagarbhaṃ devānāṃ prathamaṃ janayedayam |
viśvasmādadhiko rudro maharṣiriti hi śrutiḥ || 17 ||
[Analyze grammar]

vedāhametaṃ puruṣaṃ mahāṃtamamṛtaṃ dhruvam |
ādityavarṇaṃ tamasaḥ parastātsaṃsthitaṃ prabhum || 18 ||
[Analyze grammar]

asmānnāsti paraṃ kiṃcidaparaṃ paramātmanaḥ |
nāṇīyo 'sti na ca jyāyastena pūrṇamidaṃ jagat || 19 ||
[Analyze grammar]

sarvānanaśirogrīvaḥ sarvabhūtaguhāśayaḥ |
sarvavyāpī ca bhagavāṃstasmātsarvagataśśivaḥ || 20 ||
[Analyze grammar]

sarvataḥ pāṇipādo 'yaṃ sarvato 'kṣiśiromukhaḥ |
sarvataḥ śrutimāṃlloke sarvamāvṛtya tiṣṭhati || 21 ||
[Analyze grammar]

sarvendriyaguṇābhāsassarvendriyavivarjitaḥ |
sarvasya prabhurīśānaḥ sarvasya śaraṇaṃ suhṛt || 22 ||
[Analyze grammar]

acakṣurapi yaḥ paśyatyakarṇo 'pi śṛṇoti yaḥ |
sarvaṃ vetti na vettāsya tamāhuḥ puruṣaṃ param || 23 ||
[Analyze grammar]

aṇoraṇīyānmahato mahīyānayamavyayaḥ |
guhāyāṃ nihitaścāpi jaṃtorasya maheśvaraḥ || 24 ||
[Analyze grammar]

tamakratuṃ kratuprāyaṃ mahimātiśayānvitam |
dhātuḥ prasādādīśānaṃ vītaśokaḥ prapaśyati || 25 ||
[Analyze grammar]

vedāhamenamajaraṃ purāṇaṃ sarvagaṃ vibhum |
nirodhaṃ janmano yasya vadaṃti brahmavādinaḥ || 26 ||
[Analyze grammar]

eko 'pi trīnimāṃllokān bahudhā śaktiyogataḥ |
vidadhāti vicetyaṃte 1 viśvamādau maheśvaraḥ || 27 ||
[Analyze grammar]

viśvadhātrītyajākhyā ca śaivī citrā kṛtiḥ parā |
tāmajāṃ lohitāṃ śuklāṃ kṛṣṇāmekāṃ tvajaḥ prajām || 28 ||
[Analyze grammar]

janitrīmanuśete 'nyojuṣamāṇassvarūpiṇīm |
tāmevājāmajo 'nyastu bhaktabhogā jahāti ca || 29 ||
[Analyze grammar]

dvau suparṇau ca sayujau samānaṃ vṛkṣamāsthitau |
eko 'tti pippalaṃ svādu paro 'naśnan prapaśyati || 30 ||
[Analyze grammar]

vṛkṣesmin puruṣo magno guhyamānaśca śocati |
juṣṭamanyaṃ yadā paśyedīśaṃ paramakāraṇam || 31 ||
[Analyze grammar]

tadāsya mahimānaṃ ca vītaśokassukhī bhavet |
chaṃdāṃsi yajñāḥ ṛtavo yadbhūtaṃ bhavyameva ca || 32 ||
[Analyze grammar]

māyī viśvaṃ sṛjatyasminniviṣṭo māyayā paraḥ |
māyāṃ tu prakṛtiṃ vidyānmāyinaṃ tu maheśvaram || 33 ||
[Analyze grammar]

tasyāstvavayavaireva vyāptaṃ sarvamidaṃ jagat |
sūkṣmātisūkṣmamīśānaṃ kalalasyāpi madhyataḥ || 34 ||
[Analyze grammar]

sraṣṭāramapi viśvasya veṣṭitāraṃ ca tasya tu |
śivameveśvaraṃ jñātvā śāṃtimatyaṃtamṛcchati || 35 ||
[Analyze grammar]

sa eva kālo goptā ca viśvasyādhipatiḥ prabhuḥ |
taṃ viśvādhipatiṃ jñātvā mṛtyupāśātpramucyate || 36 ||
[Analyze grammar]

ghṛtātparaṃ maṃḍamiva sūkṣmaṃ jñātvā sthitaṃ prabhum |
sarvabhūteṣu gūḍhaṃ ca sarvapāpaiḥ pramucyate || 37 ||
[Analyze grammar]

eṣa eva paro devo viśvakarmā maheśvaraḥ |
hṛdaye saṃniviṣṭaṃ taṃ jñātvaivāmṛtamaśnute || 38 ||
[Analyze grammar]

yadā samastaṃ na divā na rātrirna sadapyasat |
kevalaśśiva evaiko yataḥ prajñā purātanī || 39 ||
[Analyze grammar]

nainamūrdhvaṃ na tiryakca na madhyaṃ paryajigrahat |
na tasya pratimā cāsti yasya nāma mahadyaśaḥ || 40 ||
[Analyze grammar]

ajātamimamevaike buddhā janmani bhīravaḥ |
rudrasyāsya prapadyaṃte rakṣārthaṃ dakṣiṇaṃ sukham || 41 ||
[Analyze grammar]

dve akṣare brahmapare tvanaṃte samudāhṛte |
vidyāvidye samākhyāte nihite yatra gūḍhavat || 42 ||
[Analyze grammar]

kṣaraṃ tvavidyā hyamṛtaṃ vidyeti parigīyate |
te ubhe īśate yastu so 'nyaḥ khalu maheśvaraḥ || 43 ||
[Analyze grammar]

ekaikaṃ bahudhā jālaṃ vikurvannekavacca yaḥ |
sarvādhipatyaṃ kurute sṛṣṭvā sarvān pratāpavān || 44 ||
[Analyze grammar]

diśa ūrdhvamadhastiryakbhāsayan bhrājate svayam |
yo niḥsvabhāvādapyeko vareṇyastvadhitiṣṭhati || 45 ||
[Analyze grammar]

svabhāvavācakān sarvān vācyāṃśca pariṇāmayan |
guṇāṃśca bhogyabhoktṛtve tadviśvamadhitiṣṭhati || 46 ||
[Analyze grammar]

te vai guhyopaṇiṣadi gūḍhaṃ brahma parātparam |
brahmayoniṃ jagatpūrvaṃ vidurdevā maharṣayaḥ || 47 ||
[Analyze grammar]

bhāvagrāhyamanīhākhyaṃ bhāvābhāvakaraṃ śivam |
kalāsargakaraṃ devaṃ ye viduste jahustanum || 48 ||
[Analyze grammar]

svabhāvameke manyaṃte kālameke vimohitāḥ |
devasya mahimā hyeṣa yenedaṃ bhrāmyate jagat || 49 ||
[Analyze grammar]

yenedamāvṛtaṃ nityaṃ kālakālātmanā yataḥ |
teneritamidaṃ karma bhūtaiḥ saha vivartate || 50 ||
[Analyze grammar]

tatkarma bhūyaśaḥ kṛtvā vinivṛtya ca bhūyaśaḥ |
tattvasya saha tattvena yogaṃ cāpi sametya vai || 51 ||
[Analyze grammar]

aṣṭābhiśca tribhiścaivaṃ dvābhyāṃ caikena vā punaḥ |
kālenātmaguṇaiścāpi kṛtsnameva jagatsvayam || 52 ||
[Analyze grammar]

guṇairārabhya karmāṇi svabhāvādīni yojayet |
teṣāmabhāve nāśaḥ syātkṛtasyāpi ca karmaṇaḥ || 53 ||
[Analyze grammar]

karmakṣaye punaścānyattato yāti sa tattvataḥ |
sa evādissvayaṃ yoganimittaṃ bhoktṛbhogayoḥ || 54 ||
[Analyze grammar]

parastrikālādakalassa eva parameśvaraḥ |
sarvavittriguṇādhīśo brahmasākṣātparātparaḥ || 55 ||
[Analyze grammar]

taṃ viśvarūpamabhavaṃ bhavamīḍyaṃ prajāpatim |
devadevaṃ jagatpūjyaṃ svacittasthamupāsmahe || 56 ||
[Analyze grammar]

kālādibhiḥ paro yasmātprapañcaḥ parivartate |
dharmāvahaṃ pāpanudaṃ bhogeśaṃ viśvadhāma ca || 57 ||
[Analyze grammar]

tamīśvarāṇāṃ paramaṃ maheśvaraṃ taṃ devatānāṃ paramaṃ ca daivatam |
patiṃ patīnāṃ paramaṃ parastādvidāma devaṃ bhuvaneśvareśvaram || 58 ||
[Analyze grammar]

na tasya vidyeta kāryaṃ kāraṇaṃ ca na vidyate |
na tatsamo 'dhikaścāpi kvacijjagati dṛśyate || 59 ||
[Analyze grammar]

parāsya vividhā śaktiḥ śrutau svābhāvikī śrutā |
jñānaṃ balaṃ kriyā caiva yābhyo viśvamidaṃ kṛtam || 60 ||
[Analyze grammar]

tasyāsti patiḥ kaścinnaiva liṃgaṃ na ceśitā |
kāraṇaṃ kāraṇānāṃ ca sa teṣāmadhipādhipaḥ || 61 ||
[Analyze grammar]

na cāsya janitā kaścinna ca janma kutaścana |
na janmahetavastadvanmalamāyādisaṃjñakāḥ || 62 ||
[Analyze grammar]

sa ekassarvabhūteṣu gūḍho vyāptaśca viśvataḥ |
sarvabhūtāṃtarātmā ca dharmādhyakṣassa kathyate || 63 ||
[Analyze grammar]

sarvabhūtādhivāsaśca sākṣī cetā ca nirguṇaḥ |
eko vaśī niṣkriyāṇāṃ bahūnāṃ vivaśātmanām || 64 ||
[Analyze grammar]

nityānāmapyasau nityaścetanānāṃ ca cetanaḥ |
eko bahūnāṃ cākāmaḥ kāmānīśaḥ prayacchati || 65 ||
[Analyze grammar]

sāṃkhyayogādhigamyaṃ yatkāraṇaṃ jagatāṃ patim |
jñātvā devaṃ paśuḥ pāśaissarvaireva vimucyate || 66 ||
[Analyze grammar]

viśvakṛdviśvavitsvātmayonijñaḥ kālakṛdguṇī |
pradhānaḥ kṣetrajñapatirguṇeśaḥ pāśamocakaḥ || 67 ||
[Analyze grammar]

brahmāṇaṃ vidadhe pūrvaṃ vedāṃścopādiśatsvayam |
yo devastamahaṃ buddhvā svātmabuddhiprasādataḥ || 68 ||
[Analyze grammar]

mumukṣurasmātsaṃsārātprapadye śaraṇaṃ śivam |
niṣphalaṃ niṣkriyaṃ śāṃtaṃ niravadyaṃ niraṃjanam || 69 ||
[Analyze grammar]

amṛtasya paraṃ setuṃ dagdheṃdhanamivānilam |
yadā carmavadākāśaṃ veṣṭayiṣyaṃti mānavāḥ || 70 ||
[Analyze grammar]

tadā śivamavijñāya duḥkhasyāṃto bhaviṣyati |
tapaḥprabhāvāddevasya prasādācca maharṣayaḥ || 71 ||
[Analyze grammar]

atyāśramocitajñānaṃ pavitraṃ pāpanāśanam |
vedāṃte paramaṃ guhyaṃ purākalpapracoditam || 72 ||
[Analyze grammar]

brahmaṇo vadanāllabdhaṃ mayedaṃ bhāgyagauravāt |
nāpraśāṃtāya dātavyametajjñānamanuttamam || 73 ||
[Analyze grammar]

na putrāyāśuvṛttāya nāśiṣyāya ca sarvathā |
yasya deve parābhaktiryathā deve tathā gurau || 74 ||
[Analyze grammar]

tasyaite kathitāhyarthāḥ prakāśaṃte mahātmanaḥ |
ataśca saṃkṣepamidaṃ śṛṇudhvaṃ śivaḥ parastātprakṛteśca puṃsaḥ || 75 ||
[Analyze grammar]

sa sargakāle ca karoti sarvaṃ saṃhārakāle punarādadāti || 76 ||
[Analyze grammar]