Chapter 5

[English text for this chapter is available]

sūta uvāca |
tatra pūrvaṃ mahābhāgā naimiṣāraṇyavāsinaḥ |
praṇipatya yathānyāyaṃ papracchuḥ pavanaṃ prabhum || 1 ||
[Analyze grammar]

naimiṣīyā ūcuḥ |
bhavān kathamanuprāpto jñānamīśvaragocaram |
kathaṃ ca śivabhāvaste brahmaṇo 'vyaktajanmanaḥ || 2 ||
[Analyze grammar]

vāyuruvāca |
ekonaviṃśatiḥ kalpo vijñeyaḥ śvetalohitaḥ |
tasminkalpe caturvaktrassraṣṭukāmo 'tapattapaḥ || 3 ||
[Analyze grammar]

tapasā tena tīvreṇa tuṣṭastasya pitā svayam |
divyaṃ kaumāramāsthāya rūpaṃ rūpavatāṃ varaḥ || 4 ||
[Analyze grammar]

śveto nāma munirbhūtvā divyāṃ vācamudīrayan |
darśanaṃ pradadau tasmai devadevo maheśvaraḥ || 5 ||
[Analyze grammar]

taṃ dṛṣṭvā pitaraṃ brahmā brahmaṇo 'dhipatiṃ patim |
praṇamya paramajñānaṃ gāyatryā saha labdhavān || 6 ||
[Analyze grammar]

tatassa labdhavijñāno viśvakarmā caturmukhaḥ |
asṛjatsarvabhūtāni sthāvarāṇi carāṇi ca || 7 ||
[Analyze grammar]

yataśśrutvāmṛtaṃ labdhaṃ brahmaṇā parameśvarāt |
tatastadvadanādeva mayā labdhaṃ tapobalāt || 8 ||
[Analyze grammar]

munaya ūcuḥ |
kiṃ tajjñānaṃ tvayā labdhaṃ tathyāttathyaṃtaraṃ śubham |
yatra kṛtvā parāṃ niṣṭhāṃ puruṣassukhamṛcchati || 9 ||
[Analyze grammar]

vayuruvāca |
paśupāśapatijñānaṃ yallabdhaṃ tu mayā purā |
tatra niṣṭhā parā kāryā puruṣeṇa sukhārthinā || 10 ||
[Analyze grammar]

ajñānaprabhavaṃ duḥkhaṃ jñānenaiva nivartate |
jñānaṃ vastuparicchedo vastu ca dvividhaṃ smṛtam || 11 ||
[Analyze grammar]

ajaḍaṃ ca jaḍaṃ caiva niyaṃtṛ ca tayorapi |
paśuḥ pāśaḥ patiśceti kathyate tattrayaṃ kramāt || 12 ||
[Analyze grammar]

akṣaraṃ ca kṣaraṃ caiva kṣarākṣaraparaṃ tathā |
tadetattritayaṃ bhūmnā kathyate tattvavedibhiḥ || 13 ||
[Analyze grammar]

akṣaraṃ paśurityuktaḥ kṣaraṃ pāśa udāhṛtaḥ |
kṣarākṣaraparaṃ yattatpatirityabhidhīyate || 14 ||
[Analyze grammar]

munaya ūcuḥ |
kiṃ tadakṣaramityuktaṃ kiṃ ca kṣaramudāhṛtam |
tayośca paramaṃ kiṃ vā tadetadbrūhi māruta || 15 ||
[Analyze grammar]

vāyuruvāca |
prakṛtiḥ kṣaramityuktaṃ puruṣo 'kṣara ucyate |
tāvimau prerayatyanyassa parā parameśvaraḥ || 16 ||
[Analyze grammar]

munaya ūcuḥ |
kaiṣā prakṛtirityuktā ka eṣa puruṣo mataḥ |
anayoḥ kena sambandhaḥ koyaṃ preraka īśvaraḥ || 17 ||
[Analyze grammar]

vāyuruvāca |
māyā prakṛtiruddiṣṭā puruṣo māyayā vṛtaḥ |
saṃbandho mūlakarmabhyāṃ śivaḥ preraka īśvaraḥ || 18 ||
[Analyze grammar]

munaya ūcuḥ |
keyaṃ māyā samā khyātā kiṃrūpo māyayā vṛtaḥ |
mūlaṃ kīdṛkkuto vāsya kiṃ śivatvaṃ kutaśśivaḥ || 19 ||
[Analyze grammar]

vāyuruvāca |
māyā māheśvarī śaktiścidrūpo māyayā vṛtaḥ |
malaścicchādako naijo viśuddhiśśivatā svataḥ || 20 ||
[Analyze grammar]

munaya ūcuḥ |
āvṛṇoti kathaṃ māyā vyāpinaṃ kena hetunā |
kimarthaṃ cāvṛtiḥ puṃsaḥ kena vā vinivartate || 21 ||
[Analyze grammar]

vāyuruvāca |
āvṛtirvyapino 'pi syādvyāpi yasmātkalādyapi |
hetuḥ karmaiva bhogārthaṃ nivarteta malakṣayāt || 22 ||
[Analyze grammar]

munaya ūcuḥ |
kalādi kathyate kiṃ tatkarma vā kimudāhṛtam |
tatkimādi kimantaṃ vā kiṃ phalaṃ vā kimāśrayam || 23 ||
[Analyze grammar]

kasya bhogena kiṃ bhogyaṃ kiṃ vā tadbhogasādhanam |
malakṣayasya ko hetuḥ kīdṛkkṣīṇamalaḥ pumān || 24 ||
[Analyze grammar]

vāyuruvāca |
kalā vidyā ca rāgaśca kālo niyatireva ca |
kalādayassamākhyātā yo bhoktā puruṣo bhavet || 25 ||
[Analyze grammar]

puṇyapāpātmakaṃ karma sukhaduḥkhaphalaṃ tu yat |
anādimalabhogāntamajñānātmasamāśrayam || 26 ||
[Analyze grammar]

bhogaḥ karmavināśāya bhogamavyaktamucyate |
bāhyāṃtaḥkaraṇadvāraṃ śarīraṃ bhogasādhanam || 27 ||
[Analyze grammar]

bhāvātiśayalabdhena prasādena malakṣayaḥ |
kṣīṇe cātmamale tasmin pumāñcchivasamo bhavet || 28 ||
[Analyze grammar]

munaya ūcuḥ |
kalādipañcatattvānāṃ kiṃ karma pṛthagucyate |
bhokteti puruṣaśceti yenātmā vyapadiśyate || 29 ||
[Analyze grammar]

kimātmakaṃ tadavyaktaṃ kenākāreṇa bhujyate |
kiṃ tasya śaraṇaṃ bhuktau śarīraṃ ca kimucyate || 30 ||
[Analyze grammar]

vāyuruvāca |
dikkriyāvyaṃjakā vidyā kālo rāgaḥ pravartakaḥ |
kālo 'vacchedakastatra niyatistu niyāmikā || 31 ||
[Analyze grammar]

avyaktaṃ kāraṇaṃ yattattriguṇaṃ prabhavāpyayam |
pradhānaṃ prakṛtiśceti yadāhustattvaciṃtakāḥ || 32 ||
[Analyze grammar]

kalātastadabhivyaktamanabhivyaktalakṣaṇam |
sukhaduḥkhavimohātmā bhujyate guṇavāṃstridhā || 33 ||
[Analyze grammar]

sattvaṃ rajastama iti guṇāḥ prakṛtisaṃbhavāḥ |
prakṛtau sūkṣmarūpeṇa tile tailamiva sthitāḥ || 34 ||
[Analyze grammar]

sukhaṃ ca sukhahetuśca samāsātsāttvikaṃ smṛtam |
rājasaṃ tadviparyāsātstaṃbhamohau tu tāmasau || 35 ||
[Analyze grammar]

sāttvikyūrdhvagatiḥ proktā tāmasī syādadhogatiḥ |
madhyamā tu gatiryā sā rājasī paripaṭhyate || 36 ||
[Analyze grammar]

tanmātrāpañcakaṃ caiva bhūtapañcakameva ca |
jñāneṃdriyāṇi pañcaikyaṃ pañca karmendriyāṇi ca || 37 ||
[Analyze grammar]

pradhānabuddhyahaṃkāramanāṃsi ca catuṣṭayam |
samāsādevamavyaktaṃ savikāramudāhṛtam || 38 ||
[Analyze grammar]

tatkāraṇadaśāpannamavyaktamiti kathyate |
vyaktaṃ kāryadaśāpannaṃ śarīrādighaṭādivat || 39 ||
[Analyze grammar]

yathā ghaṭādikaṃ kāryaṃ mṛdādernātibhidyate |
śarīrādi tathā vyaktamavyaktānnātibhidyate || 40 ||
[Analyze grammar]

tasmādavyaktamevaikyakāraṇaṃ karaṇāni ca |
śarīraṃ ca tadādhāraṃ tadbhogyaṃ cāpi netarat || 41 ||
[Analyze grammar]

munaya ūcuḥ |
buddhīndriyaśarīrebhyo vyatirekasya kasyacit |
ātmaśabdābhidheyasya vastuto 'pi kutaḥ sthitiḥ || 42 ||
[Analyze grammar]

vāyuruvāca |
buddhīndriyaśarīrebhyo vyatireko vibhordhruvam |
astyeva kaścidātmeti hetustatra sudurgamaḥ || 43 ||
[Analyze grammar]

buddhīndriyaśarīrāṇāṃ nātmatā sadbhiriṣyate |
smṛteraniyatajñānādayāvaddehavedanāt || 44 ||
[Analyze grammar]

ataḥ smartānubhūtānāmaśeṣajñeyagocaraḥ |
antaryāmīti vedeṣu vedāṃteṣu ca gīyate || 45 ||
[Analyze grammar]

sarvaṃ tatra sa sarvatra vyāpya tiṣṭhati śāśvataḥ |
tathāpi kvāpi kenāpi vyaktameṣa na dṛśyate || 46 ||
[Analyze grammar]

naivāyaṃ cakṣuṣā grāhyo nāparairindriyairapi |
manasaiva pradīptena mahānātmāvasīyate 1 || 47 ||
[Analyze grammar]

na ca strī na pumāneṣa naiva cāpi napuṃsakaḥ |
naivordhvaṃ nāpi tiryaknādhastānna kutaścana || 48 ||
[Analyze grammar]

aśarīraṃ śarīreṣu caleṣu sthāṇumavyayam |
sadā paśyati taṃ dhīro naraḥ pratyavamarśanāt || 49 ||
[Analyze grammar]

kimatra bahunoktena puruṣo dehataḥ pṛthak |
apṛthagye tu paśyaṃti hyasamyakteṣu darśanam || 50 ||
[Analyze grammar]

yaccharīramidaṃ proktaṃ puruṣasya tataḥ param |
aśuddhamavaśaṃ duḥkhamadhruvaṃ na ca vidyate || 51 ||
[Analyze grammar]

vipadāṃ vījabhūtena puruṣastena saṃyutaḥ |
sukhī duḥkhī ca mūḍhaśca bhavati svena karmaṇā || 52 ||
[Analyze grammar]

adbhirāplavitaṃ kṣetraṃ janayatyaṃkuraṃ yathā |
ājñānātplāvitaṃ karma dehaṃ janayate tathā || 53 ||
[Analyze grammar]

atyaṃtamasukhāvāsāssmṛtāścaikāṃtamṛtyavaḥ |
anāgatā atītāśca tanavo 'sya sahasraśaḥ || 54 ||
[Analyze grammar]

āgatyāgatya śīrṇeṣu śarīreṣu śarīriṇaḥ |
atyaṃtavasatiḥ kvāpi na kenāpi ca labhyate || 55 ||
[Analyze grammar]

chāditaśca viyuktaśca śarīraireṣu lakṣyate |
caṃdrabiṃbavadākāśe taralairabhrasaṃcayaiḥ || 56 ||
[Analyze grammar]

anekadehabhedena bhinnā vṛttirihātmanaḥ |
aṣṭāpadaparikṣepe hyakṣamudreva lakṣyate || 57 ||
[Analyze grammar]

naivāsya bhavitā kaścinnāsau bhavati kasyacit |
pathi saṃgama evāyaṃ dāraiḥ putraiśca baṃdhubhiḥ || 58 ||
[Analyze grammar]

yathā kāṣṭhaṃ ca kāṣṭhaṃ ca sameyātāṃ mahodadhau |
sametya ca vyapeyātāṃ tadvadbhūtasamāgamaḥ || 59 ||
[Analyze grammar]

sa paśyati śarīraṃ taccharīraṃ tanna paśyati |
tau paśyati paraḥ kaścittāvubhau taṃ na paśyataḥ || 60 ||
[Analyze grammar]

brahmādyāḥ sthāvarāṃtaśca paśavaḥ parikīrtitāḥ |
paśūnāmeva sarveṣāṃ proktametannidarśanam || 61 ||
[Analyze grammar]

sa eṣa badhyate pāśaiḥ sukhaduḥkhāśanaḥ paśuḥ |
līlāsādhanabhūto ya īśvarasyeti sūrayaḥ || 62 ||
[Analyze grammar]

ajño jaṃturanīśo 'yamātmanassukhaduḥkhayoḥ |
īśvaraprerito gacchetsvargaṃ vā śvabhrameva vā || 63 ||
[Analyze grammar]

sūta uvāca |
ityākarṇyānilavaco munayaḥ prītamānasāḥ |
procuḥ praṇamya taṃ vāyuṃ śaivāgamavicakṣaṇam || 64 ||
[Analyze grammar]