Chapter 17

[English text for this chapter is available]

sanatkumāra uvāca |
pārāśaryya susaṃkṣepācchṛṇu tvaṃ vadato mama |
maṇḍalaṃ ca bhuvassamyak saptadvīpādisaṃyutam || 1 ||
[Analyze grammar]

jaṃbū plakṣaśśālmaliśca kuśaḥ krauñcaśca śākakaḥ |
puṣpakassaptamassarve samudraissaptabhirvṛtāḥ || 2 ||
[Analyze grammar]

lavaṇekṣurasau sarpirdavidugdhajalāśayāḥ |
jambudvīpassamastānāmeteṣāṃ madhyataḥ sthitaḥ || 3 ||
[Analyze grammar]

tasyāpi meruḥ kāleyamadhye kanakaparvataḥ |
praviṣṭaḥ ṣoḍaśādhastādyojanaistasya cocchrayaḥ || 4 ||
[Analyze grammar]

caturaśītimānaistairdvātriṃśanmūrdhni vistṛtaḥ |
bhūmipṛṣṭhasthaśailo'yaṃ vistarastasya sarvataḥ || 5 ||
[Analyze grammar]

mūle ṣoḍaśasāhasraḥ karṇikākāra saṃsthitaḥ |
himavān hemakūṭaśca niṣadhaścāsya dakṣiṇe || 6 ||
[Analyze grammar]

nīlaḥ śvetaśca śṛṅgī ca uttare varṣaparvatāḥ |
daśasāhasrikaṃ hyete ratnavaṃto'ruṇaprabhāḥ || 7 ||
[Analyze grammar]

sahasrayojanotsedhāstāvadvistāriṇaśca te |
bhārataṃ prathamaṃ varṣaṃ tataḥ kiṃpuruṣaṃ smṛtam || 8 ||
[Analyze grammar]

harivarṣaṃ tato 'nyadvai merordakṣiṇato mune |
ramyakaṃ cottare pārśve tasyāṃśe tu hiraṇmayam || 9 ||
[Analyze grammar]

uttare kuravaścaiva yathā vai bhārataṃ tathā |
navasāhasramekaikameteṣāṃ munisattama || 10 ||
[Analyze grammar]

ilāvṛtaṃ tu tanmadhye tanmadhye merurucchritaḥ |
meroścaturddiśaṃ tatra navasāhasramucchritam || 11 ||
[Analyze grammar]

ilāvṛtamṛṣiśreṣṭha catvāraścātra parvatāḥ |
viṣkaṃbhā racitā meroryojitāḥ punarucchritāḥ || 12 ||
[Analyze grammar]

pūrve hi mandaro nāma dakṣiṇe gandhamādanaḥ |
vipulaḥ paścime bhāge supārśvaścottare sthitaḥ || 13 ||
[Analyze grammar]

kadaṃbo jaṃbuvṛkṣaśca pippalo vaṭa eva ca |
ekādaśaśatāyāmāḥ pādapā giriketavaḥ || 14 ||
[Analyze grammar]

jambūdvīpasya nāmno vai hetuṃ śṛṇu mahāmune |
virājaṃte mahāvṛkṣāstatsvabhāvaṃ vadāmi te || 15 ||
[Analyze grammar]

mahāgaja pramāṇāni jambvāstasyāḥ phalāni ca |
pataṃti bhūbhṛtaḥ pṛṣṭhe śīryyamāṇāni sarvataḥ || 16 ||
[Analyze grammar]

rasena teṣāṃ vikhyātā jambūnadīti vai |
parito vartate tatra pīyate tannivāsibhiḥ || 17 ||
[Analyze grammar]

na svedo na ca daurgaṃdhyaṃ na jarā cendriyagrahaḥ |
tasyāstaṭe sthitānāntu janānāṃ tanna jāyate || 18 ||
[Analyze grammar]

tīramṛtsnāṃ ca samprāpya mukhavāyuviśoṣitām |
jāmbūnadākhyaṃ bhavati suvarṇaṃ siddhabhūṣaṇam || 19 ||
[Analyze grammar]

bhadrāśvaṃ pūrvato meroḥ ketumālaṃ ca paścime |
varṣe dve tu muniśreṣṭha tayormadhya ilāvṛtam || 20 ||
[Analyze grammar]

vanaṃ caitrarathaṃ pūrve dakṣiṇe gandhamādanaḥ |
vibhrājaṃ paścime tadvaduttare nandanaṃ smṛtam || 21 ||
[Analyze grammar]

aruṇodaṃ mahābhadraṃ śītodaṃ mānasaṃ smṛtam |
sarāṃsyetāni catvāri devabhogyāni sarvaśaḥ || 22 ||
[Analyze grammar]

śītāṃjanaḥ kuruṃgaśca kuraro mālyavāṃstathā |
caikaikapramukhā meroḥ pūrvataḥ kesarācalāḥ || 23 ||
[Analyze grammar]

trikūṭaśśiśiraścaiva pataṃgo rucakastathā |
niṣadhaḥ kapilāyāśca dakṣiṇe kesarācalāḥ || 24 ||
[Analyze grammar]

sinī vāsaḥ kusuṃbhaśca kapilo nāradastathā |
nāgādayaśca girayaḥ paścime kesarācalāḥ || 25 ||
[Analyze grammar]

śaṃkhacūḍo'tha ṛṣabho haṃso nāma mahīdharaḥ |
kālaṃjarādyāśca tathā uttare kesarācalāḥ || 26 ||
[Analyze grammar]

merorupari madhye hi śātakauṃbhaṃ vidheḥ puram |
caturddaśasahasrāṇi yojanāni ca saṃkhyayā || 27 ||
[Analyze grammar]

aṣṭānāṃ lokapālānāṃ paritastadanukramāt |
yathādiśaṃ yathārūpaṃ puro'ṣṭāvupakalpitāḥ || 28 ||
[Analyze grammar]

tasyāṃ ca brahmaṇaḥ puryyāṃ pātayitvendumaṇḍalam |
viṣṇupādaviniṣkrāṃtā gaṃgā patati vai nadī || 29 ||
[Analyze grammar]

sītā cālakanaṃdā ca cakṣurbhadrā ca vai kramāt |
sā tatra patitā dikṣu caturddhā pratyapadyata || 30 ||
[Analyze grammar]

sītā pūrveṇa śailaṃ hi nandā caiva tu dakṣiṇe |
sā cakṣuḥ paścime caiva bhadrā cottarato vrajet || 31 ||
[Analyze grammar]

girīnatītya sakalāṃścaturddikṣu mahāṃbudhim |
sā yayau prayatā sūtā gaṃgā tripathagāminī || 32 ||
[Analyze grammar]

sunīlaniṣadhau yau tau mālyavadgandhamādanau |
teṣāṃ madhyagato meruḥ karṇikākārasaṃsthitaḥ || 33 ||
[Analyze grammar]

bhārataḥ ketumālaśca bhadrāśvaḥ kuravastathā |
patrāṇi lokapadmasya maryādālokaparvatāḥ || 34 ||
[Analyze grammar]

jaṭharaṃ devakūṭaśca āyāme dakṣiṇottare |
gandhamādanakailāsau pūrvapaścimato gatau || 35 ||
[Analyze grammar]

pūrvapaścimato merorniṣadho nīlaparvataḥ |
dakṣiṇottaramāyātau karṇikāṃtarvyavasthitau || 36 ||
[Analyze grammar]

jaṭharādyāḥ sthitā meroryeṣāṃ dvau dvau vyavasthitau |
kesarāḥ parvatā ete śvetādyāḥ sumanoramāḥ || 37 ||
[Analyze grammar]

śailānāmuttare droṇyassiddhacāraṇasevitāḥ |
suramyāṇi tathā tāsu kānanāni purāṇi ca || 38 ||
[Analyze grammar]

sarveṣāṃ caiva devānāṃ yakṣagaṃdharvarakṣasām |
krīḍaṃti devadaiteyāśśailaprāyeṣvaharniśam || 39 ||
[Analyze grammar]

dharmiṇāmālayā hyete bhaumāssvargāḥ prakīrtitāḥ |
na teṣu pāpakartāro yāṃti paśyaṃti kutracit || 40 ||
[Analyze grammar]

yāni kiṃpuruṣādīni varṣāṇyaṣṭau mahāmune |
na teṣu śoko nāpattyo nodvegaḥ kṣudbhayādikam || 41 ||
[Analyze grammar]

svasthāḥ prajā nirātaṃkāssarvaduḥkhavivarjitāḥ |
daśadvādaśavarṣāṇāṃ sahasrāṇi sthirāyuṣaḥ || 42 ||
[Analyze grammar]

kṛtatretādikāścaiva bhaumānyaṃbhāṃsi sarvataḥ |
na teṣu varṣate devasteṣu sthāneṣu kalpanā || 43 ||
[Analyze grammar]

saptasveteṣu nadyaśca sujātāssvarṇavā lukāḥ |
śataśassaṃti kṣudrāśca tāsu krīḍāratā janāḥ || 44 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ brahmāṇḍakathane jambūdvīpavarṣavarṇanaṃ nāma saptadaśodhyāyaḥ || 17 ||
[Analyze grammar]