Chapter 18

[English text for this chapter is available]

sanatkumāra uvāca |
vakṣye'haṃ bhārataṃ varṣaṃ himādreścaiva dakṣiṇe |
uttare tu samudrasya bhāratī yatra saṃsṛtiḥ || 1 ||
[Analyze grammar]

navayojanasāhasro vistāro'sya mahāmune |
svargāpavargayoḥ karmabhūmireṣā smṛtā budhaiḥ || 2 ||
[Analyze grammar]

yatassaṃprāpyate puṃbhissvargo naraka eva ca |
bhāratasyāpi varṣasya nava bhedānbravīmi te || 3 ||
[Analyze grammar]

iṃdradyumnaḥ kaseruśca tāmravarṇo gabhastimān |
nāgadvīpastathā saumyo gandharvastvatha vāruṇaḥ || 4 ||
[Analyze grammar]

ayaṃ tu navamasteṣāṃ dvīpassāgarasaṃbhṛtaḥ |
yojanānāṃ sahasraṃ tu dvīpo'yaṃ dakṣiṇottaraḥ || 5 ||
[Analyze grammar]

pūrve kirātā yasya syurdakṣiṇe yavanāḥ sthitāḥ |
paścime ca tathā jñeyā uttare hi tapasvinaḥ || 6 ||
[Analyze grammar]

brāhmaṇāḥ kṣatriyā vaiśyā madhye śūdrāśca bhūyaśaḥ |
ijyā yuddhapaṇā sevā vartayanto vyavasthitāḥ || 7 ||
[Analyze grammar]

maheṃdro malayassahyaḥ sudāmā carkṣaparvataḥ |
viṃdhyaśca pāriyātraśca saptātra kulaparvatāḥ || 8 ||
[Analyze grammar]

vedasmṛtipurāṇādyāḥ pāriyātrodbhavā mune |
sarvapāpaharā jñeyā darśanātsparśanādapi || 9 ||
[Analyze grammar]

narmadā surasādyāśca saptānyāśca sahasraśaḥ |
viṃdhyodbhavā mahānadyassarvapāpaharāśśubhāḥ || 10 ||
[Analyze grammar]

godāvarī bhīmarathī tāpīpramukhanimnagāḥ |
girervinirgatā ṛkṣātsadyaḥ pāpabhayāpahāḥ || 11 ||
[Analyze grammar]

sahyapādodbhavā nadyaḥ kṛṣṇāveṇyādikāstathā |
kṛtamālā tāmraparṇī pramukhā malayodbhavāḥ || 12 ||
[Analyze grammar]

triyāmā carṣikulyādyā mahendraprabhavā smṛtāḥ |
ṛṣikulyā kumāryyādyāḥ śuktimatpādasaṃbhavāḥ || 13 ||
[Analyze grammar]

nānājanapadāsteṣu maṃḍaleṣu vasanti vai |
āsāṃ pibaṃti pānīyaṃ saratsu vividheṣu ca || 14 ||
[Analyze grammar]

catvāri bhārate varṣe yugānyāsanmahāmune |
kṛtādīni na cānyeṣu dvīpeṣu prabhavaṃti hi || 15 ||
[Analyze grammar]

dānāni cātra dīyaṃte sukṛtaiścātra yājñikaiḥ |
tapastapaṃti yatayaḥ paralokārthamādarāt || 16 ||
[Analyze grammar]

yato hi karmabhūreṣā jambūdvīpe mahāmune |
atrāpi bhārataṃ śreṣṭhamato'nyā bhogabhūmayaḥ || 17 ||
[Analyze grammar]

kadācillabhate martyassahasrairmunisattama |
atra janmasahasrāṇāṃ mānuṣyaṃ puṇyasaṃcayaiḥ || 18 ||
[Analyze grammar]

svargāpavargāspadamārgabhūte dhanyāstu te bhāratabhūmibhāge |
gāyaṃti devāḥ kila gītakāni bhavaṃti bhūyaḥ puruṣāssurāste || 19 ||
[Analyze grammar]

avāpya mānuṣyamayaṃ kadācidvihṛtya śaṃbhoḥ paramātmarūpe |
phalāni sarvāṇi tu karmajāni yāsyāmyahaṃ tattanutāṃ hi tasya || 20 ||
[Analyze grammar]

āpsyaṃti dhanyāḥ khalu te manuṣyāḥ sukhairyutāḥ karmaṇi sanniviṣṭāḥ |
janurhi yeṣāṃ khalu bhārate'sti te svargamokṣobhayalābhavantaḥ || 21 ||
[Analyze grammar]

lakṣayojanavistārassamastaparimaṇḍalaḥ |
jambūdvīpo mayā khyātaḥ kṣārodadhisusaṃvṛtaḥ || 22 ||
[Analyze grammar]

saṃveṣṭya kṣāramudadhiṃ śatasāhasrasammitam |
tato hi dviguṇo brahmanplakṣadvīpaḥ prakīrtitaḥ || 23 ||
[Analyze grammar]

gomaṃtaścaiva candraśca nārado dardurastathā |
somakassumanāśśailo vaibhrājaścaiva sattamaḥ || 24 ||
[Analyze grammar]

varṣācaleṣu ramyeṣu sahitāssatataṃ prajāḥ |
vasaṃti devagaṃdharvā varṣeṣveteṣu nityaśaḥ || 25 ||
[Analyze grammar]

nādhayo vyādhayo vāpi janānāṃ tatra kutracit |
daśa varṣasahasrāṇi tatra jīvaṃti mānavāḥ || 26 ||
[Analyze grammar]

anutaptā śikhī caiva pāpaghnī tridivā kṛpā |
amṛtā sukṛtā caiva saptaivātra ca nimnagāḥ || 27 ||
[Analyze grammar]

kṣudranadyastathā śailāstatra saṃti sahasraśaḥ |
tāḥ pibaṃti susaṃhṛṣṭā nadīrjanapadāstu te || 28 ||
[Analyze grammar]

na tatrāpi yugāvasthā yathāsthāneṣu saptasu |
tretāyugasamaḥ kālassarvadaiva mahāmune || 29 ||
[Analyze grammar]

viprakṣatriyavaiśyāste śūdrāśca munisattama || |
kalpavṛkṣasamānastu tanmadhye sumahātaruḥ || 30 ||
[Analyze grammar]

plakṣastannāmasaṃjño vai plakṣadvīpo dvijottama |
ijyate tatra bhagavāñchaṃkaro lokaśaṃkaraḥ || 31 ||
[Analyze grammar]

hariśca bhagavānbrahmā yantrairmantraiśca vaidikaiḥ |
saṃkṣepeṇa tathā bhūyaśśālmaliṃ tvaṃ niśāmaya || 32 ||
[Analyze grammar]

saptavarṣāṇi tatraiva teṣāṃ nāmāni me śṛṇu |
śveto'tha haritaścaiva jīmūto rohitastathā || 33 ||
[Analyze grammar]

vaikalo mānasaścaiva suprabhassaptamo mune |
śālmalena tu vṛkṣeṇa dvīpaḥ śālmalisaṃjñakaḥ || 34 ||
[Analyze grammar]

dviguṇena samudreṇa satataṃ saṃvṛtaḥ sthitaḥ |
varṣābhivyaṃjakā nadyastāsāṃ nāmāni me śṛṇu || 35 ||
[Analyze grammar]

śuklā raktā hiraṇyā ca candrā śubhrā vimocanā |
nivṛttiḥ saptamī tāsāṃ puṇyatoyā suśītalāḥ || 36 ||
[Analyze grammar]

saptaiva tāni varṣāṇi caturvarṇāyutāni ca |
bhagavantaṃ sadā śaṃbhuṃ yajaṃte vividhairmakhaiḥ || 37 ||
[Analyze grammar]

devānāṃ tatra sānnidhyamatīva sumanorame |
eṣa dvīpassamudreṇa surodena samāvṛtaḥ || 38 ||
[Analyze grammar]

dviguṇena kuśadvīpaḥ samaṃtādbāhyataḥ sthitaḥ |
vasaṃti tatra daiteyā manujaissaha dānavāḥ || 39 ||
[Analyze grammar]

tathaiva devagandharvā yakṣāḥ kiṃpuruṣādayaḥ |
varṇāstatraiva catvāro nijānuṣṭhānatatparāḥ || 40 ||
[Analyze grammar]

tatraiva ca kuśadvīpe brahmāṇaṃ ca janārddanam |
yajaṃti ca tatheśānaṃ sarvakāmaphalapradam || 41 ||
[Analyze grammar]

kuśeśayo hariścaiva dyutimānpuṣpavāṃstathā |
maṇidrumo hemaśailassaptamo mandarācalaḥ || 42 ||
[Analyze grammar]

nadyaśca sapta tāsāṃ tu nāmāni śṛṇu tattvataḥ |
dhūtapāpā śivā caiva pavitrā saṃmitistathā || 43 ||
[Analyze grammar]

vidyā daṃbhā mahī cānyā sarvapāpaharāstvimāḥ |
anyāssahasraśassaṃti śubhāpo hemavālukāḥ || 44 ||
[Analyze grammar]

kuśadvīpe kuśastambo ghṛtodena samāvṛtaḥ |
krauñcadvīpo mahābhāga śrūyatāṃ cāparo mahān || 45 ||
[Analyze grammar]

dviguṇena samudreṇa dadhimaṃḍena cāvṛtaḥ |
varṣācalā mahābuddhe teṣāṃ nāmāni me śṛṇu || 46 ||
[Analyze grammar]

krauñcaśca vāmanaścaiva tṛtīyaścāṃdhakārakaḥ |
divāvṛtirmanaścaiva puṇḍarīkaśca dundubhiḥ || 47 ||
[Analyze grammar]

nivasaṃti nirātaṃkā varṣaśaileṣu teṣu vai |
sarvasauvarṇaramyeṣu suhṛddevagaṇaiḥ prajāḥ || 48 ||
[Analyze grammar]

brāhmaṇāḥ kṣattriyā vaiśyāśśūdrāścānukramoditāḥ |
saṃti tatra mahānadyassaptānyāstu sahasraśaḥ || 49 ||
[Analyze grammar]

gaurī kumudvatī caiva sandhyā rātrirmanojavā |
śāṃtiśca puṃḍarīkā ca yāḥ pibanti payaśśubham || 50 ||
[Analyze grammar]

bhagavānpūjyate tatra yogarudrasvarūpavān |
dadhimaṇḍodakaścāpi śākadvīpena saṃvṛtaḥ || 51 ||
[Analyze grammar]

dviguṇenādrayassapta teṣāṃ nāmāni me śṛṇu |
pūrve tatrodayagirirjaladhāraḥ pare yataḥ || 52 ||
[Analyze grammar]

pṛṣṭhato'stagiriścaiva hyavikeśaśca kesarī |
śākastatra mahāvṛkṣassiddhagaṃdharvasevitaḥ || 53 ||
[Analyze grammar]

tatra puṇyā janapadāścāturvarṇyasamanvitāḥ |
nadyaścātra mahāpuṇyāssarvapāpabhayāpahāḥ || 54 ||
[Analyze grammar]

sukumārī kumārī ca nalinī veṇukā tathā |
ikṣuśca reṇukā caiva gabhastissaptamī tathā || 55 ||
[Analyze grammar]

anyāssahasraśastatra kṣudranadyo mahāmune |
mahīdharāstathā saṃti śataśo'tha sahasraśaḥ || 56 ||
[Analyze grammar]

dharmahānirna teṣvasti svargādāgatya mānavāḥ |
varṣeṣu teṣu pṛthivīṃ viharanti parasparam || 57 ||
[Analyze grammar]

śākadvīpe tu vai sūryyaḥ prītyā janapadaissadā |
yathoktairijyate samyakkarmabhirniyatātmabhiḥ || 58 ||
[Analyze grammar]

kṣīrodenāvṛtasso'pi dviguṇena samaṃtataḥ |
kṣīrābdhissarvato vyāsa puṣkarākhyena saṃvṛtaḥ || 59 ||
[Analyze grammar]

dviguṇena mahāvarṣastatra khyāto'tra mānasaḥ |
yojanānāṃ sahasrāṇi paṃcaivordhvasamucchritaḥ || 60 ||
[Analyze grammar]

tāni caiva tu lakṣāṇi sarvato valayākṛti |
puṣkaradvīpavalayo madhyena vibhajaṃti ca || 61 ||
[Analyze grammar]

tenaiva valayā kārā dvīpavarṣasamākṛtiḥ |
daśavarṣasahasrāṇi tatra jīvaṃti mānavāḥ || 62 ||
[Analyze grammar]

nirāmayā vītaśokā rāgadveṣavivarjitāḥ |
adharmo na matasteṣāṃ na baṃdhavadhakau mune || 63 ||
[Analyze grammar]

satyānṛte na tasyāstāṃ sadaiva vasatissadā |
tulyaveṣāstu manujā hemavarṇaikarūpiṇaḥ || 64 ||
[Analyze grammar]

varṣaścāyaṃ tu kāleya bhauma svargopamo mataḥ |
sarvasya sukhadaḥ kāle jarārogavivarjitaḥ || 65 ||
[Analyze grammar]

puṣkare dhātakīkhaṇḍe mahāvīte mahāmune || |
nyagrodhaṃ puṣkaradvīpe brahmaṇaḥ sthānamuttamam || 66 ||
[Analyze grammar]

tasminnivasate brahmā pūjyamānassurāsuraiḥ |
svādūdakenāṃbudhinā puṣkaraḥ pariveṣṭitaḥ || 67 ||
[Analyze grammar]

evaṃ dvīpāssamudraistu sapta saptabhirāvṛtāḥ |
dvīpāścaiva samudrāśca samānā dviguṇaiḥ paraiḥ || 68 ||
[Analyze grammar]

uktātiriktatā teṣāṃ samudreṣu samāni vai |
payāṃsi sarvadā'lpatvaṃ jāyate na kadācana || 69 ||
[Analyze grammar]

sthālīsthamagnisaṃyogādadhaḥsthaṃ munisattamaḥ |
tathenduvṛddhau salilamūrddhvagaṃ bhavati dhruvam || 70 ||
[Analyze grammar]

udayāstamanetviṃdorvarddhaṃtyāpo hrasanti ca |
ato nyūnātiriktāśca pakṣayoḥ śuklakṛṣṇayoḥ || 71 ||
[Analyze grammar]

apāṃ vṛddhikṣayau dṛṣṭau śataśastu daśottaram |
samudrāṇāṃ muniśreṣṭho sarveṣāṃ kathitaṃ tava || 72 ||
[Analyze grammar]

bhojanaṃ puṣkaradvīpe prajāssarvāḥ sadaiva hi |
khaṃḍasya kurvate vipra tatra svayamupasthitam || 73 ||
[Analyze grammar]

svāṃgado yasya purato nāsti lokasya saṃsthitiḥ |
dviguṇā hiraṇmayī bhūmissarvajaṃtuvivarjitā || 74 ||
[Analyze grammar]

lokālokastataśśailassahasrāṇyacalo hi saḥ |
ucchrayeṇa hi tāvaṃti yojanāyutavistṛtaḥ || 75 ||
[Analyze grammar]

tamaścāṃḍakaṭāhena seyamurvī mahāmune |
paṃcāśatkoṭivistārā sadvīpā samahīdharā || 76 ||
[Analyze grammar]

ādhārabhūtā sarveṣāṃ sarvabhūtaguṇādhikā |
seyaṃ dhātrī ca kāleya sarveṣāṃ jagatāmilā || 77 ||
[Analyze grammar]

iti śrīśivamahāpurāṇe pañcamyāmumāsaṃhitāyāṃ brahmāṇḍakathane saptadīpavarṇanaṃ nāmāṣṭādaśo'dhyāyaḥ || 18 ||
[Analyze grammar]