Chapter 31

[English text for this chapter is available]

nāradauvāca |
devadeva jagannātha bhaktānāmabhayaprada |
vrataṃ brūhi mahādeva kṛpāṃ kṛtvā mamopari || 1 ||
[Analyze grammar]

śrīmahādeva uvāca |
sārvabhaumaḥ purā hyāsīddhariścaṃdro mahīpatiḥ |
tasyatuṣṭo'dadadbrahmā purīṃ kāmadughāṃ śubhām || 2 ||
[Analyze grammar]

sarvaratnamayīṃ divyāṃ bālārkasadṛśaprabhām |
tatra sthito mahīpālo saptadvīpāṃ vasuṃdharām || 3 ||
[Analyze grammar]

pālayāmāsa dharmeṇa pitā putramivaurasam |
prabhūtadhanadhānyastu putradauhitravānnṛpaḥ || 4 ||
[Analyze grammar]

sa pālayanśubhaṃ rājyaṃ paraṃ vismayamāgataḥ |
na tādṛśamabhūtpūrvaṃ rājyaṃ kasya hi karhicit || 5 ||
[Analyze grammar]

na cedṛśaṃ narairanyairvimānamadhirohitam |
kasyeha karmaṇo vyaṣṭiryenāhaṃ surarāḍiva || 6 ||
[Analyze grammar]

iti ciṃtāparo bhūtvā vimānavaramāsthitaḥ |
dadarśa pārthivavaro meruṃ śikhariṇāṃ varam || 7 ||
[Analyze grammar]

tatrāste ca mahātmāsau dvitīya iva bhāskaraḥ |
āsīnaṃ parvatavare śailapaṭṭe hiraṇmaye || 8 ||
[Analyze grammar]

sanatkumāraṃ brahmarṣiṃ jñānayogaparāyaṇam |
dṛṣṭvā hyavātaradrājā praṣṭukāmo'tha vismayam || 9 ||
[Analyze grammar]

vavaṃde caraṇau hṛṣṭastenāpi sa ca naṃditaḥ |
sukhopaviṣṭastu nṛpaḥ papraccha munipuṃgavam || 10 ||
[Analyze grammar]

bhagavandurllabhā loke saṃpacceyaṃ yathā mama |
karmaṇā kena labhyeta kaścāhaṃ pūrvajanmani || 11 ||
[Analyze grammar]

tattvaṃ kathaya me sarvamanugrāhyo'smi te yadi |
sanatkumāra uvāca |
śṛṇu rājanpravakṣyāmi pūrvavṛttasya kāraṇam || 12 ||
[Analyze grammar]

yena kṛtvā viśeṣeṇa tava cānugraho'bhavat |
tvamāsīḥ pūrvajanuṣi suvaiśyaḥ satyavākśuciḥ || 13 ||
[Analyze grammar]

svaṃ karma te parityaktaṃ tatastyaktastu bāṃdhavaiḥ |
satvaṃ vṛttiparikṣīṇo bhāryayānugatastathā || 14 ||
[Analyze grammar]

nirgataḥ svajanāṃstyaktvā parapreṣaṇalipsayā |
na ca preṣaṇado hyāsītkāle durbhikṣapīḍitaḥ || 15 ||
[Analyze grammar]

tataḥ kadācidgahane saraścotphullapaṃkajam |
dṛṣṭvā tatra kṛto bhāvo gṛhṇīvaḥ paṃkajāni vai || 16 ||
[Analyze grammar]

etāvaduktvā puṣpāṇi tānyādāya pade pade |
āsthitau nagarīṃ puṇyāṃ nāmnā vārāṇasīṃ śubhām || 17 ||
[Analyze grammar]

tato vikrayataḥ kaścinaiva gṛhṇāti paṃkajam |
tanmaṭhānnirgataḥ kaścittatraiva prāṃgaṇe sthitaḥ || 18 ||
[Analyze grammar]

tatra sthāne praviśatā śruto vāditranisvanaḥ |
kasmiṃśca śrūyate hyeṣa vāditrasya ca nisvanaḥ || 19 ||
[Analyze grammar]

iti pṛṣṭe tadā tūrye tenokte prasthitoṃtaram |
kāśirājastu vikhyāta iṃdradyumnastu pārthivaḥ || 20 ||
[Analyze grammar]

tasyāsti duhitā khyātā nāmnā caṃdrāvatī satī |
upoṣitā mahābhāgā jayaṃtīmaṣṭamīṃ śubhām || 21 ||
[Analyze grammar]

tatrāgato'sau vaiśyastu yatra tiṣṭhati sā śubhā |
saṃtuṣṭacittaḥ sa tadā harṣastatrāgato mahān || 22 ||
[Analyze grammar]

tatra sthāne tvayā dṛṣṭo deva vaitāniko vidhiḥ |
ādityasahito yatra pūjyate bhagavānhariḥ || 23 ||
[Analyze grammar]

tadbhaktyā ca tvayā patnyā saha puṣpārcanaṃ kṛtam |
śeṣaistu prakarastatra kṛtaḥ puṣpamayastathā || 24 ||
[Analyze grammar]

taṃ dṛṣṭvā vismitā sāha kenehābhyarcanaṃ kṛtam |
jñātvā tatkarmatatsarvaṃ kṛtaṃ saṃrakṣaṇaṃ tathā || 25 ||
[Analyze grammar]

tatastuṣṭā tu sā tubhyaṃ dadau vittaṃ bahusvayam |
tvayā vittaṃ no gṛhītaṃ bhojanāyānumaṃtritaḥ || 26 ||
[Analyze grammar]

na gṛhītaṃ bhojanaṃ ca na ca vittaṃ tvayā tadā |
ādityo viṣṇusaṃyuktaḥ pūjito'sau yathāvidhi || 27 ||
[Analyze grammar]

tataḥ prabhātasamaye rakṣamāṇastayā sadā |
viśraṃbhayitvā tānsarvānnirgato'si yathecchayā || 28 ||
[Analyze grammar]

tadetadanyajanuṣi sukṛtaṃ cārjitaṃ tvayā |
paṃcatvaṃ ca tvayā prāptaṃ svīyakarmānuyogataḥ || 29 ||
[Analyze grammar]

tena puṇyena mahatā vimānamāgamattadā |
tatphalaṃ bhujyate bhūpa pūrvajanmakṛtaṃ ca yat || 30 ||
[Analyze grammar]

hariścaṃdra uvāca |
kenaiva ca vidhānena kasminmāse ca sā tithiḥ |
karttavyā tanmamācakṣva anugrāhyo'smi te yadi || 31 ||
[Analyze grammar]

sanatkumāra uvāca |
śṛṇuṣvāvahito rājankathyamānaṃ mayā tava |
śrāvaṇasya tu māsasya kṛṣṇāṣṭamyāṃ narādhipa || 32 ||
[Analyze grammar]

rohiṇī yadi labhyeta jayaṃtī nāma sā tithiḥ |
bhūyobhūyo mahārāja bhavejjanmani kāraṇam || 33 ||
[Analyze grammar]

vidhānamasyā vakṣyāmi yathoktaṃ brahmaṇā mama |
yatkṛtvā muktapāpastu viṣṇulokaṃ pragacchati || 34 ||
[Analyze grammar]

upoṣitastataḥ kṛtvā snānaṃ kṛṣṇatilaiḥ saha |
sthāpayedavraṇaṃ kuṃbhaṃ paṃcaratnasamanvitam || 35 ||
[Analyze grammar]

vajramauktikavaiḍūrya puṣparāgeṃdranīlakam |
paṃcaratnaṃ praśastaṃ tu iti kātyāyano'bravīt || 36 ||
[Analyze grammar]

tasyopari nyasetpātraṃ sauvarṇaṃ lakṣaṇānvitam |
sauvarṇāṃ vinyasettatra yaśodāṃ naṃdagehinīm || 37 ||
[Analyze grammar]

dadamānāṃ tu putrasya stanaṃ vai vismitānanām |
pibamānaṃ stanaṃ māturaparaṃ pāṇinā spṛśat || 38 ||
[Analyze grammar]

ālokya mātaraṃ premṇā sukhayaṃtaṃ muhurmuhuḥ |
sauvarṇaṃ kārayeddevaṃ yāvacchaktiśca vidyate || 39 ||
[Analyze grammar]

dvi niṣkamātraṃ kartavyaṃ yadi śaktiśca vidyate |
trilohenaiva kartavyaṃ sauvarṇenāthavā punaḥ || 40 ||
[Analyze grammar]

tadvacca rohiṇīṃ kuryātsauvarṇī rājataḥ śaśī |
aṃguṣṭhamātrastu śaśī rohiṇī caturaṃgulā || 41 ||
[Analyze grammar]

karṇayoḥ kuṃḍale dadyātkaṃṭhābharaṇakaṃ gale |
evaṃ kṛtvā tu goviṃdaṃ mātrāsārddhaṃ jagatpatim || 42 ||
[Analyze grammar]

kṣīrādisnapanaṃ kṛtvā caṃdanenānulepayet |
śvetavastrayugacchatraṃ puṣpamālopaśobhitam || 43 ||
[Analyze grammar]

naivedyairvividhairbhakṣaiḥ phalairnānāvidhairapi |
dīpaṃ ca kārayettatra puṣpamaṃḍapaśobhitam || 44 ||
[Analyze grammar]

gītaṃ nṛtyaṃ ca vādyaṃ ca kārayedbhaktimānbudhaiḥ |
evaṃ kṛtvā vidhānaṃ tu yathāvibhavasārataḥ |
guruṃ saṃpūjayet paścātpūjāṃ tatra samāpayet || 45 ||
[Analyze grammar]

iti śrīpādme mahāpurāṇe paṃcapaṃcāśatsahasrasaṃhitāyāṃ uttarakhaṇḍe umāpatināradasaṃvāde janmāṣṭamīvrataṃnāma ekatriṃśo'dhyāyaḥ || 31 ||
[Analyze grammar]