Chapter 39

[English text for this chapter is available]

bhīṣma uvāca |
kathitaṃ vāmanasyaiva māhātmyaṃ vistareṇa vai |
punastasyaiva māhātmyamanyadviṣṇorato vada || 1 ||
[Analyze grammar]

padmaṃ kathamabhūddeva nābhau yenābhavajjagat |
kathaṃ ca vaiṣṇavī sṛṣṭiḥ padmamadhye'bhavatpurā || 2 ||
[Analyze grammar]

kathaṃ pādme mahākalpe'bhavatpadmamayaṃ jagat |
jalārṇavagatasyeha nābhau jātaṃ jalānugaṃ || 3 ||
[Analyze grammar]

prabhāvaṃ padmanābhasya svapataḥ sāgarāṃbhasi |
puṣkare tu kathaṃ jātā devā ṝṣigaṇāḥ purā || 4 ||
[Analyze grammar]

etadākhyāhi nikhilaṃ yogaṃ yogavidāṃ pate |
kathaṃ nirmitavāṃstatra caitaṃ lokaṃ sanātanam || 5 ||
[Analyze grammar]

kathamekārṇave śūnye naṣṭe sthāvarajaṃgame |
bhūgolake pradagdhe tu praṇaṣṭoragarākṣase || 6 ||
[Analyze grammar]

naṣṭānalānilākāśe naṣṭadharme mahītale |
kevale gahvarībhūte mahābhūtaviparyaye || 7 ||
[Analyze grammar]

kiṃ nu viśvapatiḥ sākṣānmahātejā mahādyutiḥ |
āste yathādhyānaniṣṭho vidhimāsthāya yogavit || 8 ||
[Analyze grammar]

śṛṇvataḥ parayā bhaktyā brahmannetadaśeṣataḥ |
vaktumarhasi dharmajña yaśo nārāyaṇātmakam || 9 ||
[Analyze grammar]

śraddhinaḥ sūpaviṣṭasya bhagavanvaktumarhasi |
pulastya uvāca |
nārāyaṇasya yaśasaḥ śravaṇe yā tava spṛhā || 10 ||
[Analyze grammar]

sadvaṃśānvayapūtasya nyāyyaṃ kurukulodvaha |
śṛṇuṣvādipurāṇeṣu devebhyaśca yathā śruti || 11 ||
[Analyze grammar]

brāhmaṇānāṃ ca vadatāṃ śrutvā vai sumahātmanām |
yathā ca tapasā dṛṣṭvā bṛhaspati samadyutiḥ || 12 ||
[Analyze grammar]

parāśarasutaḥ śrīmāngururdvaipāyano'bravīt |
tatte'haṃ kathayiṣyāmi yathābhakti yathāśruti || 13 ||
[Analyze grammar]

yadvijñātaṃ mayā samyagṛṣimārgeṇa sattama |
kaḥ samutsahate jñātuṃ paraṃ nārāyaṇātmakam || 14 ||
[Analyze grammar]

viśvāvitāraṃ brahmāyaṃ na vedayati tatvataḥ |
tatkarmaviśvadevā na tadrahasyaṃ maharṣiṣu || 15 ||
[Analyze grammar]

sa ijyassarvayajñānāṃ sa tattvaṃ tattvadarśinām |
adhyātmamadhyātmavidāṃ narakaṃ ca vikarmiṇām || 16 ||
[Analyze grammar]

adhidaivaṃ ca taddaivamadhidaivatasaṃjñitam |
adhibhūtaṃ ca tadbhūtaṃ paraṃ ca paramārthinām || 17 ||
[Analyze grammar]

sa yajño vedanirdiṣṭastattapaḥ kavayo viduḥ |
yaḥ karttā kārako buddhiryataḥ kṣetrajña eva ca || 18 ||
[Analyze grammar]

praṇavaḥ puruṣaḥ śāstā ekaśceti vibhāvyate |
prāṇaḥ paṃcavidhaścaiva dhruvamakṣarameva ca || 19 ||
[Analyze grammar]

kālaḥ pākaśca yajñaśca yaṣṭā cādhītameva ca |
ucyate vividhairbhāvaiḥ sa evāyaṃ tu tatparam || 20 ||
[Analyze grammar]

sa eva bhagavānsarvaṃ karoti na karoti ca |
sosminkārayate sarvaṃ sthānināṃ ca kṛtiḥ kṛtā || 21 ||
[Analyze grammar]

yajāmahe tamevādyaṃ sa evotthānanirvṛtaḥ |
yo vaktā yacca vaktavyaṃ yaścāhaṃ tadbravīmi te || 22 ||
[Analyze grammar]

śrūyate yacca vai śrāvyaṃ yaccānyatparijalpitam |
yā kathāyāśca śrutayo yo dharmī dharmatatparaḥ || 23 ||
[Analyze grammar]

viśvaṃ viśvapatiryaśca sa tu nārāyaṇaḥ smṛtaḥ |
yatsatyaṃ yadanṛtamādimadhyabhūtaṃ yaccāṃtyaṃ niravadhikaṃ ca yadbhaviṣyam || 24 ||
[Analyze grammar]

yatkiṃciccaramacaraṃ yadasti cānyatsarvaṃ tatpuruṣavaraḥ pradhānabhūtaḥ |
catvāryyāhuḥ sahasrāṇi varṣāṇāṃ tatkṛtaṃ yugam || 25 ||
[Analyze grammar]

tasya tāvacchatī saṃdhyā dviguṇā kurunaṃdana |
yatra dharmaścatuṣpādastvadharmaḥ pādavigrahaḥ || 26 ||
[Analyze grammar]

svadharmaniratāḥ śāṃtā jāyaṃte yatra mānavāḥ |
viprā sthitā dharmaparā rājavṛttisthitā nṛpāḥ || 27 ||
[Analyze grammar]

kṛṣyāmabhiratā vaiśyāḥ śūdrā śuḥśrūṣavastathā |
tadā satyaṃ ca satvaṃ ca dharmaścaiva vivardhate || 28 ||
[Analyze grammar]

sadbhirācarito dharmo yena lokaḥ pravarttate |
etatkṛtayuge vṛttaṃ sarveṣāmeva pārthiva || 29 ||
[Analyze grammar]

prāṇināṃ dharmasaṃjñānāṃ narāṇāṃ nīcajanmanām |
trīṇivarṣasahasrāṇi tretāyugamihocyate || 30 ||
[Analyze grammar]

tasya tāvacchatī saṃdhyā dviguṇā parikīrtitā |
dvābhyāmadharmaḥ pādābhyāṃ tribhirdharmo vyavasthitaḥ || 31 ||
[Analyze grammar]

yatra satyaṃ ca satvaṃ ca kriyā dharmo vidhīyate |
tretāyāṃ vikṛtiṃ yāṃti varṇā lobhena saṃyutāḥ || 32 ||
[Analyze grammar]

cāturvarṇyasya vai kṛtyaṃ kṣāṃtirdaurbalyameva ca |
eṣā tretāyugagatirvicitrā devanirmitā || 33 ||
[Analyze grammar]

dvāparaṃ dvisahasraṃ tu varṣāṇāṃ kurunandana |
tasya tāvacchatī sandhyā dviguṇaṃ yugamucyate || 34 ||
[Analyze grammar]

tatrāpyatīvārthaparāḥ prāṇino rajasā hatāḥ |
śaṭhā naiṣkṛtikāḥ kṣudrā jāyante kurunandana || 35 ||
[Analyze grammar]

dvābhyāṃ dharmaḥ sthitaḥ padbhyāmadharmastribhirutthitaḥ |
viparyayaśatairdharmaḥ kṣayameti kalau yuge || 36 ||
[Analyze grammar]

brahmaṇyabhāvaścyavate tathāstikyaṃ vivarjyate |
vratopavāsāstyajyaṃte kalau vai yugaparyaye || 37 ||
[Analyze grammar]

tadā varṣasahasraṃ tu varṣāṇāṃ dve śate tathā |
yatrādharmaścatuṣpādo dharmaḥ pādaparigrahaḥ || 38 ||
[Analyze grammar]

kāminastāpasāḥ kṣudrā jāyaṃte yatra mānavāḥ |
na cāvasāyikaḥ kaścinna sādhurna ca satyavāk || 39 ||
[Analyze grammar]

nāstikā brāhmaṇā bhaktā jñāyaṃte tatra mānavāḥ |
ahaṃkāragṛhītāśca prakṣīṇasnehabaṃdhanāḥ || 40 ||
[Analyze grammar]

viprāḥ śūdrasamācārāssaṃti sarve kalau yuge |
āśramāṇāṃ viparyāsaḥ kalau saṃprati vartate || 41 ||
[Analyze grammar]

varṇānāṃ caiva saṃdeho yugāṃte kurunaṃdana |
eṣā dvādaśasāhasrī yugākhyā pūrvanirmitā || 42 ||
[Analyze grammar]

sahasrayugaparyaṃtaṃ tadaharbrāhmamucyate |
tato ha nigate tasminsarveṣāmeva jīvinām || 43 ||
[Analyze grammar]

śarīranirvṛtiṃ dṛṣṭvā kālaḥ saṃhārabuddhimān |
devatānāṃ ca sarveṣāṃ brāhmaṇānāṃ mahīpate || 44 ||
[Analyze grammar]

daityānāṃ dānavānāṃ ca yakṣarākṣasapakṣiṇām |
gaṃdharvāṇāmapsarasāṃ bhujaṃgānāṃ ca pārthiva || 45 ||
[Analyze grammar]

parvatānāṃ nadīnāṃ ca paśūnāṃ caiva sattama |
tiryagyonigatānāṃ ca krimīṇāṃ daṃśināṃ tathā || 46 ||
[Analyze grammar]

sarvabhūtapatiḥ paṃca bhūtvā bhūtāni bhūtakṛt |
jagatsaṃharaṇārthāya kurute vaiśasaṃ mahat || 47 ||
[Analyze grammar]

bhūtvā sūryaścakṣuṣī ādadāno bhūtvā vāyuḥ prāṇināṃ prāṇijātam |
bhūtvā vahnirnirdahansarvalokānbhūtvā megho bhūya ugro'bhyavarṣat || 48 ||
[Analyze grammar]

bhūtvā nārāyaṇo yogī sarvamūrti vibhāvasuḥ |
gabhastibhiḥ pradīptābhiḥ saṃśoṣayati sāgarān || 49 ||
[Analyze grammar]

tataḥ pītvārṇavānsarvānnadīkūpāṃśca sarvataḥ |
parvatānāṃ ca salilaṃ sarvamādāya yogavit || 50 ||
[Analyze grammar]

bhūtvā caiva sa hastārcirmahīṃ bhitvā rasātale |
ramate jalamādāya pibanrasamanuttamaṃ || 51 ||
[Analyze grammar]

mūrttāmūrtte tadanyacca yadasti prāṇiṣu dhruvaṃ |
tatsarvamaraviṃdākṣa ādatte puruṣottamaḥ || 52 ||
[Analyze grammar]

vāyuśca balavānbhūtvā vidhunvāno'khilaṃ jagat |
prāṇāpānaṃ samāsādya vāyunā kramate hariḥ || 53 ||
[Analyze grammar]

tato devagaṇānāṃ ca sarveṣāṃ caiva dehinām |
paṃceṃdriyaguṇāssarve bhūtānyeva ca yāni ca || 54 ||
[Analyze grammar]

ghreyaṃ ghrāṇaṃ śarīraṃ ca pṛthivīsaṃśritā guṇāḥ |
lokayātrā bhagavatā muhūrtena vināśitā || 55 ||
[Analyze grammar]

jihvārasaśca snehaśca saṃśritāḥ salile guṇāḥ |
rūpaṃ cakṣurvibhāgaśca netra jyotiḥ śritā guṇāḥ || 56 ||
[Analyze grammar]

sparśaḥ prāṇaśca ceṣṭā ca pavanaṃ saṃśritā guṇāḥ |
śabdaḥ śrotre ca śravaṇaṃ gaganaṃ saṃśritā guṇāḥ || 57 ||
[Analyze grammar]

mano buddhiśca cittaṃ ca kṣetrajñaṃ ceti saṃśritāḥ |
pareṇa parameṣṭhī ca hṛṣīkeśamupāśritāḥ || 58 ||
[Analyze grammar]

tato bhagavatastasya raśmibhiḥ parivāritāḥ |
vāyunā parinunnāśca bhūmiśākhāmupāśritāḥ || 59 ||
[Analyze grammar]

teṣāṃ saṃharaṇodbhūtaḥ pāvakaḥ śatadhā jvalan |
pradahannakhilaṃ viśvaṃ vṛttaḥ saṃvarttako'nalaḥ || 60 ||
[Analyze grammar]

saparvatadrumāngulmānlatāvallīstṛṇāni ca |
vimānāni ca divyāni purāṇi vividhāni ca || 61 ||
[Analyze grammar]

yāni cāśrayaṇīyāni sarvāṇyapyadahadbhṛśam |
bhasmīkṛtya tu tānsarvāṃllokānllokagurorguruḥ || 62 ||
[Analyze grammar]

sa bhūtiṃ dhārayāmāsa yugāṃte lokasaṃbhavām |
sahasravṛṣṭiḥ śatadhā bhūtvā kṛṣṇo mahāghanaḥ || 63 ||
[Analyze grammar]

divyatoyena haviṣā tarpayāmāsa medinīṃ |
tataḥ kṣīranikāśena svādunā paramāṃbhasā || 64 ||
[Analyze grammar]

śiśireṇa ca puṇyena mahīnirvāṇamāgamat |
tena toyena saṃpṛktā payassādharmyato dharā || 65 ||
[Analyze grammar]

ekārṇāvajalībhūtā sarvasatvavivarjitā |
mahāsatvānyapi vibhuṃ praviṣṭānyamitaujasaṃ || 66 ||
[Analyze grammar]

naṣṭārkapavanākāśe sūkṣme jagati saṃvṛte |
saṃśoṣamātmanā kṛtvā samudrāṇāṃ ca dehinaḥ || 67 ||
[Analyze grammar]

dagdhvā saṃkocya ca tathā svapityekaḥ sanātanaḥ |
paurāṇaṃ rūpamāsthāya svapityamitavikramaḥ || 68 ||
[Analyze grammar]

ekārṇavajaleyāyī yogī yogamupāsitaḥ |
anekāni sahasrāṇi yugānyekārṇavāṃbhasi || 69 ||
[Analyze grammar]

na caiva kaścidavyaktaṃ vyakto veditumarhati |
kaścaiṣa puruṣo nāma kiṃ yogaḥ kaśca yogavān || 70 ||
[Analyze grammar]

na pṛṣṭhe naivamabhito naiva pārśve na cāgrataḥ |
kaścidvijñāyate tasya dṛśyate devasattamaḥ || 71 ||
[Analyze grammar]

nabhaḥ kṣitiṃ pavanamapaḥ prakāśanaṃ prajāpatiṃ bhuvanadharaṃ sureśvaram |
pitāmahaṃ śrutinilayaṃ muniṃ prabhuṃ samāpayañchayanamarocayatprabhuḥ || 72 ||
[Analyze grammar]

evamekārṇavībhūte śete loke mahādyutiḥ |
pracchādya salilenorvīṃ haṃso nārāyaṇāya te || 73 ||
[Analyze grammar]

mahato rajaso madhye mahārṇavasamasya vai |
vārijākṣo mahābāhurakṣayaṃ brahma yadviduḥ || 74 ||
[Analyze grammar]

ātmarūpasarūpeṇa tamasā saṃvṛtaḥ prabhuḥ |
manaḥ sātvikamādāya yatra tatsatvamāhitaṃ || 75 ||
[Analyze grammar]

yathātathyaṃ paraṃ jñānaṃ bhūtāya brahmaṇe tataḥ |
rahasyaṃ ca tathoddiṣṭaṃ yathopaniṣadāṃ smṛtam || 76 ||
[Analyze grammar]

puruṣo yajña ityetatparamaṃ parikīrtitam |
yaścānyaḥ puruṣākhyaḥ syātsa eva puruṣottamaḥ || 77 ||
[Analyze grammar]

ye ca yajñakarā viprā ye ṝtvija iti smṛtāḥ |
asmādeva purā bhūtā vaktrebhyaḥ śrūyate tathā || 78 ||
[Analyze grammar]

brahmāṇaṃ prathamaṃ vaktrādudgātāraṃ ca sāmagaṃ |
hotāraṃ ca tathāddhvaryuṃ bāhubhyāmasṛjatprabhuḥ || 79 ||
[Analyze grammar]

brahmāṇaṃ brāhmāṇācchaṃsi stotārau caiva sarvaśaḥ |
meḍhrācca maitrāvaruṇaṃ pratiṣṭhātārameva ca || 80 ||
[Analyze grammar]

udarātpratihartāraṃ potāraṃ caiva pārthiva |
pāṇibhyāmatha cāgnīdhramunnetāraṃ ca yājuṣam || 81 ||
[Analyze grammar]

acchāvākamathorubhyāṃ subrahmaṇyaṃ ca sāmagam |
evamevaṃ sa bhagavānṣoḍaśaitānjagatpatiḥ || 82 ||
[Analyze grammar]

svayaṃbhūḥ sarvayajñānāmṛtvijo'sṛjaduttamān |
tadā caiṣa mahāyogī puruṣo yajñasaṃjñitaḥ || 83 ||
[Analyze grammar]

vedāścaiva tathā sarve sahāṃgopaniṣatkriyāḥ |
svapityekārṇave caiva yadāścaryamabhūtpurā || 84 ||
[Analyze grammar]

śrūyatāṃ tu tadā vipro mārkaṃḍeyaḥ kutūhalāt |
gīrṇo bhagavatā tena kukṣāvāsīnmahāmuniḥ || 85 ||
[Analyze grammar]

bahuvarṣasahasrāyustasyaiva varatejasaḥ |
aṭaṃstīrthaprasaṃgena pṛthivītīrthagocaraḥ || 86 ||
[Analyze grammar]

āśramāṇi ca puṇyāni devatāyatanāni ca |
deśādrāṣṭrāṇi citrāṇi purāṇi vividhāni ca || 87 ||
[Analyze grammar]

japahomaparāḥ śāṃtāstapobhiramalāḥ smṛtāḥ |
mārkaṃḍeyastatastasya śanairvaktrādvinirgataḥ || 88 ||
[Analyze grammar]

niṣkrāmantaṃ na cātmānaṃ jānīte devamāyayā |
niṣkramya tasya udarādekārṇavamatho jagat || 89 ||
[Analyze grammar]

sarvatastamasāchannaṃ mārkaṃḍeyonvavaikṣata |
tasyotpannaṃ bhayaṃ tīvraṃ vyatyayaṃ cātmajīvitam || 90 ||
[Analyze grammar]

devadarśanasaṃhṛṣṭo vismayaṃ paramaṃ gataḥ |
so'ciṃtayadamoghātmā mārkaṃḍeyotha śaṃkitaḥ || 91 ||
[Analyze grammar]

kiṃ nu syāccittasaṃmohaḥ kiṃ nu svapnonubhūyate |
vyaktamanyataro bhāva etayorbhavitā mama || 92 ||
[Analyze grammar]

na hi svapno hyayaṃ satyayuktaṃ yatsatyamarhati |
naṣṭacaṃdrārkapavano naṣṭaparvatabhūtalaḥ || 93 ||
[Analyze grammar]

katamaḥ syādayaṃ loka iti śokamupāgataḥ |
dadarśa cāpi puruṣaṃ svapaṃtaṃ parvatopamam || 94 ||
[Analyze grammar]

salile'dhamatho magnaṃ jīmūtamiva sāgare |
tapaṃtamiva tejobhirāmuktaśaśibhāskaram || 95 ||
[Analyze grammar]

gāṃbhīryātsāgaramiva bhāsamānammavaujasā |
devaṃ draṣṭumihāyātaḥ ko bhavāniti vismayāt || 96 ||
[Analyze grammar]

tathaiva ca muniḥ kukṣiṃ punareva praveśitaḥ |
saṃpraviṣṭaḥ punaḥ kukṣiṃ mārkaṃḍeyaḥ savismayam || 97 ||
[Analyze grammar]

tathaiva ca punarbhūyo vijānansvapnadarśanam |
sa tathaiva yathāpūrvaṃ pṛthivīmaṭate vanam || 98 ||
[Analyze grammar]

puṇyatīrthajalopetaṃ vividhānyāśramāṇi ca |
kratubhiryajamānāṃśca samāptagurudakṣiṇaiḥ || 99 ||
[Analyze grammar]

apaśyaddevakukṣisthānyajñasthānśataśo dvijān |
sadvṛttamāśritāḥ sarve varṇā brāhmaṇapūrvakāḥ || 100 ||
[Analyze grammar]

catvāra āśramāḥ samyagyathāpūrvaṃ vilokitā |
evaṃ varṣaśataṃ sāgraṃ mārkaṃḍeyena dhīmatā || 101 ||
[Analyze grammar]

caratā pṛthivī sarvā tatkukṣau hi samīkṣyate |
tataḥ kadācidatha vai punaḥ kukṣervinirgataḥ || 102 ||
[Analyze grammar]

suptaṃnyagrodhaśākhāyāṃbālamekaṃnirīkṣyaca |
tathaivaikārṇavajale nīhāreṇāvṛtāṃtare || 103 ||
[Analyze grammar]

avyaktakrīḍite loke sarvabhūtavivarjite |
sa munirvismayāviṣṭaḥ kautūhalasamanvitaḥ || 104 ||
[Analyze grammar]

bālamādityasaṃkāśaṃ na śaknotyabhivīkṣitum |
sopyaciṃtayadekāṃte sthitvā salilasannidhau || 105 ||
[Analyze grammar]

pūrvadṛṣṭamidaṃ mene śaṃkito devamāyayā |
agādhe salile śete mārkaṃḍeyaḥ savismayaḥ || 106 ||
[Analyze grammar]

pūrvavattamatho draṣṭumavrajattrastalocanaḥ |
sa tasmai bhagavānāha svāgato bāla bho iti || 107 ||
[Analyze grammar]

babhāṣe meghatulyena svareṇa puruṣottamaḥ |
mārkaṃḍeya na bhetavyamāgacchasva mamāṃtikam || 108 ||
[Analyze grammar]

mārkaṃḍeya uvāca |
ko nāmnā kīrtayati māṃ kurvanparibhavaṃ mama |
divyavarṣasahasrākhyaṃ dharṣayaṃścaiva me vayaḥ || 109 ||
[Analyze grammar]

na hyeṣa ca sadācāro deveṣvapi mamocitaḥ |
māṃ brahmāpi hi sasneho dīrghāyuriti bhāṣate || 110 ||
[Analyze grammar]

kastapoghoramāsādya mamādya tyaktajīvitaḥ |
mārkaṃḍeyeti māmuktvā mṛtyumīkṣitumarhasi || 111 ||
[Analyze grammar]

evaṃ prakṣubhitaḥ krodhānmārkaṃḍeyo mahāmuniḥ |
tadainaṃ bhagavānbhūyo babhāṣe madhusūdanaḥ || 112 ||
[Analyze grammar]

śrībhagavānuvāca |
ahaṃ te janako vatsa hṛṣīkeśaḥ pitā guruḥ |
āyuḥ pradātā paurāṇaḥ kiṃ māṃ tvaṃ nopasarpasi || 113 ||
[Analyze grammar]

māṃ putrakāmaḥ prathamaṃ tvatpitāṃgiraso muniḥ |
pūrvamārādhayāmāsa tapastīvraṃ samāśritaḥ || 114 ||
[Analyze grammar]

taṃ dṛṣṭvā ghoratapasaṃ tridaśottamatejasam |
dattavāṃstvāmahaṃ putraṃ maharṣimamitaujasam || 115 ||
[Analyze grammar]

kassamutsahate cānyo yogibhūtātmagātmakam |
draṣṭumekārṇavagataṃ krīḍaṃtaṃ yogamāyayā || 116 ||
[Analyze grammar]

tataḥ prahṛṣṭahṛdayo vismayotphullalocanaḥ |
mūrdhni baddhāṃjalipuṭo mārkaṃḍeyo māhātapāḥ || 117 ||
[Analyze grammar]

nāmagotre tu saṃprocya dīrghāyurlokapūjitaḥ |
tasmai bhagavate bhaktyā namaskāramathākarot || 118 ||
[Analyze grammar]

mārkaṃḍeya uvāca |
icchāmi tattvato jñātumimāṃ māyāṃ tavānagha |
yadekārṇavamadhyasthaḥ śeṣe tvaṃ bālarūpavān || 119 ||
[Analyze grammar]

kiṃ saṃjñaścaiva bhagavānloke vijñāyase prabho |
tarkayehaṃ mahātmānaṃ ko hyanyaḥ sthātumarhasi || 120 ||
[Analyze grammar]

śrībhagavānuvāca |
ahaṃ nārāyaṇo brahmansarvabhūtavināśanaḥ |
ahaṃ sahasraśīrṣāsyaḥ sahasrapadasaṃyutaḥ || 121 ||
[Analyze grammar]

ādityavarṇaḥ puruṣo mukhe brahmamayo hyaham |
ahamagnirhavyavahaḥ saptasaptibhiranvitaḥ || 122 ||
[Analyze grammar]

ahamiṃdrapadaḥ śakra ṝtūnāṃ parivatsaraḥ |
ahaṃ yogiṣu sāṃkhyākhyo yugāṃtāvarta eva ca || 123 ||
[Analyze grammar]

ahaṃ sarvāṇi satvāni daivatānyakhilāni ca |
bhujagānāmahaṃ śeṣastārkṣyo'haṃ sarvapakṣiṇām || 124 ||
[Analyze grammar]

kṛtāṃtaḥ sarvabhūtānāṃ vijñeyaḥ kālasaṃjñitaḥ |
ahaṃ dharmastapaścāhaṃ sarvāśramanivāsinām || 125 ||
[Analyze grammar]

ahaṃ dayā parodharmaḥ kṣīrodohaṃ mahārṇavaḥ |
yatsatyaṃ tatparaṃ tveka ahameva prajāpatiḥ || 126 ||
[Analyze grammar]

ahaṃ sāṃkhyamahaṃ yogo hyahaṃ tatparamaṃ padam |
ahamijyā kriyā cāhamahaṃ vidyādhipaḥ smṛtaḥ || 127 ||
[Analyze grammar]

ahaṃ jyotirahaṃ vāyurahaṃ bhūmirahaṃ jalam |
ākāśohaṃ samudrāśca nakṣatrāṇi diśo daśa || 128 ||
[Analyze grammar]

ahaṃ varṣamahaṃ somaḥ parjanyohamahaṃ raviḥ |
ahaṃ purāṇaṃ paramaṃ tathaivāhaṃ parāyaṇam || 129 ||
[Analyze grammar]

bhaviṣye cāpi sarvatra bhaviṣyatsarvasaṃgrahaḥ |
yatkiṃcitpaśyase vipra yacchṛṇoṣi ca kiṃcana || 130 ||
[Analyze grammar]

yaccānubhavase loke tatsarvaṃ māmanusmara |
viśvaṃ sṛṣṭaṃ mayā pūrvaṃ sṛjedyāpi ca paśya mām || 131 ||
[Analyze grammar]

yuge yuge ca rakṣāmi mārkaṃḍeyākhilaṃ jagat |
tadetatkathitaṃ sarvaṃ mārkaṃḍeyāvadhāraya || 132 ||
[Analyze grammar]

śuśrūṣurapi dharmeṣu kukṣau carasukhaṃ mama |
mama brahmā śarīrastho devāśca ṝṣibhiḥ saha || 133 ||
[Analyze grammar]

vyaktamavyaktayogaṃ māmavagaccha muradviṣam |
ahamekākṣaro maṃtrastryakṣaraśca pitāmahaḥ || 134 ||
[Analyze grammar]

parastrivargaoṃkāraḥ paramātmapradarśanaḥ |
evamādipurāṇaṃ ca vadatemāṃ mahāmate || 135 ||
[Analyze grammar]

vaktraṃ yāto bhagavato mārkaṃḍeyo mahāmuniḥ |
tato bhagavataḥ kukṣiṃ praviṣṭo munisattamaḥ || 136 ||
[Analyze grammar]

tasyāsammukhamekānte śuśrūṣurhaṃsamavyayam |
yadakṣayaṃ vividhamupāśritaṃ tu tanmahārṇave vyapagatacaṃdrabhāskare || 137 ||
[Analyze grammar]

śanaiścaranprabhuratha haṃsasaṃjñitaḥ sṛjanjagadviharati kālaparyaye |
atha caivaṃ śucirbhūtvā varayāmāsa vai tapaḥ || 138 ||
[Analyze grammar]

chādayitvātmano dehaṃ payasāṃbujasaṃbhavaḥ |
tato mahātmātibalo martyalokavisarjane || 139 ||
[Analyze grammar]

mahatāṃ caiva bhūtānāṃ viśvo viśvamaciṃtayat |
tasya ciṃtayamānasya niyate saṃsthiterṇave || 140 ||
[Analyze grammar]

nirākāśe toyamaye sūkṣme jagati saṃkṣaye |
īśaḥ saṃkṣobhayāmāsa sorṇavaṃ salilaṃ gataḥ || 141 ||
[Analyze grammar]

athāṃtarādapāṃ sūkṣmamatha cchidramabhūtpurā |
śabdaṃ prati tato bhūto mārutaśchidrasaṃbhavaḥ || 142 ||
[Analyze grammar]

saṃlabdhvāṃtarasaṃkṣobhaṃ vyavardhata samīraṇaḥ |
nabhasvatā balavatā vegādvikṣobhitorṇavaḥ || 143 ||
[Analyze grammar]

tasyārṇavasya kṣubdhasya tasminnaṃbhasi mathyataḥ |
kṛṣṇavartmā samabhavatprabhurvaiśvānaro mahān || 144 ||
[Analyze grammar]

tataḥ saṃśoṣayāmāsa pāvakaḥ salilaṃ bahu |
samastajaladhiśchidramabhavadvisṛtaṃ nabhaḥ || 145 ||
[Analyze grammar]

ātmatejobhavāḥ puṇyā āpomṛtarasopamāḥ |
ākāśaṃ chidrasaṃbhūtaṃ vāyurākāśasaṃbhavaḥ || 146 ||
[Analyze grammar]

atha saṃgharṣasambhūtaṃ pāvakaṃ cāsya saṃbhavam |
dṛṣṭvā pitāmaho devo mahābhūtavibhāvanaḥ || 147 ||
[Analyze grammar]

dṛṣṭvā bhūtāni bhagavānlokasṛṣṭyarthamuttamam |
brahmaṇo janmasahitaṃ bahurūpo hyaciṃtayat || 148 ||
[Analyze grammar]

caturyugānāṃ saṃkhyātaṃ sahasraṃ yugaparyaye |
yatpṛthivyāṃ dvijeṃdrāṇāṃ tapasā bhāvitātmanām || 149 ||
[Analyze grammar]

bahujanmaviśuddhātmā brahmaṇo harirucyate |
jñānaṃ dṛṣṭvā tu viśvātmā yogināṃ yāti yogyatām || 150 ||
[Analyze grammar]

taṃ yogavaṃtaṃ vijñāya saṃpūrṇaiśvaryamuttamam |
pade brahmaṇi viśvasya nyayojayata yogavit || 151 ||
[Analyze grammar]

tatastasminmahātoye maheśo hariracyutaḥ |
jalakrīḍāṃ ca vidhivatsa cakre sarvalokakṛt || 152 ||
[Analyze grammar]

padmaṃ nābhyudbhavaṃ caikaṃ samutpāditavāṃstataḥ |
sahastravarṇaṃ virajaṃ bhāskarābhaṃ hiraṇmayam || 153 ||
[Analyze grammar]

hutāśanajvalitaśikhojjavalaprabhaṃ samutthitaṃ śaradamalārkatejasam |
virājate kamalamudāravarcasaṃ mahātmanastanuruha cāruśaivalam || 154 ||
[Analyze grammar]