Chapter 32

vaiśaṃpāyana uvāca |
tamasābhiplute loke rajasā caiva bhārata |
vyatiṣṭhanvai muhūrtaṃ tu vyūḍhānīkāḥ prahāriṇaḥ || 1 ||
[Analyze grammar]

tato'ndhakāraṃ praṇudannudatiṣṭhata candramāḥ |
kurvāṇo vimalāṃ rātriṃ nandayankṣatriyānyudhi || 2 ||
[Analyze grammar]

tataḥ prakāśamāsādya punaryuddhamavartata |
ghorarūpaṃ tataste sma nāvekṣanta parasparam || 3 ||
[Analyze grammar]

tataḥ suśarmā traigartaḥ saha bhrātrā yavīyasā |
abhyadravanmatsyarājaṃ rathavrātena sarvaśaḥ || 4 ||
[Analyze grammar]

tato rathābhyāṃ praskandya bhrātarau kṣatriyarṣabhau |
gadāpāṇī susaṃrabdhau samabhyadravatāṃ hayān || 5 ||
[Analyze grammar]

tathaiva teṣāṃ tu balāni tāni kruddhānyathānyonyamabhidravanti |
gadāsikhaḍgaiśca paraśvadhaiśca prāsaiśca tīkṣṇāgrasupītadhāraiḥ || 6 ||
[Analyze grammar]

balaṃ tu matsyasya balena rājā sarvaṃ trigartādhipatiḥ suśarmā |
pramathya jitvā ca prasahya matsyaṃ virāṭamojasvinamabhyadhāvat || 7 ||
[Analyze grammar]

tau nihatya pṛthagdhuryāvubhau ca pārṣṇisārathī |
virathaṃ matsyarājānaṃ jīvagrāhamagṛhṇatām || 8 ||
[Analyze grammar]

tamunmathya suśarmā tu rudatīṃ vadhukāmiva |
syandanaṃ svaṃ samāropya prayayau śīghravāhanaḥ || 9 ||
[Analyze grammar]

tasmingṛhīte virathe virāṭe balavattare |
prādravanta bhayānmatsyāstrigartairarditā bhṛśam || 10 ||
[Analyze grammar]

teṣu saṃtrāsyamāneṣu kuntīputro yudhiṣṭhiraḥ |
abhyabhāṣanmahābāhuṃ bhīmasenamariṃdamam || 11 ||
[Analyze grammar]

matsyarājaḥ parāmṛṣṭastrigartena suśarmaṇā |
taṃ mokṣaya mahābāho na gaccheddviṣatāṃ vaśam || 12 ||
[Analyze grammar]

uṣitāḥ smaḥ sukhaṃ sarve sarvakāmaiḥ supūjitāḥ |
bhīmasena tvayā kāryā tasya vāsasya niṣkṛtiḥ || 13 ||
[Analyze grammar]

bhīmasena uvāca |
ahamenaṃ paritrāsye śāsanāttava pārthiva |
paśya me sumahatkarma yudhyataḥ saha śatrubhiḥ || 14 ||
[Analyze grammar]

svabāhubalamāśritya tiṣṭha tvaṃ bhrātṛbhiḥ saha |
ekāntamāśrito rājanpaśya me'dya parākramam || 15 ||
[Analyze grammar]

suskandho'yaṃ mahāvṛkṣo gadārūpa iva sthitaḥ |
enameva samārujya drāvayiṣyāmi śātravān || 16 ||
[Analyze grammar]

vaiśaṃpāyana uvāca |
taṃ mattamiva mātaṅgaṃ vīkṣamāṇaṃ vanaspatim |
abravīdbhrātaraṃ vīraṃ dharmarājo yudhiṣṭhiraḥ || 17 ||
[Analyze grammar]

mā bhīma sāhasaṃ kārṣīstiṣṭhatveṣa vanaspatiḥ |
mā tvā vṛkṣeṇa karmāṇi kurvāṇamatimānuṣam |
janāḥ samavabudhyeranbhīmo'yamiti bhārata || 18 ||
[Analyze grammar]

anyadevāyudhaṃ kiṃcitpratipadyasva mānuṣam |
cāpaṃ vā yadi vā śaktiṃ nistriṃśaṃ vā paraśvadham || 19 ||
[Analyze grammar]

yadeva mānuṣaṃ bhīma bhavedanyairalakṣitam |
tadevāyudhamādāya mokṣayāśu mahīpatim || 20 ||
[Analyze grammar]

yamau ca cakrarakṣau te bhavitārau mahābalau |
vyūhataḥ samare tāta matsyarājaṃ parīpsataḥ || 21 ||
[Analyze grammar]

tataḥ samastāste sarve turagānabhyacodayan |
divyamastraṃ vikurvāṇāstrigartānpratyamarṣaṇāḥ || 22 ||
[Analyze grammar]

tānnivṛttarathāndṛṣṭvā pāṇḍavānsā mahācamūḥ |
vairāṭī paramakruddhā yuyudhe paramādbhutam || 23 ||
[Analyze grammar]

sahasraṃ nyavadhīttatra kuntīputro yudhiṣṭhiraḥ |
bhīmaḥ saptaśatānyodhānparalokamadarśayat |
nakulaścāpi saptaiva śatāni prāhiṇoccharaiḥ || 24 ||
[Analyze grammar]

śatāni trīṇi śūrāṇāṃ sahadevaḥ pratāpavān |
yudhiṣṭhirasamādiṣṭo nijaghne puruṣarṣabhaḥ |
bhittvā tāṃ mahatīṃ senāṃ trigartānāṃ nararṣabha || 25 ||
[Analyze grammar]

tato yudhiṣṭhiro rājā tvaramāṇo mahārathaḥ |
abhidrutya suśarmāṇaṃ śarairabhyatudadbhṛśam || 26 ||
[Analyze grammar]

suśarmāpi susaṃkruddhastvaramāṇo yudhiṣṭhiram |
avidhyannavabhirbāṇaiścaturbhiścaturo hayān || 27 ||
[Analyze grammar]

tato rājannāśukārī kuntīputro vṛkodaraḥ |
samāsādya suśarmāṇamaśvānasya vyapothayat || 28 ||
[Analyze grammar]

pṛṣṭhagopau ca tasyātha hatvā paramasāyakaiḥ |
athāsya sārathiṃ kruddho rathopasthādapāharat || 29 ||
[Analyze grammar]

cakrarakṣaśca śūraśca śoṇāśvo nāma viśrutaḥ |
sa bhayāddvairathaṃ dṛṣṭvā traigartaṃ prājahattadā || 30 ||
[Analyze grammar]

tato virāṭaḥ praskandya rathādatha suśarmaṇaḥ |
gadāmasya parāmṛśya tamevājaghnivānbalī |
sa cacāra gadāpāṇirvṛddho'pi taruṇo yathā || 31 ||
[Analyze grammar]

bhīmastu bhīmasaṃkāśo rathātpraskandya kuṇḍalī |
trigartarājamādatta siṃhaḥ kṣudramṛgaṃ yathā || 32 ||
[Analyze grammar]

tasmingṛhīte virathe trigartānāṃ mahārathe |
abhajyata balaṃ sarvaṃ traigartaṃ tadbhayāturam || 33 ||
[Analyze grammar]

nivartya gāstataḥ sarvāḥ pāṇḍuputrā mahābalāḥ |
avajitya suśarmāṇaṃ dhanaṃ cādāya sarvaśaḥ || 34 ||
[Analyze grammar]

svabāhubalasaṃpannā hrīniṣedhā yatavratāḥ |
saṃgrāmaśiraso madhye tāṃ rātriṃ sukhino'vasan || 35 ||
[Analyze grammar]

tato virāṭaḥ kaunteyānatimānuṣavikramān |
arcayāmāsa vittena mānena ca mahārathān || 36 ||
[Analyze grammar]

virāṭa uvāca |
yathaiva mama ratnāni yuṣmākaṃ tāni vai tathā |
kāryaṃ kuruta taiḥ sarve yathākāmaṃ yathāsukham || 37 ||
[Analyze grammar]

dadānyalaṃkṛtāḥ kanyā vasūni vividhāni ca |
manasaścāpyabhipretaṃ yadvaḥ śatrunibarhaṇāḥ || 38 ||
[Analyze grammar]

yuṣmākaṃ vikramādadya mukto'haṃ svastimāniha |
tasmādbhavanto matsyānāmīśvarāḥ sarva eva hi || 39 ||
[Analyze grammar]

vaiśaṃpāyana uvāca |
tathābhivādinaṃ matsyaṃ kauraveyāḥ pṛthakpṛthak |
ūcuḥ prāñjalayaḥ sarve yudhiṣṭhirapurogamāḥ || 40 ||
[Analyze grammar]

pratinandāma te vākyaṃ sarvaṃ caiva viśāṃ pate |
etenaiva pratītāḥ smo yattvaṃ mukto'dya śatrubhiḥ || 41 ||
[Analyze grammar]

athābravītprītamanā matsyarājo yudhiṣṭhiram |
punareva mahābāhurvirāṭo rājasattamaḥ |
ehi tvāmabhiṣekṣyāmi matsyarājo'stu no bhavān || 42 ||
[Analyze grammar]

manasaścāpyabhipretaṃ yatte śatrunibarhaṇa |
tatte'haṃ saṃpradāsyāmi sarvamarhati no bhavān || 43 ||
[Analyze grammar]

ratnāni gāḥ suvarṇaṃ ca maṇimuktamathāpi vā |
vaiyāghrapadya viprendra sarvathaiva namo'stu te || 44 ||
[Analyze grammar]

tvatkṛte hyadya paśyāmi rājyamātmānameva ca |
yataśca jātaḥ saṃrambhaḥ sa ca śatrurvaśaṃ gataḥ || 45 ||
[Analyze grammar]

tato yudhiṣṭhiro matsyaṃ punarevābhyabhāṣata |
pratinandāmi te vākyaṃ manojñaṃ matsya bhāṣase || 46 ||
[Analyze grammar]

ānṛśaṃsyaparo nityaṃ susukhaḥ satataṃ bhava |
gacchantu dūtāstvaritaṃ nagaraṃ tava pārthiva |
suhṛdāṃ priyamākhyātuṃ ghoṣayantu ca te jayam || 47 ||
[Analyze grammar]

tatastadvacanānmatsyo dūtānrājā samādiśat |
ācakṣadhvaṃ puraṃ gatvā saṃgrāme vijayaṃ mama || 48 ||
[Analyze grammar]

kumārāḥ samalaṃkṛtya paryāgacchantu me purāt |
vāditrāṇi ca sarvāṇi gaṇikāśca svalaṃkṛtāḥ || 49 ||
[Analyze grammar]

te gatvā kevalāṃ rātrimatha sūryodayaṃ prati |
virāṭasya purābhyāśe dūtā jayamaghoṣayan || 50 ||
[Analyze grammar]