Chapter 282

mārkaṇḍeya uvāca |
etasminneva kāle tu dyumatseno mahāvane |
labdhacakṣuḥ prasannātmā dṛṣṭyā sarvaṃ dadarśa ha || 1 ||
[Analyze grammar]

sa sarvānāśramāngatvā śaibyayā saha bhāryayā |
putrahetoḥ parāmārtiṃ jagāma manujarṣabha || 2 ||
[Analyze grammar]

tāvāśramānnadīścaiva vanāni ca sarāṃsi ca |
tāṃstāndeśānvicinvantau dampatī parijagmatuḥ || 3 ||
[Analyze grammar]

śrutvā śabdaṃ tu yatkiṃcidunmukhau sutaśaṅkayā |
sāvitrīsahito'bhyeti satyavānityadhāvatām || 4 ||
[Analyze grammar]

bhinnaiśca paruṣaiḥ pādaiḥ savraṇaiḥ śoṇitokṣitaiḥ |
kuśakaṇṭakaviddhāṅgāvunmattāviva dhāvataḥ || 5 ||
[Analyze grammar]

tato'bhisṛtya tairvipraiḥ sarvairāśramavāsibhiḥ |
parivārya samāśvāsya samānītau svamāśramam || 6 ||
[Analyze grammar]

tatra bhāryāsahāyaḥ sa vṛto vṛddhaistapodhanaiḥ |
āśvāsito vicitrārthaiḥ pūrvarājñāṃ kathāśrayaiḥ || 7 ||
[Analyze grammar]

tatastau punarāśvastau vṛddhau putradidṛkṣayā |
bālye vṛttāni putrasya smarantau bhṛśaduḥkhitau || 8 ||
[Analyze grammar]

punaruktvā ca karuṇāṃ vācaṃ tau śokakarśitau |
hā putra hā sādhvi vadhūḥ kvāsi kvāsītyarodatām || 9 ||
[Analyze grammar]

suvarcā uvāca |
yathāsya bhāryā sāvitrī tapasā ca damena ca |
ācāreṇa ca saṃyuktā tathā jīvati satyavān || 10 ||
[Analyze grammar]

gautama uvāca |
vedāḥ sāṅgā mayādhītāstapo me saṃcitaṃ mahat |
kaumāraṃ brahmacaryaṃ me guravo'gniśca toṣitāḥ || 11 ||
[Analyze grammar]

samāhitena cīrṇāni sarvāṇyeva vratāni me |
vāyubhakṣopavāsaśca kuśalāni ca yāni me || 12 ||
[Analyze grammar]

anena tapasā vedmi sarvaṃ paricikīrṣitam |
satyametannibodha tvaṃ dhriyate satyavāniti || 13 ||
[Analyze grammar]

śiṣya uvāca |
upādhyāyasya me vaktrādyathā vākyaṃ viniḥsṛtam |
naitajjātu bhavenmithyā tathā jīvati satyavān || 14 ||
[Analyze grammar]

ṛṣaya ūcuḥ |
yathāsya bhāryā sāvitrī sarvaireva sulakṣaṇaiḥ |
avaidhavyakarairyuktā tathā jīvati satyavān || 15 ||
[Analyze grammar]

bhāradvāja uvāca |
yathāsya bhāryā sāvitrī tapasā ca damena ca |
ācāreṇa ca saṃyuktā tathā jīvati satyavān || 16 ||
[Analyze grammar]

dālbhya uvāca |
yathā dṛṣṭiḥ pravṛttā te sāvitryāśca yathā vratam |
gatāhāramakṛtvā ca tathā jīvati satyavān || 17 ||
[Analyze grammar]

māṇḍavya uvāca |
yathā vadanti śāntāyāṃ diśi vai mṛgapakṣiṇaḥ |
pārthivī ca pravṛttiste tathā jīvati satyavān || 18 ||
[Analyze grammar]

dhaumya uvāca |
sarvairguṇairupetaste yathā putro janapriyaḥ |
dīrghāyurlakṣaṇopetastathā jīvati satyavān || 19 ||
[Analyze grammar]

mārkaṇḍeya uvāca |
evamāśvāsitastaistu satyavāgbhistapasvibhiḥ |
tāṃstānvigaṇayannarthānavasthita ivābhavat || 20 ||
[Analyze grammar]

tato muhūrtātsāvitrī bhartrā satyavatā saha |
ājagāmāśramaṃ rātrau prahṛṣṭā praviveśa ha || 21 ||
[Analyze grammar]

brāhmaṇā ūcuḥ |
putreṇa saṃgataṃ tvādya cakṣuṣmantaṃ nirīkṣya ca |
sarve vayaṃ vai pṛcchāmo vṛddhiṃ te pṛthivīpate || 22 ||
[Analyze grammar]

samāgamena putrasya sāvitryā darśanena ca |
cakṣuṣaścātmano lābhāttribhirdiṣṭyā vivardhase || 23 ||
[Analyze grammar]

sarvairasmābhiruktaṃ yattathā tannātra saṃśayaḥ |
bhūyo bhūyaśca vṛddhiste kṣiprameva bhaviṣyati || 24 ||
[Analyze grammar]

mārkaṇḍeya uvāca |
tato'gniṃ tatra saṃjvālya dvijāste sarva eva hi |
upāsāṃ cakrire pārtha dyumatsenaṃ mahīpatim || 25 ||
[Analyze grammar]

śaibyā ca satyavāṃścaiva sāvitrī caikataḥ sthitāḥ |
sarvaistairabhyanujñātā viśokāḥ samupāviśan || 26 ||
[Analyze grammar]

tato rājñā sahāsīnāḥ sarve te vanavāsinaḥ |
jātakautūhalāḥ pārtha papracchurnṛpateḥ sutam || 27 ||
[Analyze grammar]

prāgeva nāgataṃ kasmātsabhāryeṇa tvayā vibho |
virātre cāgataṃ kasmātko'nubandhaśca te'bhavat || 28 ||
[Analyze grammar]

saṃtāpitaḥ pitā mātā vayaṃ caiva nṛpātmaja |
nākasmāditi jānīmastatsarvaṃ vaktumarhasi || 29 ||
[Analyze grammar]

satyavānuvāca |
pitrāhamabhyanujñātaḥ sāvitrīsahito gataḥ |
atha me'bhūcchiroduḥkhaṃ vane kāṣṭhāni bhindataḥ || 30 ||
[Analyze grammar]

suptaścāhaṃ vedanayā ciramityupalakṣaye |
tāvatkālaṃ ca na mayā suptapūrvaṃ kadācana || 31 ||
[Analyze grammar]

sarveṣāmeva bhavatāṃ saṃtāpo mā bhavediti |
ato virātrāgamanaṃ nānyadastīha kāraṇam || 32 ||
[Analyze grammar]

gautama uvāca |
akasmāccakṣuṣaḥ prāptirdyumatsenasya te pituḥ |
nāsya tvaṃ kāraṇaṃ vettha sāvitrī vaktumarhati || 33 ||
[Analyze grammar]

śrotumicchāmi sāvitri tvaṃ hi vettha parāvaram |
tvāṃ hi jānāmi sāvitri sāvitrīmiva tejasā || 34 ||
[Analyze grammar]

tvamatra hetuṃ jānīṣe tasmātsatyaṃ nirucyatām |
rahasyaṃ yadi te nāsti kiṃcidatra vadasva naḥ || 35 ||
[Analyze grammar]

sāvitryuvāca |
evametadyathā vettha saṃkalpo nānyathā hi vaḥ |
na ca kiṃcidrahasyaṃ me śrūyatāṃ tathyamatra yat || 36 ||
[Analyze grammar]

mṛtyurme bharturākhyāto nāradena mahātmanā |
sa cādya divasaḥ prāptastato nainaṃ jahāmyaham || 37 ||
[Analyze grammar]

suptaṃ cainaṃ yamaḥ sākṣādupāgacchatsakiṃkaraḥ |
sa enamanayadbaddhvā diśaṃ pitṛniṣevitām || 38 ||
[Analyze grammar]

astauṣaṃ tamahaṃ devaṃ satyena vacasā vibhum |
pañca vai tena me dattā varāḥ śṛṇuta tānmama || 39 ||
[Analyze grammar]

cakṣuṣī ca svarājyaṃ ca dvau varau śvaśurasya me |
labdhaṃ pituḥ putraśataṃ putrāṇāmātmanaḥ śatam || 40 ||
[Analyze grammar]

caturvarṣaśatāyurme bhartā labdhaśca satyavān |
bharturhi jīvitārthaṃ tu mayā cīrṇaṃ sthiraṃ vratam || 41 ||
[Analyze grammar]

etatsatyaṃ mayākhyātaṃ kāraṇaṃ vistareṇa vaḥ |
yathā vṛttaṃ sukhodarkamidaṃ duḥkhaṃ mahanmama || 42 ||
[Analyze grammar]

ṛṣaya ūcuḥ |
nimajjamānaṃ vyasanairabhidrutaṃ kulaṃ narendrasya tamomaye hrade |
tvayā suśīle dhṛtadharmapuṇyayā samuddhṛtaṃ sādhvi punaḥ kulīnayā || 43 ||
[Analyze grammar]

mārkaṇḍeya uvāca |
tathā praśasya hyabhipūjya caiva te varastriyaṃ tāmṛṣayaḥ samāgatāḥ |
narendramāmantrya saputramañjasā śivena jagmurmuditāḥ svamālayam || 44 ||
[Analyze grammar]