Chapter 281

mārkaṇḍeya uvāca |
atha bhāryāsahāyaḥ sa phalānyādāya vīryavān |
kaṭhinaṃ pūrayāmāsa tataḥ kāṣṭhānyapāṭayat || 1 ||
[Analyze grammar]

tasya pāṭayataḥ kāṣṭhaṃ svedo vai samajāyata |
vyāyāmena ca tenāsya jajñe śirasi vedanā || 2 ||
[Analyze grammar]

so'bhigamya priyāṃ bhāryāmuvāca śramapīḍitaḥ |
vyāyāmena mamānena jātā śirasi vedanā || 3 ||
[Analyze grammar]

aṅgāni caiva sāvitri hṛdayaṃ dūyatīva ca |
asvasthamiva cātmānaṃ lakṣaye mitabhāṣiṇi || 4 ||
[Analyze grammar]

śūlairiva śiro viddhamidaṃ saṃlakṣayāmyaham |
tatsvaptumicche kalyāṇi na sthātuṃ śaktirasti me || 5 ||
[Analyze grammar]

samāsādyātha sāvitrī bhartāramupagūhya ca |
utsaṅge'sya śiraḥ kṛtvā niṣasāda mahītale || 6 ||
[Analyze grammar]

tataḥ sā nāradavaco vimṛśantī tapasvinī |
taṃ muhūrtaṃ kṣaṇaṃ velāṃ divasaṃ ca yuyoja ha || 7 ||
[Analyze grammar]

muhūrtādiva cāpaśyatpuruṣaṃ pītavāsasam |
baddhamauliṃ vapuṣmantamādityasamatejasam || 8 ||
[Analyze grammar]

śyāmāvadātaṃ raktākṣaṃ pāśahastaṃ bhayāvaham |
sthitaṃ satyavataḥ pārśve nirīkṣantaṃ tameva ca || 9 ||
[Analyze grammar]

taṃ dṛṣṭvā sahasotthāya bharturnyasya śanaiḥ śiraḥ |
kṛtāñjaliruvācārtā hṛdayena pravepatā || 10 ||
[Analyze grammar]

daivataṃ tvābhijānāmi vapuretaddhyamānuṣam |
kāmayā brūhi me deva kastvaṃ kiṃ ca cikīrṣasi || 11 ||
[Analyze grammar]

yama uvāca |
pativratāsi sāvitri tathaiva ca taponvitā |
atastvāmabhibhāṣāmi viddhi māṃ tvaṃ śubhe yamam || 12 ||
[Analyze grammar]

ayaṃ te satyavānbhartā kṣīṇāyuḥ pārthivātmajaḥ |
neṣyāmyenamahaṃ baddhvā viddhyetanme cikīrṣitam || 13 ||
[Analyze grammar]

mārkaṇḍeya uvāca |
ityuktvā pitṛrājastāṃ bhagavānsvaṃ cikīrṣitam |
yathāvatsarvamākhyātuṃ tatpriyārthaṃ pracakrame || 14 ||
[Analyze grammar]

ayaṃ hi dharmasaṃyukto rūpavānguṇasāgaraḥ |
nārho matpuruṣairnetumato'smi svayamāgataḥ || 15 ||
[Analyze grammar]

tataḥ satyavataḥ kāyātpāśabaddhaṃ vaśaṃ gatam |
aṅguṣṭhamātraṃ puruṣaṃ niścakarṣa yamo balāt || 16 ||
[Analyze grammar]

tataḥ samuddhṛtaprāṇaṃ gataśvāsaṃ hataprabham |
nirviceṣṭaṃ śarīraṃ tadbabhūvāpriyadarśanam || 17 ||
[Analyze grammar]

yamastu taṃ tathā baddhvā prayāto dakṣiṇāmukhaḥ |
sāvitrī cāpi duḥkhārtā yamamevānvagacchata |
niyamavratasaṃsiddhā mahābhāgā pativratā || 18 ||
[Analyze grammar]

yama uvāca |
nivarta gaccha sāvitri kuruṣvāsyaurdhvadehikam |
kṛtaṃ bhartustvayānṛṇyaṃ yāvadgamyaṃ gataṃ tvayā || 19 ||
[Analyze grammar]

sāvitryuvāca |
yatra me nīyate bhartā svayaṃ vā yatra gacchati |
mayāpi tatra gantavyameṣa dharmaḥ sanātanaḥ || 20 ||
[Analyze grammar]

tapasā guruvṛttyā ca bhartuḥ snehādvratena ca |
tava caiva prasādena na me pratihatā gatiḥ || 21 ||
[Analyze grammar]

prāhuḥ saptapadaṃ mitraṃ budhāstattvārthadarśinaḥ |
mitratāṃ ca puraskṛtya kiṃcidvakṣyāmi tacchṛṇu || 22 ||
[Analyze grammar]

nānātmavantastu vane caranti dharmaṃ ca vāsaṃ ca pariśramaṃ ca |
vijñānato dharmamudāharanti tasmātsanto dharmamāhuḥ pradhānam || 23 ||
[Analyze grammar]

ekasya dharmeṇa satāṃ matena sarve sma taṃ mārgamanuprapannāḥ |
mā vai dvitīyaṃ mā tṛtīyaṃ ca vāñche tasmātsanto dharmamāhuḥ pradhānam || 24 ||
[Analyze grammar]

yama uvāca |
nivarta tuṣṭo'smi tavānayā girā svarākṣaravyañjanahetuyuktayā |
varaṃ vṛṇīṣveha vināsya jīvitaṃ dadāni te sarvamanindite varam || 25 ||
[Analyze grammar]

sāvitryuvāca |
cyutaḥ svarājyādvanavāsamāśrito vinaṣṭacakṣuḥ śvaśuro mamāśrame |
sa labdhacakṣurbalavānbhavennṛpastava prasādājjvalanārkasaṃnibhaḥ || 26 ||
[Analyze grammar]

yama uvāca |
dadāni te sarvamanindite varaṃ yathā tvayoktaṃ bhavitā ca tattathā |
tavādhvanā glānimivopalakṣaye nivarta gacchasva na te śramo bhavet || 27 ||
[Analyze grammar]

sāvitryuvāca |
kutaḥ śramo bhartṛsamīpato hi me yato hi bhartā mama sā gatirdhruvā |
yataḥ patiṃ neṣyasi tatra me gatiḥ sureśa bhūyaśca vaco nibodha me || 28 ||
[Analyze grammar]

satāṃ sakṛtsaṃgatamīpsitaṃ paraṃ tataḥ paraṃ mitramiti pracakṣate |
na cāphalaṃ satpuruṣeṇa saṃgataṃ tataḥ satāṃ saṃnivasetsamāgame || 29 ||
[Analyze grammar]

yama uvāca |
manonukūlaṃ budhabuddhivardhanaṃ tvayāhamukto vacanaṃ hitāśrayam |
vinā punaḥ satyavato'sya jīvitaṃ varaṃ dvitīyaṃ varayasva bhāmini || 30 ||
[Analyze grammar]

sāvitryuvāca |
hṛtaṃ purā me śvaśurasya dhīmataḥ svameva rājyaṃ sa labheta pārthivaḥ |
jahyātsvadharmaṃ na ca me gururyathā dvitīyametaṃ varayāmi te varam || 31 ||
[Analyze grammar]

yama uvāca |
svameva rājyaṃ pratipatsyate'cirānna ca svadharmātparihāsyate nṛpaḥ |
kṛtena kāmena mayā nṛpātmaje nivarta gacchasva na te śramo bhavet || 32 ||
[Analyze grammar]

sāvitryuvāca |
prajāstvayemā niyamena saṃyatā niyamya caitā nayase na kāmayā |
ato yamatvaṃ tava deva viśrutaṃ nibodha cemāṃ giramīritāṃ mayā || 33 ||
[Analyze grammar]

adrohaḥ sarvabhūteṣu karmaṇā manasā girā |
anugrahaśca dānaṃ ca satāṃ dharmaḥ sanātanaḥ || 34 ||
[Analyze grammar]

evaṃprāyaśca loko'yaṃ manuṣyāḥ śaktipeśalāḥ |
santastvevāpyamitreṣu dayāṃ prāpteṣu kurvate || 35 ||
[Analyze grammar]

yama uvāca |
pipāsitasyeva yathā bhavetpayastathā tvayā vākyamidaṃ samīritam |
vinā punaḥ satyavato'sya jīvitaṃ varaṃ vṛṇīṣveha śubhe yadicchasi || 36 ||
[Analyze grammar]

sāvitryuvāca |
mamānapatyaḥ pṛthivīpatiḥ pitā bhavetpituḥ putraśataṃ mamaurasam |
kulasya saṃtānakaraṃ ca yadbhavettṛtīyametaṃ varayāmi te varam || 37 ||
[Analyze grammar]

yama uvāca |
kulasya saṃtānakaraṃ suvarcasaṃ śataṃ sutānāṃ piturastu te śubhe |
kṛtena kāmena narādhipātmaje nivarta dūraṃ hi pathastvamāgatā || 38 ||
[Analyze grammar]

sāvitryuvāca |
na dūrametanmama bhartṛsaṃnidhau mano hi me dūrataraṃ pradhāvati |
tathā vrajanneva giraṃ samudyatāṃ mayocyamānāṃ śṛṇu bhūya eva ca || 39 ||
[Analyze grammar]

vivasvatastvaṃ tanayaḥ pratāpavāṃstato hi vaivasvata ucyase budhaiḥ |
śamena dharmeṇa ca rañjitāḥ prajāstatastaveheśvara dharmarājatā || 40 ||
[Analyze grammar]

ātmanyapi na viśvāsastāvānbhavati satsu yaḥ |
tasmātsatsu viśeṣeṇa sarvaḥ praṇayamicchati || 41 ||
[Analyze grammar]

sauhṛdātsarvabhūtānāṃ viśvāso nāma jāyate |
tasmātsatsu viśeṣeṇa viśvāsaṃ kurute janaḥ || 42 ||
[Analyze grammar]

yama uvāca |
udāhṛtaṃ te vacanaṃ yadaṅgane śubhe na tādṛktvadṛte mayā śrutam |
anena tuṣṭo'smi vināsya jīvitaṃ varaṃ caturthaṃ varayasva gaccha ca || 43 ||
[Analyze grammar]

sāvitryuvāca |
mamātmajaṃ satyavatastathaurasaṃ bhavedubhābhyāmiha yatkulodvaham |
śataṃ sutānāṃ balavīryaśālināmidaṃ caturthaṃ varayāmi te varam || 44 ||
[Analyze grammar]

yama uvāca |
śataṃ sutānāṃ balavīryaśālināṃ bhaviṣyati prītikaraṃ tavābale |
pariśramaste na bhavennṛpātmaje nivarta dūraṃ hi pathastvamāgatā || 45 ||
[Analyze grammar]

sāvitryuvāca |
satāṃ sadā śāśvatī dharmavṛttiḥ santo na sīdanti na ca vyathanti |
satāṃ sadbhirnāphalaḥ saṃgamo'sti sadbhyo bhayaṃ nānuvartanti santaḥ || 46 ||
[Analyze grammar]

santo hi satyena nayanti sūryaṃ santo bhūmiṃ tapasā dhārayanti |
santo gatirbhūtabhavyasya rājansatāṃ madhye nāvasīdanti santaḥ || 47 ||
[Analyze grammar]

āryajuṣṭamidaṃ vṛttamiti vijñāya śāśvatam |
santaḥ parārthaṃ kurvāṇā nāvekṣante pratikriyām || 48 ||
[Analyze grammar]

na ca prasādaḥ satpuruṣeṣu mogho na cāpyartho naśyati nāpi mānaḥ |
yasmādetanniyataṃ satsu nityaṃ tasmātsanto rakṣitāro bhavanti || 49 ||
[Analyze grammar]

yama uvāca |
yathā yathā bhāṣasi dharmasaṃhitaṃ manonukūlaṃ supadaṃ mahārthavat |
tathā tathā me tvayi bhaktiruttamā varaṃ vṛṇīṣvāpratimaṃ yatavrate || 50 ||
[Analyze grammar]

sāvitryuvāca |
na te'pavargaḥ sukṛtādvinākṛtastathā yathānyeṣu vareṣu mānada |
varaṃ vṛṇe jīvatu satyavānayaṃ yathā mṛtā hyevamahaṃ vinā patim || 51 ||
[Analyze grammar]

na kāmaye bhartṛvinākṛtā sukhaṃ na kāmaye bhartṛvinākṛtā divam |
na kāmaye bhartṛvinākṛtā śriyaṃ na bhartṛhīnā vyavasāmi jīvitum || 52 ||
[Analyze grammar]

varātisargaḥ śataputratā mama tvayaiva datto hriyate ca me patiḥ |
varaṃ vṛṇe jīvatu satyavānayaṃ tavaiva satyaṃ vacanaṃ bhaviṣyati || 53 ||
[Analyze grammar]

mārkaṇḍeya uvāca |
tathetyuktvā tu tānpāśānmuktvā vaivasvato yamaḥ |
dharmarājaḥ prahṛṣṭātmā sāvitrīmidamabravīt || 54 ||
[Analyze grammar]

eṣa bhadre mayā mukto bhartā te kulanandini |
arogastava neyaśca siddhārthaśca bhaviṣyati || 55 ||
[Analyze grammar]

caturvarṣaśataṃ cāyustvayā sārdhamavāpsyati |
iṣṭvā yajñaiśca dharmeṇa khyātiṃ loke gamiṣyati || 56 ||
[Analyze grammar]

tvayi putraśataṃ caiva satyavāñjanayiṣyati |
te cāpi sarve rājānaḥ kṣatriyāḥ putrapautriṇaḥ |
khyātāstvannāmadheyāśca bhaviṣyantīha śāśvatāḥ || 57 ||
[Analyze grammar]

pituśca te putraśataṃ bhavitā tava mātari |
mālavyāṃ mālavā nāma śāśvatāḥ putrapautriṇaḥ |
bhrātaraste bhaviṣyanti kṣatriyāstridaśopamāḥ || 58 ||
[Analyze grammar]

evaṃ tasyai varaṃ dattvā dharmarājaḥ pratāpavān |
nivartayitvā sāvitrīṃ svameva bhavanaṃ yayau || 59 ||
[Analyze grammar]

sāvitryapi yame yāte bhartāraṃ pratilabhya ca |
jagāma tatra yatrāsyā bhartuḥ śāvaṃ kalevaram || 60 ||
[Analyze grammar]

sā bhūmau prekṣya bhartāramupasṛtyopagūhya ca |
utsaṅge śira āropya bhūmāvupaviveśa ha || 61 ||
[Analyze grammar]

saṃjñāṃ ca satyavāṃllabdhvā sāvitrīmabhyabhāṣata |
proṣyāgata iva premṇā punaḥ punarudīkṣya vai || 62 ||
[Analyze grammar]

satyavānuvāca |
suciraṃ bata supto'smi kimarthaṃ nāvabodhitaḥ |
kva cāsau puruṣaḥ śyāmo yo'sau māṃ saṃcakarṣa ha || 63 ||
[Analyze grammar]

sāvitryuvāca |
suciraṃ bata supto'si mamāṅke puruṣarṣabha |
gataḥ sa bhagavāndevaḥ prajāsaṃyamano yamaḥ || 64 ||
[Analyze grammar]

viśrānto'si mahābhāga vinidraśca nṛpātmaja |
yadi śakyaṃ samuttiṣṭha vigāḍhāṃ paśya śarvarīm || 65 ||
[Analyze grammar]

mārkaṇḍeya uvāca |
upalabhya tataḥ saṃjñāṃ sukhasupta ivotthitaḥ |
diśaḥ sarvā vanāntāṃśca nirīkṣyovāca satyavān || 66 ||
[Analyze grammar]

phalāhāro'smi niṣkrāntastvayā saha sumadhyame |
tataḥ pāṭayataḥ kāṣṭhaṃ śiraso me rujābhavat || 67 ||
[Analyze grammar]

śirobhitāpasaṃtaptaḥ sthātuṃ ciramaśaknuvan |
tavotsaṅge prasupto'hamiti sarvaṃ smare śubhe || 68 ||
[Analyze grammar]

tvayopagūḍhasya ca me nidrayāpahṛtaṃ manaḥ |
tato'paśyaṃ tamo ghoraṃ puruṣaṃ ca mahaujasam || 69 ||
[Analyze grammar]

tadyadi tvaṃ vijānāsi kiṃ tadbrūhi sumadhyame |
svapno me yadi vā dṛṣṭo yadi vā satyameva tat || 70 ||
[Analyze grammar]

tamuvācātha sāvitrī rajanī vyavagāhate |
śvaste sarvaṃ yathāvṛttamākhyāsyāmi nṛpātmaja || 71 ||
[Analyze grammar]

uttiṣṭhottiṣṭha bhadraṃ te pitarau paśya suvrata |
vigāḍhā rajanī ceyaṃ nivṛttaśca divākaraḥ || 72 ||
[Analyze grammar]

naktaṃcarāścarantyete hṛṣṭāḥ krūrābhibhāṣiṇaḥ |
śrūyante parṇaśabdāśca mṛgāṇāṃ caratāṃ vane || 73 ||
[Analyze grammar]

etāḥ śivā ghoranādā diśaṃ dakṣiṇapaścimām |
āsthāya viruvantyugrāḥ kampayantyo mano mama || 74 ||
[Analyze grammar]

satyavānuvāca |
vanaṃ pratibhayākāraṃ ghanena tamasā vṛtam |
na vijñāsyasi panthānaṃ gantuṃ caiva na śakṣyasi || 75 ||
[Analyze grammar]

sāvitryuvāca |
asminnadya vane dagdhe śuṣkavṛkṣaḥ sthito jvalan |
vāyunā dhamyamāno'gnirdṛśyate'tra kvacitkvacit || 76 ||
[Analyze grammar]

tato'gnimānayitveha jvālayiṣyāmi sarvataḥ |
kāṣṭhānīmāni santīha jahi saṃtāpamātmanaḥ || 77 ||
[Analyze grammar]

yadi notsahase gantuṃ sarujaṃ tvābhilakṣaye |
na ca jñāsyasi panthānaṃ tamasā saṃvṛte vane || 78 ||
[Analyze grammar]

śvaḥ prabhāte vane dṛśye yāsyāvo'numate tava |
vasāveha kṣapāmetāṃ rucitaṃ yadi te'nagha || 79 ||
[Analyze grammar]

satyavānuvāca |
śirorujā nivṛttā me svasthānyaṅgāni lakṣaye |
mātāpitṛbhyāmicchāmi saṃgamaṃ tvatprasādajam || 80 ||
[Analyze grammar]

na kadācidvikāle hi gatapūrvo mayāśramaḥ |
anāgatāyāṃ saṃdhyāyāṃ mātā me praruṇaddhi mām || 81 ||
[Analyze grammar]

divāpi mayi niṣkrānte saṃtapyete gurū mama |
vicinoti ca māṃ tātaḥ sahaivāśramavāsibhiḥ || 82 ||
[Analyze grammar]

mātrā pitrā ca subhṛśaṃ duḥkhitābhyāmahaṃ purā |
upālabdhaḥ subahuśaścireṇāgacchasīti ha || 83 ||
[Analyze grammar]

kā tvavasthā tayoradya madarthamiti cintaye |
tayoradṛśye mayi ca mahadduḥkhaṃ bhaviṣyati || 84 ||
[Analyze grammar]

purā māmūcatuścaiva rātrāvasrāyamāṇakau |
bhṛśaṃ suduḥkhitau vṛddhau bahuśaḥ prītisaṃyutau || 85 ||
[Analyze grammar]

tvayā hīnau na jīvāva muhūrtamapi putraka |
yāvaddhariṣyase putra tāvannau jīvitaṃ dhruvam || 86 ||
[Analyze grammar]

vṛddhayorandhayoryaṣṭistvayi vaṃśaḥ pratiṣṭhitaḥ |
tvayi piṇḍaśca kīrtiśca saṃtānaṃ cāvayoriti || 87 ||
[Analyze grammar]

mātā vṛddhā pitā vṛddhastayoryaṣṭirahaṃ kila |
tau rātrau māmapaśyantau kāmavasthāṃ gamiṣyataḥ || 88 ||
[Analyze grammar]

nidrāyāścābhyasūyāmi yasyā hetoḥ pitā mama |
mātā ca saṃśayaṃ prāptā matkṛte'napakāriṇī || 89 ||
[Analyze grammar]

ahaṃ ca saṃśayaṃ prāptaḥ kṛcchrāmāpadamāsthitaḥ |
mātāpitṛbhyāṃ hi vinā nāhaṃ jīvitumutsahe || 90 ||
[Analyze grammar]

vyaktamākulayā buddhyā prajñācakṣuḥ pitā mama |
ekaikamasyāṃ velāyāṃ pṛcchatyāśramavāsinam || 91 ||
[Analyze grammar]

nātmānamanuśocāmi yathāhaṃ pitaraṃ śubhe |
bhartāraṃ cāpyanugatāṃ mātaraṃ paridurbalām || 92 ||
[Analyze grammar]

matkṛtena hi tāvadya saṃtāpaṃ parameṣyataḥ |
jīvantāvanujīvāmi bhartavyau tau mayeti ha |
tayoḥ priyaṃ me kartavyamiti jīvāmi cāpyaham || 93 ||
[Analyze grammar]

mārkaṇḍeya uvāca |
evamuktvā sa dharmātmā guruvartī gurupriyaḥ |
ucchritya bāhū duḥkhārtaḥ sasvaraṃ praruroda ha || 94 ||
[Analyze grammar]

tato'bravīttathā dṛṣṭvā bhartāraṃ śokakarśitam |
pramṛjyāśrūṇi netrābhyāṃ sāvitrī dharmacāriṇī || 95 ||
[Analyze grammar]

yadi me'sti tapastaptaṃ yadi dattaṃ hutaṃ yadi |
śvaśrūśvaśurabhartṝṇāṃ mama puṇyāstu śarvarī || 96 ||
[Analyze grammar]

na smarāmyuktapūrvāṃ vai svaireṣvapyanṛtāṃ giram |
tena satyena tāvadya dhriyetāṃ śvaśurau mama || 97 ||
[Analyze grammar]

satyavānuvāca |
kāmaye darśanaṃ pitroryāhi sāvitri māciram |
purā mātuḥ piturvāpi yadi paśyāmi vipriyam |
na jīviṣye varārohe satyenātmānamālabhe || 98 ||
[Analyze grammar]

yadi dharme ca te buddhirmāṃ cejjīvantamicchasi |
mama priyaṃ vā kartavyaṃ gacchasvāśramamantikāt || 99 ||
[Analyze grammar]

mārkaṇḍeya uvāca |
sāvitrī tata utthāya keśānsaṃyamya bhāminī |
patimutthāpayāmāsa bāhubhyāṃ parigṛhya vai || 100 ||
[Analyze grammar]

utthāya satyavāṃścāpi pramṛjyāṅgāni pāṇinā |
diśaḥ sarvāḥ samālokya kaṭhine dṛṣṭimādadhe || 101 ||
[Analyze grammar]

tamuvācātha sāvitrī śvaḥ phalānīha neṣyasi |
yogakṣemārthametatte neṣyāmi paraśuṃ tvaham || 102 ||
[Analyze grammar]

kṛtvā kaṭhinabhāraṃ sā vṛkṣaśākhāvalambinam |
gṛhītvā paraśuṃ bhartuḥ sakāśaṃ punarāgamat || 103 ||
[Analyze grammar]

vāme skandhe tu vāmorūrbharturbāhuṃ niveśya sā |
dakṣiṇena pariṣvajya jagāma mṛdugāminī || 104 ||
[Analyze grammar]

satyavānuvāca |
abhyāsagamanādbhīru panthāno viditā mama |
vṛkṣāntarālokitayā jyotsnayā cāpi lakṣaye || 105 ||
[Analyze grammar]

āgatau svaḥ pathā yena phalānyavacitāni ca |
yathāgataṃ śubhe gaccha panthānaṃ mā vicāraya || 106 ||
[Analyze grammar]

palāśaṣaṇḍe caitasminpanthā vyāvartate dvidhā |
tasyottareṇa yaḥ panthāstena gaccha tvarasva ca |
svastho'smi balavānasmi didṛkṣuḥ pitarāvubhau || 107 ||
[Analyze grammar]

mārkaṇḍeya uvāca |
bruvannevaṃ tvarāyuktaḥ sa prāyādāśramaṃ prati || 108 ||
[Analyze grammar]