Chapter 187

deva uvāca |
kāmaṃ devāpi māṃ vipra na vijānanti tattvataḥ |
tvatprītyā tu pravakṣyāmi yathedaṃ visṛjāmyaham || 1 ||
[Analyze grammar]

pitṛbhakto'si viprarṣe māṃ caiva śaraṇaṃ gataḥ |
ato dṛṣṭo'smi te sākṣādbrahmacaryaṃ ca te mahat || 2 ||
[Analyze grammar]

āpo nārā iti proktāḥ saṃjñānāma kṛtaṃ mayā |
tena nārāyaṇo'smyukto mama taddhyayanaṃ sadā || 3 ||
[Analyze grammar]

ahaṃ nārāyaṇo nāma prabhavaḥ śāśvato'vyayaḥ |
vidhātā sarvabhūtānāṃ saṃhartā ca dvijottama || 4 ||
[Analyze grammar]

ahaṃ viṣṇurahaṃ brahmā śakraścāhaṃ surādhipaḥ |
ahaṃ vaiśravaṇo rājā yamaḥ pretādhipastathā || 5 ||
[Analyze grammar]

ahaṃ śivaśca somaśca kaśyapaśca prajāpatiḥ |
ahaṃ dhātā vidhātā ca yajñaścāhaṃ dvijottama || 6 ||
[Analyze grammar]

agnirāsyaṃ kṣitiḥ pādau candrādityau ca locane |
sadiśaṃ ca nabhaḥ kāyo vāyurmanasi me sthitaḥ || 7 ||
[Analyze grammar]

mayā kratuśatairiṣṭaṃ bahubhiḥ svāptadakṣiṇaiḥ |
yajante vedaviduṣo māṃ devayajane sthitam || 8 ||
[Analyze grammar]

pṛthivyāṃ kṣatriyendrāśca pārthivāḥ svargakāṅkṣiṇaḥ |
yajante māṃ tathā vaiśyāḥ svargalokajigīṣavaḥ || 9 ||
[Analyze grammar]

catuḥsamudraparyantāṃ merumandarabhūṣaṇām |
śeṣo bhūtvāhamevaitāṃ dhārayāmi vasuṃdharām || 10 ||
[Analyze grammar]

vārāhaṃ rūpamāsthāya mayeyaṃ jagatī purā |
majjamānā jale vipra vīryeṇāsītsamuddhṛtā || 11 ||
[Analyze grammar]

agniśca vaḍavāvaktro bhūtvāhaṃ dvijasattama |
pibāmyapaḥ samāviddhāstāścaiva visṛjāmyaham || 12 ||
[Analyze grammar]

brahma vaktraṃ bhujau kṣatramūrū me saṃśritā viśaḥ |
pādau śūdrā bhajante me vikrameṇa krameṇa ca || 13 ||
[Analyze grammar]

ṛgvedaḥ sāmavedaśca yajurvedo'pyatharvaṇaḥ |
mattaḥ prādurbhavantyete māmeva praviśanti ca || 14 ||
[Analyze grammar]

yatayaḥ śāntiparamā yatātmāno mumukṣavaḥ |
kāmakrodhadveṣamuktā niḥsaṅgā vītakalmaṣāḥ || 15 ||
[Analyze grammar]

sattvasthā nirahaṃkārā nityamadhyātmakovidāḥ |
māmeva satataṃ viprāścintayanta upāsate || 16 ||
[Analyze grammar]

ahaṃ saṃvartako jyotirahaṃ saṃvartako yamaḥ |
ahaṃ saṃvartakaḥ sūryo ahaṃ saṃvartako'nilaḥ || 17 ||
[Analyze grammar]

tārārūpāṇi dṛśyante yānyetāni nabhastale |
mama rūpāṇyathaitāni viddhi tvaṃ dvijasattama || 18 ||
[Analyze grammar]

ratnākarāḥ samudrāśca sarva eva caturdiśam |
vasanaṃ śayanaṃ caiva nilayaṃ caiva viddhi me || 19 ||
[Analyze grammar]

kāmaṃ krodhaṃ ca harṣaṃ ca bhayaṃ mohaṃ tathaiva ca |
mamaiva viddhi rūpāṇi sarvāṇyetāni sattama || 20 ||
[Analyze grammar]

prāpnuvanti narā vipra yatkṛtvā karmaśobhanam |
satyaṃ dānaṃ tapaścogramahiṃsā caiva jantuṣu || 21 ||
[Analyze grammar]

madvidhānena vihitā mama dehavihāriṇaḥ |
mayābhibhūtavijñānā viceṣṭante na kāmataḥ || 22 ||
[Analyze grammar]

samyagvedamadhīyānā yajanto vividhairmakhaiḥ |
śāntātmāno jitakrodhāḥ prāpnuvanti dvijātayaḥ || 23 ||
[Analyze grammar]

prāptuṃ na śakyo yo vidvannarairduṣkṛtakarmabhiḥ |
lobhābhibhūtaiḥ kṛpaṇairanāryairakṛtātmabhiḥ || 24 ||
[Analyze grammar]

taṃ māṃ mahāphalaṃ viddhi padaṃ sukṛtakarmaṇaḥ |
duṣprāpaṃ vipramūḍhānāṃ mārgaṃ yogairniṣevitam || 25 ||
[Analyze grammar]

yadā yadā ca dharmasya glānirbhavati sattama |
abhyutthānamadharmasya tadātmānaṃ sṛjāmyaham || 26 ||
[Analyze grammar]

daityā hiṃsānuraktāśca avadhyāḥ surasattamaiḥ |
rākṣasāścāpi loke'sminyadotpatsyanti dāruṇāḥ || 27 ||
[Analyze grammar]

tadāhaṃ saṃprasūyāmi gṛheṣu śubhakarmaṇām |
praviṣṭo mānuṣaṃ dehaṃ sarvaṃ praśamayāmyaham || 28 ||
[Analyze grammar]

sṛṣṭvā devamanuṣyāṃśca gandharvoragarākṣasān |
sthāvarāṇi ca bhūtāni saṃharāmyātmamāyayā || 29 ||
[Analyze grammar]

karmakāle punardehamanucintya sṛjāmyaham |
praviśya mānuṣaṃ dehaṃ maryādābandhakāraṇāt || 30 ||
[Analyze grammar]

śvetaḥ kṛtayuge varṇaḥ pītastretāyuge mama |
rakto dvāparamāsādya kṛṣṇaḥ kaliyuge tathā || 31 ||
[Analyze grammar]

trayo bhāgā hyadharmasya tasminkāle bhavantyuta |
antakāle ca saṃprāpte kālo bhūtvātidāruṇaḥ |
trailokyaṃ nāśayāmyekaḥ kṛtsnaṃ sthāvarajaṅgamam || 32 ||
[Analyze grammar]

ahaṃ trivartmā sarvātmā sarvalokasukhāvahaḥ |
abhibhūḥ sarvago'nanto hṛṣīkeśa urukramaḥ || 33 ||
[Analyze grammar]

kālacakraṃ nayāmyeko brahmannahamarūpi vai |
śamanaṃ sarvabhūtānāṃ sarvalokakṛtodyamam || 34 ||
[Analyze grammar]

evaṃ praṇihitaḥ samyaṅmayātmā munisattama |
sarvabhūteṣu viprendra na ca māṃ vetti kaścana || 35 ||
[Analyze grammar]

yacca kiṃcittvayā prāptaṃ mayi kleśātmakaṃ dvija |
sukhodayāya tatsarvaṃ śreyase ca tavānagha || 36 ||
[Analyze grammar]

yacca kiṃcittvayā loke dṛṣṭaṃ sthāvarajaṅgamam |
vihitaḥ sarvathaivāsau mamātmā munisattama || 37 ||
[Analyze grammar]

ardhaṃ mama śarīrasya sarvalokapitāmahaḥ |
ahaṃ nārāyaṇo nāma śaṅkhacakragadādharaḥ || 38 ||
[Analyze grammar]

yāvadyugānāṃ viprarṣe sahasraparivartanam |
tāvatsvapimi viśvātmā sarvalokapitāmahaḥ || 39 ||
[Analyze grammar]

evaṃ sarvamahaṃ kālamihāse munisattama |
aśiśuḥ śiśurūpeṇa yāvadbrahmā na budhyate || 40 ||
[Analyze grammar]

mayā ca vipra datto'yaṃ varaste brahmarūpiṇā |
asakṛtparituṣṭena viprarṣigaṇapūjita || 41 ||
[Analyze grammar]

sarvamekārṇavaṃ dṛṣṭvā naṣṭaṃ sthāvarajaṅgamam |
viklavo'si mayā jñātastataste darśitaṃ jagat || 42 ||
[Analyze grammar]

abhyantaraṃ śarīrasya praviṣṭo'si yadā mama |
dṛṣṭvā lokaṃ samastaṃ ca vismito nāvabudhyase || 43 ||
[Analyze grammar]

tato'si vaktrādviprarṣe drutaṃ niḥsārito mayā |
ākhyātaste mayā cātmā durjñeyo'pi surāsuraiḥ || 44 ||
[Analyze grammar]

yāvatsa bhagavānbrahmā na budhyati mahātapāḥ |
tāvattvamiha viprarṣe viśrabdhaścara vai sukham || 45 ||
[Analyze grammar]

tato vibuddhe tasmiṃstu sarvalokapitāmahe |
ekībhūto hi srakṣyāmi śarīrāddvijasattama || 46 ||
[Analyze grammar]

ākāśaṃ pṛthivīṃ jyotirvāyuṃ salilameva ca |
loke yacca bhaveccheṣamiha sthāvarajaṅgamam || 47 ||
[Analyze grammar]

mārkaṇḍeya uvāca |
ityuktvāntarhitastāta sa devaḥ paramādbhutaḥ |
prajāścemāḥ prapaśyāmi vicitrā bahudhākṛtāḥ || 48 ||
[Analyze grammar]

etaddṛṣṭaṃ mayā rājaṃstasminprāpte yugakṣaye |
āścaryaṃ bharataśreṣṭha sarvadharmabhṛtāṃ vara || 49 ||
[Analyze grammar]

yaḥ sa devo mayā dṛṣṭaḥ purā padmanibhekṣaṇaḥ |
sa eṣa puruṣavyāghra saṃbandhī te janārdanaḥ || 50 ||
[Analyze grammar]

asyaiva varadānāddhi smṛtirna prajahāti mām |
dīrghamāyuśca kaunteya svacchandamaraṇaṃ tathā || 51 ||
[Analyze grammar]

sa eṣa kṛṣṇo vārṣṇeyaḥ purāṇapuruṣo vibhuḥ |
āste hariracintyātmā krīḍanniva mahābhujaḥ || 52 ||
[Analyze grammar]

eṣa dhātā vidhātā ca saṃhartā caiva sātvataḥ |
śrīvatsavakṣā govindaḥ prajāpatipatiḥ prabhuḥ || 53 ||
[Analyze grammar]

dṛṣṭvemaṃ vṛṣṇiśārdūlaṃ smṛtirmāmiyamāgatā |
ādidevamajaṃ viṣṇuṃ puruṣaṃ pītavāsasam || 54 ||
[Analyze grammar]

sarveṣāmeva bhūtānāṃ pitā mātā ca mādhavaḥ |
gacchadhvamenaṃ śaraṇaṃ śaraṇyaṃ kauravarṣabhāḥ || 55 ||
[Analyze grammar]