Chapter 180

vaiśaṃpāyana uvāca |
kāmyakaṃ prāpya kaunteyā yudhiṣṭhirapurogamāḥ |
kṛtātithyā munigaṇairniṣeduḥ saha kṛṣṇayā || 1 ||
[Analyze grammar]

tatastānpariviśvastānvasataḥ pāṇḍunandanān |
brāhmaṇā bahavastatra samantātparyavārayan || 2 ||
[Analyze grammar]

athābravīddvijaḥ kaścidarjunasya priyaḥ sakhā |
eṣyatīha mahābāhurvaśī śaurirudāradhīḥ || 3 ||
[Analyze grammar]

viditā hi hareryūyamihāyātāḥ kurūdvahāḥ |
sadā hi darśanākāṅkṣī śreyo'nveṣī ca vo hariḥ || 4 ||
[Analyze grammar]

bahuvatsarajīvī ca mārkaṇḍeyo mahātapāḥ |
svādhyāyatapasā yuktaḥ kṣipraṃ yuṣmānsameṣyati || 5 ||
[Analyze grammar]

tathaiva tasya bruvataḥ pratyadṛśyata keśavaḥ |
sainyasugrīvayuktena rathena rathināṃ varaḥ || 6 ||
[Analyze grammar]

maghavāniva paulomyā sahitaḥ satyabhāmayā |
upāyāddevakīputro didṛkṣuḥ kurusattamān || 7 ||
[Analyze grammar]

avatīrya rathātkṛṣṇo dharmarājaṃ yathāvidhi |
vavande mudito dhīmānbhīmaṃ ca balināṃ varam || 8 ||
[Analyze grammar]

pūjayāmāsa dhaumyaṃ ca yamābhyāmabhivāditaḥ |
pariṣvajya guḍākeśaṃ draupadīṃ paryasāntvayat || 9 ||
[Analyze grammar]

sa dṛṣṭvā phalgunaṃ vīraṃ cirasya priyamāgatam |
paryaṣvajata dāśārhaḥ punaḥ punarariṃdamam || 10 ||
[Analyze grammar]

tathaiva satyabhāmāpi draupadīṃ pariṣasvaje |
pāṇḍavānāṃ priyāṃ bhāryāṃ kṛṣṇasya mahiṣī priyā || 11 ||
[Analyze grammar]

tataste pāṇḍavāḥ sarve sabhāryāḥ sapurohitāḥ |
ānarcuḥ puṇḍarīkākṣaṃ parivavruśca sarvaśaḥ || 12 ||
[Analyze grammar]

kṛṣṇastu pārthena sametya vidvāndhanaṃjayenāsuratarjanena |
babhau yathā bhūtapatirmahātmā sametya sākṣādbhagavānguhena || 13 ||
[Analyze grammar]

tataḥ samastāni kirīṭamālī vaneṣu vṛttāni gadāgrajāya |
uktvā yathāvatpunaranvapṛcchatkathaṃ subhadrā ca tathābhimanyuḥ || 14 ||
[Analyze grammar]

sa pūjayitvā madhuhā yathāvatpārthāṃśca kṛṣṇāṃ ca purohitaṃ ca |
uvāca rājānamabhipraśaṃsanyudhiṣṭhiraṃ tatra sahopaviśya || 15 ||
[Analyze grammar]

dharmaḥ paraḥ pāṇḍava rājyalābhāttasyārthamāhustapa eva rājan |
satyārjavābhyāṃ caratā svadharmaṃ jitastavāyaṃ ca paraśca lokaḥ || 16 ||
[Analyze grammar]

adhītamagre caratā vratāni samyagdhanurvedamavāpya kṛtsnam |
kṣātreṇa dharmeṇa vasūni labdhvā sarve hyavāptāḥ kratavaḥ purāṇāḥ || 17 ||
[Analyze grammar]

na grāmyadharmeṣu ratistavāsti kāmānna kiṃcitkuruṣe narendra |
na cārthalobhātprajahāsi dharmaṃ tasmātsvabhāvādasi dharmarājaḥ || 18 ||
[Analyze grammar]

dānaṃ ca satyaṃ ca tapaśca rājañśraddhā ca śāntiśca dhṛtiḥ kṣamā ca |
avāpya rāṣṭrāṇi vasūni bhogāneṣā parā pārtha sadā ratiste || 19 ||
[Analyze grammar]

yadā janaughaḥ kurujāṅgalānāṃ kṛṣṇāṃ sabhāyāmavaśāmapaśyat |
apetadharmavyavahāravṛttaṃ saheta tatpāṇḍava kastvadanyaḥ || 20 ||
[Analyze grammar]

asaṃśayaṃ sarvasamṛddhakāmaḥ kṣipraṃ prajāḥ pālayitāsi samyak |
ime vayaṃ nigrahaṇe kurūṇāṃ yadi pratijñā bhavataḥ samāptā || 21 ||
[Analyze grammar]

dhaumyaṃ ca kṛṣṇāṃ ca yudhiṣṭhiraṃ ca yamau ca bhīmaṃ ca daśārhasiṃhaḥ |
uvāca diṣṭyā bhavatāṃ śivena prāptaḥ kirīṭī muditaḥ kṛtāstraḥ || 22 ||
[Analyze grammar]

provāca kṛṣṇāmapi yājñasenīṃ daśārhabhartā sahitaḥ suhṛdbhiḥ |
kṛṣṇe dhanurvedaratipradhānāḥ satyavratāste śiśavaḥ suśīlāḥ |
sadbhiḥ sadaivācaritaṃ samādhiṃ caranti putrāstava yājñaseni || 23 ||
[Analyze grammar]

rājyena rāṣṭraiśca nimantryamāṇāḥ pitrā ca kṛṣṇe tava sodaraiśca |
na yajñasenasya na mātulānāṃ gṛheṣu bālā ratimāpnuvanti || 24 ||
[Analyze grammar]

ānartamevābhimukhāḥ śivena gatvā dhanurvedaratipradhānāḥ |
tavātmajā vṛṣṇipuraṃ praviśya na daivatebhyaḥ spṛhayanti kṛṣṇe || 25 ||
[Analyze grammar]

yathā tvamevārhasi teṣu vṛttiṃ prayoktumāryā ca yathaiva kuntī |
teṣvapramādena sadā karoti tathā ca bhūyaśca tathā subhadrā || 26 ||
[Analyze grammar]

yathāniruddhasya yathābhimanyoryathā sunīthasya yathaiva bhānoḥ |
tathā vinetā ca gatiśca kṛṣṇe tavātmajānāmapi raukmiṇeyaḥ || 27 ||
[Analyze grammar]

gadāsicarmagrahaṇeṣu śūrānastreṣu śikṣāsu rathāśvayāne |
samyagvinetā vinayatyatandrīstāṃścābhimanyuḥ satataṃ kumāraḥ || 28 ||
[Analyze grammar]

sa cāpi samyakpraṇidhāya śikṣāmastrāṇi caiṣāṃ guruvatpradāya |
tavātmajānāṃ ca tathābhimanyoḥ parākramaistuṣyati raukmiṇeyaḥ || 29 ||
[Analyze grammar]

yadā vihāraṃ prasamīkṣamāṇāḥ prayānti putrāstava yājñaseni |
ekaikameṣāmanuyānti tatra rathāśca yānāni ca dantinaśca || 30 ||
[Analyze grammar]

athābravīddharmarājaṃ tu kṛṣṇo daśārhayodhāḥ kukurāndhakāśca |
ete nideśaṃ tava pālayanti tiṣṭhanti yatrecchasi tatra rājan || 31 ||
[Analyze grammar]

āvartatāṃ kārmukavegavātā halāyudhapragrahaṇā madhūnām |
senā tavārtheṣu narendra yattā sasādipattyaśvarathā sanāgā || 32 ||
[Analyze grammar]

prasthāpyatāṃ pāṇḍava dhārtarāṣṭraḥ suyodhanaḥ pāpakṛtāṃ variṣṭhaḥ |
sa sānubandhaḥ sasuhṛdgaṇaśca saubhasya saubhādhipateśca mārgam || 33 ||
[Analyze grammar]

kāmaṃ tathā tiṣṭha narendra tasminyathā kṛtaste samayaḥ sabhāyām |
dāśārhayodhaistu sasādiyodhaṃ pratīkṣatāṃ nāgapuraṃ bhavantam || 34 ||
[Analyze grammar]

vyapetamanyurvyapanītapāpmā vihṛtya yatrecchasi tatra kāmam |
tataḥ samṛddhaṃ prathamaṃ viśokaḥ prapatsyase nāgapuraṃ sarāṣṭram || 35 ||
[Analyze grammar]

tatastadājñāya mataṃ mahātmā yathāvaduktaṃ puruṣottamena |
praśasya viprekṣya ca dharmarājaḥ kṛtāñjaliḥ keśavamityuvāca || 36 ||
[Analyze grammar]

asaṃśayaṃ keśava pāṇḍavānāṃ bhavāngatistvaccharaṇā hi pārthāḥ |
kālodaye tacca tataśca bhūyaḥ kartā bhavānkarma na saṃśayo'sti || 37 ||
[Analyze grammar]

yathāpratijñaṃ vihṛtaśca kālaḥ sarvāḥ samā dvādaśa nirjaneṣu |
ajñātacaryāṃ vidhivatsamāpya bhavadgatāḥ keśava pāṇḍaveyāḥ || 38 ||
[Analyze grammar]

vaiśaṃpāyana uvāca |
tathā vadati vārṣṇeye dharmarāje ca bhārata |
atha paścāttapovṛddho bahuvarṣasahasradhṛk |
pratyadṛśyata dharmātmā mārkaṇḍeyo mahātapāḥ || 39 ||
[Analyze grammar]

tamāgatamṛṣiṃ vṛddhaṃ bahuvarṣasahasriṇam |
ānarcurbrāhmaṇāḥ sarve kṛṣṇaśca saha pāṇḍavaiḥ || 40 ||
[Analyze grammar]

tamarcitaṃ suviśvastamāsīnamṛṣisattamam |
brāhmaṇānāṃ matenāha pāṇḍavānāṃ ca keśavaḥ || 41 ||
[Analyze grammar]

śuśrūṣavaḥ pāṇḍavāste brāhmaṇāśca samāgatāḥ |
draupadī satyabhāmā ca tathāhaṃ paramaṃ vacaḥ || 42 ||
[Analyze grammar]

purāvṛttāḥ kathāḥ puṇyāḥ sadācārāḥ sanātanāḥ |
rājñāṃ strīṇāmṛṣīṇāṃ ca mārkaṇḍeya vicakṣva naḥ || 43 ||
[Analyze grammar]

teṣu tatropaviṣṭeṣu devarṣirapi nāradaḥ |
ājagāma viśuddhātmā pāṇḍavānavalokakaḥ || 44 ||
[Analyze grammar]

tamapyatha mahātmānaṃ sarve tu puruṣarṣabhāḥ |
pādyārghyābhyāṃ yathānyāyamupatasthurmanīṣiṇam || 45 ||
[Analyze grammar]

nāradastvatha devarṣirjñātvā tāṃstu kṛtakṣaṇān |
mārkaṇḍeyasya vadatastāṃ kathāmanvamodata || 46 ||
[Analyze grammar]

uvāca cainaṃ kālajñaḥ smayanniva sa nāradaḥ |
brahmarṣe kathyatāṃ yatte pāṇḍaveṣu vivakṣitam || 47 ||
[Analyze grammar]

evamuktaḥ pratyuvāca mārkaṇḍeyo mahātapāḥ |
kṣaṇaṃ kurudhvaṃ vipulamākhyātavyaṃ bhaviṣyati || 48 ||
[Analyze grammar]

evamuktāḥ kṣaṇaṃ cakruḥ pāṇḍavāḥ saha tairdvijaiḥ |
madhyaṃdine yathādityaṃ prekṣantastaṃ mahāmunim || 49 ||
[Analyze grammar]