Chapter 181

vaiśaṃpāyana uvāca |
taṃ vivakṣantamālakṣya kururājo mahāmunim |
kathāsaṃjananārthāya codayāmāsa pāṇḍavaḥ || 1 ||
[Analyze grammar]

bhavāndaivatadaityānāmṛṣīṇāṃ ca mahātmanām |
rājarṣīṇāṃ ca sarveṣāṃ caritajñaḥ sanātanaḥ || 2 ||
[Analyze grammar]

sevyaścopāsitavyaśca mato naḥ kāṅkṣitaściram |
ayaṃ ca devakīputraḥ prāpto'smānavalokakaḥ || 3 ||
[Analyze grammar]

bhavatyeva hi me buddhirdṛṣṭvātmānaṃ sukhāccyutam |
dhārtarāṣṭrāṃśca durvṛttānṛdhyataḥ prekṣya sarvaśaḥ || 4 ||
[Analyze grammar]

karmaṇaḥ puruṣaḥ kartā śubhasyāpyaśubhasya ca |
svaphalaṃ tadupāśnāti kathaṃ kartā svidīśvaraḥ || 5 ||
[Analyze grammar]

atha vā sukhaduḥkheṣu nṛṇāṃ brahmavidāṃ vara |
iha vā kṛtamanveti paradehe'tha vā punaḥ || 6 ||
[Analyze grammar]

dehī ca dehaṃ saṃtyajya mṛgyamāṇaḥ śubhāśubhaiḥ |
kathaṃ saṃyujyate pretya iha vā dvijasattama || 7 ||
[Analyze grammar]

aihalaukikamevaitadutāho pāralaukikam |
kva ca karmāṇi tiṣṭhanti jantoḥ pretasya bhārgava || 8 ||
[Analyze grammar]

mārkaṇḍeya uvāca |
tvadyukto'yamanupraśno yathāvadvadatāṃ vara |
viditaṃ veditavyaṃ te sthityarthamanupṛcchasi || 9 ||
[Analyze grammar]

atra te vartayiṣyāmi tadihaikamanāḥ śṛṇu |
yathehāmutra ca naraḥ sukhaduḥkhamupāśnute || 10 ||
[Analyze grammar]

nirmalāni śarīrāṇi viśuddhāni śarīriṇām |
sasarja dharmatantrāṇi pūrvotpannaḥ prajāpatiḥ || 11 ||
[Analyze grammar]

amoghabalasaṃkalpāḥ suvratāḥ satyavādinaḥ |
brahmabhūtā narāḥ puṇyāḥ purāṇāḥ kurunandana || 12 ||
[Analyze grammar]

sarve devaiḥ samāyānti svacchandena nabhastalam |
tataśca punarāyānti sarve svacchandacāriṇaḥ || 13 ||
[Analyze grammar]

svacchandamaraṇāścāsannarāḥ svacchandajīvinaḥ |
alpabādhā nirātaṅkā siddhārthā nirupadravāḥ || 14 ||
[Analyze grammar]

draṣṭāro devasaṃghānāmṛṣīṇāṃ ca mahātmanām |
pratyakṣāḥ sarvadharmāṇāṃ dāntā vigatamatsarāḥ || 15 ||
[Analyze grammar]

āsanvarṣasahasrāṇi tathā putrasahasriṇaḥ |
tataḥ kālāntare'nyasminpṛthivītalacāriṇaḥ || 16 ||
[Analyze grammar]

kāmakrodhābhibhūtāste māyāvyājopajīvinaḥ |
lobhamohābhibhūtāśca tyaktā devaistato narāḥ || 17 ||
[Analyze grammar]

aśubhaiḥ karmabhiḥ pāpāstiryaṅnarakagāminaḥ |
saṃsāreṣu vicitreṣu pacyamānāḥ punaḥ punaḥ || 18 ||
[Analyze grammar]

mogheṣṭā moghasaṃkalpā moghajñānā vicetasaḥ |
sarvātiśaṅkinaścaiva saṃvṛttāḥ kleśabhāginaḥ |
aśubhaiḥ karmabhiścāpi prāyaśaḥ paricihnitāḥ || 19 ||
[Analyze grammar]

dauṣkulyā vyādhibahulā durātmāno'pratāpinaḥ |
bhavantyalpāyuṣaḥ pāpā raudrakarmaphalodayāḥ |
nāthantaḥ sarvakāmānāṃ nāstikā bhinnasetavaḥ || 20 ||
[Analyze grammar]

jantoḥ pretasya kaunteya gatiḥ svairiha karmabhiḥ |
prājñasya hīnabuddheśca karmakośaḥ kva tiṣṭhati || 21 ||
[Analyze grammar]

kvasthastatsamupāśnāti sukṛtaṃ yadi vetarat |
iti te darśanaṃ yacca tatrāpyanunayaṃ śṛṇu || 22 ||
[Analyze grammar]

ayamādiśarīreṇa devasṛṣṭena mānavaḥ |
śubhānāmaśubhānāṃ ca kurute saṃcayaṃ mahat || 23 ||
[Analyze grammar]

āyuṣo'nte prahāyedaṃ kṣīṇaprāyaṃ kalevaram |
saṃbhavatyeva yugapadyonau nāstyantarābhavaḥ || 24 ||
[Analyze grammar]

tatrāsya svakṛtaṃ karma chāyevānugataṃ sadā |
phalatyatha sukhārho vā duḥkhārho vāpi jāyate || 25 ||
[Analyze grammar]

kṛtāntavidhisaṃyuktaḥ sa janturlakṣaṇaiḥ śubhaiḥ |
aśubhairvā nirādāno lakṣyate jñānadṛṣṭibhiḥ || 26 ||
[Analyze grammar]

eṣā tāvadabuddhīnāṃ gatiruktā yudhiṣṭhira |
ataḥ paraṃ jñānavatāṃ nibodha gatimuttamām || 27 ||
[Analyze grammar]

manuṣyāstaptatapasaḥ sarvāgamaparāyaṇāḥ |
sthiravratāḥ satyaparā guruśuśrūṣaṇe ratāḥ || 28 ||
[Analyze grammar]

suśīlāḥ śuklajātīyāḥ kṣāntā dāntāḥ sutejasaḥ |
śubhayonyantaragatāḥ prāyaśaḥ śubhalakṣaṇāḥ || 29 ||
[Analyze grammar]

jitendriyatvādvaśinaḥ śuklatvānmandarogiṇaḥ |
alpabādhaparitrāsādbhavanti nirupadravāḥ || 30 ||
[Analyze grammar]

cyavantaṃ jāyamānaṃ ca garbhasthaṃ caiva sarvaśaḥ |
svamātmānaṃ paraṃ caiva budhyante jñānacakṣuṣaḥ |
karmabhūmimimāṃ prāpya punaryānti surālayam || 31 ||
[Analyze grammar]

kiṃciddaivāddhaṭhātkiṃcitkiṃcideva svakarmabhiḥ |
prāpnuvanti narā rājanmā te'stvanyā vicāraṇā || 32 ||
[Analyze grammar]

imāmatropamāṃ cāpi nibodha vadatāṃ vara |
manuṣyaloke yacchreyaḥ paraṃ manye yudhiṣṭhira || 33 ||
[Analyze grammar]

iha vaikasya nāmutra amutraikasya no iha |
iha cāmutra caikasya nāmutraikasya no iha || 34 ||
[Analyze grammar]

dhanāni yeṣāṃ vipulāni santi nityaṃ ramante suvibhūṣitāṅgāḥ |
teṣāmayaṃ śatruvaraghna loko nāsau sadā dehasukhe ratānām || 35 ||
[Analyze grammar]

ye yogayuktāstapasi prasaktāḥ svādhyāyaśīlā jarayanti dehān |
jitendriyā bhūtahite niviṣṭāsteṣāmasau nāyamarighna lokaḥ || 36 ||
[Analyze grammar]

ye dharmameva prathamaṃ caranti dharmeṇa labdhvā ca dhanāni kāle |
dārānavāpya kratubhiryajante teṣāmayaṃ caiva paraśca lokaḥ || 37 ||
[Analyze grammar]

ye naiva vidyāṃ na tapo na dānaṃ na cāpi mūḍhāḥ prajane yatante |
na cādhigacchanti sukhānyabhāgyāsteṣāmayaṃ caiva paraśca nāsti || 38 ||
[Analyze grammar]

sarve bhavantastvativīryasattvā divyaujasaḥ saṃhananopapannāḥ |
lokādamuṣmādavaniṃ prapannāḥ svadhītavidyāḥ surakāryahetoḥ || 39 ||
[Analyze grammar]

kṛtvaiva karmāṇi mahānti śūrāstapodamācāravihāraśīlāḥ |
devānṛṣīnpretagaṇāṃśca sarvānsaṃtarpayitvā vidhinā pareṇa || 40 ||
[Analyze grammar]

svargaṃ paraṃ puṇyakṛtāṃ nivāsaṃ krameṇa saṃprāpsyatha karmabhiḥ svaiḥ |
mā bhūdviśaṅkā tava kauravendra dṛṣṭvātmanaḥ kleśamimaṃ sukhārha || 41 ||
[Analyze grammar]