Chapter 114

vaiśaṃpāyana uvāca |
saṃvatsarāhite garbhe gāndhāryā janamejaya |
āhvayāmāsa vai kuntī garbhārthaṃ dharmamacyutam || 1 ||
[Analyze grammar]

sā baliṃ tvaritā devī dharmāyopajahāra ha |
jajāpa japyaṃ vidhivaddattaṃ durvāsasā purā || 2 ||
[Analyze grammar]

saṃgamya sā tu dharmeṇa yogamūrtidhareṇa vai |
lebhe putraṃ varārohā sarvaprāṇabhṛtāṃ varam || 3 ||
[Analyze grammar]

aindre candrasamāyukte muhūrte'bhijite'ṣṭame |
divā madhyagate sūrye tithau puṇye'bhipūjite || 4 ||
[Analyze grammar]

samṛddhayaśasaṃ kuntī suṣāva samaye sutam |
jātamātre sute tasminvāguvācāśarīriṇī || 5 ||
[Analyze grammar]

eṣa dharmabhṛtāṃ śreṣṭho bhaviṣyati na saṃśayaḥ |
yudhiṣṭhira iti khyātaḥ pāṇḍoḥ prathamajaḥ sutaḥ || 6 ||
[Analyze grammar]

bhavitā prathito rājā triṣu lokeṣu viśrutaḥ |
yaśasā tejasā caiva vṛttena ca samanvitaḥ || 7 ||
[Analyze grammar]

dhārmikaṃ taṃ sutaṃ labdhvā pāṇḍustāṃ punarabravīt |
prāhuḥ kṣatraṃ balajyeṣṭhaṃ balajyeṣṭhaṃ sutaṃ vṛṇu || 8 ||
[Analyze grammar]

tatastathoktā patyā tu vāyumevājuhāva sā |
tasmājjajñe mahābāhurbhīmo bhīmaparākramaḥ || 9 ||
[Analyze grammar]

tamapyatibalaṃ jātaṃ vāgabhyavadadacyutam |
sarveṣāṃ balināṃ śreṣṭho jāto'yamiti bhārata || 10 ||
[Analyze grammar]

idamatyadbhutaṃ cāsījjātamātre vṛkodare |
yadaṅkātpatito mātuḥ śilāṃ gātrairacūrṇayat || 11 ||
[Analyze grammar]

kuntī vyāghrabhayodvignā sahasotpatitā kila |
nānvabudhyata saṃsuptamutsaṅge sve vṛkodaram || 12 ||
[Analyze grammar]

tataḥ sa vajrasaṃghātaḥ kumāro'bhyapatadgirau |
patatā tena śatadhā śilā gātrairvicūrṇitā |
tāṃ śilāṃ cūrṇitāṃ dṛṣṭvā pāṇḍurvismayamāgamat || 13 ||
[Analyze grammar]

yasminnahani bhīmastu jajñe bharatasattama |
duryodhano'pi tatraiva prajajñe vasudhādhipa || 14 ||
[Analyze grammar]

jāte vṛkodare pāṇḍuridaṃ bhūyo'nvacintayat |
kathaṃ nu me varaḥ putro lokaśreṣṭho bhavediti || 15 ||
[Analyze grammar]

daive puruṣakāre ca loko'yaṃ hi pratiṣṭhitaḥ |
tatra daivaṃ tu vidhinā kālayuktena labhyate || 16 ||
[Analyze grammar]

indro hi rājā devānāṃ pradhāna iti naḥ śrutam |
aprameyabalotsāho vīryavānamitadyutiḥ || 17 ||
[Analyze grammar]

taṃ toṣayitvā tapasā putraṃ lapsye mahābalam |
yaṃ dāsyati sa me putraṃ sa varīyānbhaviṣyati |
karmaṇā manasā vācā tasmāttapsye mahattapaḥ || 18 ||
[Analyze grammar]

tataḥ pāṇḍurmahātejā mantrayitvā maharṣibhiḥ |
dideśa kuntyāḥ kauravyo vrataṃ sāṃvatsaraṃ śubham || 19 ||
[Analyze grammar]

ātmanā ca mahābāhurekapādasthito'bhavat |
ugraṃ sa tapa ātasthe parameṇa samādhinā || 20 ||
[Analyze grammar]

ārirādhayiṣurdevaṃ tridaśānāṃ tamīśvaram |
sūryeṇa saha dharmātmā paryavartata bhārata || 21 ||
[Analyze grammar]

taṃ tu kālena mahatā vāsavaḥ pratyabhāṣata |
putraṃ tava pradāsyāmi triṣu lokeṣu viśrutam || 22 ||
[Analyze grammar]

devānāṃ brāhmaṇānāṃ ca suhṛdāṃ cārthasādhakam |
sutaṃ te'gryaṃ pradāsyāmi sarvāmitravināśanam || 23 ||
[Analyze grammar]

ityuktaḥ kauravo rājā vāsavena mahātmanā |
uvāca kuntīṃ dharmātmā devarājavacaḥ smaran || 24 ||
[Analyze grammar]

nītimantaṃ mahātmānamādityasamatejasam |
durādharṣaṃ kriyāvantamatīvādbhutadarśanam || 25 ||
[Analyze grammar]

putraṃ janaya suśroṇi dhāma kṣatriyatejasām |
labdhaḥ prasādo devendrāttamāhvaya śucismite || 26 ||
[Analyze grammar]

evamuktā tataḥ śakramājuhāva yaśasvinī |
athājagāma devendro janayāmāsa cārjunam || 27 ||
[Analyze grammar]

jātamātre kumāre tu vāguvācāśarīriṇī |
mahāgambhīranirghoṣā nabho nādayatī tadā || 28 ||
[Analyze grammar]

kārtavīryasamaḥ kunti śibitulyaparākramaḥ |
eṣa śakra ivājeyo yaśaste prathayiṣyati || 29 ||
[Analyze grammar]

adityā viṣṇunā prītiryathābhūdabhivardhitā |
tathā viṣṇusamaḥ prītiṃ vardhayiṣyati te'rjunaḥ || 30 ||
[Analyze grammar]

eṣa madrānvaśe kṛtvā kurūṃśca saha kekayaiḥ |
cedikāśikarūṣāṃśca kurulakṣma sudhāsyati || 31 ||
[Analyze grammar]

etasya bhujavīryeṇa khāṇḍave havyavāhanaḥ |
medasā sarvabhūtānāṃ tṛptiṃ yāsyati vai parām || 32 ||
[Analyze grammar]

grāmaṇīśca mahīpālāneṣa jitvā mahābalaḥ |
bhrātṛbhiḥ sahito vīrastrīnmedhānāhariṣyati || 33 ||
[Analyze grammar]

jāmadagnyasamaḥ kunti viṣṇutulyaparākramaḥ |
eṣa vīryavatāṃ śreṣṭho bhaviṣyatyaparājitaḥ || 34 ||
[Analyze grammar]

tathā divyāni cāstrāṇi nikhilānyāhariṣyati |
vipranaṣṭāṃ śriyaṃ cāyamāhartā puruṣarṣabhaḥ || 35 ||
[Analyze grammar]

etāmatyadbhutāṃ vācaṃ kuntīputrasya sūtake |
uktavānvāyurākāśe kuntī śuśrāva cāsya tām || 36 ||
[Analyze grammar]

vācamuccāritāmuccaistāṃ niśamya tapasvinām |
babhūva paramo harṣaḥ śataśṛṅganivāsinām || 37 ||
[Analyze grammar]

tathā devaṛṣīṇāṃ ca sendrāṇāṃ ca divaukasām |
ākāśe dundubhīnāṃ ca babhūva tumulaḥ svanaḥ || 38 ||
[Analyze grammar]

udatiṣṭhanmahāghoṣaḥ puṣpavṛṣṭibhirāvṛtaḥ |
samavetya ca devānāṃ gaṇāḥ pārthamapūjayan || 39 ||
[Analyze grammar]

kādraveyā vainateyā gandharvāpsarasastathā |
prajānāṃ patayaḥ sarve sapta caiva maharṣayaḥ || 40 ||
[Analyze grammar]

bharadvājaḥ kaśyapo gautamaśca viśvāmitro jamadagnirvasiṣṭhaḥ |
yaścodito bhāskare'bhūtpranaṣṭe so'pyatrātrirbhagavānājagāma || 41 ||
[Analyze grammar]

marīciraṅgirāścaiva pulastyaḥ pulahaḥ kratuḥ |
dakṣaḥ prajāpatiścaiva gandharvāpsarasastathā || 42 ||
[Analyze grammar]

divyamālyāmbaradharāḥ sarvālaṃkārabhūṣitāḥ |
upagāyanti bībhatsumupanṛtyanti cāpsarāḥ |
gandharvaiḥ sahitaḥ śrīmānprāgāyata ca tumburuḥ || 43 ||
[Analyze grammar]

bhīmasenograsenau ca ūrṇāyuranaghastathā |
gopatirdhṛtarāṣṭraśca sūryavarcāśca saptamaḥ || 44 ||
[Analyze grammar]

yugapastṛṇapaḥ kārṣṇirnandiścitrarathastathā |
trayodaśaḥ śāliśirāḥ parjanyaśca caturdaśaḥ || 45 ||
[Analyze grammar]

kaliḥ pañcadaśaścātra nāradaścaiva ṣoḍaśaḥ |
sadvā bṛhadvā bṛhakaḥ karālaśca mahāyaśāḥ || 46 ||
[Analyze grammar]

brahmacārī bahuguṇaḥ suparṇaśceti viśrutaḥ |
viśvāvasurbhumanyuśca sucandro daśamastathā || 47 ||
[Analyze grammar]

gītamādhuryasaṃpannau vikhyātau ca hahāhuhū |
ityete devagandharvā jagustatra nararṣabham || 48 ||
[Analyze grammar]

tathaivāpsaraso hṛṣṭāḥ sarvālaṃkārabhūṣitāḥ |
nanṛturvai mahābhāgā jaguścāyatalocanāḥ || 49 ||
[Analyze grammar]

anūnā cānavadyā ca priyamukhyā guṇāvarā |
adrikā ca tathā sācī miśrakeśī alambusā || 50 ||
[Analyze grammar]

marīciḥ śicukā caiva vidyutparṇā tilottamā |
agnikā lakṣaṇā kṣemā devī rambhā manoramā || 51 ||
[Analyze grammar]

asitā ca subāhuśca supriyā suvapustathā |
puṇḍarīkā sugandhā ca surathā ca pramāthinī || 52 ||
[Analyze grammar]

kāmyā śāradvatī caiva nanṛtustatra saṃghaśaḥ |
menakā sahajanyā ca parṇikā puñjikasthalā || 53 ||
[Analyze grammar]

kratusthalā ghṛtācī ca viśvācī pūrvacittyapi |
umlocetyabhivikhyātā pramloceti ca tā daśa |
urvaśyekādaśītyetā jagurāyatalocanāḥ || 54 ||
[Analyze grammar]

dhātāryamā ca mitraśca varuṇoṃ'śo bhagastathā |
indro vivasvānpūṣā ca tvaṣṭā ca savitā tathā || 55 ||
[Analyze grammar]

parjanyaścaiva viṣṇuśca ādityāḥ pāvakārciṣaḥ |
mahimānaṃ pāṇḍavasya vardhayanto'mbare sthitāḥ || 56 ||
[Analyze grammar]

mṛgavyādhaśca śarvaśca nirṛtiśca mahāyaśāḥ |
ajaikapādahirbudhnyaḥ pinākī ca paraṃtapaḥ || 57 ||
[Analyze grammar]

dahano'theśvaraścaiva kapālī ca viśāṃ pate |
sthāṇurbhavaśca bhagavānrudrāstatrāvatasthire || 58 ||
[Analyze grammar]

aśvinau vasavaścāṣṭau marutaśca mahābalāḥ |
viśvedevāstathā sādhyāstatrāsanparisaṃsthitāḥ || 59 ||
[Analyze grammar]

karkoṭako'tha śeṣaśca vāsukiśca bhujaṃgamaḥ |
kacchapaścāpakuṇḍaśca takṣakaśca mahoragaḥ || 60 ||
[Analyze grammar]

āyayustejasā yuktā mahākrodhā mahābalāḥ |
ete cānye ca bahavastatra nāgā vyavasthitāḥ || 61 ||
[Analyze grammar]

tārkṣyaścāriṣṭanemiśca garuḍaścāsitadhvajaḥ |
aruṇaścāruṇiścaiva vainateyā vyavasthitāḥ || 62 ||
[Analyze grammar]

taddṛṣṭvā mahadāścaryaṃ vismitā munisattamāḥ |
adhikāṃ sma tato vṛttimavartanpāṇḍavānprati || 63 ||
[Analyze grammar]

pāṇḍustu punarevaināṃ putralobhānmahāyaśāḥ |
prāhiṇoddarśanīyāṅgīṃ kuntī tvenamathābravīt || 64 ||
[Analyze grammar]

nātaścaturthaṃ prasavamāpatsvapi vadantyuta |
ataḥ paraṃ cāriṇī syātpañcame bandhakī bhavet || 65 ||
[Analyze grammar]

sa tvaṃ vidvandharmamimaṃ buddhigamyaṃ kathaṃ nu mām |
apatyārthaṃ samutkramya pramādādiva bhāṣase || 66 ||
[Analyze grammar]