Chapter 113

vaiśaṃpāyana uvāca |
evamuktastayā rājā tāṃ devīṃ punarabravīt |
dharmaviddharmasaṃyuktamidaṃ vacanamuttamam || 1 ||
[Analyze grammar]

evametatpurā kunti vyuṣitāśvaścakāra ha |
yathā tvayoktaṃ kalyāṇi sa hyāsīdamaropamaḥ || 2 ||
[Analyze grammar]

atha tvimaṃ pravakṣyāmi dharmaṃ tvetaṃ nibodha me |
purāṇamṛṣibhirdṛṣṭaṃ dharmavidbhirmahātmabhiḥ || 3 ||
[Analyze grammar]

anāvṛtāḥ kila purā striya āsanvarānane |
kāmacāravihāriṇyaḥ svatantrāścārulocane || 4 ||
[Analyze grammar]

tāsāṃ vyuccaramāṇānāṃ kaumārātsubhage patīn |
nādharmo'bhūdvarārohe sa hi dharmaḥ purābhavat || 5 ||
[Analyze grammar]

taṃ caiva dharmaṃ paurāṇaṃ tiryagyonigatāḥ prajāḥ |
adyāpyanuvidhīyante kāmadveṣavivarjitāḥ |
purāṇadṛṣṭo dharmo'yaṃ pūjyate ca maharṣibhiḥ || 6 ||
[Analyze grammar]

uttareṣu ca rambhoru kuruṣvadyāpi vartate |
strīṇāmanugrahakaraḥ sa hi dharmaḥ sanātanaḥ || 7 ||
[Analyze grammar]

asmiṃstu loke nacirānmaryādeyaṃ śucismite |
sthāpitā yena yasmācca tanme vistarataḥ śṛṇu || 8 ||
[Analyze grammar]

babhūvoddālako nāma maharṣiriti naḥ śrutam |
śvetaketuriti khyātaḥ putrastasyābhavanmuniḥ || 9 ||
[Analyze grammar]

maryādeyaṃ kṛtā tena mānuṣeṣviti naḥ śrutam |
kopātkamalapatrākṣi yadarthaṃ tannibodha me || 10 ||
[Analyze grammar]

śvetaketoḥ kila purā samakṣaṃ mātaraṃ pituḥ |
jagrāha brāhmaṇaḥ pāṇau gacchāva iti cābravīt || 11 ||
[Analyze grammar]

ṛṣiputrastataḥ kopaṃ cakārāmarṣitastadā |
mātaraṃ tāṃ tathā dṛṣṭvā nīyamānāṃ balādiva || 12 ||
[Analyze grammar]

kruddhaṃ taṃ tu pitā dṛṣṭvā śvetaketumuvāca ha |
mā tāta kopaṃ kārṣīstvameṣa dharmaḥ sanātanaḥ || 13 ||
[Analyze grammar]

anāvṛtā hi sarveṣāṃ varṇānāmaṅganā bhuvi |
yathā gāvaḥ sthitāstāta sve sve varṇe tathā prajāḥ || 14 ||
[Analyze grammar]

ṛṣiputro'tha taṃ dharmaṃ śvetaketurna cakṣame |
cakāra caiva maryādāmimāṃ strīpuṃsayorbhuvi || 15 ||
[Analyze grammar]

mānuṣeṣu mahābhāge na tvevānyeṣu jantuṣu |
tadā prabhṛti maryādā sthiteyamiti naḥ śrutam || 16 ||
[Analyze grammar]

vyuccarantyāḥ patiṃ nāryā adya prabhṛti pātakam |
bhrūṇahatyākṛtaṃ pāpaṃ bhaviṣyatyasukhāvaham || 17 ||
[Analyze grammar]

bhāryāṃ tathā vyuccarataḥ kaumārīṃ brahmacāriṇīm |
pativratāmetadeva bhavitā pātakaṃ bhuvi || 18 ||
[Analyze grammar]

patyā niyuktā yā caiva patnyapatyārthameva ca |
na kariṣyati tasyāśca bhaviṣyatyetadeva hi || 19 ||
[Analyze grammar]

iti tena purā bhīru maryādā sthāpitā balāt |
uddālakasya putreṇa dharmyā vai śvetaketunā || 20 ||
[Analyze grammar]

saudāsena ca rambhoru niyuktāpatyajanmani |
madayantī jagāmarṣiṃ vasiṣṭhamiti naḥ śrutam || 21 ||
[Analyze grammar]

tasmāllebhe ca sā putramaśmakaṃ nāma bhāminī |
bhāryā kalmāṣapādasya bhartuḥ priyacikīrṣayā || 22 ||
[Analyze grammar]

asmākamapi te janma viditaṃ kamalekṣaṇe |
kṛṣṇadvaipāyanādbhīru kurūṇāṃ vaṃśavṛddhaye || 23 ||
[Analyze grammar]

ata etāni sarvāṇi kāraṇāni samīkṣya vai |
mamaitadvacanaṃ dharmyaṃ kartumarhasyanindite || 24 ||
[Analyze grammar]

ṛtāvṛtau rājaputri striyā bhartā yatavrate |
nātivartavya ityevaṃ dharmaṃ dharmavido viduḥ || 25 ||
[Analyze grammar]

śeṣeṣvanyeṣu kāleṣu svātantryaṃ strī kilārhati |
dharmametaṃ janāḥ santaḥ purāṇaṃ paricakṣate || 26 ||
[Analyze grammar]

bhartā bhāryāṃ rājaputri dharmyaṃ vādharmyameva vā |
yadbrūyāttattathā kāryamiti dharmavido viduḥ || 27 ||
[Analyze grammar]

viśeṣataḥ putragṛddhī hīnaḥ prajananātsvayam |
yathāhamanavadyāṅgi putradarśanalālasaḥ || 28 ||
[Analyze grammar]

tathā raktāṅgulitalaḥ padmapatranibhaḥ śubhe |
prasādārthaṃ mayā te'yaṃ śirasyabhyudyato'ñjaliḥ || 29 ||
[Analyze grammar]

manniyogātsukeśānte dvijātestapasādhikāt |
putrānguṇasamāyuktānutpādayitumarhasi |
tvatkṛte'haṃ pṛthuśroṇi gaccheyaṃ putriṇāṃ gatim || 30 ||
[Analyze grammar]

evamuktā tataḥ kuntī pāṇḍuṃ parapuraṃjayam |
pratyuvāca varārohā bhartuḥ priyahite ratā || 31 ||
[Analyze grammar]

pitṛveśmanyahaṃ bālā niyuktātithipūjane |
ugraṃ paryacaraṃ tatra brāhmaṇaṃ saṃśitavratam || 32 ||
[Analyze grammar]

nigūḍhaniścayaṃ dharme yaṃ taṃ durvāsasaṃ viduḥ |
tamahaṃ saṃśitātmānaṃ sarvayatnairatoṣayam || 33 ||
[Analyze grammar]

sa me'bhicārasaṃyuktamācaṣṭa bhagavānvaram |
mantragrāmaṃ ca me prādādabravīccaiva māmidam || 34 ||
[Analyze grammar]

yaṃ yaṃ devaṃ tvametena mantreṇāvāhayiṣyasi |
akāmo vā sakāmo vā sa te vaśamupaiṣyati || 35 ||
[Analyze grammar]

ityuktāhaṃ tadā tena pitṛveśmani bhārata |
brāhmaṇena vacastathyaṃ tasya kālo'yamāgataḥ || 36 ||
[Analyze grammar]

anujñātā tvayā devamāhvayeyamahaṃ nṛpa |
tena mantreṇa rājarṣe yathā syānnau prajā vibho || 37 ||
[Analyze grammar]

āvāhayāmi kaṃ devaṃ brūhi tattvavidāṃ vara |
tvatto'nujñāpratīkṣāṃ māṃ viddhyasminkarmaṇi sthitām || 38 ||
[Analyze grammar]

pāṇḍuruvāca |
adyaiva tvaṃ varārohe prayatasva yathāvidhi |
dharmamāvāhaya śubhe sa hi deveṣu puṇyabhāk || 39 ||
[Analyze grammar]

adharmeṇa na no dharmaḥ saṃyujyeta kathaṃcana |
lokaścāyaṃ varārohe dharmo'yamiti maṃsyate || 40 ||
[Analyze grammar]

dhārmikaśca kurūṇāṃ sa bhaviṣyati na saṃśayaḥ |
dattasyāpi ca dharmeṇa nādharme raṃsyate manaḥ || 41 ||
[Analyze grammar]

tasmāddharmaṃ puraskṛtya niyatā tvaṃ śucismite |
upacārābhicārābhyāṃ dharmamārādhayasva vai || 42 ||
[Analyze grammar]

vaiśaṃpāyana uvāca |
sā tathoktā tathetyuktvā tena bhartrā varāṅganā |
abhivādyābhyanujñātā pradakṣiṇamavartata || 43 ||
[Analyze grammar]