Chapter 78

vaiśaṃpāyana uvāca |
śrutvā kumāraṃ jātaṃ tu devayānī śucismitā |
cintayāmāsa duḥkhārtā śarmiṣṭhāṃ prati bhārata || 1 ||
[Analyze grammar]

abhigamya ca śarmiṣṭhāṃ devayānyabravīdidam |
kimidaṃ vṛjinaṃ subhru kṛtaṃ te kāmalubdhayā || 2 ||
[Analyze grammar]

śarmiṣṭhovāca |
ṛṣirabhyāgataḥ kaściddharmātmā vedapāragaḥ |
sa mayā varadaḥ kāmaṃ yācito dharmasaṃhitam || 3 ||
[Analyze grammar]

nāhamanyāyataḥ kāmamācarāmi śucismite |
tasmādṛṣermamāpatyamiti satyaṃ bravīmi te || 4 ||
[Analyze grammar]

devayānyuvāca |
śobhanaṃ bhīru satyaṃ cedatha sa jñāyate dvijaḥ |
gotranāmābhijanato vettumicchāmi taṃ dvijam || 5 ||
[Analyze grammar]

śarmiṣṭhovāca |
ojasā tejasā caiva dīpyamānaṃ raviṃ yathā |
taṃ dṛṣṭvā mama saṃpraṣṭuṃ śaktirnāsīcchucismite || 6 ||
[Analyze grammar]

devayānyuvāca |
yadyetadevaṃ śarmiṣṭhe na manyurvidyate mama |
apatyaṃ yadi te labdhaṃ jyeṣṭhācchreṣṭhācca vai dvijāt || 7 ||
[Analyze grammar]

vaiśaṃpāyana uvāca |
anyonyamevamuktvā ca saṃprahasya ca te mithaḥ |
jagāma bhārgavī veśma tathyamityeva jajñuṣī || 8 ||
[Analyze grammar]

yayātirdevayānyāṃ tu putrāvajanayannṛpaḥ |
yaduṃ ca turvasuṃ caiva śakraviṣṇū ivāparau || 9 ||
[Analyze grammar]

tasmādeva tu rājarṣeḥ śarmiṣṭhā vārṣaparvaṇī |
druhyuṃ cānuṃ ca pūruṃ ca trīnkumārānajījanat || 10 ||
[Analyze grammar]

tataḥ kāle tu kasmiṃściddevayānī śucismitā |
yayātisahitā rājannirjagāma mahāvanam || 11 ||
[Analyze grammar]

dadarśa ca tadā tatra kumārāndevarūpiṇaḥ |
krīḍamānānsuviśrabdhānvismitā cedamabravīt || 12 ||
[Analyze grammar]

kasyaite dārakā rājandevaputropamāḥ śubhāḥ |
varcasā rūpataścaiva sadṛśā me matāstava || 13 ||
[Analyze grammar]

evaṃ pṛṣṭvā tu rājānaṃ kumārānparyapṛcchata |
kiṃnāmadheyagotro vaḥ putrakā brāhmaṇaḥ pitā |
vibrūta me yathātathyaṃ śrotumicchāmi taṃ hyaham || 14 ||
[Analyze grammar]

te'darśayanpradeśinyā tameva nṛpasattamam |
śarmiṣṭhāṃ mātaraṃ caiva tasyācakhyuśca dārakāḥ || 15 ||
[Analyze grammar]

ityuktvā sahitāste tu rājānamupacakramuḥ |
nābhyanandata tānrājā devayānyāstadāntike |
rudantaste'tha śarmiṣṭhāmabhyayurbālakāstataḥ || 16 ||
[Analyze grammar]

dṛṣṭvā tu teṣāṃ bālānāṃ praṇayaṃ pārthivaṃ prati |
buddhvā ca tattvato devī śarmiṣṭhāmidamabravīt || 17 ||
[Analyze grammar]

madadhīnā satī kasmādakārṣīrvipriyaṃ mama |
tamevāsuradharmaṃ tvamāsthitā na bibheṣi kim || 18 ||
[Analyze grammar]

śarmiṣṭhovāca |
yaduktamṛṣirityeva tatsatyaṃ cāruhāsini |
nyāyato dharmataścaiva carantī na bibhemi te || 19 ||
[Analyze grammar]

yadā tvayā vṛto rājā vṛta eva tadā mayā |
sakhībhartā hi dharmeṇa bhartā bhavati śobhane || 20 ||
[Analyze grammar]

pūjyāsi mama mānyā ca jyeṣṭhā śreṣṭhā ca brāhmaṇī |
tvatto'pi me pūjyatamo rājarṣiḥ kiṃ na vettha tat || 21 ||
[Analyze grammar]

vaiśaṃpāyana uvāca |
śrutvā tasyāstato vākyaṃ devayānyabravīdidam |
rājannādyeha vatsyāmi vipriyaṃ me kṛtaṃ tvayā || 22 ||
[Analyze grammar]

sahasotpatitāṃ śyāmāṃ dṛṣṭvā tāṃ sāśrulocanām |
tvaritaṃ sakāśaṃ kāvyasya prasthitāṃ vyathitastadā || 23 ||
[Analyze grammar]

anuvavrāja saṃbhrāntaḥ pṛṣṭhataḥ sāntvayannṛpaḥ |
nyavartata na caiva sma krodhasaṃraktalocanā || 24 ||
[Analyze grammar]

avibruvantī kiṃcittu rājānaṃ cārulocanā |
acirādiva saṃprāptā kāvyasyośanaso'ntikam || 25 ||
[Analyze grammar]

sā tu dṛṣṭvaiva pitaramabhivādyāgrataḥ sthitā |
anantaraṃ yayātistu pūjayāmāsa bhārgavam || 26 ||
[Analyze grammar]

devayānyuvāca |
adharmeṇa jito dharmaḥ pravṛttamadharottaram |
śarmiṣṭhayātivṛttāsmi duhitrā vṛṣaparvaṇaḥ || 27 ||
[Analyze grammar]

trayo'syāṃ janitāḥ putrā rājñānena yayātinā |
durbhagāyā mama dvau tu putrau tāta bravīmi te || 28 ||
[Analyze grammar]

dharmajña iti vikhyāta eṣa rājā bhṛgūdvaha |
atikrāntaśca maryādāṃ kāvyaitatkathayāmi te || 29 ||
[Analyze grammar]

śukra uvāca |
dharmajñaḥ sanmahārāja yo'dharmamakṛthāḥ priyam |
tasmājjarā tvāmacirāddharṣayiṣyati durjayā || 30 ||
[Analyze grammar]

yayātiruvāca |
ṛtuṃ vai yācamānāyā bhagavannānyacetasā |
duhiturdānavendrasya dharmyametatkṛtaṃ mayā || 31 ||
[Analyze grammar]

ṛtuṃ vai yācamānāyā na dadāti pumānvṛtaḥ |
bhrūṇahetyucyate brahmansa iha brahmavādibhiḥ || 32 ||
[Analyze grammar]

abhikāmāṃ striyaṃ yastu gamyāṃ rahasi yācitaḥ |
nopaiti sa ca dharmeṣu bhrūṇahetyucyate budhaiḥ || 33 ||
[Analyze grammar]

ityetāni samīkṣyāhaṃ kāraṇāni bhṛgūdvaha |
adharmabhayasaṃvignaḥ śarmiṣṭhāmupajagmivān || 34 ||
[Analyze grammar]

śukra uvāca |
nanvahaṃ pratyavekṣyaste madadhīno'si pārthiva |
mithyācārasya dharmeṣu cauryaṃ bhavati nāhuṣa || 35 ||
[Analyze grammar]

vaiśaṃpāyana uvāca |
kruddhenośanasā śapto yayātirnāhuṣastadā |
pūrvaṃ vayaḥ parityajya jarāṃ sadyo'nvapadyata || 36 ||
[Analyze grammar]

yayātiruvāca |
atṛpto yauvanasyāhaṃ devayānyāṃ bhṛgūdvaha |
prasādaṃ kuru me brahmañjareyaṃ mā viśeta mām || 37 ||
[Analyze grammar]

śukra uvāca |
nāhaṃ mṛṣā bravīmyetajjarāṃ prāpto'si bhūmipa |
jarāṃ tvetāṃ tvamanyasmai saṃkrāmaya yadīcchasi || 38 ||
[Analyze grammar]

yayātiruvāca |
rājyabhāksa bhavedbrahmanpuṇyabhākkīrtibhāktathā |
yo me dadyādvayaḥ putrastadbhavānanumanyatām || 39 ||
[Analyze grammar]

śukra uvāca |
saṃkrāmayiṣyasi jarāṃ yatheṣṭaṃ nahuṣātmaja |
māmanudhyāya bhāvena na ca pāpamavāpsyasi || 40 ||
[Analyze grammar]

vayo dāsyati te putro yaḥ sa rājā bhaviṣyati |
āyuṣmānkīrtimāṃścaiva bahvapatyastathaiva ca || 41 ||
[Analyze grammar]