Chapter 139

vāyuruvāca |
imāṃ bhūmiṃ brāhmaṇebhyo ditsurvai dakṣiṇāṃ purā |
aṅgo nāma nṛpo rājaṃstataścintāṃ mahī yayau || 1 ||
[Analyze grammar]

dhāraṇīṃ sarvabhūtānāmayaṃ prāpya varo nṛpaḥ |
kathamicchati māṃ dātuṃ dvijebhyo brahmaṇaḥ sutām || 2 ||
[Analyze grammar]

sāhaṃ tyaktvā gamiṣyāmi bhūmitvaṃ brahmaṇaḥ padam |
ayaṃ sarāṣṭro nṛpatirmā bhūditi tato'gamat || 3 ||
[Analyze grammar]

tatastāṃ kaśyapo dṛṣṭvā vrajantīṃ pṛthivīṃ tadā |
praviveśa mahīṃ sadyo muktvātmānaṃ samāhitaḥ || 4 ||
[Analyze grammar]

ruddhā sā sarvato jajñe tṛṇauṣadhisamanvitā |
dharmottarā naṣṭabhayā bhūmirāsīttato nṛpa || 5 ||
[Analyze grammar]

evaṃ varṣasahasrāṇi divyāni vipulavrataḥ |
triṃśataṃ kaśyapo rājanbhūmirāsīdatandritaḥ || 6 ||
[Analyze grammar]

athāgamya mahārāja namaskṛtya ca kaśyapam |
pṛthivī kāśyapī jajñe sutā tasya mahātmanaḥ || 7 ||
[Analyze grammar]

eṣa rājannīdṛśo vai brāhmaṇaḥ kaśyapo'bhavat |
anyaṃ prabrūhi vāpi tvaṃ kaśyapātkṣatriyaṃ varam || 8 ||
[Analyze grammar]

tūṣṇīṃ babhūva nṛpatiḥ pavanastvabravītpunaḥ |
śṛṇu rājannutathyasya jātasyāṅgirase kule || 9 ||
[Analyze grammar]

bhadrā somasya duhitā rūpeṇa paramā matā |
tasyāstulyaṃ patiṃ soma utathyaṃ samapaśyata || 10 ||
[Analyze grammar]

sā ca tīvraṃ tapastepe mahābhāgā yaśasvinī |
utathyaṃ tu mahābhāgaṃ tatkṛte'varayattadā || 11 ||
[Analyze grammar]

tata āhūya sotathyaṃ dadāvatra yaśasvinīm |
bhāryārthe sa ca jagrāha vidhivadbhūridakṣiṇa || 12 ||
[Analyze grammar]

tāṃ tvakāmayata śrīmānvaruṇaḥ pūrvameva ha |
sa cāgamya vanaprasthaṃ yamunāyāṃ jahāra tām || 13 ||
[Analyze grammar]

jaleśvarastu hṛtvā tāmanayatsvapuraṃ prati |
paramādbhutasaṃkāśaṃ ṣaṭsahasraśatahradam || 14 ||
[Analyze grammar]

na hi ramyataraṃ kiṃcittasmādanyatpurottamam |
prāsādairapsarobhiśca divyaiḥ kāmaiśca śobhitam |
tatra devastayā sārdhaṃ reme rājañjaleśvaraḥ || 15 ||
[Analyze grammar]

athākhyātamutathyāya tataḥ patnyavamardanam || 16 ||
[Analyze grammar]

tacchrutvā nāradātsarvamutathyo nāradaṃ tadā |
provāca gaccha brūhi tvaṃ varuṇaṃ paruṣaṃ vacaḥ |
madvākyānmuñca me bhāryāṃ kasmādvā hṛtavānasi || 17 ||
[Analyze grammar]

lokapālo'si lokānāṃ na lokasya vilopakaḥ |
somena dattā bhāryā me tvayā cāpahṛtādya vai || 18 ||
[Analyze grammar]

ityukto vacanāttasya nāradena jaleśvaraḥ |
muñca bhāryāmutathyasyetyatha taṃ varuṇo'bravīt |
mamaiṣā supriyā bhāryā naināmutsraṣṭumutsahe || 19 ||
[Analyze grammar]

ityukto varuṇenātha nāradaḥ prāpya taṃ munim |
utathyamabravīdvākyaṃ nātihṛṣṭamanā iva || 20 ||
[Analyze grammar]

gale gṛhītvā kṣipto'smi varuṇena mahāmune |
na prayacchati te bhāryāṃ yatte kāryaṃ kuruṣva tat || 21 ||
[Analyze grammar]

nāradasya vacaḥ śrutvā kruddhaḥ prājvaladaṅgirāḥ |
apibattejasā vāri viṣṭabhya sumahātapāḥ || 22 ||
[Analyze grammar]

pīyamāne ca sarvasmiṃstoye vai salileśvaraḥ |
suhṛdbhiḥ kṣipyamāṇo'pi naivāmuñcata tāṃ tadā || 23 ||
[Analyze grammar]

tataḥ kruddho'bravīdbhūmimutathyo brāhmaṇottamaḥ |
darśayasva sthalaṃ bhadre ṣaṭsahasraśatahradam || 24 ||
[Analyze grammar]

tatastadiriṇaṃ jātaṃ samudraścāpasarpitaḥ |
tasmāddeśānnadīṃ caiva provācāsau dvijottamaḥ || 25 ||
[Analyze grammar]

adṛśyā gaccha bhīru tvaṃ sarasvati maruṃ prati |
apuṇya eṣa bhavatu deśastyaktastvayā śubhe || 26 ||
[Analyze grammar]

tasminsaṃcūrṇite deśe bhadrāmādāya vāripaḥ |
adadāccharaṇaṃ gatvā bhāryāmāṅgirasāya vai || 27 ||
[Analyze grammar]

pratigṛhya tu tāṃ bhāryāmutathyaḥ sumanābhavat |
mumoca ca jagadduḥkhādvaruṇaṃ caiva haihaya || 28 ||
[Analyze grammar]

tataḥ sa labdhvā tāṃ bhāryāṃ varuṇaṃ prāha dharmavit |
utathyaḥ sumahātejā yattacchṛṇu narādhipa || 29 ||
[Analyze grammar]

mayaiṣā tapasā prāptā krośataste jalādhipa |
ityuktvā tāmupādāya svameva bhavanaṃ yayau || 30 ||
[Analyze grammar]

eṣa rājannīdṛśo vai utathyo brāhmaṇarṣabhaḥ |
bravīmyahaṃ brūhi vā tvamutathyātkṣatriyaṃ varam || 31 ||
[Analyze grammar]