Chapter 106

yudhiṣṭhira uvāca |
dānaṃ bahuvidhākāraṃ śāntiḥ satyamahiṃsatā |
svadāratuṣṭiścoktā te phalaṃ dānasya caiva yat || 1 ||
[Analyze grammar]

pitāmahasya viditaṃ kimanyatra tapobalāt |
tapaso yatparaṃ te'dya tanme vyākhyātumarhasi || 2 ||
[Analyze grammar]

bhīṣma uvāca |
tapaḥ pracakṣate yāvattāvallokā yudhiṣṭhira |
mataṃ mama tu kaunteya tapo nānaśanātparam || 3 ||
[Analyze grammar]

atrāpyudāharantīmamitihāsaṃ purātanam |
bhagīrathasya saṃvādaṃ brahmaṇaśca mahātmanaḥ || 4 ||
[Analyze grammar]

atītya suralokaṃ ca gavāṃ lokaṃ ca bhārata |
ṛṣilokaṃ ca so'gacchadbhagīratha iti śrutiḥ || 5 ||
[Analyze grammar]

taṃ dṛṣṭvā sa vacaḥ prāha brahmā rājanbhagīratham |
kathaṃ bhagīrathāgāstvamimaṃ deśaṃ durāsadam || 6 ||
[Analyze grammar]

na hi devā na gandharvā na manuṣyā bhagīratha |
āyāntyataptatapasaḥ kathaṃ vai tvamihāgataḥ || 7 ||
[Analyze grammar]

bhagīratha uvāca |
niḥśaṅkamannamadadaṃ brāhmaṇebhyaḥ śataṃ sahasrāṇi sadaiva dānam |
brāhmaṃ vrataṃ nityamāsthāya viddhi na tvevāhaṃ tasya phalādihāgām || 8 ||
[Analyze grammar]

daśaikarātrāndaśa pañcarātrānekādaśaikādaśakānkratūṃśca |
jyotiṣṭomānāṃ ca śataṃ yadiṣṭaṃ phalena tenāpi ca nāgato'ham || 9 ||
[Analyze grammar]

yaccāvasaṃ jāhnavītīranityaḥ śataṃ samāstapyamānastapo'ham |
adāṃ ca tatrāśvatarīsahasraṃ nārīpuraṃ na ca tenāhamāgām || 10 ||
[Analyze grammar]

daśāyutāni cāśvānāmayutāni ca viṃśatim |
puṣkareṣu dvijātibhyaḥ prādāṃ gāśca sahasraśaḥ || 11 ||
[Analyze grammar]

suvarṇacandroḍupadhāriṇīnāṃ kanyottamānāmadadaṃ sragviṇīnām |
ṣaṣṭiṃ sahasrāṇi vibhūṣitānāṃ jāmbūnadairābharaṇairna tena || 12 ||
[Analyze grammar]

daśārbudānyadadaṃ gosavejyāsvekaikaśo daśa gā lokanātha |
samānavatsāḥ payasā samanvitāḥ suvarṇakāṃsyopaduhā na tena || 13 ||
[Analyze grammar]

aptoryāmeṣu niyatamekaikasmindaśādadam |
gṛṣṭīnāṃ kṣīradātrīṇāṃ rohiṇīnāṃ na tena ca || 14 ||
[Analyze grammar]

dogdhrīṇāṃ vai gavāṃ caiva prayutāni daśaiva ha |
prādāṃ daśaguṇaṃ brahmanna ca tenāhamāgataḥ || 15 ||
[Analyze grammar]

vājināṃ bāhlijātānāmayutānyadadaṃ daśa |
karkāṇāṃ hemamālānāṃ na ca tenāhamāgataḥ || 16 ||
[Analyze grammar]

koṭīśca kāñcanasyāṣṭau prādāṃ brahmandaśa tvaham |
ekaikasminkratau tena phalenāhaṃ na cāgataḥ || 17 ||
[Analyze grammar]

vājināṃ śyāmakarṇānāṃ haritānāṃ pitāmaha |
prādāṃ hemasrajāṃ brahmankoṭīrdaśa ca sapta ca || 18 ||
[Analyze grammar]

īṣādantānmahākāyānkāñcanasragvibhūṣitān |
patnīmataḥ sahasrāṇi prāyacchaṃ daśa sapta ca || 19 ||
[Analyze grammar]

alaṃkṛtānāṃ deveśa divyaiḥ kanakabhūṣaṇaiḥ |
rathānāṃ kāñcanāṅgānāṃ sahasrāṇyadadaṃ daśa |
sapta cānyāni yuktāni vājibhiḥ samalaṃkṛtaiḥ || 20 ||
[Analyze grammar]

dakṣiṇāvayavāḥ kecidvedairye saṃprakīrtitāḥ |
vājapeyeṣu daśasu prādāṃ tenāpi nāpyaham || 21 ||
[Analyze grammar]

śakratulyaprabhāvānāmijyayā vikrameṇa ca |
sahasraṃ niṣkakaṇṭhānāmadadaṃ dakṣiṇāmaham || 22 ||
[Analyze grammar]

vijitya nṛpatīnsarvānmakhairiṣṭvā pitāmaha |
aṣṭabhyo rājasūyebhyo na ca tenāhamāgataḥ || 23 ||
[Analyze grammar]

srotaśca yāvadgaṅgāyāśchannamāsījjagatpate |
dakṣiṇābhiḥ pravṛttābhirmama nāgāṃ ca tatkṛte || 24 ||
[Analyze grammar]

vājināṃ ca sahasre dve suvarṇaśatabhūṣite |
varaṃ grāmaśataṃ cāhamekaikasya tridhādadam |
tapasvī niyatāhāraḥ śamamāsthāya vāgyataḥ || 25 ||
[Analyze grammar]

dīrghakālaṃ himavati gaṅgāyāśca durutsahām |
mūrdhnā dhārāṃ mahādevaḥ śirasā yāmadhārayat |
na tenāpyahamāgacchaṃ phaleneha pitāmaha || 26 ||
[Analyze grammar]

śamyākṣepairayajaṃ yacca devānsadyaskānāmayutaiścāpi yattat |
trayodaśadvādaśāhāṃśca deva sapauṇḍarīkānna ca teṣāṃ phalena || 27 ||
[Analyze grammar]

aṣṭau sahasrāṇi kakudmināmahaṃ śuklarṣabhāṇāmadadaṃ brāhmaṇebhyaḥ |
ekaikaṃ vai kāñcanaṃ śṛṅgamebhyaḥ patnīścaiṣāmadadaṃ niṣkakaṇṭhīḥ || 28 ||
[Analyze grammar]

hiraṇyaratnanicitānadadaṃ ratnaparvatān |
dhanadhānyasamṛddhāṃśca grāmāñśatasahasraśaḥ || 29 ||
[Analyze grammar]

śataṃ śatānāṃ gṛṣṭīnāmadadaṃ cāpyatandritaḥ |
iṣṭvānekairmahāyajñairbrāhmaṇebhyo na tena ca || 30 ||
[Analyze grammar]

ekādaśāhairayajaṃ sadakṣiṇairdvirdvādaśāhairaśvamedhaiśca deva |
ārkāyaṇaiḥ ṣoḍaśabhiśca brahmaṃsteṣāṃ phaleneha na cāgato'smi || 31 ||
[Analyze grammar]

niṣkaikakaṇṭhamadadaṃ yojanāyataṃ tadvistīrṇaṃ kāñcanapādapānām |
vanaṃ cūtānāṃ ratnavibhūṣitānāṃ na caiva teṣāmāgato'haṃ phalena || 32 ||
[Analyze grammar]

turāyaṇaṃ hi vratamapradhṛṣyamakrodhano'karavaṃ triṃśato'bdān |
śataṃ gavāmaṣṭa śatāni caiva dine dine hyadadaṃ brāhmaṇebhyaḥ || 33 ||
[Analyze grammar]

payasvinīnāmatha rohiṇīnāṃ tathaiva cāpyanaḍuhāṃ lokanātha |
prādāṃ nityaṃ brāhmaṇebhyaḥ sureśa nehāgatastena phalena cāham || 34 ||
[Analyze grammar]

triṃśadagnimahaṃ brahmannayajaṃ yacca nityadā |
aṣṭābhiḥ sarvamedhaiśca naramedhaiśca saptabhiḥ || 35 ||
[Analyze grammar]

daśabhirviśvajidbhiśca śatairaṣṭādaśottaraiḥ |
na caiva teṣāṃ deveśa phalenāhamihāgataḥ || 36 ||
[Analyze grammar]

sarayvāṃ bāhudāyāṃ ca gaṅgāyāmatha naimiṣe |
gavāṃ śatānāmayutamadadaṃ na ca tena vai || 37 ||
[Analyze grammar]

indreṇa guhyaṃ nihitaṃ vai guhāyāṃ yadbhārgavastapasehābhyavindat |
jājvalyamānamuśanastejaseha tatsādhayāmāsa mahaṃ vareṇyam || 38 ||
[Analyze grammar]

tato me brāhmaṇāstuṣṭāstasminkarmaṇi sādhite |
sahasramṛṣayaścāsanye vai tatra samāgatāḥ |
uktastairasmi gaccha tvaṃ brahmalokamiti prabho || 39 ||
[Analyze grammar]

prītenoktaḥ sahasreṇa brāhmaṇānāmahaṃ prabho |
imaṃ lokamanuprāpto mā bhūtte'tra vicāraṇā || 40 ||
[Analyze grammar]

kāmaṃ yathāvadvihitaṃ vidhātrā pṛṣṭena vācyaṃ tu mayā yathāvat |
tapo hi nānyaccānaśanānmataṃ me namo'stu te devavara prasīda || 41 ||
[Analyze grammar]

bhīṣma uvāca |
ityuktavantaṃ taṃ brahmā rājānaṃ sma bhagīratham |
pūjayāmāsa pūjārhaṃ vidhidṛṣṭena karmaṇā || 42 ||
[Analyze grammar]