Chapter 107

yudhiṣṭhira uvāca |
śatāyuruktaḥ puruṣaḥ śatavīryaśca vaidike |
kasmānmriyante puruṣā bālā api pitāmaha || 1 ||
[Analyze grammar]

āyuṣmānkena bhavati svalpāyurvāpi mānavaḥ |
kena vā labhate kīrtiṃ kena vā labhate śriyam || 2 ||
[Analyze grammar]

tapasā brahmacaryeṇa japairhomaistathauṣadhaiḥ |
janmanā yadi vācārāttanme brūhi pitāmaha || 3 ||
[Analyze grammar]

bhīṣma uvāca |
atra te vartayiṣyāmi yanmāṃ tvamanupṛcchasi |
alpāyuryena bhavati dīrghāyurvāpi mānavaḥ || 4 ||
[Analyze grammar]

yena vā labhate kīrtiṃ yena vā labhate śriyam |
yathā ca vartanpuruṣaḥ śreyasā saṃprayujyate || 5 ||
[Analyze grammar]

ācārāllabhate hyāyurācārāllabhate śriyam |
ācārātkīrtimāpnoti puruṣaḥ pretya ceha ca || 6 ||
[Analyze grammar]

durācāro hi puruṣo nehāyurvindate mahat |
trasanti yasmādbhūtāni tathā paribhavanti ca || 7 ||
[Analyze grammar]

tasmātkuryādihācāraṃ ya icchedbhūtimātmanaḥ |
api pāpaśarīrasya ācāro hantyalakṣaṇam || 8 ||
[Analyze grammar]

ācāralakṣaṇo dharmaḥ santaścācāralakṣaṇāḥ |
sādhūnāṃ ca yathā vṛttametadācāralakṣaṇam || 9 ||
[Analyze grammar]

apyadṛṣṭaṃ śrutaṃ vāpi puruṣaṃ dharmacāriṇam |
bhūtikarmāṇi kurvāṇaṃ taṃ janāḥ kurvate priyam || 10 ||
[Analyze grammar]

ye nāstikā niṣkriyāśca guruśāstrātilaṅghinaḥ |
adharmajñā durācārāste bhavanti gatāyuṣaḥ || 11 ||
[Analyze grammar]

viśīlā bhinnamaryādā nityaṃ saṃkīrṇamaithunāḥ |
alpāyuṣo bhavantīha narā nirayagāminaḥ || 12 ||
[Analyze grammar]

sarvalakṣaṇahīno'pi samudācāravānnaraḥ |
śraddadhāno'nasūyaśca śataṃ varṣāṇi jīvati || 13 ||
[Analyze grammar]

akrodhanaḥ satyavādī bhūtānāmavihiṃsakaḥ |
anasūyurajihmaśca śataṃ varṣāṇi jīvati || 14 ||
[Analyze grammar]

loṣṭamardī tṛṇacchedī nakhakhādī ca yo naraḥ |
nityocchiṣṭaḥ saṃkusuko nehāyurvindate mahat || 15 ||
[Analyze grammar]

brāhme muhūrte budhyeta dharmārthau cānucintayet |
utthāyācamya tiṣṭheta pūrvāṃ saṃdhyāṃ kṛtāñjaliḥ || 16 ||
[Analyze grammar]

evamevāparāṃ saṃdhyāṃ samupāsīta vāgyataḥ |
nekṣetādityamudyantaṃ nāstaṃ yāntaṃ kadācana || 17 ||
[Analyze grammar]

ṛṣayo dīrghasaṃdhyatvāddīrghamāyuravāpnuvan |
tasmāttiṣṭhetsadā pūrvāṃ paścimāṃ caiva vāgyataḥ || 18 ||
[Analyze grammar]

ye ca pūrvāmupāsante dvijāḥ saṃdhyāṃ na paścimām |
sarvāṃstāndhārmiko rājā śūdrakarmāṇi kārayet || 19 ||
[Analyze grammar]

paradārā na gantavyāḥ sarvavarṇeṣu karhicit |
na hīdṛśamanāyuṣyaṃ loke kiṃcana vidyate |
yādṛśaṃ puruṣasyeha paradāropasevanam || 20 ||
[Analyze grammar]

prasādhanaṃ ca keśānāmañjanaṃ dantadhāvanam |
pūrvāhṇa eva kurvīta devatānāṃ ca pūjanam || 21 ||
[Analyze grammar]

purīṣamūtre nodīkṣennādhitiṣṭhetkadācana |
udakyayā ca saṃbhāṣāṃ na kurvīta kadācana || 22 ||
[Analyze grammar]

notsṛjeta purīṣaṃ ca kṣetre grāmasya cāntike |
ubhe mūtrapurīṣe tu nāpsu kuryātkadācana || 23 ||
[Analyze grammar]

prāṅmukho nityamaśnīyādvāgyato'nnamakutsayan |
praskandayecca manasā bhuktvā cāgnimupaspṛśet || 24 ||
[Analyze grammar]

āyuṣyaṃ prāṅmukho bhuṅkte yaśasyaṃ dakṣiṇāmukhaḥ |
dhanyaṃ paścānmukho bhuṅkte ṛtaṃ bhuṅkte udaṅmukhaḥ || 25 ||
[Analyze grammar]

nādhitiṣṭhettuṣāñjātu keśabhasmakapālikāḥ |
anyasya cāpyupasthānaṃ dūrataḥ parivarjayet || 26 ||
[Analyze grammar]

śāntihomāṃśca kurvīta sāvitrāṇi ca kārayet |
niṣaṇṇaścāpi khādeta na tu gacchankathaṃcana || 27 ||
[Analyze grammar]

mūtraṃ na tiṣṭhatā kāryaṃ na bhasmani na govraje || 28 ||
[Analyze grammar]

ārdrapādastu bhuñjīta nārdrapādastu saṃviśet |
ārdrapādastu bhuñjāno varṣāṇāṃ jīvate śatam || 29 ||
[Analyze grammar]

trīṇi tejāṃsi nocchiṣṭa ālabheta kadācana |
agniṃ gāṃ brāhmaṇaṃ caiva tathāsyāyurna riṣyate || 30 ||
[Analyze grammar]

trīṇi tejāṃsi nocchiṣṭa udīkṣeta kadācana |
sūryācandramasau caiva nakṣatrāṇi ca sarvaśaḥ || 31 ||
[Analyze grammar]

ūrdhvaṃ prāṇā hyutkrāmanti yūnaḥ sthavira āyati |
pratyutthānābhivādābhyāṃ punastānpratipadyate || 32 ||
[Analyze grammar]

abhivādayeta vṛddhāṃśca āsanaṃ caiva dāpayet |
kṛtāñjalirupāsīta gacchantaṃ pṛṣṭhato'nviyāt || 33 ||
[Analyze grammar]

na cāsītāsane bhinne bhinnaṃ kāṃsyaṃ ca varjayet |
naikavastreṇa bhoktavyaṃ na nagnaḥ snātumarhati |
svaptavyaṃ naiva nagnena na cocchiṣṭo'pi saṃviśet || 34 ||
[Analyze grammar]

ucchiṣṭo na spṛśecchīrṣaṃ sarve prāṇāstadāśrayāḥ |
keśagrahānprahārāṃśca śirasyetānvivarjayet || 35 ||
[Analyze grammar]

na pāṇibhyāmubhābhyāṃ ca kaṇḍūyejjātu vai śiraḥ |
na cābhīkṣṇaṃ śiraḥ snāyāttathāsyāyurna riṣyate || 36 ||
[Analyze grammar]

śiraḥsnātaśca tailena nāṅgaṃ kiṃcidupaspṛśet |
tilapiṣṭaṃ na cāśnīyāttathāyurvindate mahat || 37 ||
[Analyze grammar]

nādhyāpayettathocchiṣṭo nādhīyīta kadācana |
vāte ca pūtigandhe ca manasāpi na cintayet || 38 ||
[Analyze grammar]

atra gāthā yamodgītāḥ kīrtayanti purāvidaḥ |
āyurasya nikṛntāmi prajāmasyādade tathā || 39 ||
[Analyze grammar]

ya ucchiṣṭaḥ pravadati svādhyāyaṃ cādhigacchati |
yaścānadhyāyakāle'pi mohādabhyasyati dvijaḥ |
tasmādyukto'pyanadhyāye nādhīyīta kadācana || 40 ||
[Analyze grammar]

pratyādityaṃ pratyanilaṃ prati gāṃ ca prati dvijān |
ye mehanti ca panthānaṃ te bhavanti gatāyuṣaḥ || 41 ||
[Analyze grammar]

ubhe mūtrapurīṣe tu divā kuryādudaṅmukhaḥ |
dakṣiṇābhimukho rātrau tathāsyāyurna riṣyate || 42 ||
[Analyze grammar]

trīnkṛśānnāvajānīyāddīrghamāyurjijīviṣuḥ |
brāhmaṇaṃ kṣatriyaṃ sarpaṃ sarve hyāśīviṣāstrayaḥ || 43 ||
[Analyze grammar]

dahatyāśīviṣaḥ kruddho yāvatpaśyati cakṣuṣā |
kṣatriyo'pi dahetkruddho yāvatspṛśati tejasā || 44 ||
[Analyze grammar]

brāhmaṇastu kulaṃ hanyāddhyānenāvekṣitena ca |
tasmādetattrayaṃ yatnādupaseveta paṇḍitaḥ || 45 ||
[Analyze grammar]

guruṇā vairanirbandho na kartavyaḥ kadācana |
anumānyaḥ prasādyaśca guruḥ kruddho yudhiṣṭhira || 46 ||
[Analyze grammar]

samyaṅmithyāpravṛtte'pi vartitavyaṃ gurāviha |
gurunindā dahatyāyurmanuṣyāṇāṃ na saṃśayaḥ || 47 ||
[Analyze grammar]

dūrādāvasathānmūtraṃ dūrātpādāvasecanam |
ucchiṣṭotsarjanaṃ caiva dūre kāryaṃ hitaiṣiṇā || 48 ||
[Analyze grammar]

nātikalpaṃ nātisāyaṃ na ca madhyaṃdine sthite |
nājñātaiḥ saha gaccheta naiko na vṛṣalaiḥ saha || 49 ||
[Analyze grammar]

panthā deyo brāhmaṇāya gobhyo rājabhya eva ca |
vṛddhāya bhārataptāya garbhiṇyai durbalāya ca || 50 ||
[Analyze grammar]

pradakṣiṇaṃ ca kurvīta parijñātānvanaspatīn |
catuṣpathānprakurvīta sarvāneva pradakṣiṇān || 51 ||
[Analyze grammar]

madhyaṃdine niśākāle madhyarātre ca sarvadā |
catuṣpathānna seveta ubhe saṃdhye tathaiva ca || 52 ||
[Analyze grammar]

upānahau ca vastraṃ ca dhṛtamanyairna dhārayet |
brahmacārī ca nityaṃ syātpādaṃ pādena nākramet || 53 ||
[Analyze grammar]

amāvāsyāṃ paurṇamāsyāṃ caturdaśyāṃ ca sarvaśaḥ |
aṣṭamyāṃ sarvapakṣāṇāṃ brahmacārī sadā bhavet || 54 ||
[Analyze grammar]

vṛthā māṃsaṃ na khādeta pṛṣṭhamāṃsaṃ tathaiva ca |
ākrośaṃ parivādaṃ ca paiśunyaṃ ca vivarjayet || 55 ||
[Analyze grammar]

nāruṃtudaḥ syānna nṛśaṃsavādī na hīnataḥ paramabhyādadīta |
yayāsya vācā para udvijeta na tāṃ vadedruśatīṃ pāpalokyām || 56 ||
[Analyze grammar]

vāksāyakā vadanānniṣpatanti yairāhataḥ śocati rātryahāni |
parasya nāmarmasu te patanti tānpaṇḍito nāvasṛjetpareṣu || 57 ||
[Analyze grammar]

rohate sāyakairviddhaṃ vanaṃ paraśunā hatam |
vācā duruktaṃ bībhatsaṃ na saṃrohati vākkṣatam || 58 ||
[Analyze grammar]

hīnāṅgānatiriktāṅgānvidyāhīnānvayodhikān |
rūpadraviṇahīnāṃśca sattvahīnāṃśca nākṣipet || 59 ||
[Analyze grammar]

nāstikyaṃ vedanindāṃ ca devatānāṃ ca kutsanam |
dveṣastambhābhimānāṃśca taikṣṇyaṃ ca parivarjayet || 60 ||
[Analyze grammar]

parasya daṇḍaṃ nodyacchetkroddho nainaṃ nipātayet |
anyatra putrācchiṣyādvā śikṣārthaṃ tāḍanaṃ smṛtam || 61 ||
[Analyze grammar]

na brāhmaṇānparivadennakṣatrāṇi na nirdiśet |
tithiṃ pakṣasya na brūyāttathāsyāyurna riṣyate || 62 ||
[Analyze grammar]

kṛtvā mūtrapurīṣe tu rathyāmākramya vā punaḥ |
pādaprakṣālanaṃ kuryātsvādhyāye bhojane tathā || 63 ||
[Analyze grammar]

trīṇi devāḥ pavitrāṇi brāhmaṇānāmakalpayan |
adṛṣṭamadbhirnirṇiktaṃ yacca vācā praśasyate || 64 ||
[Analyze grammar]

saṃyāvaṃ kṛsaraṃ māṃsaṃ śaṣkulī pāyasaṃ tathā |
ātmārthaṃ na prakartavyaṃ devārthaṃ tu prakalpayet || 65 ||
[Analyze grammar]

nityamagniṃ paricaredbhikṣāṃ dadyācca nityadā |
vāgyato dantakāṣṭhaṃ ca nityameva samācaret |
na cābhyuditaśāyī syātprāyaścittī tathā bhavet || 66 ||
[Analyze grammar]

mātāpitaramutthāya pūrvamevābhivādayet |
ācāryamatha vāpyenaṃ tathāyurvindate mahat || 67 ||
[Analyze grammar]

varjayeddantakāṣṭhāni varjanīyāni nityaśaḥ |
bhakṣayecchāstradṛṣṭāni parvasvapi ca varjayet || 68 ||
[Analyze grammar]

udaṅmukhaśca satataṃ śaucaṃ kuryātsamāhitaḥ || 69 ||
[Analyze grammar]

akṛtvā devatāpūjāṃ nānyaṃ gacchetkadācana |
anyatra tu guruṃ vṛddhaṃ dhārmikaṃ vā vicakṣaṇam || 70 ||
[Analyze grammar]

avalokyo na cādarśo malino buddhimattaraiḥ |
na cājñātāṃ striyaṃ gacchedgarbhiṇīṃ vā kadācana || 71 ||
[Analyze grammar]

udakśirā na svapeta tathā pratyakśirā na ca |
prākśirāstu svapedvidvānatha vā dakṣiṇāśirāḥ || 72 ||
[Analyze grammar]

na bhagne nāvadīrṇe vā śayane prasvapeta ca |
nāntardhāne na saṃyukte na ca tiryakkadācana || 73 ||
[Analyze grammar]

na nagnaḥ karhicitsnāyānna niśāyāṃ kadācana |
snātvā ca nāvamṛjyeta gātrāṇi suvicakṣaṇaḥ || 74 ||
[Analyze grammar]

na cānulimpedasnātvā snātvā vāso na nirdhunet |
ārdra eva tu vāsāṃsi nityaṃ seveta mānavaḥ |
srajaśca nāvakarṣeta na bahirdhārayeta ca || 75 ||
[Analyze grammar]

raktamālyaṃ na dhāryaṃ syācchuklaṃ dhāryaṃ tu paṇḍitaiḥ |
varjayitvā tu kamalaṃ tathā kuvalayaṃ vibho || 76 ||
[Analyze grammar]

raktaṃ śirasi dhāryaṃ tu tathā vāneyamityapi |
kāñcanī caiva yā mālā na sā duṣyati karhicit |
snātasya varṇakaṃ nityamārdraṃ dadyādviśāṃ pate || 77 ||
[Analyze grammar]

viparyayaṃ na kurvīta vāsaso buddhimānnaraḥ |
tathā nānyadhṛtaṃ dhāryaṃ na cāpadaśameva ca || 78 ||
[Analyze grammar]

anyadeva bhavedvāsaḥ śayanīye narottama |
anyadrathyāsu devānāmarcāyāmanyadeva hi || 79 ||
[Analyze grammar]

priyaṅgucandanābhyāṃ ca bilvena tagareṇa ca |
pṛthagevānulimpeta kesareṇa ca buddhimān || 80 ||
[Analyze grammar]

upavāsaṃ ca kurvīta snātaḥ śuciralaṃkṛtaḥ |
parvakāleṣu sarveṣu brahmacārī sadā bhavet || 81 ||
[Analyze grammar]

nālīḍhayā parihataṃ bhakṣayīta kadācana |
tathā noddhṛtasārāṇi prekṣatāṃ nāpradāya ca || 82 ||
[Analyze grammar]

na saṃnikṛṣṭo medhāvī nāśucirna ca satsu ca |
pratiṣiddhānna dharmeṣu bhakṣānbhuñjīta pṛṣṭhataḥ || 83 ||
[Analyze grammar]

pippalaṃ ca vaṭaṃ caiva śaṇaśākaṃ tathaiva ca |
udumbaraṃ na khādecca bhavārthī puruṣottamaḥ || 84 ||
[Analyze grammar]

ājaṃ gavyaṃ ca yanmāṃsaṃ māyūraṃ caiva varjayet |
varjayecchuṣkamāṃsaṃ ca tathā paryuṣitaṃ ca yat || 85 ||
[Analyze grammar]

na pāṇau lavaṇaṃ vidvānprāśnīyānna ca rātriṣu |
dadhisaktūnna bhuñjīta vṛthāmāṃsaṃ ca varjayet || 86 ||
[Analyze grammar]

vālena tu na bhuñjīta paraśrāddhaṃ tathaiva ca |
sāyaṃ prātaśca bhuñjīta nāntarāle samāhitaḥ || 87 ||
[Analyze grammar]

vāgyato naikavastraśca nāsaṃviṣṭaḥ kadācana |
bhūmau sadaiva nāśnīyānnānāsīno na śabdavat || 88 ||
[Analyze grammar]

toyapūrvaṃ pradāyānnamatithibhyo viśāṃ pate |
paścādbhuñjīta medhāvī na cāpyanyamanā naraḥ || 89 ||
[Analyze grammar]

samānamekapaṅktyāṃ tu bhojyamannaṃ nareśvara |
viṣaṃ hālāhalaṃ bhuṅkte yo'pradāya suhṛjjane || 90 ||
[Analyze grammar]

pānīyaṃ pāyasaṃ sarpirdadhisaktumadhūnyapi |
nirasya śeṣameteṣāṃ na pradeyaṃ tu kasyacit || 91 ||
[Analyze grammar]

bhuñjāno manujavyāghra naiva śaṅkāṃ samācaret |
dadhi cāpyanupānaṃ vai na kartavyaṃ bhavārthinā || 92 ||
[Analyze grammar]

ācamya caiva hastena parisrāvya tathodakam |
aṅguṣṭhaṃ caraṇasyātha dakṣiṇasyāvasecayet || 93 ||
[Analyze grammar]

pāṇiṃ mūrdhni samādhāya spṛṣṭvā cāgniṃ samāhitaḥ |
jñātiśraiṣṭhyamavāpnoti prayogakuśalo naraḥ || 94 ||
[Analyze grammar]

adbhiḥ prāṇānsamālabhya nābhiṃ pāṇitalena ca |
spṛśaṃścaiva pratiṣṭheta na cāpyārdreṇa pāṇinā || 95 ||
[Analyze grammar]

aṅguṣṭhasyāntarāle ca brāhmaṃ tīrthamudāhṛtam |
kaniṣṭhikāyāḥ paścāttu devatīrthamihocyate || 96 ||
[Analyze grammar]

aṅguṣṭhasya ca yanmadhyaṃ pradeśinyāśca bhārata |
tena pitryāṇi kurvīta spṛṣṭvāpo nyāyatastathā || 97 ||
[Analyze grammar]

parāpavādaṃ na brūyānnāpriyaṃ ca kadācana |
na manyuḥ kaścidutpādyaḥ puruṣeṇa bhavārthinā || 98 ||
[Analyze grammar]

patitaistu kathāṃ neccheddarśanaṃ cāpi varjayet |
saṃsargaṃ ca na gaccheta tathāyurvindate mahat || 99 ||
[Analyze grammar]

na divā maithunaṃ gacchenna kanyāṃ na ca bandhakīm |
na cāsnātāṃ striyaṃ gacchettathāyurvindate mahat || 100 ||
[Analyze grammar]

sve sve tīrthe samācamya kārye samupakalpite |
triḥ pītvāpo dviḥ pramṛjya kṛtaśauco bhavennaraḥ || 101 ||
[Analyze grammar]

indriyāṇi sakṛtspṛśya trirabhyukṣya ca mānavaḥ |
kurvīta pitryaṃ daivaṃ ca vedadṛṣṭena karmaṇā || 102 ||
[Analyze grammar]

brāhmaṇārthe ca yacchaucaṃ tacca me śṛṇu kaurava |
pravṛttaṃ ca hitaṃ coktvā bhojanādyantayostathā || 103 ||
[Analyze grammar]

sarvaśauceṣu brāhmeṇa tīrthena samupaspṛśet |
niṣṭhīvya tu tathā kṣutvā spṛśyāpo hi śucirbhavet || 104 ||
[Analyze grammar]

vṛddho jñātistathā mitraṃ daridro yo bhavedapi |
gṛhe vāsayitavyāste dhanyamāyuṣyameva ca || 105 ||
[Analyze grammar]

gṛhe pārāvatā dhanyāḥ śukāśca sahasārikāḥ |
gṛheṣvete na pāpāya tathā vai tailapāyikāḥ || 106 ||
[Analyze grammar]

uddīpakāśca gṛdhrāśca kapotā bhramarāstathā |
niviśeyuryadā tatra śāntimeva tadācaret || 107 ||
[Analyze grammar]

amaṅgalyāni caitāni tathākrośo mahātmanām |
mahātmanāṃ ca guhyāni na vaktavyāni karhicit || 108 ||
[Analyze grammar]

agamyāśca na gaccheta rājapatnīḥ sakhīstathā |
vaidyānāṃ bālavṛddhānāṃ bhṛtyānāṃ ca yudhiṣṭhira || 109 ||
[Analyze grammar]

bandhūnāṃ brāhmaṇānāṃ ca tathā śāraṇikasya ca |
saṃbandhināṃ ca rājendra tathāyurvindate mahat || 110 ||
[Analyze grammar]

brāhmaṇasthapatibhyāṃ ca nirmitaṃ yanniveśanam |
tadāvasetsadā prājño bhavārthī manujeśvara || 111 ||
[Analyze grammar]

saṃdhyāyāṃ na svapedrājanvidyāṃ na ca samācaret |
na bhuñjīta ca medhāvī tathāyurvindate mahat || 112 ||
[Analyze grammar]

naktaṃ na kuryātpitryāṇi bhuktvā caiva prasādhanam |
pānīyasya kriyā naktaṃ na kāryā bhūtimicchatā || 113 ||
[Analyze grammar]

varjanīyāśca vai nityaṃ saktavo niśi bhārata |
śeṣāṇi cāvadātāni pānīyaṃ caiva bhojane || 114 ||
[Analyze grammar]

sauhityaṃ ca na kartavyaṃ rātrau naiva samācaret |
dvijacchedaṃ na kurvīta bhuktvā na ca samācaret || 115 ||
[Analyze grammar]

mahākulaprasūtāṃ ca praśastāṃ lakṣaṇaistathā |
vayaḥsthāṃ ca mahāprājña kanyāmāvoḍhumarhati || 116 ||
[Analyze grammar]

apatyamutpādya tataḥ pratiṣṭhāpya kulaṃ tathā |
putrāḥ pradeyā jñāneṣu kuladharmeṣu bhārata || 117 ||
[Analyze grammar]

kanyā cotpādya dātavyā kulaputrāya dhīmate |
putrā niveśyāśca kulādbhṛtyā labhyāśca bhārata || 118 ||
[Analyze grammar]

śiraḥsnāto'tha kurvīta daivaṃ pitryamathāpi ca |
nakṣatre na ca kurvīta yasmiñjāto bhavennaraḥ |
na proṣṭhapadayoḥ kāryaṃ tathāgneye ca bhārata || 119 ||
[Analyze grammar]

dāruṇeṣu ca sarveṣu pratyahaṃ ca vivarjayet |
jyotiṣe yāni coktāni tāni sarvāṇi varjayet || 120 ||
[Analyze grammar]

prāṅmukhaḥ śmaśrukarmāṇi kārayeta samāhitaḥ |
udaṅmukho vā rājendra tathāyurvindate mahat || 121 ||
[Analyze grammar]

parivādaṃ na ca brūyātpareṣāmātmanastathā |
parivādo na dharmāya procyate bharatarṣabha || 122 ||
[Analyze grammar]

varjayedvyaṅginīṃ nārīṃ tathā kanyāṃ narottama |
samārṣāṃ vyaṅgitāṃ caiva mātuḥ svakulajāṃ tathā || 123 ||
[Analyze grammar]

vṛddhāṃ pravrajitāṃ caiva tathaiva ca pativratām |
tathātikṛṣṇavarṇāṃ ca varṇotkṛṣṭāṃ ca varjayet || 124 ||
[Analyze grammar]

ayoniṃ ca viyoniṃ ca na gaccheta vicakṣaṇaḥ |
piṅgalāṃ kuṣṭhinīṃ nārīṃ na tvamāvoḍhumarhasi || 125 ||
[Analyze grammar]

apasmārikule jātāṃ nihīnāṃ caiva varjayet |
śvitriṇāṃ ca kule jātāṃ trayāṇāṃ manujeśvara || 126 ||
[Analyze grammar]

lakṣaṇairanvitā yā ca praśastā yā ca lakṣaṇaiḥ |
manojñā darśanīyā ca tāṃ bhavānvoḍhumarhati || 127 ||
[Analyze grammar]

mahākule niveṣṭavyaṃ sadṛśe vā yudhiṣṭhira |
avarā patitā caiva na grāhyā bhūtimicchatā || 128 ||
[Analyze grammar]

agnīnutpādya yatnena kriyāḥ suvihitāśca yāḥ |
vedeṣu brāhmaṇaiḥ proktāstāśca sarvāḥ samācaret || 129 ||
[Analyze grammar]

na cerṣyā strīṣu kartavyā dārā rakṣyāśca sarvaśaḥ |
anāyuṣyā bhavedīrṣyā tasmādīrṣyāṃ vivarjayet || 130 ||
[Analyze grammar]

anāyuṣyo divāsvapnastathābhyuditaśāyitā |
prātarniśāyāṃ ca tathā ye cocchiṣṭāḥ svapanti vai || 131 ||
[Analyze grammar]

pāradāryamanāyuṣyaṃ nāpitocchiṣṭatā tathā |
yatnato vai na kartavyamabhyāsaścaiva bhārata || 132 ||
[Analyze grammar]

saṃdhyāṃ na bhuñjenna snāyānna purīṣaṃ samutsṛjet |
prayataśca bhavettasyāṃ na ca kiṃcitsamācaret || 133 ||
[Analyze grammar]

brāhmaṇānpūjayeccāpi tathā snātvā narādhipa |
devāṃśca praṇametsnāto gurūṃścāpyabhivādayet || 134 ||
[Analyze grammar]

animantrito na gaccheta yajñaṃ gacchettu darśakaḥ |
animantrite hyanāyuṣyaṃ gamanaṃ tatra bhārata || 135 ||
[Analyze grammar]

na caikena parivrājyaṃ na gantavyaṃ tathā niśi |
anāgatāyāṃ saṃdhyāyāṃ paścimāyāṃ gṛhe vaset || 136 ||
[Analyze grammar]

mātuḥ piturgurūṇāṃ ca kāryamevānuśāsanam |
hitaṃ vāpyahitaṃ vāpi na vicāryaṃ nararṣabha || 137 ||
[Analyze grammar]

dhanurvede ca vede ca yatnaḥ kāryo narādhipa |
hastipṛṣṭhe'śvapṛṣṭhe ca rathacaryāsu caiva ha |
yatnavānbhava rājendra yatnavānsukhamedhate || 138 ||
[Analyze grammar]

apradhṛṣyaśca śatrūṇāṃ bhṛtyānāṃ svajanasya ca |
prajāpālanayuktaśca na kṣatiṃ labhate kvacit || 139 ||
[Analyze grammar]

yuktiśāstraṃ ca te jñeyaṃ śabdaśāstraṃ ca bhārata |
gandharvaśāstraṃ ca kalāḥ parijñeyā narādhipa || 140 ||
[Analyze grammar]

purāṇamitihāsāśca tathākhyānāni yāni ca |
mahātmanāṃ ca caritaṃ śrotavyaṃ nityameva te || 141 ||
[Analyze grammar]

patnīṃ rajasvalāṃ caiva nābhigacchenna cāhvayet |
snātāṃ caturthe divase rātrau gacchedvicakṣaṇaḥ || 142 ||
[Analyze grammar]

pañcame divase nārī ṣaṣṭhe'hani pumānbhavet |
etena vidhinā patnīmupagaccheta paṇḍitaḥ || 143 ||
[Analyze grammar]

jñātisaṃbandhimitrāṇi pūjanīyāni nityaśaḥ |
yaṣṭavyaṃ ca yathāśakti yajñairvividhadakṣiṇaiḥ |
ataūrdhvamaraṇyaṃ ca sevitavyaṃ narādhipa || 144 ||
[Analyze grammar]

eṣa te lakṣaṇoddeśa āyuṣyāṇāṃ prakīrtitaḥ |
śeṣastraividyavṛddhebhyaḥ pratyāhāryo yudhiṣṭhira || 145 ||
[Analyze grammar]

ācāro bhūtijanana ācāraḥ kīrtivardhanaḥ |
ācārādvardhate hyāyurācāro hantyalakṣaṇam || 146 ||
[Analyze grammar]

āgamānāṃ hi sarveṣāmācāraḥ śreṣṭha ucyate |
ācāraprabhavo dharmo dharmādāyurvivardhate || 147 ||
[Analyze grammar]

etadyaśasyamāyuṣyaṃ svargyaṃ svastyayanaṃ mahat |
anukampatā sarvavarṇānbrahmaṇā samudāhṛtam || 148 ||
[Analyze grammar]