Chapter 105

yudhiṣṭhira uvāca |
eko lokaḥ sukṛtināṃ sarve tvāho pitāmaha |
uta tatrāpi nānātvaṃ tanme brūhi pitāmaha || 1 ||
[Analyze grammar]

bhīṣma uvāca |
karmabhiḥ pārtha nānātvaṃ lokānāṃ yānti mānavāḥ |
puṇyānpuṇyakṛto yānti pāpānpāpakṛto janāḥ || 2 ||
[Analyze grammar]

atrāpyudāharantīmamitihāsaṃ purātanam |
gautamasya munestāta saṃvādaṃ vāsavasya ca || 3 ||
[Analyze grammar]

brāhmaṇo gautamaḥ kaścinmṛdurdānto jitendriyaḥ |
mahāvane hastiśiśuṃ paridyūnamamātṛkam || 4 ||
[Analyze grammar]

taṃ dṛṣṭvā jīvayāmāsa sānukrośo dhṛtavrataḥ |
sa tu dīrgheṇa kālena babhūvātibalo mahān || 5 ||
[Analyze grammar]

taṃ prabhinnaṃ mahānāgaṃ prasrutaṃ sarvato madam |
dhṛtarāṣṭrasya rūpeṇa śakro jagrāha hastinam || 6 ||
[Analyze grammar]

hriyamāṇaṃ tu taṃ dṛṣṭvā gautamaḥ saṃśitavrataḥ |
abhyabhāṣata rājānaṃ dhṛtarāṣṭraṃ mahātapāḥ || 7 ||
[Analyze grammar]

mā me hārṣīrhastinaṃ putramenaṃ duḥkhātpuṣṭaṃ dhṛtarāṣṭrākṛtajña |
mitraṃ satāṃ saptapadaṃ vadanti mitradroho naiva rājanspṛśettvām || 8 ||
[Analyze grammar]

idhmodakapradātāraṃ śūnyapālakamāśrame |
vinītamācāryakule suyuktaṃ gurukarmaṇi || 9 ||
[Analyze grammar]

śiṣṭaṃ dāntaṃ kṛtajñaṃ ca priyaṃ ca satataṃ mama |
na me vikrośato rājanhartumarhasi kuñjaram || 10 ||
[Analyze grammar]

dhṛtarāṣṭra uvāca |
gavāṃ sahasraṃ bhavate dadāmi dāsīśataṃ niṣkaśatāni pañca |
anyacca vittaṃ vividhaṃ maharṣe kiṃ brāhmaṇasyeha gajena kṛtyam || 11 ||
[Analyze grammar]

gautama uvāca |
tvāmeva gāvo'bhi bhavantu rājandāsyaḥ saniṣkā vividhaṃ ca ratnam |
anyacca vittaṃ vividhaṃ narendra kiṃ brāhmaṇasyeha dhanena kṛtyam || 12 ||
[Analyze grammar]

dhṛtarāṣṭra uvāca |
brāhmaṇānāṃ hastibhirnāsti kṛtyaṃ rājanyānāṃ nāgakulāni vipra |
svaṃ vāhanaṃ nayato nāstyadharmo nāgaśreṣṭhādgautamāsmānnivarta || 13 ||
[Analyze grammar]

gautama uvāca |
yatra preto nandati puṇyakarmā yatra pretaḥ śocati pāpakarmā |
vaivasvatasya sadane mahātmanastatra tvāhaṃ hastinaṃ yātayiṣye || 14 ||
[Analyze grammar]

dhṛtarāṣṭra uvāca |
ye niṣkriyā nāstikāḥ śraddadhānāḥ pāpātmāna indriyārthe niviṣṭāḥ |
yamasya te yātanāṃ prāpnuvanti paraṃ gantā dhṛtarāṣṭro na tatra || 15 ||
[Analyze grammar]

gautama uvāca |
vaivasvatī saṃyamanī janānāṃ yatrānṛtaṃ nocyate yatra satyam |
yatrābalā balinaṃ yātayanti tatra tvāhaṃ hastinaṃ yātayiṣye || 16 ||
[Analyze grammar]

dhṛtarāṣṭra uvāca |
jyeṣṭhāṃ svasāraṃ pitaraṃ mātaraṃ ca guruṃ yathā mānayantaścaranti |
tathāvidhānāmeṣa loko maharṣe paraṃ gantā dhṛtarāṣṭro na tatra || 17 ||
[Analyze grammar]

gautama uvāca |
mandākinī vaiśravaṇasya rājño mahābhogā bhogijanapraveśyā |
gandharvayakṣairapsarobhiśca juṣṭā tatra tvāhaṃ hastinaṃ yātayiṣye || 18 ||
[Analyze grammar]

dhṛtarāṣṭra uvāca |
atithivratāḥ suvratā ye janā vai pratiśrayaṃ dadati brāhmaṇebhyaḥ |
śiṣṭāśinaḥ saṃvibhajyāśritāṃśca mandākinīṃ te'pi vibhūṣayanti || 19 ||
[Analyze grammar]

gautama uvāca |
meroragre yadvanaṃ bhāti ramyaṃ supuṣpitaṃ kiṃnaragītajuṣṭam |
sudarśanā yatra jambūrviśālā tatra tvāhaṃ hastinaṃ yātayiṣye || 20 ||
[Analyze grammar]

dhṛtarāṣṭra uvāca |
ye brāhmaṇā mṛdavaḥ satyaśīlā bahuśrutāḥ sarvabhūtābhirāmāḥ |
ye'dhīyante setihāsaṃ purāṇaṃ madhvāhutyā juhvati ca dvijebhyaḥ || 21 ||
[Analyze grammar]

tathāvidhānāmeṣa loko maharṣe paraṃ gantā dhṛtarāṣṭro na tatra |
yadvidyate viditaṃ sthānamasti tadbrūhi tvaṃ tvarito hyeṣa yāmi || 22 ||
[Analyze grammar]

gautama uvāca |
supuṣpitaṃ kiṃnararājajuṣṭaṃ priyaṃ vanaṃ nandanaṃ nāradasya |
gandharvāṇāmapsarasāṃ ca sadma tatra tvāhaṃ hastinaṃ yātayiṣye || 23 ||
[Analyze grammar]

dhṛtarāṣṭra uvāca |
ye nṛttagītakuśalā janāḥ sadā hyayācamānāḥ sahitāścaranti |
tathāvidhānāmeṣa loko maharṣe paraṃ gantā dhṛtarāṣṭro na tatra || 24 ||
[Analyze grammar]

gautama uvāca |
yatrottarāḥ kuravo bhānti ramyā devaiḥ sārdhaṃ modamānā narendra |
yatrāgniyaunāśca vasanti viprā hyayonayaḥ parvatayonayaśca || 25 ||
[Analyze grammar]

yatra śakro varṣati sarvakāmānyatra striyaḥ kāmacārāścaranti |
yatra cerṣyā nāsti nārīnarāṇāṃ tatra tvāhaṃ hastinaṃ yātayiṣye || 26 ||
[Analyze grammar]

dhṛtarāṣṭra uvāca |
ye sarvabhūteṣu nivṛttakāmā amāṃsādā nyastadaṇḍāścaranti |
na hiṃsanti sthāvaraṃ jaṅgamaṃ ca bhūtānāṃ ye sarvabhūtātmabhūtāḥ || 27 ||
[Analyze grammar]

nirāśiṣo nirmamā vītarāgā lābhālābhe tulyanindāpraśaṃsāḥ |
tathāvidhānāmeṣa loko maharṣe paraṃ gantā dhṛtarāṣṭro na tatra || 28 ||
[Analyze grammar]

gautama uvāca |
tataḥ paraṃ bhānti lokāḥ sanātanāḥ supuṇyagandhā nirmalā vītaśokāḥ |
somasya rājñaḥ sadane mahātmanastatra tvāhaṃ hastinaṃ yātayiṣye || 29 ||
[Analyze grammar]

dhṛtarāṣṭra uvāca |
ye dānaśīlā na pratigṛhṇate sadā na cāpyarthānādadate parebhyaḥ |
yeṣāmadeyamarhate nāsti kiṃcitsarvātithyāḥ suprasādā janāśca || 30 ||
[Analyze grammar]

ye kṣantāro nābhijalpanti cānyāñśaktā bhūtvā satataṃ puṇyaśīlāḥ |
tathāvidhānāmeṣa loko maharṣe paraṃ gantā dhṛtarāṣṭro na tatra || 31 ||
[Analyze grammar]

gautama uvāca |
tataḥ paraṃ bhānti lokāḥ sanātanā virajaso vitamaskā viśokāḥ |
ādityasya sumahāntaḥ suvṛttāstatra tvāhaṃ hastinaṃ yātayiṣye || 32 ||
[Analyze grammar]

dhṛtarāṣṭra uvāca |
svādhyāyaśīlā guruśuśrūṣaṇe ratāstapasvinaḥ suvratāḥ satyasaṃdhāḥ |
ācāryāṇāmapratikūlabhāṣiṇo nityotthitā gurukarmasvacodyāḥ || 33 ||
[Analyze grammar]

tathāvidhānāmeṣa loko maharṣe viśuddhānāṃ bhāvitavāṅmatīnām |
satye sthitānāṃ vedavidāṃ mahātmanāṃ paraṃ gantā dhṛtarāṣṭro na tatra || 34 ||
[Analyze grammar]

gautama uvāca |
tataḥ pare bhānti lokāḥ sanātanāḥ supuṇyagandhā virajā viśokāḥ |
varuṇasya rājñaḥ sadane mahātmanastatra tvāhaṃ hastinaṃ yātayiṣye || 35 ||
[Analyze grammar]

dhṛtarāṣṭra uvāca |
cāturmāsyairye yajante janāḥ sadā tatheṣṭīnāṃ daśaśataṃ prāpnuvanti |
ye cāgnihotraṃ juhvati śraddadhānā yathānyāyaṃ trīṇi varṣāṇi viprāḥ || 36 ||
[Analyze grammar]

svadāriṇāṃ dharmadhure mahātmanāṃ yathocite vartmani susthitānām |
dharmātmanāmudvahatāṃ gatiṃ tāṃ paraṃ gantā dhṛtarāṣṭro na tatra || 37 ||
[Analyze grammar]

gautama uvāca |
indrasya lokā virajā viśokā duranvayāḥ kāṅkṣitā mānavānām |
tasyāhaṃ te bhavane bhūritejaso rājannimaṃ hastinaṃ yātayiṣye || 38 ||
[Analyze grammar]

dhṛtarāṣṭra uvāca |
śatavarṣajīvī yaśca śūro manuṣyo vedādhyāyī yaśca yajvāpramattaḥ |
ete sarve śakralokaṃ vrajanti paraṃ gantā dhṛtarāṣṭro na tatra || 39 ||
[Analyze grammar]

gautama uvāca |
prājāpatyāḥ santi lokā mahānto nākasya pṛṣṭhe puṣkalā vītaśokāḥ |
manīṣitāḥ sarvalokodbhavānāṃ tatra tvāhaṃ hastinaṃ yātayiṣye || 40 ||
[Analyze grammar]

dhṛtarāṣṭra uvāca |
ye rājāno rājasūyābhiṣiktā dharmātmāno rakṣitāraḥ prajānām |
ye cāśvamedhāvabhṛthāplutāṅgāsteṣāṃ lokā dhṛtarāṣṭro na tatra || 41 ||
[Analyze grammar]

gautama uvāca |
tataḥ paraṃ bhānti lokāḥ sanātanāḥ supuṇyagandhā virajā vītaśokāḥ |
tasminnahaṃ durlabhe tvāpradhṛṣye gavāṃ loke hastinaṃ yātayiṣye || 42 ||
[Analyze grammar]

dhṛtarāṣṭra uvāca |
yo gosahasrī śatadaḥ samāṃ samāṃ yo gośatī daśa dadyācca śaktyā |
tathā daśabhyo yaśca dadyādihaikāṃ pañcabhyo vā dānaśīlastathaikām || 43 ||
[Analyze grammar]

ye jīryante brahmacaryeṇa viprā brāhmīṃ vācaṃ parirakṣanti caiva |
manasvinastīrthayātrāparāyaṇāste tatra modanti gavāṃ vimāne || 44 ||
[Analyze grammar]

prabhāsaṃ mānasaṃ puṇyaṃ puṣkarāṇi mahatsaraḥ |
puṇyaṃ ca naimiṣaṃ tīrthaṃ bāhudāṃ karatoyinīm || 45 ||
[Analyze grammar]

gayāṃ gayaśiraścaiva vipāśāṃ sthūlavālukām |
tūṣṇīṃgaṅgāṃ daśagaṅgāṃ mahāhradamathāpi ca || 46 ||
[Analyze grammar]

gautamīṃ kauśikīṃ pākāṃ mahātmāno dhṛtavratāḥ |
sarasvatīdṛṣadvatyau yamunāṃ ye prayānti ca || 47 ||
[Analyze grammar]

tatra te divyasaṃsthānā divyamālyadharāḥ śivāḥ |
prayānti puṇyagandhāḍhyā dhṛtarāṣṭro na tatra vai || 48 ||
[Analyze grammar]

gautama uvāca |
yatra śītabhayaṃ nāsti na coṣṇabhayamaṇvapi |
na kṣutpipāse na glānirna duḥkhaṃ na sukhaṃ tathā || 49 ||
[Analyze grammar]

na dveṣyo na priyaḥ kaścinna bandhurna ripustathā |
na jarāmaraṇe vāpi na puṇyaṃ na ca pātakam || 50 ||
[Analyze grammar]

tasminvirajasi sphīte prajñāsattvavyavasthite |
svayaṃbhubhavane puṇye hastinaṃ me yatiṣyati || 51 ||
[Analyze grammar]

dhṛtarāṣṭra uvāca |
nirmuktāḥ sarvasaṅgebhyo kṛtātmāno yatavratāḥ |
adhyātmayogasaṃsthāne yuktāḥ svargagatiṃ gatāḥ || 52 ||
[Analyze grammar]

te brahmabhavanaṃ puṇyaṃ prāpnuvantīha sāttvikāḥ |
na tatra dhṛtarāṣṭraste śakyo draṣṭuṃ mahāmune || 53 ||
[Analyze grammar]

gautama uvāca |
rathantaraṃ yatra bṛhacca gīyate yatra vedī puṇḍarīkaiḥ stṛṇoti |
yatropayāti haribhiḥ somapīthī tatra tvāhaṃ hastinaṃ yātayiṣye || 54 ||
[Analyze grammar]

budhyāmi tvāṃ vṛtrahaṇaṃ śatakratuṃ vyatikramantaṃ bhuvanāni viśvā |
kaccinna vācā vṛjinaṃ kadācidakārṣaṃ te manaso'bhiṣaṅgāt || 55 ||
[Analyze grammar]

śakra uvāca |
yasmādimaṃ lokapathaṃ prajānāmanvāgamaṃ padavāde gajasya |
tasmādbhavānpraṇataṃ mānuśāstu bravīṣi yattatkaravāṇi sarvam || 56 ||
[Analyze grammar]

gautama uvāca |
śvetaṃ kareṇuṃ mama putranāgaṃ yaṃ me'hārṣīrdaśavarṣāṇi bālam |
yo me vane vasato'bhūddvitīyastameva me dehi surendra nāgam || 57 ||
[Analyze grammar]

śakra uvāca |
ayaṃ sutaste dvijamukhya nāgaścāghrāyate tvāmabhivīkṣamāṇaḥ |
pādau ca te nāsikayopajighrate śreyo mama dhyāhi namaśca te'stu || 58 ||
[Analyze grammar]

gautama uvāca |
śivaṃ sadaiveha surendra tubhyaṃ dhyāyāmi pūjāṃ ca sadā prayuñje |
mamāpi tvaṃ śakra śivaṃ dadasva tvayā dattaṃ pratigṛhṇāmi nāgam || 59 ||
[Analyze grammar]

śakra uvāca |
yeṣāṃ vedā nihitā vai guhāyāṃ manīṣiṇāṃ sattvavatāṃ mahātmanām |
teṣāṃ tvayaikena mahātmanāsmi buddhastasmātprītimāṃste'hamadya || 60 ||
[Analyze grammar]

hantaihi brāhmaṇa kṣipraṃ saha putreṇa hastinā |
prāpnuhi tvaṃ śubhāṃllokānahnāya ca cirāya ca || 61 ||
[Analyze grammar]

bhīṣma uvāca |
sa gautamaṃ puraskṛtya saha putreṇa hastinā |
divamācakrame vajrī sadbhiḥ saha durāsadam || 62 ||
[Analyze grammar]