Chapter 84

devā ūcuḥ |
asurastārako nāma tvayā dattavaraḥ prabho |
surānṛṣīṃśca kliśnāti vadhastasya vidhīyatām || 1 ||
[Analyze grammar]

tasmādbhayaṃ samutpannamasmākaṃ vai pitāmaha |
paritrāyasva no deva na hyanyā gatirasti naḥ || 2 ||
[Analyze grammar]

brahmovāca |
samo'haṃ sarvabhūtānāmadharmaṃ neha rocaye |
hanyatāṃ tārakaḥ kṣipraṃ surarṣigaṇabādhakaḥ || 3 ||
[Analyze grammar]

vedā dharmāśca notsādaṃ gaccheyuḥ surasattamāḥ |
vihitaṃ pūrvamevātra mayā vai vyetu vo jvaraḥ || 4 ||
[Analyze grammar]

devā ūcuḥ |
varadānādbhagavato daiteyo balagarvitaḥ |
devairna śakyate hantuṃ sa kathaṃ praśamaṃ vrajet || 5 ||
[Analyze grammar]

sa hi naiva sma devānāṃ nāsurāṇāṃ na rakṣasām |
vadhyaḥ syāmiti jagrāha varaṃ tvattaḥ pitāmaha || 6 ||
[Analyze grammar]

devāśca śaptā rudrāṇyā prajocchede purā kṛte |
na bhaviṣyati vo'patyamiti sarvajagatpate || 7 ||
[Analyze grammar]

brahmovāca |
hutāśano na tatrāsīcchāpakāle surottamāḥ |
sa utpādayitāpatyaṃ vadhārthaṃ tridaśadviṣām || 8 ||
[Analyze grammar]

tadvai sarvānatikramya devadānavarākṣasān |
mānuṣānatha gandharvānnāgānatha ca pakṣiṇaḥ || 9 ||
[Analyze grammar]

astreṇāmoghapātena śaktyā taṃ ghātayiṣyati |
yato vo bhayamutpannaṃ ye cānye suraśatravaḥ || 10 ||
[Analyze grammar]

sanātano hi saṃkalpaḥ kāma ityabhidhīyate |
rudrasya tejaḥ praskannamagnau nipatitaṃ ca tat || 11 ||
[Analyze grammar]

tattejo'gnirmahadbhūtaṃ dvitīyamiva pāvakam |
vadhārthaṃ devaśatrūṇāṃ gaṅgāyāṃ janayiṣyati || 12 ||
[Analyze grammar]

sa tu nāvāpa taṃ śāpaṃ naṣṭaḥ sa hutabhuktadā |
tasmādvo bhayahṛddevāḥ samutpatsyati pāvakiḥ || 13 ||
[Analyze grammar]

anviṣyatāṃ vai jvalanastathā cādya niyujyatām |
tārakasya vadhopāyaḥ kathito vai mayānaghāḥ || 14 ||
[Analyze grammar]

na hi tejasvināṃ śāpāstejaḥsu prabhavanti vai |
balānyatibalaṃ prāpya nabalāni bhavanti vai || 15 ||
[Analyze grammar]

hanyādavadhyānvaradānapi caiva tapasvinaḥ |
saṃkalpābhiruciḥ kāmaḥ sanātanatamo'nalaḥ || 16 ||
[Analyze grammar]

jagatpatiranirdeśyaḥ sarvagaḥ sarvabhāvanaḥ |
hṛcchayaḥ sarvabhūtānāṃ jyeṣṭho rudrādapi prabhuḥ || 17 ||
[Analyze grammar]

anviṣyatāṃ sa tu kṣipraṃ tejorāśirhutāśanaḥ |
sa vo manogataṃ kāmaṃ devaḥ saṃpādayiṣyati || 18 ||
[Analyze grammar]

etadvākyamupaśrutya tato devā mahātmanaḥ |
jagmuḥ saṃsiddhasaṃkalpāḥ paryeṣanto vibhāvasum || 19 ||
[Analyze grammar]

tatastrailokyamṛṣayo vyacinvanta suraiḥ saha |
kāṅkṣanto darśanaṃ vahneḥ sarve tadgatamānasāḥ || 20 ||
[Analyze grammar]

pareṇa tapasā yuktāḥ śrīmanto lokaviśrutāḥ |
lokānanvacaransiddhāḥ sarva eva bhṛgūdvaha |
naṣṭamātmani saṃlīnaṃ nādhijagmurhutāśanam || 21 ||
[Analyze grammar]

tataḥ saṃjātasaṃtrāsānagnerdarśanalālasān |
jalecaraḥ klāntamanāstejasāgneḥ pradīpitaḥ |
uvāca devānmaṇḍūko rasātalatalotthitaḥ || 22 ||
[Analyze grammar]

rasātalatale devā vasatyagniriti prabho |
saṃtāpādiha saṃprāptaḥ pāvakaprabhavādaham || 23 ||
[Analyze grammar]

sa saṃsupto jale devā bhagavānhavyavāhanaḥ |
apaḥ saṃsṛjya tejobhistena saṃtāpitā vayam || 24 ||
[Analyze grammar]

tasya darśanamiṣṭaṃ vo yadi devā vibhāvasoḥ |
tatrainamabhigacchadhvaṃ kāryaṃ vo yadi vahninā || 25 ||
[Analyze grammar]

gamyatāṃ sādhayiṣyāmo vayaṃ hyagnibhayātsurāḥ |
etāvaduktvā maṇḍūkastvarito jalamāviśat || 26 ||
[Analyze grammar]

hutāśanastu bubudhe maṇḍūkasyātha paiśunam |
śaśāpa sa tamāsādya na rasānvetsyasīti vai || 27 ||
[Analyze grammar]

taṃ sa saṃyujya śāpena maṇḍūkaṃ pāvako yayau |
anyatra vāsāya vibhurna ca devānadarśayat || 28 ||
[Analyze grammar]

devāstvanugrahaṃ cakrurmaṇḍūkānāṃ bhṛgūdvaha |
yattacchṛṇu mahābāho gadato mama sarvaśaḥ || 29 ||
[Analyze grammar]

devā ūcuḥ |
agniśāpādajihvāpi rasajñānabahiṣkṛtāḥ |
sarasvatīṃ bahuvidhāṃ yūyamuccārayiṣyatha || 30 ||
[Analyze grammar]

bilavāsagatāṃścaiva nirādānānacetasaḥ |
gatāsūnapi vaḥ śuṣkānbhūmiḥ saṃdhārayiṣyati |
tamogatāyāmapi ca niśāyāṃ vicariṣyatha || 31 ||
[Analyze grammar]

ityuktvā tāṃstato devāḥ punareva mahīmimām |
parīyurjvalanasyārthe na cāvindanhutāśanam || 32 ||
[Analyze grammar]

atha tāndviradaḥ kaścitsurendradviradopamaḥ |
aśvatthastho'gnirityevaṃ prāha devānbhṛgūdvaha || 33 ||
[Analyze grammar]

śaśāpa jvalanaḥ sarvāndviradānkrodhamūrchitaḥ |
pratīpā bhavatāṃ jihvā bhavitrīti bhṛgūdvaha || 34 ||
[Analyze grammar]

ityuktvā niḥsṛto'śvatthādagnirvāraṇasūcitaḥ |
praviveśa śamīgarbhamatha vahniḥ suṣupsayā || 35 ||
[Analyze grammar]

anugrahaṃ tu nāgānāṃ yaṃ cakruḥ śṛṇu taṃ prabho |
devā bhṛgukulaśreṣṭha prītāḥ satyaparākramāḥ || 36 ||
[Analyze grammar]

devā ūcuḥ |
pratīpayā jihvayāpi sarvāhārānkariṣyatha |
vācaṃ coccārayiṣyadhvamuccairavyañjitākṣaram |
ityuktvā punarevāgnimanusasrurdivaukasaḥ || 37 ||
[Analyze grammar]

aśvatthānniḥsṛtaścāgniḥ śamīgarbhagatastadā |
śukena khyāpito vipra taṃ devāḥ samupādravan || 38 ||
[Analyze grammar]

śaśāpa śukamagnistu vāgvihīno bhaviṣyasi |
jihvāṃ cāvartayāmāsa tasyāpi hutabhuktadā || 39 ||
[Analyze grammar]

dṛṣṭvā tu jvalanaṃ devāḥ śukamūcurdayānvitāḥ |
bhavitā na tvamatyantaṃ śakune naṣṭavāgiti || 40 ||
[Analyze grammar]

āvṛttajihvasya sato vākyaṃ kāntaṃ bhaviṣyati |
bālasyeva pravṛddhasya kalamavyaktamadbhutam || 41 ||
[Analyze grammar]

ityuktvā taṃ śamīgarbhe vahnimālakṣya devatāḥ |
tadevāyatanaṃ cakruḥ puṇyaṃ sarvakriyāsvapi || 42 ||
[Analyze grammar]

tataḥprabhṛti cāpyagniḥ śamīgarbheṣu dṛśyate |
utpādane tathopāyamanujagmuśca mānavāḥ || 43 ||
[Analyze grammar]

āpo rasātale yāstu saṃsṛṣṭāścitrabhānunā |
tāḥ parvataprasravaṇairūṣmāṃ muñcanti bhārgava |
pāvakenādhiśayatā saṃtaptāstasya tejasā || 44 ||
[Analyze grammar]

tato'gnirdevatā dṛṣṭvā babhūva vyathitastadā |
kimāgamanamityevaṃ tānapṛcchata pāvakaḥ || 45 ||
[Analyze grammar]

tamūcurvibudhāḥ sarve te caiva paramarṣayaḥ |
tvāṃ niyokṣyāmahe kārye tadbhavānkartumarhati |
kṛte ca tasminbhavitā tavāpi sumahānguṇaḥ || 46 ||
[Analyze grammar]

agniruvāca |
brūta yadbhavatāṃ kāryaṃ sarvaṃ kartāsmi tatsurāḥ |
bhavatāṃ hi niyojyo'haṃ mā vo'trāstu vicāraṇā || 47 ||
[Analyze grammar]

devā ūcuḥ |
asurastārako nāma brahmaṇo varadarpitaḥ |
asmānprabādhate vīryādvadhastasya vidhīyatām || 48 ||
[Analyze grammar]

imāndevagaṇāṃstāta prajāpatigaṇāṃstathā |
ṛṣīṃścāpi mahābhāgānparitrāyasva pāvaka || 49 ||
[Analyze grammar]

apatyaṃ tejasā yuktaṃ pravīraṃ janaya prabho |
yadbhayaṃ no'surāttasmānnāśayeddhavyavāhana || 50 ||
[Analyze grammar]

śaptānāṃ no mahādevyā nānyadasti parāyaṇam |
anyatra bhavato vīryaṃ tasmāttrāyasva nastataḥ || 51 ||
[Analyze grammar]

ityuktaḥ sa tathetyuktvā bhagavānhavyakavyabhuk |
jagāmātha durādharṣo gaṅgāṃ bhāgīrathīṃ prati || 52 ||
[Analyze grammar]

tayā cāpyabhavanmiśro garbhaścāsyābhavattadā |
vavṛdhe sa tadā garbhaḥ kakṣe kṛṣṇagatiryathā || 53 ||
[Analyze grammar]

tejasā tasya garbhasya gaṅgā vihvalacetanā |
saṃtāpamagamattīvraṃ sā soḍhuṃ na śaśāka ha || 54 ||
[Analyze grammar]

āhite jvalanenātha garbhe tejaḥsamanvite |
gaṅgāyāmasuraḥ kaścidbhairavaṃ nādamutsṛjat || 55 ||
[Analyze grammar]

abuddhāpatitenātha nādena vipulena sā |
vitrastodbhrāntanayanā gaṅgā viplutalocanā |
visaṃjñā nāśakadgarbhaṃ saṃdhārayitumātmanā || 56 ||
[Analyze grammar]

sā tu tejaḥparītāṅgī kampamānā ca jāhnavī |
uvāca vacanaṃ vipra tadā garbhabaloddhatā |
na te śaktāsmi bhagavaṃstejaso'sya vidhāraṇe || 57 ||
[Analyze grammar]

vimūḍhāsmi kṛtānena tathāsvāsthyaṃ kṛtaṃ param |
vihvalā cāsmi bhagavaṃstejo naṣṭaṃ ca me'nagha || 58 ||
[Analyze grammar]

dhāraṇe nāsya śaktāhaṃ garbhasya tapatāṃ vara |
utsrakṣye'hamimaṃ duḥkhānna tu kāmātkathaṃcana || 59 ||
[Analyze grammar]

na cetaso'sti saṃsparśo mama deva vibhāvaso |
āpadarthe hi saṃbandhaḥ susūkṣmo'pi mahādyute || 60 ||
[Analyze grammar]

yadatra guṇasaṃpannamitaraṃ vā hutāśana |
tvayyeva tadahaṃ manye dharmādharmau ca kevalau || 61 ||
[Analyze grammar]

tāmuvāca tato vahnirdhāryatāṃ dhāryatāmayam |
garbho mattejasā yukto mahāguṇaphalodayaḥ || 62 ||
[Analyze grammar]

śaktā hyasi mahīṃ kṛtsnāṃ voḍhuṃ dhārayituṃ tathā |
na hi te kiṃcidaprāpyaṃ madretodhāraṇādṛte || 63 ||
[Analyze grammar]

sā vahninā vāryamāṇā devaiścāpi saridvarā |
samutsasarja taṃ garbhaṃ merau girivare tadā || 64 ||
[Analyze grammar]

samarthā dhāraṇe cāpi rudratejaḥpradharṣitā |
nāśakattaṃ tadā garbhaṃ saṃdhārayitumojasā || 65 ||
[Analyze grammar]

sā samutsṛjya taṃ duḥkhāddīptavaiśvānaraprabham |
darśayāmāsa cāgnistāṃ tadā gaṅgāṃ bhṛgūdvaha |
papraccha saritāṃ śreṣṭhāṃ kaccidgarbhaḥ sukhodayaḥ || 66 ||
[Analyze grammar]

kīdṛgvarṇo'pi vā devi kīdṛgrūpaśca dṛśyate |
tejasā kena vā yuktaḥ sarvametadbravīhi me || 67 ||
[Analyze grammar]

gaṅgovāca |
jātarūpaḥ sa garbho vai tejasā tvamivānala |
suvarṇo vimalo dīptaḥ parvataṃ cāvabhāsayat || 68 ||
[Analyze grammar]

padmotpalavimiśrāṇāṃ hradānāmiva śītalaḥ |
gandho'sya sa kadambānāṃ tulyo vai tapatāṃ vara || 69 ||
[Analyze grammar]

tejasā tasya garbhasya bhāskarasyeva raśmibhiḥ |
yaddravyaṃ parisaṃsṛṣṭaṃ pṛthivyāṃ parvateṣu vā |
tatsarvaṃ kāñcanībhūtaṃ samantātpratyadṛśyata || 70 ||
[Analyze grammar]

paryadhāvata śailāṃśca nadīḥ prasravaṇāni ca |
vyadīpayattejasā ca trailokyaṃ sacarācaram || 71 ||
[Analyze grammar]

evaṃrūpaḥ sa bhagavānputraste havyavāhana |
sūryavaiśvānarasamaḥ kāntyā soma ivāparaḥ |
evamuktvā tu sā devī tatraivāntaradhīyata || 72 ||
[Analyze grammar]

pāvakaścāpi tejasvī kṛtvā kāryaṃ divaukasām |
jagāmeṣṭaṃ tato deśaṃ tadā bhārgavanandana || 73 ||
[Analyze grammar]

etaiḥ karmaguṇairloke nāmāgneḥ parigīyate |
hiraṇyaretā iti vai ṛṣibhirvibudhaistathā |
pṛthivī ca tadā devī khyātā vasumatīti vai || 74 ||
[Analyze grammar]

sa tu garbho mahātejā gāṅgeyaḥ pāvakodbhavaḥ |
divyaṃ śaravaṇaṃ prāpya vavṛdhe'dbhutadarśanaḥ || 75 ||
[Analyze grammar]

dadṛśuḥ kṛttikāstaṃ tu bālārkasadṛśadyutim |
jātasnehāśca taṃ bālaṃ pupuṣuḥ stanyavisravaiḥ || 76 ||
[Analyze grammar]

tataḥ sa kārttikeyatvamavāpa paramadyutiḥ |
skannatvātskandatāṃ cāpi guhāvāsādguho'bhavat || 77 ||
[Analyze grammar]

evaṃ suvarṇamutpannamapatyaṃ jātavedasaḥ |
tatra jāmbūnadaṃ śreṣṭhaṃ devānāmapi bhūṣaṇam || 78 ||
[Analyze grammar]

tataḥprabhṛti cāpyetajjātarūpamudāhṛtam |
yatsuvarṇaṃ sa bhagavānagnirīśaḥ prajāpatiḥ || 79 ||
[Analyze grammar]

pavitrāṇāṃ pavitraṃ hi kanakaṃ dvijasattama |
agnīṣomātmakaṃ caiva jātarūpamudāhṛtam || 80 ||
[Analyze grammar]

ratnānāmuttamaṃ ratnaṃ bhūṣaṇānāṃ tathottamam |
pavitraṃ ca pavitrāṇāṃ maṅgalānāṃ ca maṅgalam || 81 ||
[Analyze grammar]