Chapter 31

yudhiṣṭhira uvāca |
śrutaṃ me mahadākhyānametatkurukulodvaha |
suduṣprāpaṃ bravīṣi tvaṃ brāhmaṇyaṃ vadatāṃ vara || 1 ||
[Analyze grammar]

viśvāmitreṇa ca purā brāhmaṇyaṃ prāptamityuta |
śrūyate vadase tacca duṣprāpamiti sattama || 2 ||
[Analyze grammar]

vītahavyaśca rājarṣiḥ śruto me vipratāṃ gataḥ |
tadeva tāvadgāṅgeya śrotumicchāmyahaṃ vibho || 3 ||
[Analyze grammar]

sa kena karmaṇā prāpto brāhmaṇyaṃ rājasattama |
vareṇa tapasā vāpi tanme vyākhyātumarhati || 4 ||
[Analyze grammar]

bhīṣma uvāca |
śṛṇu rājanyathā rājā vītahavyo mahāyaśāḥ |
kṣatriyaḥ sanpunaḥ prāpto brāhmaṇyaṃ lokasatkṛtam || 5 ||
[Analyze grammar]

manormahātmanastāta prajādharmeṇa śāsataḥ |
babhūva putro dharmātmā śaryātiriti viśrutaḥ || 6 ||
[Analyze grammar]

tasyānvavāye dvau rājanrājānau saṃbabhūvatuḥ |
hehayastālajaṅghaśca vatseṣu jayatāṃ vara || 7 ||
[Analyze grammar]

hehayasya tu putrāṇāṃ daśasu strīṣu bhārata |
śataṃ babhūva prakhyātaṃ śūrāṇāmanivartinām || 8 ||
[Analyze grammar]

tulyarūpaprabhāvāṇāṃ viduṣāṃ yuddhaśālinām |
dhanurvede ca vede ca sarvatraiva kṛtaśramāḥ || 9 ||
[Analyze grammar]

kāśiṣvapi nṛpo rājandivodāsapitāmahaḥ |
haryaśva iti vikhyāto babhūva jayatāṃ varaḥ || 10 ||
[Analyze grammar]

sa vītahavyadāyādairāgatya puruṣarṣabha |
gaṅgāyamunayormadhye saṃgrāme vinipātitaḥ || 11 ||
[Analyze grammar]

taṃ tu hatvā naravaraṃ hehayāste mahārathāḥ |
pratijagmuḥ purīṃ ramyāṃ vatsānāmakutobhayāḥ || 12 ||
[Analyze grammar]

haryaśvasya tu dāyādaḥ kāśirājo'bhyaṣicyata |
sudevo devasaṃkāśaḥ sākṣāddharma ivāparaḥ || 13 ||
[Analyze grammar]

sa pālayanneva mahīṃ dharmātmā kāśinandanaḥ |
tairvītahavyairāgatya yudhi sarvairvinirjitaḥ || 14 ||
[Analyze grammar]

tamapyājau vinirjitya pratijagmuryathāgatam |
saudevistvatha kāśīśo divodāso'bhyaṣicyata || 15 ||
[Analyze grammar]

divodāsastu vijñāya vīryaṃ teṣāṃ mahātmanām |
vārāṇasīṃ mahātejā nirmame śakraśāsanāt || 16 ||
[Analyze grammar]

viprakṣatriyasaṃbādhāṃ vaiśyaśūdrasamākulām |
naikadravyoccayavatīṃ samṛddhavipaṇāpaṇām || 17 ||
[Analyze grammar]

gaṅgāyā uttare kūle vaprānte rājasattama |
gomatyā dakṣiṇe caiva śakrasyevāmarāvatīm || 18 ||
[Analyze grammar]

tatra taṃ rājaśārdūlaṃ nivasantaṃ mahīpatim |
āgatya hehayā bhūyaḥ paryadhāvanta bhārata || 19 ||
[Analyze grammar]

sa niṣpatya dadau yuddhaṃ tebhyo rājā mahābalaḥ |
devāsurasamaṃ ghoraṃ divodāso mahādyutiḥ || 20 ||
[Analyze grammar]

sa tu yuddhe mahārāja dinānāṃ daśatīrdaśa |
hatavāhanabhūyiṣṭhastato dainyamupāgamat || 21 ||
[Analyze grammar]

hatayodhastato rājankṣīṇakośaśca bhūmipaḥ |
divodāsaḥ purīṃ hitvā palāyanaparo'bhavat || 22 ||
[Analyze grammar]

sa tvāśramamupāgamya bharadvājasya dhīmataḥ |
jagāma śaraṇaṃ rājā kṛtāñjalirariṃdama || 23 ||
[Analyze grammar]

rājovāca |
bhagavanvaitahavyairme yuddhe vaṃśaḥ praṇāśitaḥ |
ahamekaḥ paridyūno bhavantaṃ śaraṇaṃ gataḥ || 24 ||
[Analyze grammar]

śiṣyasnehena bhagavansa māṃ rakṣitumarhasi |
niḥśeṣo hi kṛto vaṃśo mama taiḥ pāpakarmabhiḥ || 25 ||
[Analyze grammar]

tamuvāca mahābhāgo bharadvājaḥ pratāpavān |
na bhetavyaṃ na bhetavyaṃ saudeva vyetu te bhayam || 26 ||
[Analyze grammar]

ahamiṣṭiṃ karomyadya putrārthaṃ te viśāṃ pate |
vaitahavyasahasrāṇi yathā tvaṃ prasahiṣyasi || 27 ||
[Analyze grammar]

tata iṣṭiṃ cakārarṣistasya vai putrakāmikīm |
athāsya tanayo jajñe pratardana iti śrutaḥ || 28 ||
[Analyze grammar]

sa jātamātro vavṛdhe samāḥ sadyastrayodaśa |
vedaṃ cādhijage kṛtsnaṃ dhanurvedaṃ ca bhārata || 29 ||
[Analyze grammar]

yogena ca samāviṣṭo bharadvājena dhīmatā |
tejo laukyaṃ sa saṃgṛhya tasmindeśe samāviśat || 30 ||
[Analyze grammar]

tataḥ sa kavacī dhanvī bāṇī dīpta ivānalaḥ |
prayayau sa dhanurdhunvanvivarṣuriva toyadaḥ || 31 ||
[Analyze grammar]

taṃ dṛṣṭvā paramaṃ harṣaṃ sudevatanayo yayau |
mene ca manasā dagdhānvaitahavyānsa pārthivaḥ || 32 ||
[Analyze grammar]

tatastaṃ yauvarājyena sthāpayitvā pratardanam |
kṛtakṛtyaṃ tadātmānaṃ sa rājā abhyanandata || 33 ||
[Analyze grammar]

tatastu vaitahavyānāṃ vadhāya sa mahīpatiḥ |
putraṃ prasthāpayāmāsa pratardanamariṃdamam || 34 ||
[Analyze grammar]

sarathaḥ sa tu saṃtīrya gaṅgāmāśu parākramī |
prayayau vītahavyānāṃ purīṃ parapuraṃjayaḥ || 35 ||
[Analyze grammar]

vaitahavyāstu saṃśrutya rathaghoṣaṃ samuddhatam |
niryayurnagarākārai rathaiḥ pararathārujaiḥ || 36 ||
[Analyze grammar]

niṣkramya te naravyāghrā daṃśitāścitrayodhinaḥ |
pratardanaṃ samājaghnuḥ śaravarṣairudāyudhāḥ || 37 ||
[Analyze grammar]

astraiśca vividhākārai rathaughaiśca yudhiṣṭhira |
abhyavarṣanta rājānaṃ himavantamivāmbudāḥ || 38 ||
[Analyze grammar]

astrairastrāṇi saṃvārya teṣāṃ rājā pratardanaḥ |
jaghāna tānmahātejā vajrānalasamaiḥ śaraiḥ || 39 ||
[Analyze grammar]

kṛttottamāṅgāste rājanbhallaiḥ śatasahasraśaḥ |
apatanrudhirārdrāṅgā nikṛttā iva kiṃśukāḥ || 40 ||
[Analyze grammar]

hateṣu teṣu sarveṣu vītahavyaḥ suteṣvatha |
prādravannagaraṃ hitvā bhṛgorāśramamapyuta || 41 ||
[Analyze grammar]

yayau bhṛguṃ ca śaraṇaṃ vītahavyo narādhipaḥ |
abhayaṃ ca dadau tasmai rājñe rājanbhṛgustathā |
tato dadāvāsanaṃ ca tasmai śiṣyo bhṛgostadā || 42 ||
[Analyze grammar]

athānupadamevāśu tatrāgacchatpratardanaḥ |
sa prāpya cāśramapadaṃ divodāsātmajo'bravīt || 43 ||
[Analyze grammar]

bho bhoḥ ke'trāśrame santi bhṛgoḥ śiṣyā mahātmanaḥ |
draṣṭumicche munimahaṃ tasyācakṣata māmiti || 44 ||
[Analyze grammar]

sa taṃ viditvā tu bhṛgurniścakrāmāśramāttadā |
pūjayāmāsa ca tato vidhinā parameṇa ha || 45 ||
[Analyze grammar]

uvāca cainaṃ rājendra kiṃ kāryamiti pārthivam |
sa covāca nṛpastasmai yadāgamanakāraṇam || 46 ||
[Analyze grammar]

ayaṃ brahmannito rājā vītahavyo visarjyatām |
asya putrairhi me brahmankṛtsno vaṃśaḥ praṇāśitaḥ |
utsāditaśca viṣayaḥ kāśīnāṃ ratnasaṃcayaḥ || 47 ||
[Analyze grammar]

etasya vīryadṛptasya hataṃ putraśataṃ mayā |
asyedānīṃ vadhādbrahmanbhaviṣyāmyanṛṇaḥ pituḥ || 48 ||
[Analyze grammar]

tamuvāca kṛpāviṣṭo bhṛgurdharmabhṛtāṃ varaḥ |
nehāsti kṣatriyaḥ kaścitsarve hīme dvijātayaḥ || 49 ||
[Analyze grammar]

evaṃ tu vacanaṃ śrutvā bhṛgostathyaṃ pratardanaḥ |
pādāvupaspṛśya śanaiḥ prahasanvākyamabravīt || 50 ||
[Analyze grammar]

evamapyasmi bhagavankṛtakṛtyo na saṃśayaḥ |
yadeṣa rājā vīryeṇa svajātiṃ tyājito mayā || 51 ||
[Analyze grammar]

anujānīhi māṃ brahmandhyāyasva ca śivena mām |
tyājito hi mayā jātimeṣa rājā bhṛgūdvaha || 52 ||
[Analyze grammar]

tatastenābhyanujñāto yayau rājā pratardanaḥ |
yathāgataṃ mahārāja muktvā viṣamivoragaḥ || 53 ||
[Analyze grammar]

bhṛgorvacanamātreṇa sa ca brahmarṣitāṃ gataḥ |
vītahavyo mahārāja brahmavāditvameva ca || 54 ||
[Analyze grammar]

tasya gṛtsamadaḥ putro rūpeṇendra ivāparaḥ |
śakrastvamiti yo daityairnigṛhītaḥ kilābhavat || 55 ||
[Analyze grammar]

ṛgvede vartate cāgryā śrutiratra viśāṃ pate |
yatra gṛtsamado brahmanbrāhmaṇaiḥ sa mahīyate || 56 ||
[Analyze grammar]

sa brahmacārī viprarṣiḥ śrīmāngṛtsamado'bhavat |
putro gṛtsamadasyāpi sucetā abhavaddvijaḥ || 57 ||
[Analyze grammar]

varcāḥ sutejasaḥ putro vihavyastasya cātmajaḥ |
vihavyasya tu putrastu vitatyastasya cātmajaḥ || 58 ||
[Analyze grammar]

vitatyasya sutaḥ satyaḥ santaḥ satyasya cātmajaḥ |
śravāstasya sutaścarṣiḥ śravasaścābhavattamaḥ || 59 ||
[Analyze grammar]

tamasaśca prakāśo'bhūttanayo dvijasattamaḥ |
prakāśasya ca vāgindro babhūva jayatāṃ varaḥ || 60 ||
[Analyze grammar]

tasyātmajaśca pramatirvedavedāṅgapāragaḥ |
ghṛtācyāṃ tasya putrastu rururnāmodapadyata || 61 ||
[Analyze grammar]

pramadvarāyāṃ tu ruroḥ putraḥ samudapadyata |
śunako nāma viprarṣiryasya putro'tha śaunakaḥ || 62 ||
[Analyze grammar]

evaṃ vipratvamagamadvītahavyo narādhipaḥ |
bhṛgoḥ prasādādrājendra kṣatriyaḥ kṣatriyarṣabha || 63 ||
[Analyze grammar]

tathaiva kathito vaṃśo mayā gārtsamadastava |
vistareṇa mahārāja kimanyadanupṛcchasi || 64 ||
[Analyze grammar]