Chapter 288

yudhiṣṭhira uvāca |
satyaṃ kṣamāṃ damaṃ prajñāṃ praśaṃsanti pitāmaha |
vidvāṃso manujā loke kathametanmataṃ tava || 1 ||
[Analyze grammar]

bhīṣma uvāca |
atra te vartayiṣye'hamitihāsaṃ purātanam |
sādhyānāmiha saṃvādaṃ haṃsasya ca yudhiṣṭhira || 2 ||
[Analyze grammar]

haṃso bhūtvātha sauvarṇastvajo nityaḥ prajāpatiḥ |
sa vai paryeti lokāṃstrīnatha sādhyānupāgamat || 3 ||
[Analyze grammar]

sādhyā ūcuḥ |
śakune vayaṃ sma devā vai sādhyāstvāmanuyujmahe |
pṛcchāmastvāṃ mokṣadharmaṃ bhavāṃśca kila mokṣavit || 4 ||
[Analyze grammar]

śruto'si naḥ paṇḍito dhīravādī sādhuśabdaḥ patate te patatrin |
kiṃ manyase śreṣṭhatamaṃ dvija tvaṃ kasminmanaste ramate mahātman || 5 ||
[Analyze grammar]

tannaḥ kāryaṃ pakṣivara praśādhi yatkāryāṇāṃ manyase śreṣṭhamekam |
yatkṛtvā vai puruṣaḥ sarvabandhairvimucyate vihagendreha śīghram || 6 ||
[Analyze grammar]

haṃsa uvāca |
idaṃ kāryamamṛtāśāḥ śṛṇomi tapo damaḥ satyamātmābhiguptiḥ |
granthīnvimucya hṛdayasya sarvānpriyāpriye svaṃ vaśamānayīta || 7 ||
[Analyze grammar]

nāruṃtudaḥ syānna nṛśaṃsavādī na hīnataḥ paramabhyādadīta |
yayāsya vācā para udvijeta na tāṃ vadedruśatīṃ pāpalokyām || 8 ||
[Analyze grammar]

vāksāyakā vadanānniṣpatanti yairāhataḥ śocati rātryahāni |
parasya nāmarmasu te patanti tānpaṇḍito nāvasṛjetpareṣu || 9 ||
[Analyze grammar]

paraścedenamativādabāṇairbhṛśaṃ vidhyecchama eveha kāryaḥ |
saṃroṣyamāṇaḥ pratimṛṣyate yaḥ sa ādatte sukṛtaṃ vai parasya || 10 ||
[Analyze grammar]

kṣepābhimānādabhiṣaṅgavyalīkaṃ nigṛhṇāti jvalitaṃ yaśca manyum |
aduṣṭacetā mudito'nasūyuḥ sa ādatte sukṛtaṃ vai pareṣām || 11 ||
[Analyze grammar]

ākruśyamāno na vadāmi kiṃcitkṣamāmyahaṃ tāḍyamānaśca nityam |
śreṣṭhaṃ hyetatkṣamamapyāhurāryāḥ satyaṃ tathaivārjavamānṛśaṃsyam || 12 ||
[Analyze grammar]

vedasyopaniṣatsatyaṃ satyasyopaniṣaddamaḥ |
damasyopaniṣanmokṣa etatsarvānuśāsanam || 13 ||
[Analyze grammar]

vāco vegaṃ manasaḥ krodhavegaṃ vivitsāvegamudaropasthavegam |
etānvegānyo viṣahatyudīrṇāṃstaṃ manye'haṃ brāhmaṇaṃ vai muniṃ ca || 14 ||
[Analyze grammar]

akrodhanaḥ krudhyatāṃ vai viśiṣṭastathā titikṣuratitikṣorviśiṣṭaḥ |
amānuṣānmānuṣo vai viśiṣṭastathājñānājjñānavānvai pradhānaḥ || 15 ||
[Analyze grammar]

ākruśyamāno nākrośenmanyureva titikṣataḥ |
ākroṣṭāraṃ nirdahati sukṛtaṃ cāsya vindati || 16 ||
[Analyze grammar]

yo nātyuktaḥ prāha rūkṣaṃ priyaṃ vā yo vā hato na pratihanti dhairyāt |
pāpaṃ ca yo necchati tasya hantustasmai devāḥ spṛhayante sadaiva || 17 ||
[Analyze grammar]

pāpīyasaḥ kṣametaiva śreyasaḥ sadṛśasya ca |
vimānito hato''kruṣṭa evaṃ siddhiṃ gamiṣyati || 18 ||
[Analyze grammar]

sadāhamāryānnibhṛto'pyupāse na me vivitsā na ca me'sti roṣaḥ |
na cāpyahaṃ lipsamānaḥ paraimi na caiva kiṃcidviṣameṇa yāmi || 19 ||
[Analyze grammar]

nāhaṃ śaptaḥ pratiśapāmi kiṃciddamaṃ dvāraṃ hyamṛtasyeha vedmi |
guhyaṃ brahma tadidaṃ vo bravīmi na mānuṣācchreṣṭhataraṃ hi kiṃcit || 20 ||
[Analyze grammar]

vimucyamānaḥ pāpebhyo ghanebhya iva candramāḥ |
virajāḥ kālamākāṅkṣandhīro dhairyeṇa sidhyati || 21 ||
[Analyze grammar]

yaḥ sarveṣāṃ bhavati hyarcanīya utsecane stambha ivābhijātaḥ |
yasmai vācaṃ supraśastāṃ vadanti sa vai devāngacchati saṃyatātmā || 22 ||
[Analyze grammar]

na tathā vaktumicchanti kalyāṇānpuruṣe guṇān |
yathaiṣāṃ vaktumicchanti nairguṇyamanuyuñjakāḥ || 23 ||
[Analyze grammar]

yasya vāṅmanasī gupte samyakpraṇihite sadā |
vedāstapaśca tyāgaśca sa idaṃ sarvamāpnuyāt || 24 ||
[Analyze grammar]

ākrośanāvamānābhyāmabudhādvardhate budhaḥ |
tasmānna vardhayedanyaṃ na cātmānaṃ vihiṃsayet || 25 ||
[Analyze grammar]

amṛtasyeva saṃtṛpyedavamānasya vai dvijaḥ |
sukhaṃ hyavamataḥ śete yo'vamantā sa naśyati || 26 ||
[Analyze grammar]

yatkrodhano yajate yaddadāti yadvā tapastapyati yajjuhoti |
vaivasvatastaddharate'sya sarvaṃ moghaḥ śramo bhavati krodhanasya || 27 ||
[Analyze grammar]

catvāri yasya dvārāṇi suguptānyamarottamāḥ |
upasthamudaraṃ hastau vākcaturthī sa dharmavit || 28 ||
[Analyze grammar]

satyaṃ damaṃ hyārjavamānṛśaṃsyaṃ dhṛtiṃ titikṣāmabhisevamānaḥ |
svādhyāyanityo'spṛhayanpareṣāmekāntaśīlyūrdhvagatirbhavetsaḥ || 29 ||
[Analyze grammar]

sarvānetānanucaranvatsavaccaturaḥ stanān |
na pāvanatamaṃ kiṃcitsatyādadhyagamaṃ kvacit || 30 ||
[Analyze grammar]

ācakṣe'haṃ manuṣyebhyo devebhyaḥ pratisaṃcaran |
satyaṃ svargasya sopānaṃ pārāvārasya nauriva || 31 ||
[Analyze grammar]

yādṛśaiḥ saṃnivasati yādṛśāṃścopasevate |
yādṛgicchecca bhavituṃ tādṛgbhavati pūruṣaḥ || 32 ||
[Analyze grammar]

yadi santaṃ sevate yadyasantaṃ tapasvinaṃ yadi vā stenameva |
vāso yathā raṅgavaśaṃ prayāti tathā sa teṣāṃ vaśamabhyupaiti || 33 ||
[Analyze grammar]

sadā devāḥ sādhubhiḥ saṃvadante na mānuṣaṃ viṣayaṃ yānti draṣṭum |
nenduḥ samaḥ syādasamo hi vāyuruccāvacaṃ viṣayaṃ yaḥ sa veda || 34 ||
[Analyze grammar]

aduṣṭaṃ vartamāne tu hṛdayāntarapūruṣe |
tenaiva devāḥ prīyante satāṃ mārgasthitena vai || 35 ||
[Analyze grammar]

śiśnodare ye'bhiratāḥ sadaiva stenā narā vākparuṣāśca nityam |
apetadoṣāniti tānviditvā dūrāddevāḥ saṃparivarjayanti || 36 ||
[Analyze grammar]

na vai devā hīnasattvena toṣyāḥ sarvāśinā duṣkṛtakarmaṇā vā |
satyavratā ye tu narāḥ kṛtajñā dharme ratāstaiḥ saha saṃbhajante || 37 ||
[Analyze grammar]

avyāhṛtaṃ vyāhṛtācchreya āhuḥ satyaṃ vadedvyāhṛtaṃ taddvitīyam |
dharmaṃ vadedvyāhṛtaṃ tattṛtīyaṃ priyaṃ vadedvyāhṛtaṃ taccaturtham || 38 ||
[Analyze grammar]

sādhyā ūcuḥ |
kenāyamāvṛto lokaḥ kena vā na prakāśate |
kena tyajati mitrāṇi kena svargaṃ na gacchati || 39 ||
[Analyze grammar]

haṃsa uvāca |
ajñānenāvṛto loko mātsaryānna prakāśate |
lobhāttyajati mitrāṇi saṅgātsvargaṃ na gacchati || 40 ||
[Analyze grammar]

sādhyā ūcuḥ |
kaḥ svideko ramate brāhmaṇānāṃ kaḥ svideko bahubhirjoṣamāste |
kaḥ svideko balavāndurbalo'pi kaḥ svideṣāṃ kalahaṃ nānvavaiti || 41 ||
[Analyze grammar]

haṃsa uvāca |
prājña eko ramate brāhmaṇānāṃ prājña eko bahubhirjoṣamāste |
prājña eko balavāndurbalo'pi prājña eṣāṃ kalahaṃ nānvavaiti || 42 ||
[Analyze grammar]

sādhyā ūcuḥ |
kiṃ brāhmaṇānāṃ devatvaṃ kiṃ ca sādhutvamucyate |
asādhutvaṃ ca kiṃ teṣāṃ kimeṣāṃ mānuṣaṃ matam || 43 ||
[Analyze grammar]

haṃsa uvāca |
svādhyāya eṣāṃ devatvaṃ vrataṃ sādhutvamucyate |
asādhutvaṃ parīvādo mṛtyurmānuṣamucyate || 44 ||
[Analyze grammar]

bhīṣma uvāca |
saṃvāda ityayaṃ śreṣṭhaḥ sādhyānāṃ parikīrtitaḥ |
kṣetraṃ vai karmaṇāṃ yoniḥ sadbhāvaḥ satyamucyate || 45 ||
[Analyze grammar]