Chapter 287

bhīṣma uvāca |
punareva tu papraccha janako mithilādhipaḥ |
parāśaraṃ mahātmānaṃ dharme paramaniścayam || 1 ||
[Analyze grammar]

kiṃ śreyaḥ kā gatirbrahmankiṃ kṛtaṃ na vinaśyati |
kva gato na nivarteta tanme brūhi mahāmune || 2 ||
[Analyze grammar]

parāśara uvāca |
asaṅgaḥ śreyaso mūlaṃ jñānaṃ jñānagatiḥ parā |
cīrṇaṃ tapo na praṇaśyedvāpaḥ kṣetre na naśyati || 3 ||
[Analyze grammar]

chittvādharmamayaṃ pāśaṃ yadā dharme'bhirajyate |
dattvābhayakṛtaṃ dānaṃ tadā siddhimavāpnuyāt || 4 ||
[Analyze grammar]

yo dadāti sahasrāṇi gavāmaśvaśatāni ca |
abhayaṃ sarvabhūtebhyastaddānamativartate || 5 ||
[Analyze grammar]

vasanviṣayamadhye'pi na vasatyeva buddhimān |
saṃvasatyeva durbuddhirasatsu viṣayeṣvapi || 6 ||
[Analyze grammar]

nādharmaḥ śliṣyate prājñamāpaḥ puṣkaraparṇavat |
aprājñamadhikaṃ pāpaṃ śliṣyate jatu kāṣṭhavat || 7 ||
[Analyze grammar]

nādharmaḥ kāraṇāpekṣī kartāramabhimuñcati |
kartā khalu yathākālaṃ tatsarvamabhipadyate |
na bhidyante kṛtātmāna ātmapratyayadarśinaḥ || 8 ||
[Analyze grammar]

buddhikarmendriyāṇāṃ hi pramatto yo na budhyate |
śubhāśubheṣu saktātmā prāpnoti sumahadbhayam || 9 ||
[Analyze grammar]

vītarāgo jitakrodhaḥ samyagbhavati yaḥ sadā |
viṣaye vartamāno'pi na sa pāpena yujyate || 10 ||
[Analyze grammar]

maryādāyāṃ dharmaseturnibaddho naiva sīdati |
puṣṭasrota ivāyattaḥ sphīto bhavati saṃcayaḥ || 11 ||
[Analyze grammar]

yathā bhānugataṃ tejo maṇiḥ śuddhaḥ samādhinā |
ādatte rājaśārdūla tathā yogaḥ pravartate || 12 ||
[Analyze grammar]

yathā tilānāmiha puṣpasaṃśrayātpṛthakpṛthagyāti guṇo'tisaumyatām |
tathā narāṇāṃ bhuvi bhāvitātmanāṃ yathāśrayaṃ sattvaguṇaḥ pravartate || 13 ||
[Analyze grammar]

jahāti dārānihate na saṃpadaḥ sadaśvayānaṃ vividhāśca yāḥ kriyāḥ |
triviṣṭape jātamatiryadā narastadāsya buddhirviṣayeṣu bhidyate || 14 ||
[Analyze grammar]

prasaktabuddhirviṣayeṣu yo naro yo budhyate hyātmahitaṃ kadā ca na |
sa sarvabhāvānugatena cetasā nṛpāmiṣeṇeva jhaṣo vikṛṣyate || 15 ||
[Analyze grammar]

saṃghātavānmartyalokaḥ parasparamapāśritaḥ |
kadalīgarbhaniḥsāro naurivāpsu nimajjati || 16 ||
[Analyze grammar]

na dharmakālaḥ puruṣasya niścito na cāpi mṛtyuḥ puruṣaṃ pratīkṣate |
kriyā hi dharmasya sadaiva śobhanā yadā naro mṛtyumukhe'bhivartate || 17 ||
[Analyze grammar]

yathāndhaḥ svagṛhe yukto hyabhyāsādeva gacchati |
tathā yuktena manasā prājño gacchati tāṃ gatim || 18 ||
[Analyze grammar]

maraṇaṃ janmani proktaṃ janma vai maraṇāśritam |
avidvānmokṣadharmeṣu baddho bhramati cakravat || 19 ||
[Analyze grammar]

yathā mṛṇālo'nugatamāśu muñcati kardamam |
tathātmā puruṣasyeha manasā parimucyate |
manaḥ praṇayate''tmānaṃ sa enamabhiyuñjati || 20 ||
[Analyze grammar]

parārthe vartamānastu svakāryaṃ yo'bhimanyate |
indriyārtheṣu saktaḥ sansvakāryātparihīyate || 21 ||
[Analyze grammar]

adhastiryaggatiṃ caiva svarge caiva parāṃ gatim |
prāpnoti svakṛtairātmā prājñasyehetarasya ca || 22 ||
[Analyze grammar]

mṛnmaye bhājane pakve yathā vai nyasyate dravaḥ |
tathā śarīraṃ tapasā taptaṃ viṣayamaśnute || 23 ||
[Analyze grammar]

viṣayānaśnute yastu na sa bhokṣyatyasaṃśayam |
yastu bhogāṃstyajedātmā sa vai bhoktuṃ vyavasyati || 24 ||
[Analyze grammar]

nīhāreṇa hi saṃvītaḥ śiśnodaraparāyaṇaḥ |
jātyandha iva panthānamāvṛtātmā na budhyate || 25 ||
[Analyze grammar]

vaṇigyathā samudrādvai yathārthaṃ labhate dhanam |
tathā martyārṇave jantoḥ karmavijñānato gatiḥ || 26 ||
[Analyze grammar]

ahorātramaye loke jarārūpeṇa saṃcaran |
mṛtyurgrasati bhūtāni pavanaṃ pannago yathā || 27 ||
[Analyze grammar]

svayaṃ kṛtāni karmāṇi jāto jantuḥ prapadyate |
nākṛtaṃ labhate kaścitkiṃcidatra priyāpriyam || 28 ||
[Analyze grammar]

śayānaṃ yāntamāsīnaṃ pravṛttaṃ viṣayeṣu ca |
śubhāśubhāni karmāṇi prapadyante naraṃ sadā || 29 ||
[Analyze grammar]

na hyanyattīramāsādya punastartuṃ vyavasyati |
durlabho dṛśyate hyasya vinipāto mahārṇave || 30 ||
[Analyze grammar]

yathā bhārāvasaktā hi naurmahāmbhasi tantunā |
tathā mano'bhiyogādvai śarīraṃ pratikarṣati || 31 ||
[Analyze grammar]

yathā samudramabhitaḥ saṃsyūtāḥ sarito'parāḥ |
tathādyā prakṛtiryogādabhisaṃsyūyate sadā || 32 ||
[Analyze grammar]

snehapāśairbahuvidhairāsaktamanaso narāḥ |
prakṛtisthā viṣīdanti jale saikataveśmavat || 33 ||
[Analyze grammar]

śarīragṛhasaṃsthasya śaucatīrthasya dehinaḥ |
buddhimārgaprayātasya sukhaṃ tviha paratra ca || 34 ||
[Analyze grammar]

vistarāḥ kleśasaṃyuktāḥ saṃkṣepāstu sukhāvahāḥ |
parārthaṃ vistarāḥ sarve tyāgamātmahitaṃ viduḥ || 35 ||
[Analyze grammar]

saṃkalpajo mitravargo jñātayaḥ kāraṇātmakāḥ |
bhāryā dāsāśca putrāśca svamarthamanuyuñjate || 36 ||
[Analyze grammar]

na mātā na pitā kiṃcitkasyacitpratipadyate |
dānapathyodano jantuḥ svakarmaphalamaśnute || 37 ||
[Analyze grammar]

mātā putraḥ pitā bhrātā bhāryā mitrajanastathā |
aṣṭāpadapadasthāne tvakṣamudreva nyasyate || 38 ||
[Analyze grammar]

sarvāṇi karmāṇi purā kṛtāni śubhāśubhānyātmano yānti jantoḥ |
upasthitaṃ karmaphalaṃ viditvā buddhiṃ tathā codayate'ntarātmā || 39 ||
[Analyze grammar]

vyavasāyaṃ samāśritya sahāyānyo'dhigacchati |
na tasya kaścidārambhaḥ kadācidavasīdati || 40 ||
[Analyze grammar]

advaidhamanasaṃ yuktaṃ śūraṃ dhīraṃ vipaścitam |
na śrīḥ saṃtyajate nityamādityamiva raśmayaḥ || 41 ||
[Analyze grammar]

āstikyavyavasāyābhyāmupāyādvismayāddhiyā |
yamārabhatyanindyātmā na so'rthaḥ parisīdati || 42 ||
[Analyze grammar]

sarvaḥ svāni śubhāśubhāni niyataṃ karmāṇi jantuḥ svayaṃ garbhātsaṃpratipadyate tadubhayaṃ yattena pūrvaṃ kṛtam |
mṛtyuścāparihāravānsamagatiḥ kālena viccheditā dāroścūrṇamivāśmasāravihitaṃ karmāntikaṃ prāpayet || 43 ||
[Analyze grammar]

svarūpatāmātmakṛtaṃ ca vistaraṃ kulānvayaṃ dravyasamṛddhisaṃcayam |
naro hi sarvo labhate yathākṛtaṃ śubhāśubhenātmakṛtena karmaṇā || 44 ||
[Analyze grammar]

bhīṣma uvāca |
ityukto janako rājanyathātathyaṃ manīṣiṇā |
śrutvā dharmavidāṃ śreṣṭhaḥ parāṃ mudamavāpa ha || 45 ||
[Analyze grammar]