Chapter 289

yudhiṣṭhira uvāca |
sāṃkhye yoge ca me tāta viśeṣaṃ vaktumarhasi |
tava sarvajña sarvaṃ hi viditaṃ kurusattama || 1 ||
[Analyze grammar]

bhīṣma uvāca |
sāṃkhyāḥ sāṃkhyaṃ praśaṃsanti yogā yogaṃ dvijātayaḥ |
vadanti kāraṇaiḥ śraiṣṭhyaṃ svapakṣodbhāvanāya vai || 2 ||
[Analyze grammar]

anīśvaraḥ kathaṃ mucyedityevaṃ śatrukarśana |
vadanti kāraṇaiḥ śraiṣṭhyaṃ yogāḥ samyaṅmanīṣiṇaḥ || 3 ||
[Analyze grammar]

vadanti kāraṇaṃ cedaṃ sāṃkhyāḥ samyagdvijātayaḥ |
vijñāyeha gatīḥ sarvā virakto viṣayeṣu yaḥ || 4 ||
[Analyze grammar]

ūrdhvaṃ sa dehātsuvyaktaṃ vimucyediti nānyathā |
etadāhurmahāprājñāḥ sāṃkhyaṃ vai mokṣadarśanam || 5 ||
[Analyze grammar]

svapakṣe kāraṇaṃ grāhyaṃ samarthaṃ vacanaṃ hitam |
śiṣṭānāṃ hi mataṃ grāhyaṃ tvadvidhaiḥ śiṣṭasaṃmataiḥ || 6 ||
[Analyze grammar]

pratyakṣahetavo yogāḥ sāṃkhyāḥ śāstraviniścayāḥ |
ubhe caite mate tattve mama tāta yudhiṣṭhira || 7 ||
[Analyze grammar]

ubhe caite mate jñāne nṛpate śiṣṭasaṃmate |
anuṣṭhite yathāśāstraṃ nayetāṃ paramāṃ gatim || 8 ||
[Analyze grammar]

tulyaṃ śaucaṃ tayoryuktaṃ dayā bhūteṣu cānagha |
vratānāṃ dhāraṇaṃ tulyaṃ darśanaṃ na samaṃ tayoḥ || 9 ||
[Analyze grammar]

yudhiṣṭhira uvāca |
yadi tulyaṃ vrataṃ śaucaṃ dayā cātra pitāmaha |
tulyaṃ na darśanaṃ kasmāttanme brūhi pitāmaha || 10 ||
[Analyze grammar]

bhīṣma uvāca |
rāgaṃ mohaṃ tathā snehaṃ kāmaṃ krodhaṃ ca kevalam |
yogācchittvādito doṣānpañcaitānprāpnuvanti tat || 11 ||
[Analyze grammar]

yathā cānimiṣāḥ sthūlā jālaṃ chittvā punarjalam |
prāpnuvanti tathā yogāstatpadaṃ vītakalmaṣāḥ || 12 ||
[Analyze grammar]

tathaiva vāgurāṃ chittvā balavanto yathā mṛgāḥ |
prāpnuyurvimalaṃ mārgaṃ vimuktāḥ sarvabandhanaiḥ || 13 ||
[Analyze grammar]

lobhajāni tathā rājanbandhanāni balānvitāḥ |
chittvā yogāḥ paraṃ mārgaṃ gacchanti vimalāḥ śivam || 14 ||
[Analyze grammar]

abalāśca mṛgā rājanvāgurāsu tathāpare |
vinaśyanti na saṃdehastadvadyogabalādṛte || 15 ||
[Analyze grammar]

balahīnāśca kaunteya yathā jālagatā jhaṣāḥ |
antaṃ gacchanti rājendra tathā yogāḥ sudurbalāḥ || 16 ||
[Analyze grammar]

yathā ca śakunāḥ sūkṣmāḥ prāpya jālamariṃdama |
tatra saktā vipadyante mucyante ca balānvitāḥ || 17 ||
[Analyze grammar]

karmajairbandhanairbaddhāstadvadyogāḥ paraṃtapa |
abalā vai vinaśyanti mucyante ca balānvitāḥ || 18 ||
[Analyze grammar]

alpakaśca yathā rājanvahniḥ śāmyati durbalaḥ |
ākrānta indhanaiḥ sthūlaistadvadyogo'balaḥ prabho || 19 ||
[Analyze grammar]

sa eva ca yadā rājanvahnirjātabalaḥ punaḥ |
samīraṇayutaḥ kṛtsnāṃ dahetkṣipraṃ mahīmapi || 20 ||
[Analyze grammar]

tadvajjātabalo yogī dīptatejā mahābalaḥ |
antakāla ivādityaḥ kṛtsnaṃ saṃśoṣayejjagat || 21 ||
[Analyze grammar]

durbalaśca yathā rājansrotasā hriyate naraḥ |
balahīnastathā yogo viṣayairhriyate'vaśaḥ || 22 ||
[Analyze grammar]

tadeva ca yathā sroto viṣṭambhayati vāraṇaḥ |
tadvadyogabalaṃ labdhvā vyūhate viṣayānbahūn || 23 ||
[Analyze grammar]

viśanti cāvaśāḥ pārtha yogā yogabalānvitāḥ |
prajāpatīnṛṣīndevānmahābhūtāni ceśvarāḥ || 24 ||
[Analyze grammar]

na yamo nāntakaḥ kruddho na mṛtyurbhīmavikramaḥ |
īśate nṛpate sarve yogasyāmitatejasaḥ || 25 ||
[Analyze grammar]

ātmanāṃ ca sahasrāṇi bahūni bharatarṣabha |
yogaḥ kuryādbalaṃ prāpya taiśca sarvairmahīṃ caret || 26 ||
[Analyze grammar]

prāpnuyādviṣayāṃścaiva punaścograṃ tapaścaret |
saṃkṣipecca punaḥ pārtha sūryastejoguṇāniva || 27 ||
[Analyze grammar]

balasthasya hi yogasya bandhaneśasya pārthiva |
vimokṣaprabhaviṣṇutvamupapannamasaṃśayam || 28 ||
[Analyze grammar]

balāni yoge proktāni mayaitāni viśāṃ pate |
nidarśanārthaṃ sūkṣmāṇi vakṣyāmi ca punastava || 29 ||
[Analyze grammar]

ātmanaśca samādhāne dhāraṇāṃ prati cābhibho |
nidarśanāni sūkṣmāṇi śṛṇu me bharatarṣabha || 30 ||
[Analyze grammar]

apramatto yathā dhanvī lakṣyaṃ hanti samāhitaḥ |
yuktaḥ samyaktathā yogī mokṣaṃ prāpnotyasaṃśayam || 31 ||
[Analyze grammar]

snehapūrṇe yathā pātre mana ādhāya niścalam |
puruṣo yatta ārohetsopānaṃ yuktamānasaḥ || 32 ||
[Analyze grammar]

yuktvā tathāyamātmānaṃ yogaḥ pārthiva niścalam |
karotyamalamātmānaṃ bhāskaropamadarśanam || 33 ||
[Analyze grammar]

yathā ca nāvaṃ kaunteya karṇadhāraḥ samāhitaḥ |
mahārṇavagatāṃ śīghraṃ nayetpārthiva pattanam || 34 ||
[Analyze grammar]

tadvadātmasamādhānaṃ yuktvā yogena tattvavit |
durgamaṃ sthānamāpnoti hitvā dehamimaṃ nṛpa || 35 ||
[Analyze grammar]

sārathiśca yathā yuktvā sadaśvānsusamāhitaḥ |
deśamiṣṭaṃ nayatyāśu dhanvinaṃ puruṣarṣabha || 36 ||
[Analyze grammar]

tathaiva nṛpate yogī dhāraṇāsu samāhitaḥ |
prāpnotyāśu paraṃ sthānaṃ lakṣaṃ mukta ivāśugaḥ || 37 ||
[Analyze grammar]

āveśyātmani cātmānaṃ yogī tiṣṭhati yo'calaḥ |
pāpaṃ hanteva mīnānāṃ padamāpnoti so'jaram || 38 ||
[Analyze grammar]

nābhyāṃ kaṇṭhe ca śīrṣe ca hṛdi vakṣasi pārśvayoḥ |
darśane sparśane cāpi ghrāṇe cāmitavikrama || 39 ||
[Analyze grammar]

sthāneṣveteṣu yo yogī mahāvratasamāhitaḥ |
ātmanā sūkṣmamātmānaṃ yuṅkte samyagviśāṃ pate || 40 ||
[Analyze grammar]

sa śīghramamalaprajñaḥ karma dagdhvā śubhāśubham |
uttamaṃ yogamāsthāya yadīcchati vimucyate || 41 ||
[Analyze grammar]

yudhiṣṭhira uvāca |
āhārānkīdṛśānkṛtvā kāni jitvā ca bhārata |
yogī balamavāpnoti tadbhavānvaktumarhati || 42 ||
[Analyze grammar]

bhīṣma uvāca |
kaṇānāṃ bhakṣaṇe yuktaḥ piṇyākasya ca bhakṣaṇe |
snehānāṃ varjane yukto yogī balamavāpnuyāt || 43 ||
[Analyze grammar]

bhuñjāno yāvakaṃ rūkṣaṃ dīrghakālamariṃdama |
ekārāmo viśuddhātmā yogī balamavāpnuyāt || 44 ||
[Analyze grammar]

pakṣānmāsānṛtūṃścitrānsaṃcaraṃśca guhāstathā |
apaḥ pītvā payomiśrā yogī balamavāpnuyāt || 45 ||
[Analyze grammar]

akhaṇḍamapi vā māsaṃ satataṃ manujeśvara |
upoṣya samyakśuddhātmā yogī balamavāpnuyāt || 46 ||
[Analyze grammar]

kāmaṃ jitvā tathā krodhaṃ śītoṣṇe varṣameva ca |
bhayaṃ nidrāṃ tathā śvāsaṃ pauruṣaṃ viṣayāṃstathā || 47 ||
[Analyze grammar]

aratiṃ durjayāṃ caiva ghorāṃ tṛṣṇāṃ ca pārthiva |
sparśānsarvāṃstathā tandrīṃ durjayāṃ nṛpasattama || 48 ||
[Analyze grammar]

dīpayanti mahātmānaḥ sūkṣmamātmānamātmanā |
vītarāgā mahāprājñā dhyānādhyayanasaṃpadā || 49 ||
[Analyze grammar]

durgastveṣa mataḥ panthā brāhmaṇānāṃ vipaścitām |
na kaścidvrajati hyasminkṣemeṇa bharatarṣabha || 50 ||
[Analyze grammar]

yathā kaścidvanaṃ ghoraṃ bahusarpasarīsṛpam |
śvabhravattoyahīnaṃ ca durgamaṃ bahukaṇṭakam || 51 ||
[Analyze grammar]

abhaktamaṭavīprāyaṃ dāvadagdhamahīruham |
panthānaṃ taskarākīrṇaṃ kṣemeṇābhipatedyuvā || 52 ||
[Analyze grammar]

yogamārgaṃ tathāsādya yaḥ kaścidbhajate dvijaḥ |
kṣemeṇoparamenmārgādbahudoṣo hi sa smṛtaḥ || 53 ||
[Analyze grammar]

sustheyaṃ kṣuradhārāsu niśitāsu mahīpate |
dhāraṇāsu tu yogasya duḥstheyamakṛtātmabhiḥ || 54 ||
[Analyze grammar]

vipannā dhāraṇāstāta nayanti naśubhāṃ gatim |
netṛhīnā yathā nāvaḥ puruṣānarṇave nṛpa || 55 ||
[Analyze grammar]

yastu tiṣṭhati kaunteya dhāraṇāsu yathāvidhi |
maraṇaṃ janma duḥkhaṃ ca sukhaṃ ca sa vimuñcati || 56 ||
[Analyze grammar]

nānāśāstreṣu niṣpannaṃ yogeṣvidamudāhṛtam |
paraṃ yogaṃ tu yatkṛtsnaṃ niścitaṃ taddvijātiṣu || 57 ||
[Analyze grammar]

paraṃ hi tadbrahma mahanmahātmanbrahmāṇamīśaṃ varadaṃ ca viṣṇum |
bhavaṃ ca dharmaṃ ca ṣaḍānanaṃ ca ṣaḍbrahmaputrāṃśca mahānubhāvān || 58 ||
[Analyze grammar]

tamaśca kaṣṭaṃ sumahadrajaśca sattvaṃ ca śuddhaṃ prakṛtiṃ parāṃ ca |
siddhiṃ ca devīṃ varuṇasya patnīṃ tejaśca kṛtsnaṃ sumahacca dhairyam || 59 ||
[Analyze grammar]

tārādhipaṃ vai vimalaṃ satāraṃ viśvāṃśca devānuragānpitṝṃśca |
śailāṃśca kṛtsnānudadhīṃśca ghorānnadīśca sarvāḥ savanānghanāṃśca || 60 ||
[Analyze grammar]

nāgānnagānyakṣagaṇāndiśaśca gandharvasaṃghānpuruṣānstriyaśca |
parasparaṃ prāpya mahānmahātmā viśeta yogī nacirādvimuktaḥ || 61 ||
[Analyze grammar]

kathā ca yeyaṃ nṛpate prasaktā deve mahāvīryamatau śubheyam |
yogānsa sarvānabhibhūya martyānnārāyaṇātmā kurute mahātmā || 62 ||
[Analyze grammar]