Chapter 124

yudhiṣṭhira uvāca |
ime janā naraśreṣṭha praśaṃsanti sadā bhuvi |
dharmasya śīlamevādau tato me saṃśayo mahān || 1 ||
[Analyze grammar]

yadi tacchakyamasmābhirjñātuṃ dharmabhṛtāṃ vara |
śrotumicchāmi tatsarvaṃ yathaitadupalabhyate || 2 ||
[Analyze grammar]

kathaṃ nu prāpyate śīlaṃ śrotumicchāmi bhārata |
kiṃlakṣaṇaṃ ca tatproktaṃ brūhi me vadatāṃ vara || 3 ||
[Analyze grammar]

bhīṣma uvāca |
purā duryodhaneneha dhṛtarāṣṭrāya mānada |
ākhyātaṃ tapyamānena śriyaṃ dṛṣṭvā tathāgatām || 4 ||
[Analyze grammar]

indraprasthe mahārāja tava sabhrātṛkasya ha |
sabhāyāṃ cāvahasanaṃ tatsarvaṃ śṛṇu bhārata || 5 ||
[Analyze grammar]

bhavatastāṃ sabhāṃ dṛṣṭvā samṛddhiṃ cāpyanuttamām |
duryodhanastadāsīnaḥ sarvaṃ pitre nyavedayat || 6 ||
[Analyze grammar]

śrutvā ca dhṛtarāṣṭro'pi duryodhanavacastadā |
abravītkarṇasahitaṃ duryodhanamidaṃ vacaḥ || 7 ||
[Analyze grammar]

kimarthaṃ tapyase putra śrotumicchāmi tattvataḥ |
śrutvā tvāmanuneṣyāmi yadi samyagbhaviṣyasi || 8 ||
[Analyze grammar]

yathā tvaṃ mahadaiśvaryaṃ prāptaḥ parapuraṃjaya |
kiṃkarā bhrātaraḥ sarve mitrāḥ saṃbandhinastathā || 9 ||
[Analyze grammar]

ācchādayasi prāvārānaśnāsi piśitodanam |
ājāneyā vahanti tvāṃ kasmācchocasi putraka || 10 ||
[Analyze grammar]

duryodhana uvāca |
daśa tāni sahasrāṇi snātakānāṃ mahātmanām |
bhuñjate rukmapātrīṣu yudhiṣṭhiraniveśane || 11 ||
[Analyze grammar]

dṛṣṭvā ca tāṃ sabhāṃ divyāṃ divyapuṣpaphalānvitām |
aśvāṃstittirakalmāṣānratnāni vividhāni ca || 12 ||
[Analyze grammar]

dṛṣṭvā tāṃ pāṇḍaveyānāmṛddhimindropamāṃ śubhām |
amitrāṇāṃ sumahatīmanuśocāmi mānada || 13 ||
[Analyze grammar]

dhṛtarāṣṭra uvāca |
yadīcchasi śriyaṃ tāta yādṛśīṃ tāṃ yudhiṣṭhire |
viśiṣṭāṃ vā naravyāghra śīlavānbhava putraka || 14 ||
[Analyze grammar]

śīlena hi trayo lokāḥ śakyā jetuṃ na saṃśayaḥ |
na hi kiṃcidasādhyaṃ vai loke śīlavatāṃ bhavet || 15 ||
[Analyze grammar]

ekarātreṇa māndhātā tryaheṇa janamejayaḥ |
saptarātreṇa nābhāgaḥ pṛthivīṃ pratipedivān || 16 ||
[Analyze grammar]

ete hi pārthivāḥ sarve śīlavanto damānvitāḥ |
atasteṣāṃ guṇakrītā vasudhā svayamāgamat || 17 ||
[Analyze grammar]

atrāpyudāharantīmamitihāsaṃ purātanam |
nāradena purā proktaṃ śīlamāśritya bhārata || 18 ||
[Analyze grammar]

prahrādena hṛtaṃ rājyaṃ mahendrasya mahātmanaḥ |
śīlamāśritya daityena trailokyaṃ ca vaśīkṛtam || 19 ||
[Analyze grammar]

tato bṛhaspatiṃ śakraḥ prāñjaliḥ samupasthitaḥ |
uvāca ca mahāprājñaḥ śreya icchāmi veditum || 20 ||
[Analyze grammar]

tato bṛhaspatistasmai jñānaṃ naiḥśreyasaṃ param |
kathayāmāsa bhagavāndevendrāya kurūdvaha || 21 ||
[Analyze grammar]

etāvacchreya ityeva bṛhaspatirabhāṣata |
indrastu bhūyaḥ papraccha kva viśeṣo bhavediti || 22 ||
[Analyze grammar]

bṛhaspatiruvāca |
viśeṣo'sti mahāṃstāta bhārgavasya mahātmanaḥ |
tatrāgamaya bhadraṃ te bhūya eva puraṃdara || 23 ||
[Analyze grammar]

dhṛtarāṣṭra uvāca |
ātmanastu tataḥ śreyo bhārgavātsumahāyaśāḥ |
jñānamāgamayatprītyā punaḥ sa paramadyutiḥ || 24 ||
[Analyze grammar]

tenāpi samanujñāto bhārgaveṇa mahātmanā |
śreyo'stīti punarbhūyaḥ śukramāha śatakratuḥ || 25 ||
[Analyze grammar]

bhārgavastvāha dharmajñaḥ prahrādasya mahātmanaḥ |
jñānamasti viśeṣeṇa tato hṛṣṭaśca so'bhavat || 26 ||
[Analyze grammar]

sa tato brāhmaṇo bhūtvā prahrādaṃ pākaśāsanaḥ |
sṛtvā provāca medhāvī śreya icchāmi veditum || 27 ||
[Analyze grammar]

prahrādastvabravīdvipraṃ kṣaṇo nāsti dvijarṣabha |
trailokyarājye saktasya tato nopadiśāmi te || 28 ||
[Analyze grammar]

brāhmaṇastvabravīdvākyaṃ kasminkāle kṣaṇo bhavet |
tatopadiṣṭamicchāmi yadyatkāryāntaraṃ bhavet || 29 ||
[Analyze grammar]

tataḥ prīto'bhavadrājā prahrādo brahmavādine |
tathetyuktvā śubhe kāle jñānatattvaṃ dadau tadā || 30 ||
[Analyze grammar]

brāhmaṇo'pi yathānyāyaṃ guruvṛttimanuttamām |
cakāra sarvabhāvena yadvatsa manasecchati || 31 ||
[Analyze grammar]

pṛṣṭaśca tena bahuśaḥ prāptaṃ kathamariṃdama |
trailokyarājyaṃ dharmajña kāraṇaṃ tadbravīhi me || 32 ||
[Analyze grammar]

prahrāda uvāca |
nāsūyāmi dvijaśreṣṭha rājāsmīti kadācana |
kavyāni vadatāṃ tāta saṃyacchāmi vahāmi ca || 33 ||
[Analyze grammar]

te visrabdhāḥ prabhāṣante saṃyacchanti ca māṃ sadā |
te mā kavyapade saktaṃ śuśrūṣumanasūyakam || 34 ||
[Analyze grammar]

dharmātmānaṃ jitakrodhaṃ saṃyataṃ saṃyatendriyam |
samācinvanti śāstāraḥ kṣaudraṃ madhviva makṣikāḥ || 35 ||
[Analyze grammar]

so'haṃ vāgagrapiṣṭānāṃ rasānāmavalehitā |
svajātyānadhitiṣṭhāmi nakṣatrāṇīva candramāḥ || 36 ||
[Analyze grammar]

etatpṛthivyāmamṛtametaccakṣuranuttamam |
yadbrāhmaṇamukhe kavyametacchrutvā pravartate || 37 ||
[Analyze grammar]

dhṛtarāṣṭra uvāca |
etāvacchreya ityāha prahrādo brahmavādinam |
śuśrūṣitastena tadā daityendro vākyamabravīt || 38 ||
[Analyze grammar]

yathāvadguruvṛttyā te prīto'smi dvijasattama |
varaṃ vṛṇīṣva bhadraṃ te pradātāsmi na saṃśayaḥ || 39 ||
[Analyze grammar]

kṛtamityeva daityendramuvāca sa ca vai dvijaḥ |
prahrādastvabravītprīto gṛhyatāṃ vara ityuta || 40 ||
[Analyze grammar]

brāhmaṇa uvāca |
yadi rājanprasannastvaṃ mama cecchasi ceddhitam |
bhavataḥ śīlamicchāmi prāptumeṣa varo mama || 41 ||
[Analyze grammar]

dhṛtarāṣṭra uvāca |
tataḥ prītaśca daityendro bhayaṃ cāsyābhavanmahat |
vare pradiṣṭe vipreṇa nālpatejāyamityuta || 42 ||
[Analyze grammar]

evamastviti taṃ prāha prahrādo vismitastadā |
upākṛtya tu viprāya varaṃ duḥkhānvito'bhavat || 43 ||
[Analyze grammar]

datte vare gate vipre cintāsīnmahatī tataḥ |
prahrādasya mahārāja niścayaṃ na ca jagmivān || 44 ||
[Analyze grammar]

tasya cintayatastāta chāyābhūtaṃ mahādyute |
tejo vigrahavattāta śarīramajahāttadā || 45 ||
[Analyze grammar]

tamapṛcchanmahākāyaṃ prahrādaḥ ko bhavāniti |
pratyāha nanu śīlo'smi tyakto gacchāmyahaṃ tvayā || 46 ||
[Analyze grammar]

tasmindvijavare rājanvatsyāmyahamaninditam |
yo'sau śiṣyatvamāgamya tvayi nityaṃ samāhitaḥ |
ityuktvāntarhitaṃ tadvai śakraṃ cānvaviśatprabho || 47 ||
[Analyze grammar]

tasmiṃstejasi yāte tu tādṛgrūpastato'paraḥ |
śarīrānniḥsṛtastasya ko bhavāniti cābravīt || 48 ||
[Analyze grammar]

dharmaṃ prahrāda māṃ viddhi yatrāsau dvijasattamaḥ |
tatra yāsyāmi daityendra yataḥ śīlaṃ tato hyaham || 49 ||
[Analyze grammar]

tato'paro mahārāja prajvalanniva tejasā |
śarīrānniḥsṛtastasya prahrādasya mahātmanaḥ || 50 ||
[Analyze grammar]

ko bhavāniti pṛṣṭaśca tamāha sa mahādyutiḥ |
satyamasmyasurendrāgrya yāsye'haṃ dharmamanviha || 51 ||
[Analyze grammar]

tasminnanugate dharmaṃ puruṣe puruṣo'paraḥ |
niścakrāma tatastasmātpṛṣṭaścāha mahātmanā |
vṛttaṃ prahrāda māṃ viddhi yataḥ satyaṃ tato hyaham || 52 ||
[Analyze grammar]

tasmingate mahāśvetaḥ śarīrāttasya niryayau |
pṛṣṭaścāha balaṃ viddhi yato vṛttamahaṃ tataḥ |
ityuktvā ca yayau tatra yato vṛttaṃ narādhipa || 53 ||
[Analyze grammar]

tataḥ prabhāmayī devī śarīrāttasya niryayau |
tāmapṛcchatsa daityendraḥ sā śrīrityevamabravīt || 54 ||
[Analyze grammar]

uṣitāsmi sukhaṃ vīra tvayi satyaparākrame |
tvayā tyaktā gamiṣyāmi balaṃ yatra tato hyaham || 55 ||
[Analyze grammar]

tato bhayaṃ prādurāsītprahrādasya mahātmanaḥ |
apṛcchata ca tāṃ bhūyaḥ kva yāsi kamalālaye || 56 ||
[Analyze grammar]

tvaṃ hi satyavratā devī lokasya parameśvarī |
kaścāsau brāhmaṇaśreṣṭhastattvamicchāmi veditum || 57 ||
[Analyze grammar]

śrīruvāca |
sa śakro brahmacārī ca yastvayā copaśikṣitaḥ |
trailokye te yadaiśvaryaṃ tattenāpahṛtaṃ prabho || 58 ||
[Analyze grammar]

śīlena hi tvayā lokāḥ sarve dharmajña nirjitāḥ |
tadvijñāya mahendreṇa tava śīlaṃ hṛtaṃ prabho || 59 ||
[Analyze grammar]

dharmaḥ satyaṃ tathā vṛttaṃ balaṃ caiva tathā hyaham |
śīlamūlā mahāprājña sadā nāstyatra saṃśayaḥ || 60 ||
[Analyze grammar]

bhīṣma uvāca |
evamuktvā gatā tu śrīste ca sarve yudhiṣṭhira |
duryodhanastu pitaraṃ bhūya evābravīdidam || 61 ||
[Analyze grammar]

śīlasya tattvamicchāmi vettuṃ kauravanandana |
prāpyate ca yathā śīlaṃ tamupāyaṃ vadasva me || 62 ||
[Analyze grammar]

dhṛtarāṣṭra uvāca |
sopāyaṃ pūrvamuddiṣṭaṃ prahrādena mahātmanā |
saṃkṣepatastu śīlasya śṛṇu prāptiṃ narādhipa || 63 ||
[Analyze grammar]

adrohaḥ sarvabhūteṣu karmaṇā manasā girā |
anugrahaśca dānaṃ ca śīlametatpraśasyate || 64 ||
[Analyze grammar]

yadanyeṣāṃ hitaṃ na syādātmanaḥ karma pauruṣam |
apatrapeta vā yena na tatkuryātkathaṃcana || 65 ||
[Analyze grammar]

tattu karma tathā kuryādyena ślāgheta saṃsadi |
etacchīlaṃ samāsena kathitaṃ kurusattama || 66 ||
[Analyze grammar]

yadyapyaśīlā nṛpate prāpnuvanti kvacicchriyam |
na bhuñjate ciraṃ tāta samūlāśca patanti te || 67 ||
[Analyze grammar]

etadviditvā tattvena śīlavānbhava putraka |
yadīcchasi śriyaṃ tāta suviśiṣṭāṃ yudhiṣṭhirāt || 68 ||
[Analyze grammar]

bhīṣma uvāca |
etatkathitavānputre dhṛtarāṣṭro narādhipa |
etatkuruṣva kaunteya tataḥ prāpsyasi tatphalam || 69 ||
[Analyze grammar]