Chapter 105

yudhiṣṭhira uvāca |
dhārmiko'rthānasaṃprāpya rājāmātyaiḥ prabādhitaḥ |
cyutaḥ kośācca daṇḍācca sukhamicchankathaṃ caret || 1 ||
[Analyze grammar]

bhīṣma uvāca |
atrāyaṃ kṣemadarśīyamitihāso'nugīyate |
tatte'haṃ saṃpravakṣyāmi tannibodha yudhiṣṭhira || 2 ||
[Analyze grammar]

kṣemadarśaṃ nṛpasutaṃ yatra kṣīṇabalaṃ purā |
muniḥ kālakavṛkṣīya ājagāmeti naḥ śrutam |
taṃ papracchopasaṃgṛhya kṛcchrāmāpadamāsthitaḥ || 3 ||
[Analyze grammar]

artheṣu bhāgī puruṣa īhamānaḥ punaḥ punaḥ |
alabdhvā madvidho rājyaṃ brahmankiṃ kartumarhati || 4 ||
[Analyze grammar]

anyatra maraṇātsteyādanyatra parasaṃśrayāt |
kṣudrādanyatra cācārāttanmamācakṣva sattama || 5 ||
[Analyze grammar]

vyādhinā cābhipannasya mānasenetareṇa vā |
bahuśrutaḥ kṛtaprajñastvadvidhaḥ śaraṇaṃ bhavet || 6 ||
[Analyze grammar]

nirvidya hi naraḥ kāmānniyamya sukhamedhate |
tyaktvā prītiṃ ca śokaṃ ca labdhvāprītimayaṃ vasu || 7 ||
[Analyze grammar]

sukhamarthāśrayaṃ yeṣāmanuśocāmi tānaham |
mama hyarthāḥ subahavo naṣṭāḥ svapna ivāgatāḥ || 8 ||
[Analyze grammar]

duṣkaraṃ bata kurvanti mahato'rthāṃstyajanti ye |
vayaṃ tvenānparityaktumasato'pi na śaknumaḥ || 9 ||
[Analyze grammar]

imāmavasthāṃ saṃprāptaṃ dīnamārtaṃ śriyaścyutam |
yadanyatsukhamastīha tadbrahmannanuśādhi mām || 10 ||
[Analyze grammar]

kausalyenaivamuktastu rājaputreṇa dhīmatā |
muniḥ kālakavṛkṣīyaḥ pratyuvāca mahādyutiḥ || 11 ||
[Analyze grammar]

purastādeva te buddhiriyaṃ kāryā vijānataḥ |
anityaṃ sarvamevedamahaṃ ca mama cāsti yat || 12 ||
[Analyze grammar]

yatkiṃcinmanyase'stīti sarvaṃ nāstīti viddhi tat |
evaṃ na vyathate prājñaḥ kṛcchrāmapyāpadaṃ gataḥ || 13 ||
[Analyze grammar]

yaddhi bhūtaṃ bhaviṣyacca dhruvaṃ tanna bhaviṣyati |
evaṃ viditavedyastvamadharmebhyaḥ pramokṣyase || 14 ||
[Analyze grammar]

yacca pūrve samāhāre yacca pūrvatare pare |
sarvaṃ tannāsti taccaiva tajjñātvā ko'nusaṃjvaret || 15 ||
[Analyze grammar]

bhūtvā ca na bhavatyetadabhūtvā ca bhavatyapi |
śoke na hyasti sāmarthyaṃ śokaṃ kuryātkathaṃ naraḥ || 16 ||
[Analyze grammar]

kva nu te'dya pitā rājankva nu te'dya pitāmahaḥ |
na tvaṃ paśyasi tānadya na tvā paśyanti te'pi ca || 17 ||
[Analyze grammar]

ātmano'dhruvatāṃ paśyaṃstāṃstvaṃ kimanuśocasi |
buddhyā caivānubudhyasva dhruvaṃ hi na bhaviṣyasi || 18 ||
[Analyze grammar]

ahaṃ ca tvaṃ ca nṛpate śatravaḥ suhṛdaśca te |
avaśyaṃ na bhaviṣyāmaḥ sarvaṃ ca na bhaviṣyati || 19 ||
[Analyze grammar]

ye tu viṃśativarṣā vai triṃśadvarṣāśca mānavāḥ |
arvāgeva hi te sarve mariṣyanti śaracchatāt || 20 ||
[Analyze grammar]

api cenmahato vittādvipramucyeta pūruṣaḥ |
naitanmameti tanmatvā kurvīta priyamātmanaḥ || 21 ||
[Analyze grammar]

anāgataṃ yanna mameti vidyādatikrāntaṃ yanna mameti vidyāt |
diṣṭaṃ balīya iti manyamānāste paṇḍitāstatsatāṃ sthānamāhuḥ || 22 ||
[Analyze grammar]

anāḍhyāścāpi jīvanti rājyaṃ cāpyanuśāsate |
buddhipauruṣasaṃpannāstvayā tulyādhikā janāḥ || 23 ||
[Analyze grammar]

na ca tvamiva śocanti tasmāttvamapi mā śucaḥ |
kiṃ nu tvaṃ tairna vai śreyāṃstulyo vā buddhipauruṣaiḥ || 24 ||
[Analyze grammar]

rājaputra uvāca |
yādṛcchikaṃ mamāsīttadrājyamityeva cintaye |
hriyate sarvamevedaṃ kālena mahatā dvija || 25 ||
[Analyze grammar]

tasyaivaṃ hriyamāṇasya srotaseva tapodhana |
phalametatprapaśyāmi yathālabdhena vartaye || 26 ||
[Analyze grammar]

muniruvāca |
anāgatamatītaṃ ca yathā tathyaviniścayāt |
nānuśocasi kausalya sarvārtheṣu tathā bhava || 27 ||
[Analyze grammar]

avāpyānkāmayasvārthānnānavāpyānkadācana |
pratyutpannānanubhavanmā śucastvamanāgatān || 28 ||
[Analyze grammar]

yathā labdhopapannārthastathā kausalya raṃsyase |
kaccicchuddhasvabhāvena śriyā hīno na śocasi || 29 ||
[Analyze grammar]

purastādbhūtapūrvatvāddhīnabhāgyo hi durmatiḥ |
dhātāraṃ garhate nityaṃ labdhārthāṃśca na mṛṣyate || 30 ||
[Analyze grammar]

anarhānapi caivānyānmanyate śrīmato janān |
etasmātkāraṇādetadduḥkhaṃ bhūyo'nuvartate || 31 ||
[Analyze grammar]

īrṣyāticchedasaṃpannā rājanpuruṣamāninaḥ |
kaccittvaṃ na tathā prājña matsarī kosalādhipa || 32 ||
[Analyze grammar]

sahasva śriyamanyeṣāṃ yadyapi tvayi nāsti sā |
anyatrāpi satīṃ lakṣmīṃ kuśalā bhuñjate janāḥ |
abhiviṣyandate śrīrhi satyapi dviṣato janāt || 33 ||
[Analyze grammar]

śriyaṃ ca putrapautraṃ ca manuṣyā dharmacāriṇaḥ |
tyāgadharmavido vīrāḥ svayameva tyajantyuta || 34 ||
[Analyze grammar]

bahu saṃkasukaṃ dṛṣṭvā vivitsāsādhanena ca |
tathānye saṃtyajantyenaṃ matvā paramadurlabham || 35 ||
[Analyze grammar]

tvaṃ punaḥ prājñarūpaḥ sankṛpaṇaṃ paritapyase |
akāmyānkāmayāno'rthānparācīnānupadrutān || 36 ||
[Analyze grammar]

tāṃ buddhimupajijñāsustvamevainānparityaja |
anarthāṃścārtharūpeṇa arthāṃścānartharūpataḥ || 37 ||
[Analyze grammar]

arthāyaiva hi keṣāṃciddhananāśo bhavatyuta |
anantyaṃ taṃ sukhaṃ matvā śriyamanyaḥ parīkṣate || 38 ||
[Analyze grammar]

ramamāṇaḥ śriyā kaścinnānyacchreyo'bhimanyate |
tathā tasyehamānasya samārambho vinaśyati || 39 ||
[Analyze grammar]

kṛcchrāllabdhamabhipretaṃ yadā kausalya naśyati |
tadā nirvidyate so'rthātparibhagnakramo naraḥ || 40 ||
[Analyze grammar]

dharmameke'bhipadyante kalyāṇābhijanā narāḥ |
paratra sukhamicchanto nirvidyeyuśca laukikāt || 41 ||
[Analyze grammar]

jīvitaṃ saṃtyajantyeke dhanalobhaparā narāḥ |
na jīvitārthaṃ manyante puruṣā hi dhanādṛte || 42 ||
[Analyze grammar]

paśya teṣāṃ kṛpaṇatāṃ paśya teṣāmabuddhitām |
adhruve jīvite mohādarthatṛṣṇāmupāśritāḥ || 43 ||
[Analyze grammar]

saṃcaye ca vināśānte maraṇānte ca jīvite |
saṃyoge viprayogānte ko nu vipraṇayenmanaḥ || 44 ||
[Analyze grammar]

dhanaṃ vā puruṣaṃ rājanpuruṣo vā punardhanam |
avaśyaṃ prajahātyetattadvidvānko'nusaṃjvaret || 45 ||
[Analyze grammar]

anyeṣāmapi naśyanti suhṛdaśca dhanāni ca |
paśya buddhyā manuṣyāṇāṃ rājannāpadamātmanaḥ |
niyaccha yaccha saṃyaccha indriyāṇi mano giram || 46 ||
[Analyze grammar]

pratiṣiddhānavāpyeṣu durlabheṣvahiteṣu ca |
pratikṛṣṭeṣu bhāveṣu vyatikṛṣṭeṣvasaṃbhave |
prajñānatṛpto vikrāntastvadvidho nānuśocati || 47 ||
[Analyze grammar]

alpamicchannacapalo mṛdurdāntaḥ susaṃśitaḥ |
brahmacaryopapannaśca tvadvidho naiva muhyati || 48 ||
[Analyze grammar]

na tveva jālmīṃ kāpālīṃ vṛttimeṣitumarhasi |
nṛśaṃsavṛttiṃ pāpiṣṭhāṃ duḥkhāṃ kāpuruṣocitām || 49 ||
[Analyze grammar]

api mūlaphalājīvo ramasvaiko mahāvane |
vāgyataḥ saṃgṛhītātmā sarvabhūtadayānvitaḥ || 50 ||
[Analyze grammar]

sadṛśaṃ paṇḍitasyaitadīṣādantena dantinā |
yadeko ramate'raṇye yaccāpyalpena tuṣyati || 51 ||
[Analyze grammar]

mahāhradaḥ saṃkṣubhita ātmanaiva prasīdati |
etadevaṃgatasyāhaṃ sukhaṃ paśyāmi kevalam || 52 ||
[Analyze grammar]

asaṃbhave śriyo rājanhīnasya sacivādibhiḥ |
daive pratiniviṣṭe ca kiṃ śreyo manyate bhavān || 53 ||
[Analyze grammar]